Yuhani 20

Kadrwanga ku yakai adringi ki balriu

(Matai 28.1-8; Maruku 16.1-8; Luka 24.1-12)

1Sakamialrealre ki Niciwbi, sakaina ledra, ku swa Magedaleni ka Malria matwase papia tadralredralrekane, la drele ka kiapataluelanga kudra lrenege ki lrawlrawdru ki balriu. 2Kai alisu la katwase lailai silape ki Simune Pitiru si kudra kadalame ki Yesu ka situ, si pelaela liniane iya kai, “Yakai ku umawmase ku wamalra iluku ki Tamatama patwalai ki balriu, la kai nai thingale kwini ki lalasu luka piainu sarare iniane!”

3Ku Pitiru si kwini situ la katwase papia tadralredralrekane. 4Kai tadrusa la tarudradrusa katwase lailai, ai kwini situ mariaridare ki Pitiru, la aswala daruru tadralredralrekane. 5Kwi lasu la lulukwane si papia adringi drele, la drele la ikaiyana isarare ikai kwini kudra lalasare ka kaimadhane, ai kai lasu kai matwase mwa adringi. 6Ku Simune Pitiru la kabibilrili kainganai, la malradaalru mudaane ki balriu, si la drele kwini lalasare ka kaimadhane ikai kwini, 7la drele kudra sakabungane ki awlru ki Yesu ka salripungai kai yakai taelre ki lalasare ka kaimadhane, nipelrepelrane, si pitali thili sarare. 8Kudra aswala kainganai daruru ka situ la mialri kabibilrili mudaane ki balriu, kwi lasu sa drele la kasalru. 9(Kai lalasu kaiyana wathingale ku pacugane kudra taiyane kai ki Sisiu, “Kwini lasu lri tara twalai ki wapacai si sielane”.) 10Kwini tadrusa ka situ ala katwase ubalriu.

Ku Yesu adrelane papia ki swa Magedaleni ka Malria

(Matai 28.9-10; Maruku 16.9-11)

11Ku Malria acegeecegeana si tubitubi ikai latadre ki balriu. La takutubitubi, si takulukuane dredrele adringi ki balriu, 12la drele ku tadrusa ku sialaimai ku lrawlrapungu ka sasiakawlu subelebelenge, wanene ikai kudra natapikaiyane ki kinawmasane ki Yesu, yatali awlrulru ku tangea, yatali drapadrapale ku tangea.

13Kwi lalasu la kivaga ki Malria, “Ababai, asu tubitubi?”

Kwini alisu la tubalre, “Kwi lalasu wamalra pataluela ki Tamatamali, la kainaku thingale lu pikai inu sarare iniane!”

14Saiyanga kawriva, la ngibangulu ku Malria, si drele ki Yesu acegecege ikai kwini, ai kaiyana wathingale ala ka Yesu. 15Ku Yesu la kivaga iniane, “Ababai, asu tubitubi? Wasilasilapesu ki aneane?”

Ku Malria alau amani kudra taramarasikaikai ki mauivaivai ka umawmase la iya, si iya kai iniane, “Sinsi, alaiyasi kamanisu ku wailuku pataluela, pelaelaili, luka piakaisu inu sarare iniane, la nau katwase malra sawlri iniane.”

16Ku Yesu la iya kai iniane, “Malria!”

La ngibangulu ku Malria, si arakai ku vaga ki swa Hiburu iya kai iniane, “Rabuni!” (“Sinsi” amia ku pacugane.)

17Ku Yesu la iya kai, “Madha ruthuku nakwane, asi lwiyane kainaku mwabelengeana kikawriva ki Ama. Lu katwasa mwa papia ki laretesaneli, la pelaela liniane iya kai, ‘Lri ubelengaku kikawriva ki Ama, la mialri ka Tama numi; lri kikawrivaku ki Twaumase, la mialri ka Twaumase numi.’ ”

18Ku swa Magedaleni ka Malria ala katwase pelaela ki lasitu, wadrelengaku ki Tamatama iya, la patululu pelaela ku taiyane ki Tamatama iniane.

Ku Yesu adrelane papia ki lasitu

(Matai 28.16-20; Maruku 16.14-18; Luka 24.36-49)

19Sakamaungu ki Niciwbi, ku lasitu ki Yesu taelre irubu, la pakatakese elebe ku lrawlrawdru, asi lwiyane mwakuludru ki lamabelenge ki swa Yuda. Sakamani kwidra, ku Yesu la adrelane, si acegecege ikai liniane, la iya kai, “Ani ikai ku sulivatane numiane!” 20Saiyanga kwini kawriva, la padrele liniane ku alrimaini si tali cigianeini. Ku lasitu sadrelenga ki Tamatama, la kiragai turamuru. 21Ku Yesu la peela iya kai liniane, “Ani ikai ku sulivatane numiane! Mia ku tasikawlane ki Ama nakwane, lai pangimiaku tuthadaalrane sikawlu numiane.” 22Sa maka iyanga kai kawriva, la papia liniane ipi, si iya kai, “Tarumara ki Siri! 23Ku pacepe numi ki aneane ku pasalrivane, lri kipacepe ku pasalrivaneini; ku kaika pacepe numi ki aneane ku pasalrivane, lri kai kipacepe ku pasalrivaneini.”

Yesu si Tumase

24Sa adrelane ku Yesu, kudra tangea ikai ki ta 12 ka situ ka Tumase (ku kisunaganeini ku drumane sia Tukapiane) kai taelre ikai liniane. 25Lakamani ku drumane ka situ sapelaela ki Tumase ku tadrelane lini ki Tamatama.

Ku Tumase la iya kai liniane, “Lu patakamacamaacaku drele ku bakici ki alrimaini ku takikedrekedrane, si arakai kai dadiputhaneli sulrape kwini bakici ki takikedrekedrane, la arakai kai alrimali sulrape ki tali cigianeini, lri kainaku kasalru lutumane.”

26Sa makapitulunga, ku lasitu la iruubunga ikai ki daane, ku Tumase la ikai taelre liniane. Nielebane ku lrawlrawdru, ai ku Yesu kiarimu adrelane, la acegecege ikai liniane, si iya kai, “Ani ikai numiane ku sulivatane!” 27Ala iya kai ki Tumase, “Kwini galawgausu pwa kai, drela kai alrimali, la sega kwi alrimasu, si sulrape kai tali cigianeli! Madha kalrikilriki, kasalrwa sikakathane!”

28Ku Tumase la iya kai, “Tamatamali, Twaumaseli!”

29La iya kai ku Yesu, “Amani sa drelengasu nakwane ala kamani ku kasalrusu? Mwaesailringa kudra kai wadrele si la kasalru!”

Ku tangadrane kai ki hungu

30Ku Yesu la piana ku makaalra ku pinangu Twaumasane ka puku ikai cucubungu ki lasituini, si kaika nipacasane pikai kai ki hungu. 31Ku tangadrane ku tapacasane kai ki hungu, ani kasalru#20.31 “ani kasalru” yakai ku lasidrumane ka hungu ku amia kai “lanu pacungulu kasalru”. ki Yesu ala ka Kirisitu, ka Lalake ki Twaumase amia numiane, si ani ngwalai ku salrwane lini iniane si malra ku niake amia.

Currently Selected:

Yuhani 20: NDV

Highlight

Copy