馬可 11

光榮入耶路撒冷

(馬太 21:1-11；路加 19:28-40；約翰 12:12-19)

1耶穌㧯學生行會到耶路撒冷，將近伯法其㧯伯大尼，在橄欖山，耶穌喊兩個學生先行， 2吩咐佢等講：「你等去頭前个村莊。你等一入去，就會看到一隻還吂有人騎過个細驢仔紽在該位。你等將牠解開，牽來這位。 3若係有人問你等：『樣般做這個事？』你等就㧯佢講：『主 #11:3 「主」抑係譯做「牠个主人」。愛用牠；佢黏時會送轉來。』」

4佢等就去，看到路堘有一隻細驢仔紽在門口，就將牠解開。 5企在該位个人問佢等講：「你等做麼介解開細驢仔？」

6佢等就照耶穌所吩咐个回答；該兜人就准佢等將細驢仔牽走。 7佢等將細驢仔牽到耶穌該位，將自家个衫搭在驢仔个背囊頂，耶穌就騎上去。 8有盡多人用自家个衫鋪在路上，也有人拿野地斬來个樹枝鋪在路上。 9頭前行㧯後背跈个人大聲喊講：

「和散那！頌讚上帝！

願上帝賜福給該奉主名來个！

10願上帝賜福給𠊎等祖先大衛个國，

就係無幾久會臨到个！

和散那！頌讚歸給至高个上帝！」

11耶穌到耶路撒冷，入去聖殿，四周圍看一下。因為天已經暗，佢就㧯十二個學生出城到伯大尼去。

咒詛無花果樹

(馬太 21:18-19)

12第二日，佢等對伯大尼倒轉城肚去；在路上，耶穌肚飢。 13佢看到頭前無幾遠个所在有一頭無花果樹，葉仔拶拶，就行過去，想愛看有果子無。佢行到樹前，看到只有葉仔，因為該時毋係無花果个時節。 14耶穌就對該頭樹仔講：「從今以後，毋會再有人食你个果子！」

厥學生攏總聽到這個話。

耶穌潔淨聖殿

(馬太 21:12-17；路加 19:45-48；約翰 2:13-22)

15佢等來到耶路撒冷，耶穌一入聖殿就將所有在聖殿肚做生理个人逐出去。佢㩳橫換錢个人个桌仔㧯賣月鴿仔个人个凳仔， 16也毋准有人扛東西在聖殿行來行去。 17佢教訓佢等講：「聖經敢毋係記載上帝个話講：『𠊎个聖殿愛做萬民祈禱个殿』，你等卻將它變做賊竇！」

18祭司長㧯經學教師聽到這個話，就想辦法愛殺害耶穌。總係佢等驚佢，因為眾人都欽服佢个教訓。

19臨暗仔，耶穌就㧯學生去城外。

對無花果樹得到教訓

(馬太 21:20-22)

20第二日打早，耶穌㧯學生又對該條路經過，看到該頭無花果樹連根全部燥掉。 21彼得想起這件事个經過，就對耶穌講：「先生，你看，你所咒詛个無花果樹燥掉囉。」

22耶穌回答講：「對上帝愛有信心！ 23𠊎實在㧯你等講，你等若係對這座山講：『徙開，落海肚去！』心中無疑狐，確信所講个一定會實現，這個事就會為到你等來實現。 24所以，𠊎㧯你等講，你等祈禱个時，相信你等所求个係已經得到，就會得到。 25你等企等祈禱个時，愛先赦免得罪你等个人；恁樣，你等在天頂个阿爸正會赦免你等个過犯。」#11:25 有兜古卷加 26 節：「若係你等毋赦免別人，你等在天頂个阿爸也毋會赦免你等个過犯。」

質問耶穌个權柄

(馬太 21:23-27；路加 20:1-8)

27佢等又來到耶路撒冷。耶穌在聖殿肚行个時，祭司長、經學教師，㧯長老來見佢， 28問佢講：「你靠麼介權柄做這兜事？麼人給你這權柄做這兜事呢？」

29耶穌應講：「𠊎先問你等一句話，若係你等回答𠊎，𠊎就㧯你等講，𠊎靠麼介權柄做這兜事。 30㧯𠊎講，約翰行洗禮个權柄，係對上帝來个，抑係對人來个？」

31佢等就彼此爭論，講：「若係𠊎等講：『對上帝來个』，佢會講：『恁樣，你等做麼介毋信約翰呢？』 32若係𠊎等講：『對人來个』，𠊎等个問題就當大了 #11:32 「𠊎等个問題就當大了」：原文無這句話。。」 (佢等驚人民會對付佢等，因為眾人攏總相信約翰係先知。) 33對恁樣，佢等應耶穌講：「𠊎等毋知。」

耶穌對佢等講：「恁樣，𠊎也毋㧯你等講𠊎靠麼介權柄做這兜事情。」

Currently Selected:

馬可 11: THV12Hdb

Highlight

Copy