何西阿書 13
13
以色列个最後審判
1以前，以法蓮支族講話个時，以色列其他个支族全部愊愊掣；佢等全部敬重以法蓮。總係以法蓮拜巴力，犯了罪，就滅亡了。 2這下，佢等繼續犯罪，照自家个想法㧯技術，用銀仔鑄造偶像，然後講：「向它兜獻祭啊！」佢等竟然㧯牛像唚嘴 #13:2 「然後講…唚嘴」希伯來文个意思無清楚。！ 3所以，這兜人全部愛像打早个濛紗煙㧯露水，日頭一出來就無掉。佢等愛像禾埕个冇仔，又像火煙被風捲走。
4上主講：「𠊎係上主，係𢱋你等出埃及个上帝。除了𠊎，你等無別个上帝；只有𠊎係你等个救主。 5在當燥个曠野，𠊎親身看顧你等； 6總係你等一入到這盡肥个土地，因為無愁食無愁著就自滿驕傲。然後，你等就毋記得𠊎了。 7所以，𠊎愛像獅仔攻擊你等，像豹仔埋伏在路堘等等你等。 8𠊎愛像失落細熊子个熊乸攻擊你等，扯裂你等。𠊎愛像兇惡个獅仔當場吞食你等，像野獸將你等扯到爛爛。
9「以色列人啊，𠊎愛毀滅你等！因為你等反對𠊎，就係反對你等个幫助者。 10你等識向𠊎要求設立君王㧯逐城市个官長。佢等有救過你等麼？這下你等个君王㧯官長在㖠位呢？ 11𠊎在發譴个當中給你等君王，也在大發譴中將佢等廢掉。
12「以色列人个罪惡、過犯全部有記錄，係封等囥起來个。 13以色列人還有機會，總係佢等無智慧，竟然無把扼這機會。佢等像產期到个孲𤘅仔，毋肯出母胎。 14𠊎敢愛對陰間將以色列人救出來？𠊎敢愛 #13:14 「𠊎敢愛…𠊎敢愛」有兜譯本照一古譯本翻譯做「𠊎愛…𠊎愛」。對死个權勢之下將佢等放出來？死亡啊，你个災害在㖠位？陰間啊，你个毀滅在㖠位？𠊎無愛再憐憫這兜人民了。 15雖然以色列像野草遰到滿遍係 #13:15 「像野草遰到滿遍係」抑係譯做「在兄弟當中茂盛」。，𠊎愛喊東風對曠野吹來，將水源㧯井水吹燥；𠊎愛搶走佢等所有个財寶。 16撒馬利亞愛因為悖逆𠊎受責罰。該位个人愛因為戰爭死掉；孲𤘅仔愛被人㧹死；有身項个婦女也愛被人破肚笥。」
Currently Selected:
何西阿書 13: THV12Hdb
Highlight
Share
Compare
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012