Luka 18

Mlaha masa mubada mwevotwa.

1Azawaγambila lushimo lwa kuγamba: Shuti wavike, washedile, washetibuke! 2Angwe: Kuna muzi, muja muna mlaha masa ashiyemwogoha Mulungu, hata muntu nkana shoni naye. 3Mwe uja muzi ne mwina mvyelengwa afilweye ni mulume, uyu azamtimila, azamuti: Nivunila mwe masa, ṅwiyangu ayonigela! 4Mishi mingi nkakundile. Vikibinda azafanyanya mwe moyo wakwe kuγamba: Ati Mulungu nashemwogoha, ati sina shoni na muntu, 5miya yuja mvyele, kwa kuti aisa kunipisha, nenimvunile, kangwe ashezaiza akinitula vuzo. 6Zumbe azawati: Teγelezai, yuja mlaha masa muwiwi avyolonga! 7Mulungu ashevunile washaγulwewo ndiye, wemkemela kilo na mushi? Atazunganya mbuli yawe? 8Namiti: Atafikawavunila kinyanyi. Kumbe ṅwanangwa ywa muntu akizaiza neaone wemtozesha kunu shi?

Faliseyo na mngelu.

9Wantu kuṅwe wakifanyanyizewo wenye, kuti ni watanda, haṅwe na kubela waja watuhu azawazisa ulu lushiino angwe: 10Wantu waili wazakwela vikiloi, wavike; muṅwe ni Faliseyo, muṅwe ni mngelu. 11Yuja Faliseyo azaγoloka, azavika mwe moyo wakwe angwe: Mulungu, nakulaviliza ntogolo kuti: Sifanana na wantu watuhu, ati ni wampoko, ati ni watungulu, ali ni watesi, hata ni uyu mngelu. 12Kila juma nifunga kaili, vyoshe nivyoonela navilavya fungu ja kumi. 13Miya yuja mngelu azaγoloka hale, mesho du nkakundile kuyainula na kwe lwingu, miya azatowa kifuwa chakwe angwe: Mulungu, nifa mbazi imi mhuza! 14Namiti: Uyu asheele na kaya kwakwe ai mtanda kumzinka yuja. Hambu kila mwekikuza ṅwenye atazapunguziγwa, kangi mwekipunguza ṅwenye atazakuziγwa.

Vizana vyahokelwa ni Yesu.

15-17.

15Wazamletela hata vizana, kangwe avibadikile mikono; wahina wakwe wakiona wazawavaila. 16Miya Yesu azaviitanga angwe: Lekai, vizana viize kwangu, mshevifingize! Hambu we ivyoho uzumbe wa Mulungu ni wawe. 17Kweli namiti: Ndiye ashehokele uzumbe wa Mulungu, viya ni kazana, nkezeauingile.

Mfuṅwa mzuti.

18-30.

18Kuna mfuṅwa, azamwuza angwe: Mfuzi mtana, nitende zeze, kangwe nezenipale nkalamo ya kale na kale? 19Yesu azamuti: Nini ukiniitanga mtana? Nkakuna mtana kushima Mulungu ike du. 20Milomongwa waitaila ija ya kuγamba: Ushetende kilanga! Ushekome! Ushebawe! Ushemshinge ṅwiyawo ukilonga uwona wa lulimi! Gimbika isho na nyokwe! 21Angwe ndiye: Ivi vyoshe nizaviγolokela, vivyo nikuzilevyo. 22Yesu akiviiva azamuti: Ukeshiγaze mbuli ṅwenga; vyoshe, uvyona navyo, vitaγe, ukavipangile wakiwal Ne ndivyo utende mali mwe lwingu; ukibinda uize, unitongele! 23Yuja akiiva izi mbuli azaona ukiwa ukulu, hambu ne ai mzuli kabisa.

Ntoγo za kitende.

24Yesu azamwolela, azalonga: Wena kitende wana ntoγo nyingi za kuingila mwe uzumbe wa Mulungu. 25Ngameya ntoγo zakwe za kuingila mwe kihula cha singano nkaziinga sa ziya, mzuli azoona za kuingila mwe uzumbe wa Mulungu. 26Waviivilewo wazalonga: Lushe ndiye adahe kuzahona, ni ndai? 27Angwe: Vishivyodahikana kwa wantu vyadahikana kwa Mulungu.

Kuasha vyoshe.

28Angwe ni Petelo: Olela! Ishwi tizaasha vyetu, tizakutongela. 29Azawati: Kweli namiti: Mweasha nyumba yakwe ao muke ao wakuluwe ao wanduγuze ao wavyazi wakwe ao wanae kwa mbuli ya uzumbe wa Mulungu, 30nkakuna ndiye asheviuziziγwe kangi muno mwe mishi inu, kangi mishi ija, ndiyo nezeibule, atazainkwa nkalamo ya kale na kale.

Yesu alonga vingi ndivyo ainkilwe.

31-34.

31Azaγuwa waja kumi na waili azawati: Olelai! Takwela Yelusalemu, vyoshe ṅwanangwa ywa muntu agondelwavyo ni wateγanyingwa nevibontoke. 32Hambu neainkilwe kwa wamzimu, afyulilwe, akankwe, ashwelwe mate; 33vikibinda watamtowa, watamkoma, miya mushi wa ntatu atafufuka. 34Waja izi mbuli nkawaziivile hata ṅwenga, ziifishiγwe, washezione bontokelo, nkawataile walongiγwevyo.

Tuntu ahonyiγwa Yeliko.

35-43.

35Akibula hehi na Yeliko, kuna muntu afileye mesho, azaikala silai, aakalombeza. 36Akiiva shindo ya wantu wangi weomboka azauza, ati kuna mbwai. 37Wazamwukwila, kuti Yesu ywa Nazaleti aomboka. 38Azakema angwe: Yesu, ṅwana Dawidi, nifa mbazi! 39Waja walongolewo wazamvaila, kangwe aleke lwashu; miya azaisiiza kukema vivyoho: Yesu, ṅwana Dawidi, nifa mbazi! 40Yesu azaγoloka, azalaγiliza, aletiγwe na haja, aliho. Akibula, azamwuza: 41Ukunda, nikuγoshwele mbwai? Angwe: Zumbe, nakunda, nione! 42Yesu azamuti: Ona! Mitozesheze yako izakuhonya. 43Viya du lushe azaona, azamtongela akimtogola Mulungu. Hata wantu woshe wavienewo wazamunka Mulungu ntogolo.

Currently Selected:

Luka 18: KISHNT05

Highlight

Copy