Enzũko 21

Eributwa lya Ĩsaka

1Neryo Omwami Mukulu mwibuka Sara ngoko abũga, neryo Omwami Mukulu mwakolera Sara ngoko amubwira. 2Neryo Sara mwaheka obukule, mwabutira Abrahamũ yʼomugala iniamabikekeluha, oko mugulu ogo Nyamuhanga amubwira. 3Neryo Abrahamũ mwahula erĩna lyʼomugala oyo Sara amubutira, mo Ĩsaka. 4Neryo Abrahamũ mwabanĩa mugala wuwe Ĩsaka omugulu abya wʼebiro munani, ngoko Nyamuhanga amuhana. 5Neryo Abrahamũ abya wʼemyaka erĩgana omugulu Ĩsaka mugala wuwe abutawa. 6Neryo Sara mwabũga ati, Nyamuhanga amaleka inaseka, nʼobuli mundu ũkowa asyaseka haguma nage. 7Kandi mwabũga ati, Ko nindi wangabũgĩre na Abrahamũ ati, Sara asyongya abana kwehĩ? Nĩkwa nabirimubutira mugala omo bũsyakulu buwe.

Erihigwa lya Hagarĩ na mugala Ĩsmaelĩ

8Neryo omwana mwakula, kandi mwatsira amabere, neryo Abrahamũ mwakokotya erirya ĩnene ekiro Ĩsaka atsira amabere. 9Neryo Sara mwalangira mugala wa Hagarĩ Omunya Mĩsĩrĩ, oyo abutira Abrahamũ, akasekererya. 10Kyaleka Sara iniabwira Abrahamũ ati, Uhige omukobe wʼobũkalĩ oyo, na mugala wuwe, kusangwa omugala wʼomũkalĩ mukobe siendisyalya omwandu haguma na mugala wage Ĩsaka. 11Omwatsi oyo mwabya wʼobũlĩge omo meso wa Abrahamũ busana nʼomugala wuwe. 12Neryo Nyamuhanga mwabwira Abrahamũ, ati, Suleke kikabya bũlĩge omo meso wawe busana nʼomũlwana, na busana nʼomũkalĩ mukobe wawe. Ebyosĩ ebyo Sara akakubwira, uhulikirire omulenge wuwe, kusangwa abana ba Ĩsaka bo basyahulwa mo bana bawe. 13Omugala wʼomũkalĩ mukobe nibya nasyamuyira mo kihanda, kusangwa naye ni mwana wawe. 14Neryo Abrahamũ mwahangana omo ngyakya-ngyakya, mwĩmya obundu nʼakasya kʼamagetsi, mwahabyo uku Hagarĩ, mwahĩrabyo oko kitigo kiwe, nʼomwana, neryo mwamuha olugendo. Naye mwagenda, mwaganga-ganga omo mbwarara yʼeBerĩ-seba. 15Nʼamagetsi awabya omo kasya mwahwamo, neryo mwahĩra omwana omwisi wʼekisaka kiguma. 16Neryo mwagenda mwĩkala ahisi eyisirya hake, haraha nʼaho musoha wʼobuta angaguswa, kusangwa abũga ati, Sinyilole oko luholo lʼomwana. Neryo mwĩkala eyisirya kwiye, mwasumba omulenge wuwe, mwalira, 17Neryo Nyamuhanga mowa omulenge wʼomũlwana akalira, nʼomũlaĩka wa Nyamuhanga erĩlũa elubula mwabirikira Hagarĩ, neryo mwabũga naye ati, Wamakwakĩ Hagarĩ? Sigubahe, kusangwa Nyamuhanga amabĩowa omulenge wʼomũlwana aho ali. 18Hangana, Usumbe omũlwana, umuwateko omo byala byawe, kusangwa nasyamuyira mo kihanda kinene. 19Nĩkwa Nyamuhanga mwalĩbũla ameso wuwe, neryo mwalangira ekitsinga kyʼamagetsi neryo mwagenda, mwũsũlya omo kasya mwʼamagetsi, mwasomya omũlwana. 20Neryo Nyamuhanga mwabya haguma nʼomũlwana oyo. Neryo musuka, kandi mwĩkala omo mbwarara, neryo mwabya mũlasĩ wʼobuta. 21Neryo mwĩkala omo mbwarara yʼeParanĩ. Kandi nyĩnya wuwe mwamũherũkĩrya omũkalĩ omo kihugo kyʼeMĩsĩrĩ.

Erilagana lya Abrahamũ na Abĩmelekĩ

22Neryo mokyabya oko mugulu oyo, Abĩmelekĩ na Fĩkolĩ, omukulu wʼemilondo yiwe, mobabũga na Abrahamũ bati, Nyamuhanga ali haguma nawe omo byosĩ ukakola, 23neryo busana nʼekyo ũnyĩlahĩrĩraye uku Nyamuhanga ko hano ngoko utendisyanyibihira, kutse uku mugala wage, kutse uku mwitsikulu wage, nĩkwa ngʼekibuya nakukolera, nawe wasyanyikolerakyo, nʼoko kihugo ekyo wamabungiramo. 24Neryo Abrahamũ mwabũga ati, Ngandĩlahĩrya. 25Neryo Abrahamũ mwakunga Abĩmelekĩ busana nʼekitehero kyʼamagetsi, ekyo abagombe ba Abĩmelekĩ bahũnga kinya-maka. 26Neryo Abĩmelekĩ mwabũga ati, Sĩnyasĩ oyo wakola ekĩ nga nindi, kutse nawe mutambwira, kutse mondowa omwatsi wakyo, nĩna mũnabwĩre. 27Neryo Abrahamũ mwatwala esyombũlĩ nʼesyonde, mwahasyo Abĩmelekĩ, nʼababiri abo mobahĩralo endagano. 28Neryo Abrahamũ mwahĩra esyotsugutsi sirinda syʼekihangulo aho wasyo. 29Neryo Abĩmelekĩ mwabũga na Abrahamũ ati, Esyotsugutsi sirinda esĩ esyo wahĩra aho wasyo sikakanga bukangakĩ kwehĩ? 30Neryo Abrahamũ mwabũga ati, Esyotsugutsi sirinda esĩ wasyangirirasyo omo byala byage, isyabya erĩtũlago lyage, ngoko indi nĩna ngye natakula ekitehero ekĩ. 31Busana nʼekyo mwahula erĩna lyaho mo Berĩseba kusangwa aho ababiri bosĩ balahĩrĩranaya. 32Neryo mobahĩra endagano eBerĩseba. Neryo Abĩmelekĩ mwahangana na Fĩkolĩ omukulu wʼemilondo yiwe, mobasuba omo kihugo kyʼAbafĩlĩstĩnĩ. 33Neryo Abrahamũ mwahera omuti wʼomũeserĩ eBerĩseba, nʼaho mwabirikiriraho erĩna lyʼOmwami Mukulu, Nyamuhanga Wʼerikota. 34Neryo Abrahamũ mwabungira omo kihugo kyʼAbafĩlĩstĩnĩ ebiro bingi.

Currently Selected:

Enzũko 21: KB80

Highlight

Copy