Enkiterunoto 35

Etamayiana Enkai Yakobo te Betel

1 # Enk 28.11-17 Nejoki Enkai Yakobo, “Tudumunye ilepa shomo Betel, nilo amany ine; nintobir teine olperere lo lasar, aitaiki Enkai ina nikimpang'aka ina kata apa peyie ilo ailany olalashe lino Esau.” 2Metaa etiaka Yakobo Enkaji enye o lelo pooki apa ootii tenebo ninye, “Ewuangie kulie aitin oo loreren naatii atua intae, nintisinyinyi ate, nimbelekenyenye inkilani inyi; 3ematudumunye aailep aapuo Betel, peyie atum aitayu teine olperere lo lasar aitaiki Enkai ina naatawalikia nanu te nkata osina, naataboitare te pooki wueji nashomo.” 4Ina peyie eisho Yakobo nena aitin oo loreren pooki naata, tenebo ilgiso ootii inkiyiaa enye; neisudoo Yakobo nena pooki te ntonata olchani onyaanyukie olngaboli otii embata Shekem.

5Ore eidur ninche nedoiki enkuretisho naing'uaa Enkai inkanas naamanita ninche, metaa eitu esujaa ninche ilayiok le Yakobo. 6Nelotu Yakobo Lus (aa ninye Betel), aa ninye natii enkop e Kanaan, ore ninye tenebo olorere pooki oboitare, 7neshet olperere lo lasar teine, nejo ine wueji El-betel, amu ine apa eibalakinye Enkai kewan ninye ina kata naisik alo aing'uaa olalashe lenye. 8Neye Debora enkaisiaayiani, teine nenukari te ntonata olchani onyaanyuuki olng'aboli tiabori Betel, metaa etejoki enkarna e ine Al'lonbakut.

9Neitoki ake Enkai aipang'aki Yakobo aigil, ina kata pee elotu aing'uaa Padan-aram, nemayian ninye. 10#Enk 32.28 Nejoki Enkai ninye, “Aikiji enkarna ino Yakobo; meitokini aajo enkarna ino Yakobo, kake keji Israel, enkarna ino.” Metaa eipotoki enkarna enye aajo Israel. 11#Enk 17.4-8 Nejoki Enkai ninye, “Ara Enkai magilani; entoisho entoponari, epuku te iyie olorere o lorora loo loreren, nepuku ilaiguanak te iyie. 12Ore ina kop apa naishoo Abraham o Isaak naa kaaisho iyie, naa kaisho ina kop eishoi ino nikisuju.” 13Nelo Enkai aig'uaa ninye teine neirorie ninche. 14#Enk 28.18-19 Neitasheyie Yakobo eng'ape teine apa neirorie Enkai o ninye eng'ape osoit; nebukoki olasar opikuni enchumata enye, nebukoki eilata shumata enye. 15Metaa eishoo enkarna ine wueji neirorie Enkai ajo Betel.

Keeya e Raheli

16Neitoki ninche aaidur aapuo te Betel; ore eton elakuaniki Efrat, nesaisayu Raheli, near enkop oleng. 17Ore eitanyamal emion oleng', etiaka enkaitoyioni ninye, “Miureishoyu amu itum ae ayioni.” 18Ore ena kata edung'o tau (amu etua), neipot enkarna enye ajo Benoni#35.18 Benoni Eutu te nkutuk oo Lhebrania ajo “olayioni lo sina lai”; kake eipoto menye enkarna enye ajo Benchamen#35.18 Benchamen Eutu te nkutuk oo Lhebrania ajo “olayioni oyooki atum omom”. 19Metaa etua Raheli, nenukari te nkoitoi epuoi Efrat, (aa ninye Betlehem), 20neitasheyie Yakobo eng'ape te nchumata enkurare e Raheli; naa eng'ape ina enkurare e Raheli, netii ina ng'ape o taata. 21Neidur Israel alo, neun olng'obor lenye te dukuya oltalet le Eder.

Ilayiok le Yakobo

(1 Int 2.1-2)

22 # Enk 49.4 Ore emanya Israel ina kop, nejing'aki Ruben aboitare Bilhah ina apiani e papaai lenye nening Israel ina bae.

23Nera ina kata ilayiok le Yakobo tomon aare. Ore ilayiok le Lea naa: Ruben, (olkikau le Yakobo), o Simion, o Lawi, o Yuda, o Isaakar o Sebulon. 24Ore ilayiok le Raheli naa: Yosef o Benchamen. 25Ore ilayiok le Bilhah enkaisiaayiani e Raheli naa: Dan o Naftali. 26Ore ilayiok le Silpa enkaisiaayiani e Lea naa Gad o Asheri. Kulo apa ilayiok le Yakobo ootoikioki ninye te Padan-aram.

Keeya e Isaak

27 # Enk 13.18 Nelotu Yakobo enetii Isaak papaai lenye te wueji neji Mamre, aashu Kiriat-tarba (aa ninye taa eji Hebron), ine apa etamanya Abraham o Isaak. 28Etabaitie ina kata inkolong'i e Isaak ilarin iip o ntomoni isiet. 29Neye ninye, nelo eneiturrurrorre iltung'ana lenyena apa ootuata, etaa oltung'ani moruo oiputakinote nkolong'i, ore ilayiok lenyena Esau o Yakobo nenukaa ninye.

Currently Selected:

Enkiterunoto 35: MBS

Highlight

Copy