Amǝ Mishan 5

Hananiya andǝ Safira

1Sǝ ɓeɓwa nakam lullǝi ama Hananiya. Yì andǝ mami Safira ka à mak nzali malea. 2Sǝ nǝ eare mala mami, sǝ san boalo mǝnana à mangŋa nzali nǝi ka, sǝ warinǝ cili aban amǝ'mishan, kya pea wia.

3Pǝlǝa Bitǝrus banggi wi ama, “Hananiya, palang sǝ a eare Shetan lumsǝ ɓabumo, gandǝa a ne Bangŋo Mǝfele nyir, sǝ a tsǝk cili boalo mǝnana a kumo aɓa mak nzali ka a pangŋǝna mo nǝi?” 4Nzali nî ka, mona sǝ a me re? Sǝ anzǝm mǝnana a mangŋǝni ka, boale kat ka mona a nǝ pangŋǝna gir mana kat a earkiyice ka nǝi. Palang sǝ a pak ɗenyicau mala pak mǝnia yì gir ka? Sǝ sǝm nda mǝnana a bangga sǝm nyir ka ɗang. Ɓakuli na mǝnana a ne wi nyir ka.

5Lang Hananiya nǝ̀ ok cau mǝno ka, kara kpa a nzali, wu. Sǝ aɓwana mana kat à ok cau mǝnia ka, gir nî pea wia ɓangciu kǝrkǝr. 6Pǝlǝa alaggana marǝki luí, à kya ci a tūli.

7A nzǝmi kǝla abúpwari tārú ka, mami yiu, pànǝ sǝlǝe mala gir mǝnana kum burri ka ɗang. 8Bitǝrus pǝlǝa ɗi ama, “Banggam, mǝnia ka nda kǝ boalo kat mǝnana à pa wun ace nzali mǝnana wu me ka le?”

Pǝlǝa pa eare ama, “E, anggo sǝ sǝm me.”

9Pǝlǝa Bitǝrus banggi wi ama, “Palang sǝ wun kǝm wu eare, wu pak ɗenyicau mala karǝki Bangŋo mala Ɓakuli? Sǝni, kusǝ alaggana mǝnana à tsǝk burrio a tūli ka, à nda à cam a kunɓala ka, à nǝ̀ yia twalo gbal!”

10Àkǝ̀ banì, kpa a ɓadǝm Bitǝrus wu. Pǝlǝa alaggana man kutio, sǝ lang à yì kumi wu na ka, à twali à kya ci abanarǝia andǝ burri. 11Pǝlǝa ɓangciu mǝgule sulǝ amur ikǝlisiya kat, andǝ aɓwana kat mǝnana à ok ce mǝnia yì gir ka.

Amǝ'mishan pakkia agir-ndali andǝ agir-gyambǝliban

12Amǝ'mishan pakki agir-ndali andǝ agir-gyambǝliban pas aɓalǝ aɓwana. Sǝ amǝkpata Yesu kat pak ka à kǝ kpapi a Ndàmǝgule mala Ɓakuli a buban mǝnana à kǝ tunǝi ama Tara mala Solomon ngga. 13Acili aɓwana ka, ɓangciu pakkia wia, à gandǝ kutio aɓalǝ amǝkpata Yesu ɗang, sǝ aɓwana kat ka à twal amǝkpata Yesu nǝ gulo kǝrkǝr.

14Kat andǝ mǝno ka, aburana andǝ amamǝna pas camarǝ paɓamuria aban Mǝtalabangŋo. Mǝnia ka tsǝa amur lakki malea. 15Nda gir mǝnana tsǝa, sǝ aɓwana pusǝ amǝkwano à nongsǝia a girǝi anjar aɓalǝ aleso andǝ akala, ace mǝnana ɓǝ̀ Bitǝrus nǝ̀ yia kuti ka, ɓǝ̀ yilǝmi ɓǝ̀ sulǝ amur aɓea aɓwana atea. 16Aɓwabunda purki arǝ amuna la pas mala Urǝshalima, à yiu nǝ amǝkwano andǝ aɓwana mǝnana akukwar na a rǝia ka. Sǝ yia kat ka à kum twalban mala akwano malea.

À pe amǝ'mishan tanni.

17Pǝlǝa Pǝris mǝgule andǝ aɓwana mǝnana ate, mǝnana à nda bui mala amǝ Saduki ka, à lo nǝ mɓali kǝrkǝr arǝ amǝ'mishan. 18Pǝlǝa à bwal amǝ'mishan, à oasǝia a ndàkurban. 19Sǝ nǝ dú mǝno ka, mǝturonjar mala Mǝtalabangŋo mǝn a kun ndàkurban, pusǝ amǝ'mishan a nza, sǝ banggia wia ama, 20“Wu kyane, wu kya came a Ndàmǝgule mala Ɓakuli, wu banggi aɓwana kat cau mala mǝnia yì bǝsa yilǝmu ka.”

21Pǝlǝa amǝ'mishan ongŋǝna anggo ka, à kutia Ndàmǝgule mala Ɓakuli nǝ budǝmbari, sǝ à tita kanigir.

Lang Pǝris Mǝgule andǝ aɓwana ate yina ka, à tunǝ amǝkurcau mala amǝ Yahudi aɓa kpapi, sǝ à tasǝ ban a Ndàkurban ace mǝnana ɓǝa kya yiu nǝ amǝ'mishan a ɓadǝmbǝia ka. 22Lang aɓwana mana à turia ka à yiu a ndàkurban ngga, à yì kum amǝ'mishan a ndàkurban ɗang. Pǝlǝa à nyare aban kpapi a kya bangce, ama, 23“Lang sǝm warina a ndàkurban ngga, sǝm nggea kum akun ndàkurban ngga à kumlǝnia, sǝ à ɓun kǝ ɓe atea ɗang. Sǝ amǝyal ndàkurban gbal ka, à nda aban came malea, sǝ lang sǝm loasǝ kunakurǝm ngga, sǝm kum kǝɓwa a ɓalǝi ɗang!” 24Lang agbani pǝris andǝ ɓwamǝgule mala amǝyal Ndàmǝgule mala Ɓakuli o anggo ka, gir nî pea wia ndali, nǝ gir mana kum amǝ'mishan ngga, andǝ gir mana nǝ̀ kpate ka.

25Pǝlǝa ɓeɓwa yiu abania sǝ yi banggia wia ama, “Wu kwaki kir wun! Aɓwana mana wu oasǝia a ndàkurban ngga, à nda a Ndàmǝgule mala Ɓakuli aban kani aɓwana gir!” 26Pǝlǝa ɓwamǝgule mala amǝyal Ndàmǝgule mala Ɓakuli puro wario andǝ amǝte, à kya yiu nǝ amǝ'mishan. À pakkia wia ɓe kǝgir nǝ rǝcandǝa ɗang, acemǝnana ɓangciu kǝ pakkia wia ama, aɓwana nǝ̀ ɓukkia nǝ atali.

27Pǝlǝa à kuti nǝ amǝ'mishan à yì tamsǝia a ɓadǝm amǝkurcau, sǝ Pǝris Mǝgule pakkia wia ɗiban, 28ama, “Sǝm nunkir wun nǝ rǝcandǝa ama, wu kǝa na ama, wu nǝ̀ kanigir nǝ lullǝ ɓwa man ɗǝm ɗang. Ado ka wu tsǝngŋǝna kanigir ma'wun akina ban kat aɓa Urǝshalima, nyar ɗǝm ngga, wu kǝ earce tsǝa ɓǝa na ama, sǝm nda sǝm wal Yesu ka!”#5:28 Ɓalli gbal aɓa: Mat 27:25.

29Pǝlǝa Bitǝrus andǝ aɓea amǝ'mishan eare ama:

Sǝm ngga, sǝm nǝ̀ oki Ɓakuli, amur mǝnana sǝm nǝ̀ oki ɓwapǝndǝa ka. 30Ɓakuli mala aká sǝm na loasǝ Yesu a ɓembe, anzǝm mǝnana wu gballì amur nggun-gangndi, wu wal-luí 31Nda Ɓakuli loasǝi, dumsǝi a buno mala gulo, a bui mǝli, nda sǝ duk Ɓwamǝgule andǝ Mǝ'amsǝban ngga. Ɓakuli pak mǝnia yì gir ka ace pe amǝ Isǝrayila dǝmbǝu mala pwanzali ɓǝa pǝlǝ nzǝmia arǝ acauɓikea malea, sǝ nǝ̀ twalia wia banì. 32Sǝm nda ka aɓwana mǝnana sǝm sǝni nǝ mǝsǝ sǝm, nda sǝm nggǝ nakun amǝnia yì agir ka, sǝ anggo gbal sǝ Bangŋo Mǝfele, mǝnana Ɓakuli pani aɓwana mǝnana à kǝ kpata cau male ka.

33Lang amǝkurcau kat ongŋǝna mǝno yì cau ka, bumia lul kǝrkǝr, sǝ à lo ama, à nǝ̀ wal-luia. 34Pǝlǝa ɓeɓwa nakam aɓalǝia, ɓwa Farisi, mǝnana à tunǝki ama Gamaliyel, malǝm Nggurcau mala Musa, mǝnana ɓwapǝndǝa kat kǝ pe wi gulo ka. Lo came aɓalǝia, sǝ tsǝa ɓe amǝ'mishan pur a nza bǝti. 35Pǝlǝa banggi kpapi ama:

Wun amǝ'eambǝam, amǝ Isǝrayila, wu ɓal ɓabum wun nǝ gir mǝnana wu kǝ earce wu nǝ̀ pakki aɓwana man ngga. 36Wu nǝ̀ gandǝ ɗenyi ama, ɓwa kǝla Tiudas, pur a pwaryan kǝ na ama, yì ka, ɓwamǝgule na, yi mǝnana aɓwana gbǝman-ine pǝlǝ amǝkpate ka. Sǝ à yì wali wǔ, amǝ kpate gbal ka à mesǝke, sǝ cau male yi wú anggo. 37A nzǝmi ka, Yahuda, ɓwa Galili yi lo gbal, a baku mala ɓalban. Yi nun aɓwana pas ate, yì gbal ka à yì wali wǔ, sǝ amǝte mesǝki kat.

38Ace mani ka, mǝ ndaban bangga wun, wu kǝa na ama, wu nǝ̀ pakki aɓwana man ɓe kǝgir ɗang. Wu nyia anggo! Acemǝnana gir mana yia ka à ne, sǝ à pè ka, ɓǝ̀ pè mala ɓwapǝndǝa na ka, nǝ̀ kuti anggo, 39sǝ ɓǝ̀ pè mala Ɓakuli na yinǝ gir man ngga, wu pa wu nǝ̀ gandǝia ɗang, ɓǝa na raka, wu nǝ̀ ngga kum ɓamur rǝ wun aban munǝo arǝ Ɓakuli!

Pǝlǝa kpapi kat kpata kwarkiru mala Gamaliyel, 40sǝ a tunǝ amǝ'mishan ɓǝa kutio abania, sǝ à nunkiria, à kwea. Pǝlǝa à nea wia ama, ɓǝa kǝa na ama à nǝ̀ ɓǝsǝlǝ na cau nǝ lullǝ Yesu ɗǝm ɗang. Pǝlǝa à nyia ɓǝa o anggo.

41Lang amǝ'mishan nying bania ka, à pak banɓoarnado, acemǝnana Ɓakuli sǝnǝnia ama à karǝna nutanni ace lullǝ Yesu. 42Nda do ama ko aya pwari ka, ko a Ndàmǝgule mala Ɓakuli, ko arǝ aɓala, amǝ'mishan ngga, à lidǝmbǝa nǝ kanigir andǝ hama nǝ Cau Amsǝban ama, Yesu nda Kǝrǝsti, Mǝ'amsǝban.

Currently Selected:

Amǝ Mishan 5: mbu

Highlight

Copy