Mateyo 12

Yesu avyogimbika mushi wa sabato.

1-8.

1Mishi ija Yesu azaanga mushi wa sabato kwe mbuwa za ngano; wahina wakwe wakiluṅwa ni sala wazaandiila kudahula maiswa ya ngano, wazaja. 2Mafaliseyo wakiviona wazamγamba: Olela, wahina wako waγoshola viya vishivyoγosholwa mushi wa sikunkulu. 3Azawati: Nkamfyomile, Dawidi aγosholevyo akiluṅwa ni sala haṅwe na weyae, awona nawo? 4Kuti azaingila mwe nyumba ya Mulungu, azaja migate ya ntogolo? Kangi ṅwenye na weyae, awona nawo, wana ṅwiko kuija, washinawo ṅwiko nayo ni wavikizi ike. 5Vituhu nkamfyomile mwe mlomongwa, kuti mushi wa sabato wavikizi waabana kitigo cha sabato muja mwe vikilongwa, kangi nkawana masa? 6Namiti: Aha hana mwekula kuzinka vikilongwa. 7Ati mwataila bontokelo ja iyo mbuli ya kuγamba: Nakunda mbazi, sikunda ṅombe za mviko, anga nkamkaalize awa washinawo masa. 8Hambu ṅwanangwa ywa muntu ni zumbe ywa mushi wa sabato.

Yesu ahonya mtamu mwena mkono.

9-14.

9Akihauka azaingila mwe vikilo jawe. 10Ne mwina muntu mwena mkono unyulukewo. Wazamwuza kuγamba: Kumbe vina ṅwiko kuhonya mushi wa sabato? Kangwe waone lufyalimile. 11Azawati: Ati kwenyu muntu ana ngoto ṅwenga, lushe ati yakina mwe lwina mushi wa sabato, asheitoze akiilavya? 12Muntu nkazinka ngoto hakulu? Kwa ivyoho nkavina ṅwiko kuγoshola vyetama mushi wa sabato. 13Ne ahomlonga yuja muntu: Kusula mkono wako! Azaukusula, uzauya ugima sa ṅwiyae 14Mafaliseyo wakimulawa wazalonga njama kwa mbuli yakwe, ndivyo waonele luhoseze.

Uhozu wa Yesu.

15Yesu akivitaila azahauka; wantu wangi wazamtongela, azawahonya woshe, 16azawavaila, kangwe washezamubunkula, 17kangwe vibontoke viya vilongiγwevyo ni mteγanyi Yesaya, akiγamba: 18Shuyu ṅwanangu, nimshaγuleye! Shuyu mwombozi ywangu, mwetamila moyo wangu! Nezenimgele mpeho yangu, abilikile wamzimu, kuti wana masa. 19Nkeagwishe nkumbizi, nkeavunke, nkakuna ndiye aive kanwa chakwe he ndumi. 20Luguγu lutunyukelo nkealubindilize, vungo jena moto hadodo nkeajizimye, mpaka masa, ndiyo agwishe, yavote. 21Zina jakwe ne ndijo wamzimu waalile.

Muntu mwena mpepo.

22-25.

22Haja azaletelwa muntu ashiyeona, ashiyelonga kwa mbuli ya kuhuma mpepo. Azamhonya, ne yuja, ndiye ashilonga, aholonga, kangi ne ahoona. 23Wantu woshe wazashentuka angwe: Uyu so ṅwana Dawidi? 24Mafaliseyo wakiviiva wazaγamba: Uyu akiingata mpepo, so kwa nguvu ntuhu, ni kwa nguvu ya Mzuka, zumbe ywa mpepo. 25Miya azataila ntongonyezi zawe, azawati: Kila uzumbe ukipangana ṅwenye wachakuka. Kila muzi, hata nyumba du ikipangana ṅwenye nkaiikala.

Nguvu ya Satani.

26Ati Satani amwingata Satani ṅwiyae, azabinda kupangana ṅwenye; lushe uzumbe wakwe utatoγa zeze? 27Ati imi niingata mpepo kwa nguvu ya Mzuka, wana wenyu waziingata kwa nguvu ya ndai? Kwa ivyoho awa watazamilaha. 28Miya ati imi niingata mpepo kwa nguvu ya Mulungu, shivyo, uzumbe wa Mulungu uzabula kwenyu. 29Hambu muntu adaha zeze kuingila mwenyumbaya mnguvu, amhoke ntanu zakwe? Bosi nkatamshunga yuja mnguvu, akibinda akadaha kumhoka ntanu ze mwe nyumba yakwe?

Uhuza ushiwozaushiγwa.

30Ashiyeniambiza aniomanya, ashiyeunganyanya haṅwe na imi aasakanya. 31Ne vyeleka, nikimiti: Wantu waushiliziγwa uhuza na lwezo lwoshe, miya muntu akieza Mpehongwa nkaviushiliziγwa. 32Ati muntu amubishiza ṅwanangwa ywa muntu nkani, aushiliziγwa, miya ati muntu amubishiza Mpeho mṅazi nkani, nkezeaushiliziγwe, ati ni mwe inu shi, ati ni mwe ija, ndiyo ilawile.

Muti wena matunda matana.

33Mkihanda muti mtana, ne ndimo mwonele malunda matana; mkihanda muti mubada, ne ndimo mwonele ntunda mbada, hambu muti utailwa na ntunda zakwe. 34Wana nyoka inywi! Mdaha zeze kulonga mbuli ntana, wenye mwi wabada? Hambu viya, moyo uvyogisa, ne kanwa chivyolonga. 35Muntu mtana alavya mwe kitende chakwe kitana vintu vitana, kangi muntu mubada alavya mwe kitende chakwe kibada vintu vibada. 36Miya namiti: Kila mbuli mbada, ndiyo wantu walonge, watazaiuziγwa mushi wa mlaho. 37Hambu kwa milongele yako nezeuinkwe utanda, kangi kwa milongele yako nezeulahwe.

Lwitangilo lwa Yona.

38Ne watabaluwangwa na Mafaliseyo kuṅwe wahomlandula angwe: Mfuzi, takunda kuona lwitangilo kwako. 39Azawalandula angwe: Inu mbali mbada yeγenyeza kilanga yalonda lwitangilo, kangi nkezewainkwe lutuhu, kushima luja lwa mteγanyi Yona. 40Hambu sa Yona aikalevyo mwe ifu ja nyama ya bahali mishi mitatu na vilo vitatu, vivyoho ṅwanangwa ywa muntu atazaikala uko ndai mwe shanga mishi mitatu na vilo vitatu. 41Mushi wa mlaho wantu wa Niniwe watazainukila inu mbali, wailahe, kwa kuti wakibilikilwa ni Yona wazavoteka, kangi shivyo, kunu kuna mkulu kumzinka Yona. 42Mushi wa mlaho zumbe ywa kivyele ywa ija shi ye lwazu lwegwila zuwa mishi ya vuli atazainukila inu mbali, hambu azalawa shi ikohelela, ateγeleze viyuγo vya Salomo, kangi shivyo, kunu kuna mkulu kumzinka Salomo. 43Ati mpepo mbada yalawa mwe muntu, yaanga mwe shi ishinayo mazi, yalonda hemelo, yashejiona. 44Ne ndiho ilonge kuγamba: Neniγotoke na mwe nyumba yangu, nilawilemo namo. Ikiiza yaibulila, iiashiγwe ṅwazi, iihaγilwe, iihambiγwe. 45Ne ihohita kwa γuwa mpepo mfungate ntuhu mbada kuzinka ija ṅwenye, ziγaluke weyae, vikibinda zaiza, zaikala muja. Ivyoho bindilizo ja yuja muntu jitaiha kuzinka chandilo. Ne ndivyo mbuli ya inu mbali mbada iγende.

Wanduγu wa kweli wa Yesu.

46-50.

46Akelonga na wantu, kuzaiza nine na wanduγuze, wazaγoloka se wakimlonda, walonge naye. 47Kuna amγambileye: Olela, nyokwe na wanduγuzo waγoloka uko se, wakulonda, walonge na iwe. 48Azamlandula yuja amlongileye, angwe: Mlala ywangu ni ndai? Wenetu ni wandai? 49Azakuswila wahina wakwe mkono angwe: Shawa wamlala na wenetu! Hambu ndiye aγoshole, 50Tate mweikala mwe lwingu avyokunda, uyu ne ṅwenetu na lumbu jangu na mlala.

Currently Selected:

Mateyo 12: KISHNT05

Highlight

Copy