但以理書 9
9
但以理為同胞祈禱
1 米底亞族亞哈隨魯个孻仔大流士做王統治巴比倫國。 2佢在位个第一年，𠊎 — 但以理研讀聖經，了解上主㧯先知耶利米講个有關耶路撒冷會荒廢、直到滿七十年个話 #9:2 參考耶利米書 25:11-12；29:10 。。 3𠊎禁食，著麻衫，坐在塵灰肚，面向主上帝迫切祈禱。 4𠊎向上主 — 𠊎个上帝祈禱，為𠊎个同胞認罪。
𠊎講：「主啊，你係至大个上帝；𠊎等敬畏你。你守你个約，向該兜愛你、遵守你命令个人顯明不變个慈愛。
5「𠊎等犯罪做壞事，常常悖逆，偏離你个誡命律例。 6你个僕人，就係該兜先知，識奉你个名向𠊎等个君王、領袖、祖先，㧯全國个人講話；總係𠊎等毋聽。 7主啊，你係公正个，總係𠊎這兜猶大㧯耶路撒冷个人民，並該兜悖逆你、被你逐散到遠方、抑係附近逐國个以色列人，全部因為對你無忠心，今晡日正會恁見笑。 8上主啊，𠊎等㧯𠊎等个君王、領袖，並祖先全部得罪你，𠊎等个見笑係自家惹來个。 9主 — 𠊎等个上帝啊，雖然𠊎等悖逆你，你還係憐憫𠊎等，赦免𠊎等。 10上主 — 𠊎等个上帝啊，你通過你个僕人，就係該兜先知，向𠊎等宣佈法律，愛𠊎等遵守；總係𠊎等毋聽你个話。 11以色列人全部悖逆你个法律，偏離你，無聽從你。所以，該兜記在你僕人摩西法律書个咒詛㧯審判全部落在𠊎等身上，因為𠊎等實在得罪你。 12你在𠊎等㧯𠊎等个統治者身上實現你講過个話。你用大災禍責罰耶路撒冷係天下所有个城市吂有施行過个。 13你將摩西法律書上所寫一切个災禍全部降在𠊎等身上。總係，上主 — 𠊎等个上帝啊，𠊎等還係無俾你歡喜，𠊎等還係無離開罪惡，無看重你个真理。 14上主 — 𠊎等个上帝啊，你識準備愛責罰𠊎等。事實上，你已經責罰𠊎等了；因為你從頭到尾公正，總係𠊎等毋聽你个話。
15「主 — 𠊎等个上帝啊，你用大能个手帶領你个子民出埃及；你个名聲流傳到今晡日。𠊎等確實有犯罪、做壞事。 16主啊，求你照你一切个公義，這下毋好向你个聖山耶路撒冷城發譴。因為𠊎等犯罪、𠊎等祖先做壞事，耶路撒冷㧯你个子民就被四周圍个人侮辱。 17這下，𠊎等个上帝啊，求你聽你僕人个祈禱㧯哀求。求你光照，再看顧你該座荒廢个聖殿，使人知你係主。 18上帝啊，求你聽𠊎等个祈求！求你看顧𠊎等㧯屬你名下荒廢个城！𠊎等向你懇求毋係靠自家个公義，係靠你个大憐憫。 19主啊，求你聽！主啊，求你赦免！主啊，求你答應來聽並施行拯救！𠊎个上帝啊，為到使人知你係上帝，求你毋好延纏；因為這座城係你个城，這兜人係你个子民。」
天使加百列解釋異象
20𠊎繼續祈禱，承認𠊎㧯𠊎同胞以色列个罪，又為上帝个聖山向上主 — 𠊎个上帝懇求。 21𠊎祈禱个時，先前出現在𠊎異象中个加百列盡遽飛到𠊎這位來；該樣時係臨暗仔獻祭个時間。 22加百列向𠊎解釋講：「但以理，𠊎這下來，俾你有智慧好明白。 23你開始向上帝祈求个時，佢就答應你了。佢合意你，所以𠊎來向你傳佢个話。這下請你注意聽𠊎解釋異象个意思：
24「七十個七年係上帝所定愛解救你同胞㧯聖城離開罪惡个時間。該時，佢愛赦免罪惡，帶來永久个正義，使異象㧯預言實現 #9:24 「使…實現」抑係譯做「將…封起來」。，並使聖殿重新奉獻 #9:24 「使聖殿重新奉獻」抑係譯做「膏至聖所」抑係「膏至聖个祭壇」抑係「膏至聖者」。。 25你愛知，愛了解：對宣佈復興重建耶路撒冷个命令到上帝揀選个領袖出現，期間一定愛經過七個七年。耶路撒冷城會重建，有街路㧯堅固个防備；期間係六十二個七年，總係 #9:25 「七個七年…六十二個七年，總係」抑係譯做「七個七年㧯六十二個七年。耶路撒冷城會重建，有街路㧯堅固个防備，總係」。該係一站困苦个期間。 26過了這期間，上帝揀選个領袖會被人㓾掉，一無所有 #9:26 「一無所有」希伯來文个意思無清楚。；這城㧯聖殿會被一個君王个軍隊毀壞。這結局會像大水沖來，將上帝所準備个戰爭㧯毀滅帶來。 27該君王會㧯當多人結盟約七年，總係七年過掉一半，佢就禁止人獻祭、獻禮物。該時，該『毀滅性、邪惡个東西』#9:27 「毀滅性、邪惡个東西」：指外來个侵略者放在聖殿肚个異教神像 (看舊約外典馬加比上 1:54-61)。會被人放在祭壇个角上 #9:27 「祭壇个角上」抑係譯做「聖殿个至高所在」，希伯來文个意思無清楚。，留在該位，一直到將它放在該位个人受到上帝為佢所定个災難為止。」
Currently Selected:
但以理書 9: THV12Hdb
Highlight
Share
Compare
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012