Mariko 15

Oter Yesu e nyim Pilato

(Mathayo 27.1-2, 11-14; Luka 23.1-5; Johana 18.28-38)

1Kane piny oru gokinyi mang’ich jodolo madongo nopimo wach piyopiyo gi jodongo gi jopuonj Chik kod jobura mamoko duto. Eka ne gitueyo Yesu, mi gitero e nyim Pilato. 2Pilato nopenje niya, “In e ruodh jo-Yahudi koso?” Yesu to nodwoke ni, “In ema isewacho kamano.” 3Jodolo madongo nodonjone gi weche mathoth, 4omiyo Pilato nochako openje niya, “Ok inyal dwoko wach moro koso? Neye weche mathoth ma jogi donjonigogi!” 5To Yesu noling’ aling’a. Mano ne omiyo Pilato owuoro.

Ong’ad ni Yesu buch tho

(Mathayo 27.15-26; Luka 23.13-25; Johana 18.39—19.16)

6To higa ka higa e Sap Pasaka, Pilato ne gonyo ng’at achiel ma ji okwaye kuom joma otue. 7Koro noyudo ka ng’at moro ma nyinge Baraba ne nie jela, kaachiel gi joma ne ojemo moneko, ka kedo gi joma nie loch. 8Kane ji ochokore mondo okwa Pilato otimnigi kaka ne ojatimo e ndalo Pasaka, 9ne openjogi ni, “Udwaro mondo agonynu ruodh jo-Yahudi koso?” 10Nowacho kamano nimar nong’eyo maber ni jodolo madongo nosetero Yesu ire mana nikech nyiego. 11To jodolo madongo nojiwo ji ni mondo okwa Pilato ogonynigi mana Baraba. 12Eka Pilato nopenjogi kendo niya, “To ere gima udwaro ni mondo atim ni jal muluongo ni ruodh jo-Yahudini?” 13Ne gidwoke ka gikok niya, “Gure e msalaba!” 14To Pilato nochako openjogi ni, “To ere gima rach mosetimo?” To ne gimedo kok moloyo, ka giwacho ni, “Gure!” 15Kuom mano, kaka Pilato ne dwaro timo ni ji gima gidwaro, nogonyonigi Baraba, kendo kane osegolo chik mochwad Yesu malit, nochiwe mondo ogure.

Askeche ocharo Yesu

(Mathayo 27.27-31; Johana 19.2-3)

16Askeche nokawo Yesu, motero e laru mar od ruoth, mi giluongo askeche mamoko duto. 17Ne girwakone kandhu makwar, kendo ne giloso osimbo mar kudho, mi gisidhone. 18Eka ne gimose, ka giwachone niya, “Ruodh jo-Yahudi mondo odag aming’a!” 19Ne gichwado wiye gi luth, kendo ging’udho kuome olawo, bende ne gigoyone chonggi piny ka gima gidende. 20Kane gisetieko chare kamano, ne gilonyo kandhu makwarno oko kuome, mi girwakone lepe owuon. Eka ne gitere oko mondo gigure e msalaba.

Ogur Yesu e msalaba

(Mathayo 27.32-44; Luka 23.26-43; Johana 19.17-27)

21 # Rumi 16.13. Kane giwuotho gidhi, ne giromo gi ng’at moro ma nyinge Simon, mane oyudo biro Jerusalem, koa e gweng’ moro, mi gichuno mondo oting’ ni Yesu msalape. Mano e Simon ja-Kurene ma wuon Aleksander gi Rufus. 22Ne gitero Yesu kama iluongo ni Golgotha, tiende ni Kar Hanga Wich. 23Ne gimiye divai moruw gi yath makueyo rem miluongo ni manemane mondo omadhi, to ne odagi madho. 24#Zab 22.18.Eka ne gigure e msalaba, mi gipogore lepe, ka gigoyo ombulu mondo ging’ego law ma ng’ato ka ng’ato dikaw. 25Ne en sa adek onyango ka ne gigure, 26kendo weche modonjnego ondiki ewi msalaba niya, “RUODH JO-YAHUDI.” 27#Isa 53.12.Jomecho ariyo bende ne giguro kode, achiel e bathe korachwich, to machielo e bathe koracham. [ 28Kamano wach mondiki e Muma ni, “Nokwane ka achiel kuom joma richo,” nochopo kare.]

29 # Zab 22.7; 109.25; Mar 14.58; Joh 2.19. Joma ne kadho kanyo nojaro Yesu katwenyone umgi, kendo wachone niya, “Oo! In mane iwacho ni ibiro muko Hekalu, mi ichak iger bang’ ndalo adek, 30koro resri ane, ilor ia e msalaba!” 31Kamano bende e kaka jodolo madongo kod jopuonj Chik nojaro Yesu, ka giwacho e kindgi giwegi niya, “Ne oreso jomoko, to koro en owuon dak oresre! 32Ara koro Kristo ruodh Israel olor oa e msalaba ane, mondo wayie kuome!” Ji ariyo mane ogurego bende noyanye.

Tho mar Yesu

(Mathayo 27.45-56; Luka 23.44-49; Johana 19.28-30)

33Kane sa auchiel ochopo, piny duto notimo mudho nyaka sa ochiko, 34#Zab 22.1.kendo kar sa ochiko nogono, Yesu nokok matek niya, “Eloi, Eloi lama sabakthani?” tiende ni, “Nyasacha, Nyasacha, iweya nang’o?” 35Jomoko mane ochung’ kanyo nowinjo wechego, mi owacho ni, “Winjuru! Oluongo Elija.” 36#Zab 69.21.To ng’at achiel kuomgi noringo mokawo sipanj, onyumo e kong andwayo, mochwowo e dho odundu. Eka notere e dho Yesu gi odunduno mondo onyodhi, kowacho niya, “Weuru, wane ane ka Elija biro biro, mi lore e msalaba!” 37Bang’ mano, Yesu nokok matek, eka chunye ochot; 38#Wuok 26.31-33.kendo nanga mane ogeng’o Kama Ler mar Hekalu noriedore diere ariyo, chakre malo nyaka piny. 39Kane jaduong’ lweny mane oyudo ochung’ e nyim msalaba kanyo oneno kaka Yesu okok ka chunye chot, nowacho niya, “Adier ng’atni ne en Wuod Nyasaye!”

40 # Luka 8.2, 3. Mon moko bende ne ni kanyo kang’icho gi chien. Kuomgi ne nitie Maria nyar Magdala, gi Salome, kod Maria min Jakobo matin gi Jose. 41Gin mon mane luwo Yesu, kendo tiyone ka gin Galili. Mon moko mang’eny mane osebiro kode Jerusalem bende ne ni kanyo.

Yik mar Yesu

(Mathayo 27.57-61; Luka 23.50-56; Johana 19.38-42)

42Kane koro piny ochopo odhiambo, kendo kaka ne en chieng’ Ikruok, tiende ni chieng’ motelo ni Sabato, 43Josef ja-Arimathaya, ma jabura mogen, kendo ma bende nogeno ni none Loch Nyasaye, nodhi ir Pilato gi chir, mokwaye mondo omiye ringre Yesu. 44To Pilato nowuoro kane owinjo ni Yesu osetho mana piyo kamano, omiyo noluongo jaduong’ lweny cha, mopenjo ka Yesu osetho adier. 45Kane oseyudo wach kuom jaduong’ lweny, noyie ni Josef mondo okaw ringre Yesu. 46Josef nong’iewo nanga, kendo kane osegolo ringre Yesu e msalaba, noboye gi nangano, mokete e bur mane osekuny ariwa e kor lwanda. Eka nong’ielo kidi maduong’, molorogo dho bur. 47Maria nyar Magdala kod Maria min Jose ne jo ni kanyo, mi oneno kama oketie ringre Yesu.

Currently Selected:

Mariko 15: DHO15

Highlight

Copy