Tabekacane 4
4
Kaingi si Abele
1Ku Adame tadrusa ki tauwaneini ka Iva apece, kwini alisu la katawbaliri, si tulalake ku vaeva ku sawvalai. La iya kai kwini alisu, “Ngwalai ku taparalubane ki Tamatama, la tarumaraku kai vaeva kai lalake ka sawvalai,” la sunagane iniane pasi Kaingi#4.1 “Kaingi” ku pacugane “wamalranga” amia.. 2Sakabilrilinga, kai alisu la tulaalakenga ku vaeva ku sawvalai, la sunagane pasi Abele. Kai Abele taralapulapu ki kiu; kai Kaingi tarakawaungu. 3Sangilribatenga kudra lanimaka pialane, ku Kaingi wailuku ku nikitalekane, tusapatarumarane ki Tamatama; 4ku Abele la mialri patwalai ki lakiuini pilri kwidra aswalaalanga ka mathaithariringa ka lrulai ka kiu, tusapatarumarane ki Tamatama. Ku Tamatama kiaragai ki Abele, la tarumara ku patarumaraini. 5Ai kai kiaragai ki Kaingi, la kai tarumara ku patarumaraini; la ngwalai kikai ku Kaingi malisi turamuru, si angelrece kwi lringauini. 6Ku Tamatama la pakipapawlringau ki Kaingi, “Asu kalisi? Ani angelrece kwi lringausu? 7Anapiasu ku mathariri ku awngane, lri tara pathingaalanesu parangithi#4.7 “lri tara pathingaalanesu parangithi,” ku wahunyake madu iya kai “lri tara tarumaaraku kwini patarumarasu”., ai paiyasu kwini kaika apiyaiyane ku awngane, ku pasalrivane walepenge ikai ki lrawlrawdru. Ku pasalrivane lri ruthuku muswane, ai lri tara sabelengesu ki pasalrivane.”
8Sakabilrilanenga, ku Kaingi la iya kai ki agini ka Abele, “Ila tangudaalrane!#4.8 “Ila tangudaalrane!” Patwalai ki sidrumane ka lanihunyakane ka hungu, ikai ki pacase ki Hiburu kadrwa kikai taiyane kikai.” Kwi lalasu sa ikai umawma, ku Kaingi la pwalrima ki agini, papacai iniane.
9Ku Tamatama la kivaga ki Kaingi, “Ku agi ka Abele yainu?”
Kwi lasu la tubalre, “Kiau. Bekace ka amaniaku ku tarasiraparapale ki agili?”
10Ku Tamatama la kaelaela si kivaga iniane, “Watumanesu? Kai erai ki agi twalai adringi ki dae kawriva, papia nakwane sidruru. 11Sa papacaisu iniane, kai kadaengane aegacane si alra thamukulu lrelre ki eraini. Kikai lri kipususu, kaisu lri maka pavilringinga ki umawma; 12adravane kaungusu, kai kadaengane kai lri cebe ku taleke. Lri acaicaicalisu, katwatwatwasenga ikai kai kawmasane.”
13Ku Kaingi la iya kai ki Tamatama, “Kainaku walreme kikai miyaiya kai ku telregane ka sapathavungane. 14Lu pakatwasesu nakwane kai ki kadaengane, si kai kidrelenga muswane; lri kamaninga naku kwidra kadrwa ku daane katwasenga acaicaicali ka umawmase, ikai kai kawmasane katwatwatwase, lu drele ku palrapalra nakwane, lri pasana papacai nakwane.”
15Ai ku Tamatama twabalre, “Ini, ku papacai muswane, lri balrithi ku pitu ku niake.” Lakamani, ku Tamatama piakai ki punu ki Kaingi patuthingale, ku sapakipapawlringavane kwidra kiapadradresenge iniane ku umawmase ku kaika apapacadhane iniane. 16Ku Kaingi la katwase ki Tamatama, si kela tali talrawane Idingi kwidra ki sia “Acaicali” ka kadaengane ikaikai kwini.
Mwabaibalrithi ki Kaingi
17Ku Kaingi la tadrusa apece ki taelrelreini, ku taelrelreini la katawbaliri, si tulalake ku vaeva ku sawvalai, la sunagane pasi Inuke. Ku Kaingi la tucekele ku vaeva, la arakai ku nagane ki lalakeini sunagane kwini ki cekele pasi Inuke. 18Ku Inuke twalalake ki Irade; ku Irade twalalake ki Mehuyaelre; ku Mehuyaelre twalalake ki Methusaele; ku Methusaele twalalake ki Lameke. 19Ku Lameke la sadrusa ku labaibaini: Ada si Zila. 20Ku Ada twalalake ki Yabale; ku Yabale amani ku twapathagili ki tarapagwagu. 21Ku agini sia Yubale; ku Yubale yai amani ku twapathagili ki tarangilebere, si tarangikulralru. 22Ku Zila twalalake ki Tubale Kaingi; ku Tubale Kaingi amani ku twapathagili ki taradarepe ki adreme si lriwlu. Ku agi ki Tubale Kaingi sia Nama ka ababai.
23Ku Lameke la iya kai ki tadrusa ka labaibaini:
Ada, Zila, kilalra kai aiyaneli;
labaibai ki Lameke, kicacaligira kilalra:
Papacadhaku kwidra wadula nakwane;
papacadhaku kwidra walrumai nakwane ka langukathathabarane.
24Ku papacai ki Kaingi ku umawmase lri balrithi ku pitu ku niake;
Ku papacai ki Lameke ku umawmase lri tara baalrithi ku 77 ku niake.
Sethe si Inuse
25Ku Adame la tadrusanga apece ki taelrelreini, kwi alisu la tulalake ku vaeva ku sawvalai, si sunagane pasi Sethe#4.25 “Sethe” ku pacugane “wabaainga” amia.; ku Iva la iya kai, “Ku Twaumase wabaai nakwane ku vaeva ku sawvalai ka lalake, pawbalrithi ki kiapapacai ki Kaingi ka Abele.” 26Ku Sethe twalalake ku vaeva ku sawvalai, la sunagane pasi Inuse. Twalainga kwini kai umawmase ala pathagili kitubi ki nagane ki Tamatama.
Currently Selected:
Tabekacane 4: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
