以西結書 45

獻給上主个土地

1分土地給逐支族个時，愛留一份獻給上主。這垤土地愛有十二公里半長，十公里 #45:1 「十公里」係根據一古譯本，希伯來文係「五公里」。闊；歸垤地區係聖區。 2愛對其中分出四方个地做聖殿个用地，逐片長兩百五十公尺，四周圍加二十五公尺闊个空地。 3愛畫出長十二公里半、闊五公里做聖殿个用地，這係至聖个地。 4在全國當中，這垤地係聖區，係分給在聖殿肚親近事奉上主个祭司个；底背有佢等个屋仔㧯聖殿个用地。 5另外一垤土地，長十二公里半、闊五公里，愛分給在聖殿事奉个利未人，底背有利未人个房屋區 #45:5 「利未人个房屋區」係根據一古譯本，希伯來文係「二十個房間」。。

6又愛在聖區隔壁畫一垤土地，長十二公里半，闊兩公里半，做以色列人个房屋區。

君王个土地

7愛畫出一垤土地給君王。這垤土地愛對聖區个西片達到西片个邊界，對聖區个東片達到東片个邊界，㧯以色列逐支族分到个土地平長。 8這垤地係君王在以色列中分到个產業。恁樣，𠊎設立个君王就毋會再欺負𠊎个子民；佢愛將全國其他个土地分給以色列逐支族。

君王愛遵守个規則

9至高个上主恁樣講：「以色列个君王啊，罅擺了！毋好再專權霸道，欺負人民；愛伸張正義，主持公道。你等做毋得再霸佔𠊎子民个土地。𠊎 — 至高个上主恁樣宣佈了。

10「大家愛用標準公當个尺斗秤。

11「量硬質用个『伊法』愛㧯量流質用个『罷特』平大，係用『賀梅珥』#45:11 「賀梅珥」係硬質抑係流質量个單位；一「賀梅珥」大約一百七十五公升，一「伊法」抑係一「罷特」大約十七公升半。做標準單位：

一『賀梅珥』㧯十『伊法』平多，

也㧯十『罷特』平多。

12「量重个單位係：

一『舍客勒』#45:12 在以西結个時代，一「舍客勒」大約十一點四公克。㧯二十『季拉』平重；

一『彌那』㧯六十『舍客勒』平重。

13-15「你等愛照下背个規定奉獻：

小麥：收成个六十分之一。

大麥：收成个六十分之一。

橄欖油：收成个百分之一。

(橄欖油愛用『罷特』來量：十『罷特』㧯一『賀梅珥』平多，也㧯一『柯珥』平多。)

羊：在以色列牧場个羊，兩百隻愛獻上一隻。

「你等愛獻素祭、燒化祭、平安祭，恁樣，你等个罪就會得到赦免。𠊎 — 至高个上主恁樣宣佈了。

16「全國人民一定愛帶這兜祭物到以色列个君王該位去。 17逐隻月初一、安息日、㧯其他以色列个節期，王愛負責全國人民所獻燒化祭个牲儀、素祭、㧯祭酒。佢愛準備贖罪祭、素祭、燒化祭、㧯平安祭个祭物，為以色列人民贖罪。」

節期

(出埃及記 12:1-20；利未記 23:33-43)

18至高个上主恁樣講：「正月初一，你愛獻一隻無缺點个細牛牯，來潔淨聖殿。 19祭司愛拿贖罪祭个血來膏聖殿个門柱、祭壇个四隻角、㧯內院大門个門柱。 20該隻月初七，你也愛照樣為該兜毋係故意抑係因為無知來犯罪个人獻祭。恁樣，你就做得保持聖殿个聖潔。

21「對正月十四開始，你愛守𨃟過節七日。在這七日當中，逐個人全部愛食無酵餅。 22節期第一日，君王一定愛為自家㧯全國人民獻一隻牛牯做贖罪祭。 23在七日節期內，佢逐日愛向上主獻無缺點个牛牯七隻、綿羊牯七隻做燒化祭。佢逐日也愛獻一隻山羊牯做贖罪祭。 24逐隻牛牯，逐隻綿羊牯全部愛㧯十七公升半个素祭，三公升个橄欖油共下獻。

25「在搭寮仔節，就係對七月十五開始个七日期間，君王愛照𨃟過節个條例逐日獻贖罪祭、燒化祭、素祭、㧯橄欖油。」

Currently Selected:

以西結書 45: THV12Hdb

Highlight

Copy

Compare