Tabekacane 49
49
Taawlriwlriane ki Yakubu
1Ku Yakubu wadawlu sarubu ki lalalakeini mwa iniane, la iya kai liniane: Kela makanaelre, lri pelaelaku ku akipadradresengane numi lukabibilrili:
2Lalalake ki Yakubu, kela makanaelre, kilalra!
Kilalalra kicacaligiri kai vaga ki tama numi ka Iseraylri.
3Kusu ka eapeli ka lalakeli ka Riwbingi, amanisu ku pukuli;
amanisu ku sa pucacuganaku ka aswalaalanga ku tulalakeli,
ka amani ku ngiesaesadhanenga, ka lriguli ka lalakeli.
4Miasu ki telebe lrapesai, kaika aruthuruthukane;
tadrusasu apece ki labaibai ki tamasu,
kudrulru ki tapeapecane ki tamasu;
lakamani kaisu lri kamani ku abebeelengenga.
5Simiune si Lrivi ka lamataka;
kai lalasu madradrekase arakai ku dramu papacai.
6Kainaku lri kipaelre ki ngialisiane ka madrekadrekadrekase lini,
si karededele liniane;
asi lwiyane kai lalasu ara lisiane papacai ki umawmase,
la ngisasingikaai raretege ku uvace ki drapale ki lwange.
7Kwi lalasu magiririmucu kalilisi, lri kipusu;
kai lalasu ngiakarakacane mabebetethe kadrwa ku kalithane, lri kipathavungu.
Lri malraku liniane pasivavagai pasalraelre ikai ki kadaengane ki tai Yakubu;
lri malraku liniane pasarau ikai ki swa Iseraylri.
8Yuda, ku labetakanesu lri drengedrengere muswane.
Lri theeresu ku lre ki badha;
ku labetakanesu lri icucubungu muswane sukubu.
9Ku Yuda mia ki yacengecenge ka raiyungu,
walredepe ki pana, si siwlri mubarungulane;
la sege ku kinawmasane apece,
kadrwa ku naaneanenga ku walreme velevele iniane!
10Yuda lrika takamaniane ka wagemegeme ku puku ki talialalai;
ku mwabaibalrithi iniane lri kawlai rathudu.
Sanaka kuni lri kela bulri tuswalupu;
sanaka umawmase lri pidruru sukubu iniane.
11Kai lasu wamalra ki lrulai ka ruba pakerenge pikai ki cebe ki budu,
pakerenge pikai ki mathaithaariringa ka cebe ki budu.
Kai lasu ku kalrane ku budu ka bava wadulru madu arakai sinau ku laimai,
ku kalrane ki budu wadulru madu sinau ki sapakabelebelengane ka laimai.
12Ku maca ki lasu madirerele ki taungulane ki bava;
ku valisi ki lasu mapupuli ki taungulane ki mireke.
13Kai Zibulungu lri ikaikai babiabila ki laveke.
Kai lasu lri kamani ku tawbilabilane ki lavarukuru;
ku kadaenganeini lri daruru kavai Sidune.
14Ku Isakare mia ki maricuru ka ruba,
guruthungane ikai ki takivane.
15Kai lasu madalame ki tasutelradhane,
kadalame ki karawmane ka kadaengane.
Kai lasu kwaalri angeale ku amece,
kiatuduri, kipakwalri kauawngu.
16Kai Dange lri rathudu ki mapapangaleini,
mia ki drumane ka zuku ki swa Iseraylri.
17Kai Dange lri mia ki yasigingane ki kadalranane ka sulrau,
ithili ki salralragau ka kadalranane ka siduduku ka sulrau;
kace si pakadula ki drapale ki rigi,
ku kwapingi ka ngwarigirigi la papulrilrikudru tuverevere.
18 Tamatama, mwakalavaku ku sapalribulanesu!
19Kai Gade lri kilrumai ki sadre;
ai kai lasu lri ngibalre saladha liniane.
20Ku kadaengane ki Asere yai ngiaesadhane ka tatwaladhane ki taleke;
kai lasu yakai ku malimeeme ku akaneane ku abadhane ki talialalai.
21Kai Napetali amani ku tina ka salawngane,
la tulalake ku matingulwalwadhane ka salawngane#49.21 “Napetali ... salawngane” ku wahunyake madu iya kai “ku Napetali mia ki ngiacaeme ku tacebeane ka angatu, matidadalame ku lataturicingane”..
22Kai Yusepe mia ki yaubulane ka ruba ka yababiabila ki berai ka acilai,
mia ki yalrelrelrege ka yaubulane ka rigi#49.22 “Yusepe ... rigi” ku wahunyake madu iya kai “ku Yusepe mia ki angatu ka yathili ki waberaberai ka acilai, mia ki makaalra ku madru si kapakapa ki balingibingi ka angatu”..
23Ku badha pakialringau kikaruburu iniane,
la arakai ku bu, lraili saladha iniane.
24Ai satalu ki sapukwane ka Twaumase ki Yakubu,
ku buini sakamia kakeecenge;
satalu ki tarapagwagu ka tarapalribulu ki Iseraylri,
ku alrimaini sakamia sapukwane#49.24 “ku buini sakamia kakeecenge ... ku alrimaini sakamia sapukwane” ku wahunyake madu iya kai “ku bu ki badha kiacelra, ku tabalangane ki badha kiatuluthu”..
25Amani ku Twaumase ki tamasu ka paralubu muswane,
ku wadulru sanaka manemane ka Twaumase swabulrubulru muswane.
Wabaai muswane ku twalai subelebelenge ku udale, ku berai twalai ki kadaengane,
twaredelane ku lwange rigi, kapangale ku lamwabaibalrithi.
26Ku Twaumase pasatalekane muswane, ka tangipaipadhane ku labengelrai;
yakai ku nasidrumadrumane ku lrelrelrege, apalralrawthu ikai ka lalregelrege.
Kikai demedeme kai akaesadhane ani mulebe ikai ki awlru ki Yusepe,
mulebe ikai kwini ki kinawmasane ki tangea ki mabetabetake ka mukalrilrivilinga.
27Kai Biniyamingi mia ki magarange ka tawpungu ubulane.
Lukamialrealre wathamukulu ku panaini,
lukamaungu mathwaililici ku niravasane.
28Kikai patuelre yai tai 12 ka lazuku ki swa Iseraylri. Kikai amani ku taawlriwlriane ki tama lini, arakai ku tasudaleepane ku vaga subulrubulru nguvavaeva ki lalalake.
Tapacadhane si takidralrekane ki Yakubu
29Ku Yakubu wacunu ki lalalakeini, “Lri padaalrungaku si pacai, kunumi malrangaili si pataelre ki lacucungulaneli dralreke, pikai kwidra ki angangade ki Iperungu ka swa Hite ka taluvaale ka barungulu. 30Kikai barungulu yakai Kanange, yakai kwini Makepela tali talrawane ka Mamere, ka amani ku langai ki Aberahame patwalai ki Iperungu ka swa Hite tutadralredralrekane. 31Ku Aberahame si taelrelreini ka Sara kiadralreke ikai kwini; ku Isake si taelrelreini ka Rebeka mialri kidralreke ikai kwini; la mialriaku malra ki Lria dralreke pikai kwini. 32Kikai kadaengane si barungulu yai nipatwaladhane ki swa Hite langai; kunumi dralrekangaili pwa kavai.” 33Ku Yakubu sa cununga ki lalalakeini kikai lavaga yai, la apece, la karetege ku niake si pacai.
Currently Selected:
Tabekacane 49: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
