Tabekacane 23
23
Ku Aberahame walangai ku tadralredralrekane si dralreke ki Sara
1Ku Sara tara 127 ka caili ku taikaiyaneini kawmasane. 2Kai alisu wapacai ikai kavai Hiburungu ka Kanange. Ku Aberahame la ngwalai iniane tubi turamuru.
3Ku Aberahame la katwase kidaili kwini ki tasararane pikai ki kinawmasane ki taelrelreini, la kela si mwa ki swa Hite, si iya kai, 4“Yakaikaiyaku numiane kikai ka maelane ka zuku; ala kilangadhaili ku taluvaale ku tadralredralrekane, la nau dralreke ki taelrelreli.”
5La iya kai kwini lalasu, 6“Sinsi, ala kilalra! Lu drele nai, amanisu ku saniange ka umawmase. Pikaiya ki mathaithariringa ki tadralredralrekane nai dralreke ki taelrelresu; lri taramubangalre baai muswane makanaelre ku tadralredralrekane si dralreke iniane.”
7Ku Aberahame la ngidrakale si papia liniane sukubu. 8La iya kai, “Alaiyasi mubangalre numi lu dralrekaku ki taelrelreli pikai kai, ala kawriva ki Iperungu ka lalake ki Zuhare, 9lani kilangai nakwane kavai Makepela ka barungulu, kwini barungulu yakai ki talikaiyane ki kadaenganeini. Kwi lasu ani ikai cucubungu numiane singikai ku patengane ku takathane si kilangai nakwane kwini barungulu, la nau arakai tutadralredralrekane.”
10Ku Iperungu si drumane ka swa Hite la taelre nene ikai ki lrawlrawdru ki cekele ki tairuburubwane; kwini lalasu la icucubungu ki mapapangale tubalre ki Aberahame, pakilalra sanaka mwadadaane ki cekele ku umawmase. Kwini lasu la iya kai, 11“Sinsi, kilalra! Lri baadhaku muswane kavai sakakadaedaenganane si paelre kavai yakai ki umawma ka barungulu, lri icucubungaku ki sakacekeleli baai muswane, lasu dralreke ki taelrelresu.”
12Ai, ku Aberahame la icucubungu ki swa Hite pidruru sukubu, 13la kawriva ki Iperungu si pakilaalra sanaka umawmase, kwini lasu amia kai, “Kilalra, lri langadhaku nguelre kai ki kadaengane, ala tarumara kai paisu, la nau dralreke ki taelrelreli pikai kavai.”
14Ku Iperungu la tubalre, 15“Sinsi kikavai kadaengane swasupate ka idai ka gingi, ikai mitane, kaika apasiasipane? Ala dralreka ki taelrelresu pikai kavai!” 16Ku Aberahame la palraingi, la singikai ku taiyane ki Iperungu ikai cucubungu ki swa Hite pelaela ku takapiane, arakai ku tatuthathane lu malangalangai tu 400 ka gingi baai iniane.
17Laka ngimiyaiya kai, kudra kadaengane ki Iperungu ikai tali talrawane ki Mamere ka Makepela laka Aberahameanenga; kikai kadaengane nipaelreane kwini umawma si yakai kwini ka barungulu si laangatu patuelre. 18Kwini yasarubu ikai lrawlrawdru ki cekele ka swa Hite, la makitu kipawtenga kikai kadaengane ka Aberahameanenga.
19Ku Aberahame la dralreke ki taelrelreini ka Sara pikai tali talrawane Kanange Mamere ka barungulu Makepela (kwini Mamere amani kwini Hiburungu). 20Kwini nakadaengane si barungulu ki swa Hite, la twalainga kwini ka tadralredralrekane ki Aberahame.
Currently Selected:
Tabekacane 23: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
