Enzũko 26

Nyamuhanga akatsumula Ĩsaka

1Neryo mohabya enzala omo kihugo, enzala butsira eyo eyʼerĩmbere oko biro bya Abrahamũ. Neryo Ĩsaka mwaya ewa Abĩmelekĩ Omwami wʼAbanya Fĩlĩstĩnĩ, erĩhĩka eGerarĩ. 2Neryo Omwami Mukulu mwamuhulukira, mwabũga naye ati, Siwandagalire eMĩsĩrĩ; Wĩkale omo kihugo ekyo nasyakubwira. 3Ubunge omo kihugo ekĩ, nage nasyabya haguma nawe, nʼerikutsumula, kusangwa ukʼuwe nʼoko bana bawe nasyabaha ebihugo byosĩ ebĩ, kandi nasyahanganĩa erĩlahĩrya eryo nalahĩraya uku tata wawe Abrahamũ. 4Nage nasyakanyĩrĩrya abana bawe ngʼesyongũnũnũ syʼelubula, kandi nasyaha oko bana bawe ebihugo byosĩ ebĩ. Kandi busana nʼabana bawe ebihanda byosĩ byʼekihugo byasyatsumulwa. 5Kusangwa Abrahamũ mowa omulenge wage, nʼerĩteya ebyo namulayira, nʼamategeko wage, nʼebihano byage nʼemigambo yage.

Amatebo wa Ĩsaka

6Neryo Ĩsaka mwĩkala eGerarĩ. 7Omugulu abalume bayo bamũbũlaya busana nʼomũkalĩ wuwe, Ĩsaka mwabũga ati, Iye ni mwali wetu; kusangwa ubaha erĩbũga ati, Oyũ nĩ mũkalĩ wage; ati, Abalume baho bakasyanyĩta busana na Rebeka kusangwa abya mubuya erilolwako. 8Enyũma wʼaho abere abĩkalayo biro bingi, Omwami bĩmelekĩ mwaleberya omo lĩdĩrĩsa, neryo mwalangira Ĩsaka iniakatsanga na Rebeka mũkalĩwe. 9Neryo Abĩmelekĩ mwabirikira Ĩsaka mwabũga ati, Lebaya, kwenene iye nĩ mũkalĩ wawe. Nawe mũtabũga uti ni mwali wenyũ kwehĩ? Neryo Ĩsaka mwamũsũbĩrya ati, Kusangwa nabũga nyiti, Ngasyakwa busana naye. 10Neryo Abĩmelekĩ mwabũga ati, Ekĩ nĩkĩ ekyo wabiritukolera kwehĩ? Omuguma gʼoko bandu angabere amagotsera na mũkalĩ wawe, kumbe wabirituletera omusango. 11Kyaleka Abĩmelekĩ iniahana abandu bosĩ ati, Oyo wasyatũla oko mundu oyũ, kutse uku mũkalĩwe, kwenene asyĩtwa.

Omũyĩsa wa Ĩsaka nʼeritsurwa

12Neryo Ĩsaka mwahera esyombuto omo kihugo ekyo, neryo mwagesa nʼomũyĩsa ngendo ĩgana oko mwaka oyo. Kandi Omwami Mukulu mwamutsumula. 13Omundu oyo mwabya muteke, mwatomekerwa kandi nʼakandi, mwakamaha kũndũ. 14Kusangwa mwabya nʼebihangulo byʼesyombũlĩ, nʼebihangulo byʼesyonde, nʼabagombe bangi nʼAbafĩlĩstĩnĩ mobamutsura. 15Nĩkwa ebitehero byosĩ ebyo bagombe ba tata wuwe batakula oko biro bya Abrahamũ tata wuwe, Abafĩlĩstĩnĩ ĩbamabĩrĩbabyo nʼerĩũsũlya mubyo mʼomutaka. 16Neryo Abĩmelekĩ mwabũga na Ĩsaka ati, Ũlũe omo katĩkatĩ ketu. Kusangwa uli nʼamaka kwilaba twe kutsibu. 17Neryo Ĩsaka mwalũaho, mwahĩmba ekilaliriro omo musya wʼeGerari, neryo mwĩkalaho.

Ĩsaka amatsũka eritakula ebitehero

18Neryo Ĩsaka mwaswatakula ebitehero byʼamagetsi ebyo batakula oko biro bya Abrahamũ tata wuwe, kusangwa Abafĩlĩstĩnĩ ĩbabĩrĩrĩbabyo enyũma wʼoluholo lwa Abrahamũ. Neryo mwahulabyo omo mena ago tata wuwe alukabyo. 19Nĩkwa abagombe ba Ĩsaka mobatakula omo musya, mobeyaho eyĩsoko yʼamagetsi. 20Neryo abalĩsya bʼeGerarĩ mobalwa nʼabalĩsya ba Ĩsaka, bati, Ekitehero ni kyetu. Neryo mwahula erĩna lyʼekitehero ekyo mo Ezekĩ, kusangwa balwa naye. 21Kandi mobatakula ekindi kitehero, mobalwirakyo nibya neryo mwahula erĩna lyakyo mo Sĩtĩna. 22Neryo mwalũayo, mwatakula ekindi kitehero, nĩkwa mobataswalwirakyo neryo mwahula erĩna lyakyo mo Rehobotĩ kusangwa ati, Lino Omwami Mukulu abiritubanira omwanya, neryo twasyakanya omo kihugo.

23Neryo mwahetukira eBerĩseba akalũa eyo. 24Neryo Omwami Mukulu mwamuhulukira omo kiro ekyo, mwabũga ati, Ĩngye indi Nyamuhanga wa Abrahamũ, tata wawe. Sigubahe, kusangwa ĩngye indi haguma nawe. Nasyakutsumula, nʼerĩkanyĩrĩrya abana bawe busana nʼomugombe wage Abrahamũ. 25Neryo mwahĩmbaho ekiherero, kandi mwabirikira oko lĩna lyʼOmwami Mukulu, neryo mwahandaho ehema yiwe. Nʼaho abagombe ba Ĩsaka mobatakula ekitehero.

Endagano ya Abĩmelekĩ na Ĩsaka

26Neryo Abĩmelekĩ mwalũa eGerarĩ, mwahĩka uku Ĩsaka, haguma na Ahũzadĩ oyukamuhana, na Fĩkolĩ, omukulu wʼemilondo yiwe. 27Neryo Ĩsaka mwabũga nabo ati, Busana nakĩ mũkambĩkako, Ĩnywe mũnyĩkwĩre obusu, Ĩnywe mwambiga omo katĩkatĩ kenyũ kwehĩ? 28Neryo mobabũga bati, Motwalangira ndeke ngoko Mwami Mukulu abya haguma nawe; motwabũga tuti, Lino habye erĩlahĩrya omo katĩkatĩ ketu, ketu nawe, neryo tulagane haguma nawe, 29uti, Siwendisyatukola nabi, ngoko tũtakũtũlako, kandi ngoko tutakukolera kindu kye nʼekibuya, nʼerikutsindika nʼobuholo. Lino uli mutsumulwa wʼOmwami Mukulu. 30Neryo mwakokoteryabo erirya ĩnene, mobalya mobapũlya. 31Neryo mobahangana omo ngyakya-ngyakya mobalahĩrya ogundi oko gundi. Neryo Ĩsaka mwahamulabo, mobagenda nʼobuholo, nabo mobalũaho nʼobuholo. 32Neryo oko kiro ekyo kisa-kisa abagombe ba Ĩsaka mobasa, mobamubwira busana nʼekitehero ekyo batakula, mobabũga, bati, Twabiribana amagetsi. 33Naye mwahulakyo mo Siba; kyaleka erĩna lyʼomũyĩ oyo iryabya Berĩ-seba erĩhĩka na mũnabwĩre.

Abakalĩ ba Esaũ

34Omugulu Esaũ abya wʼemyaka makũmĩ ani mwahĩkya Yũdĩtĩ mwali wa Berĩo Omũhĩtĩ, na Basematĩ mwali wa Elonĩ Omũhĩtĩ. 35Nʼababiri abo mobĩta Ĩsaka na Rebeka bʼobũlĩge omo mutima.

Currently Selected:

Enzũko 26: KB80

Highlight

Copy