馬可 10
10
關係離掉𡜵娘个教訓
(馬太 19:1-12；路加 16:18)
1耶穌離開該地方，來到猶太地區㧯約旦河東片。眾人又聚集到佢該位去，佢就照常教訓佢等。
2有兜法利賽人來見耶穌，想愛害佢，就問佢講：「請教你，𠊎等个法律准老公離掉𡜵娘麼？」
3耶穌反問講：「摩西个命令係樣般講？」
4佢等應講：「摩西准老公寫一張離婚書給𡜵娘，就做得離掉姖。」
5耶穌對佢等講：「摩西寫這條誡命給你等係因為你等个心盡硬。 6總係在太初，上帝創造世界个時，所造个人『有男也有女』； 7『因為恁樣，男人愛離開佢个爺𡟓，㧯𡜵娘結合， 8兩儕成做一體。』既然係恁樣，夫妻就毋係兩個人，係一體。 9所以，上帝所配合个，人做毋得拆開。」
10佢等倒轉去屋肚个時，學生又問起這件事。 11耶穌㧯佢等講：「無論麼人離掉𡜵娘，重新㧯別个婦人家結婚，就係犯姦淫，虧欠佢个𡜵娘； 12𡜵娘若離掉老公，再去㧯別人結婚，也係犯姦淫。」
耶穌祝福細人仔
(馬太 19:13-15；路加 18:15-17)
13有兜人帶細人仔來見耶穌，希望佢摸佢等；總係學生責備該兜人。 14耶穌看到就發譴，對學生講：「俾細人仔來𠊎這位，毋好禁止佢等，因為上帝國个子民就像這種个人。 15𠊎實在㧯你等講，無論麼人，若毋係像細人仔恁樣來接受上帝个主權，佢絕對無可能成做上帝个子民。」 16講了，佢就揇等細人仔，一個一個按手，為佢等祝福。
財主个難題
(馬太 19:16-30；路加 18:18-30)
17耶穌堵堵正出去，有一個人走過來，跪在佢个面前，問佢講：「良善个先生，𠊎愛做麼介正做得承受永遠个生命啊？」
18耶穌問佢講：「你樣般喊𠊎做良善个呢？上帝以外，無再有良善个。 19你知該兜誡命：『做毋得㓾人；做毋得犯姦淫；做毋得偷拿；做毋得做假見證；做毋得詐欺；愛孝敬爺𡟓。』」
20該人應講：「先生，這兜誡命𠊎全部從細就已經遵守了。」
21耶穌注目看等佢，盡惜佢，就講：「你還欠一樣。去賣你所有个產業，將錢送給窮苦人，你就會有財產積存在天頂；然後你來跈𠊎。」 22該人一聽到這個話，就面色癧青，心情沈重來離開，因為佢个產業盡多。
23耶穌看等學生，㧯佢等講：「有錢人愛做上帝國个子民，實在真難噢！」
24學生因為佢个話感覺盡奇怪；總係耶穌又講：「細子啊，愛做上帝國个子民就盡難！ 25有錢人愛做上帝國个子民，比駱駝穿過針鼻還較難！」
26這時，學生十分奇怪，彼此問講：「恁樣，麼人有可能得救呢？」
27耶穌注目看佢等，講：「在人係無可能，總係在上帝就毋係恁樣，因為上帝萬事都能。」
28 彼得接嘴講：「你看，𠊎等已經放掉一切來跈你。」
29耶穌對佢等講：「𠊎實在㧯你等講，為到𠊎抑係福音來放掉房屋、兄弟、姊妹、爺𡟓、子女、抑係田地个人， 30在今世雖然會堵到迫害，總係會得到百倍个房屋、兄弟、姊妹、爺𡟓、子女、抑係田地；在來生會得到永遠个生命。 31總係，盡多在最頭前个會做背尾；盡多在最背尾个會做頭前。」
耶穌第三擺預言自家个死㧯復活
(馬太 20:17-19；路加 18:31-34)
32在佢等去耶路撒冷个路上，耶穌在頭前行。學生心中充滿疑狐；其他跈等个人也盡驚。耶穌喊十二個學生到佢面前來，再一擺㧯佢等講起無幾久以後愛發生在佢身上个事。 33佢講：「看啊，𠊎等這下愛上耶路撒冷去；人子會被人交在祭司長㧯經學教師个手中。佢等會判佢死刑，然後將佢交給外邦人。 34佢等會㩢耍佢，呸佢口潾，鞭打佢，最後殺害佢；總係，第三日佢會復活。」
雅各㧯約翰个要求
(馬太 20:20-28)
35 西庇太个孻仔雅各㧯約翰來見耶穌，講：「先生，𠊎等有一個要求，希望你答應。」
36耶穌問講：「愛𠊎為你等做麼介？」
37佢等講：「你坐榮耀寶座个時，希望你俾𠊎等同你共下坐，一個在你个右片，一個在你个左片。」
38耶穌對佢等講：「你等毋知自家所求个係麼介。𠊎所啉个苦杯，你等有法度啉麼？𠊎所受个洗禮，你等有法度承受麼？」
39佢等講：「𠊎等有法度！」
耶穌講：「𠊎所啉个苦杯，你等確實愛啉，𠊎所受个洗禮，你等確實愛承受； 40總係麼人坐在𠊎个左右，就毋係𠊎做得決定个。這兜座位，上帝為麼人準備，就愛賜給麼人。」
41其他十個學生聽到這個事，就當閼雅各㧯約翰。 42耶穌喊佢等全部到佢面前來，對佢等講：「你等知，外邦人所認為个統治者有權管轄佢等，佢等个領袖也有權指揮佢等； 43總係，在你等當中就毋係恁樣。你等中間想愛做大人物个，就愛做你等个僕人； 44想愛做頭个，就愛做大家个奴僕。 45因為人子來，毋係愛被人服事，係來服事人，也愛為到救贖眾人來犧牲自家个生命。」
醫好瞙目个巴底買
(馬太 20:29-34；路加 18:35-43)
46佢等來到耶利哥城。耶穌㧯厥學生同一大群人離開耶利哥个時，有一個瞙目个乞食仔 — 底買个孻仔巴底買，坐在路堘。 47佢一聽講係拿撒勒个耶穌，就大聲喊講：「大衛个子孫耶穌啊，可憐𠊎！」
48盡多人責備佢，喊佢毋好吵。總係佢還較大聲喊講：「大衛个子孫啊，可憐𠊎！」
49耶穌就停下來，講：「喊佢過來。」
佢等就對瞙目个講：「毋使緊張，䟘起來，佢喊你過去！」
50瞙目个即時脫下外衫，跳起來，行到耶穌个面前。
51耶穌問佢講：「你愛𠊎為你做麼介？」
瞙目个應講：「先生，𠊎愛看得到！」
52耶穌就對佢講：「你做得離開了！你个信心已經醫好你了。」
瞙目个黏時看得到，就跈等耶穌共下行。
Currently Selected:
馬可 10: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
