Enzũko 23

Erihola lya Sara nʼerigula ahʼamasinda

1Sara mwabyaho emyaka erĩgana nʼamakũmĩ abiri nʼeyirinda. Eyĩ ye myaka yʼeribyaho lya Sara. 2Na Sara mwaholera eKĩrĩatĩ-araba. Eyo ye Hebũronĩ, omo kihugo kyʼeKanana. Neryo Abrahamũ mwatsũka eririra Sara, nʼerĩsũsũmana busana naye. 3Neryo Abrahamũ mwahangana akalũa embere syʼekĩnda kiwe, neryo mwabũga nʼabana ba Hetĩ, ati, 4Ĩngye indi owʼehandi, indi mubunga ewenyũ. Mumbe obukungu omo katĩkatĩ kenyũ ahʼerita omundu, inatoka erita ekĩnda kyʼomũkalĩ wage erĩlũsyakyo omo meso wage. 5Neryo abana ba Hetĩ mobasũbĩrya Abrahamũ, nʼerimubwira bati, 6Ũtowe, mukama wetu, uwe uli mundu mukulu wa Nyamuhanga ũkwʼĩtwe. Ute ekĩnda kyʼomũkalĩ wawe omwʼisinda eyo ukandiyisoga oko sisinda syetu. Ũkwʼĩtwe sihali oyo wangakukaga eyisinda yiwe erita omũholĩ wawe. 7Neryo Abrahamũ mwahangana, mũnamira abandu bʼekihugo ekyo, abo ba bana ba Hetĩ. 8Neryo mwakanĩa nabo ati, Bwamabya ini bũlengekanĩa bwenyũ erita ekĩnda kyage erĩlũa omo meso wage, mũnyowe, mũnyĩbũlĩraye Efũronĩ mugala wa Zoharĩ, 9iniamba omwangalũ wuwe wʼeMakĩpela, owali oko ndũlĩ yʼeririma liwe. Ambego oko nzwere yago yosĩ, omo katĩkatĩ kenyũ, busana nʼeribya ahʼerita omundu. 10Nĩkwa Efũronĩ abya ĩnĩanĩkere omo katĩkatĩ kʼabana ba Hetĩ. Neryo Efũronĩ mwasũbĩrya Abrahamũ omo matwĩ wʼabana ba Hetĩ, abosĩ bʼomũyĩ, ati, 11Ko bite bitya mukama wage, tahulikirira, eririma namakuhalyo, nʼomwangalũ owali mulyo, ngakuhago; embere syʼabana bʼabandu bage ngakuhago; ute ekĩnda kyawe. 12Neryo Abrahamũ mũnamira ahisi embere syʼabandu bʼekihugo ekyo. 13Neryo mwabũga na Efũronĩ omo matwĩ wʼabandu bʼekihugo ekyo ati, Nĩkwa wamanza, ngakusaba nyiti, Unyihulikirire: ngandikuha enzwere yʼeririma. Ũlĩgeyo, nage nasyata ebĩnda byage byomo. 14Neryo Efũronĩ mwasũbĩrya Abrahamũ, nʼerĩbũga naye ati, 15Mukama wage, umbulikirire. Oluhande lwʼekitaka nĩ lwʼobũgũlĩ bwʼesekelĩ magana ani syʼebĩtsĩpa, esyo nĩkĩ omo katĩkatĩ kage nawe kwehĩ? Neryo ute ekĩnda kyawe. 16Neryo Abrahamũ mowa Efũronĩ. Neryo Abrahamũ mwalengera Efũronĩ ebĩtsĩpa ebyo ahula embere syʼabana ba Hetĩ, esyosekelĩ magana ani syʼebĩtsĩpa, ngʼobũgũlĩ bwʼabatũndĩ.

17Neryo eririma lya Efũronĩ, eriri eMakĩpela, eriri embere syʼeMamore, eririma nʼomwangalũ owabya mulyo, nʼemiti yosĩ eyabya omwʼirima eyabya omo mutano oko mbande syosĩ, moyasohwa itya ndeke, 18busana na Abrahamũ eribya enzĩgalya yiwe embere syʼabana ba Hetĩ, nʼembere syʼabosĩ abʼomũyĩ wuwe. 19Enyũma wʼaho, Abrahamũ mwata Sara mũkalĩwe yʼomo mwangalũ wʼomwʼirima lyʼeMakĩpela embere syʼeMamore, eyo nĩ Hebũronĩ, omo kihugo kyʼeKanana. 20Nʼabana ba Hetĩ mobaha Abrahamũ yʼeririma nʼomwangalũ owali mulyo, eribya ahʼerita abandu buwe.

Currently Selected:

Enzũko 23: KB80

Highlight

Copy