Yohana 5

Yesu twali gbakǝre ban rǝkwana

1Anzǝm man ngga, Yesu wario a Urǝshalima a ɓe lamsan mala amǝ Yahudi. 2Aɓa Urǝshalima ka, ɓe guguri nakam a Kun njar mala anzur mǝnana à tunǝki nǝ kun mala amǝ Yahudi ama Beseda ka. À gumbǝli nǝ atara tongno. 3Aɓalǝ amǝnia yì atara ka sǝ amǝ rǝkwana pas, ante, andǝ agbakǝre andǝ aɓwana mǝnana aɓea barea wu ka, à kǝ nongŋo [aban kundǝ zurǝì mùr.] 4Acemǝnana arǝ aɓea apwari ka, mǝturonjar mala Mǝtalabangŋo kǝ zurǝi mùr. Anzǝm zurǝi mùr ka, mǝkwano mǝnana ak dǝmbǝa kutio a mùr ka, ɓǝ̀ ya ulang kwano ndanǝi ka, nǝ̀ mal kat. 5Ɓe ɓwabura nakam abanì, pangŋǝna apǝlǝa lumi-tārú-bwamdǝ-tongno-nong-tārú aban nongŋo nǝ rǝkwana. 6Yesu sǝni aban nongŋo, sǝ sǝlǝna ama sauwuna aɓa rǝkwana male, pǝlǝa ɗi ama, “A kǝ́ earce ɓǝa twalo ban rǝkwana mo le?”

7Mǝkwano ear ama, “Ɓwamǝgule, ǝn panǝ kǝɓwa a muram, mǝnana ɓǝa zurina mùr ka nǝ̀ ramtam aɓa guguri ka ɗang. Ɓǝ̀ mǝ nda ban ɓariki mǝ nǝ kuti ka, kara ɓeɓwa nǝ̀ akàm dǝmbǝa.”

8Yesu ne wi ama, “Lo, twal kala mo o!” 9Àkǝ̀ banì rǝkwana male malâ, lo twal kala male aban o.

Pwari mǝnana à pak mǝnia yì gir ka pwari Sabbat na, pwari usǝlǝo mala amǝ Yahudi. 10Pǝlǝa aɓwana-mǝgule mala amǝ Yahudi ne ɓwa mǝnana à twali wi ban rǝkwana ka ama, “Yalung ngga pwari usǝlǝo na, Nggurcau ma'sǝm eare ama wu twal kal nongŋo mo a pwari usǝlǝo ɗang.”#5:10 Ɓalli gbal aɓa: Nehe 13:19; Ir 17:21.

11Pǝlǝa nea wia ama, “Ɓwa mǝnana twalam ban rǝkwana ka nǝ̀ nam ama, mǝ twal kala mem mǝ o.”

12Sǝ à ɗi ama, “Yana ɓwe na no ama wu pak mǝnia yì gir ka?”

13Ɓwa mǝnana à twali wi ban rǝkwana ka surǝ yana nda Yesu ɗang, acemǝnana ɓwapǝndǝa lakki pas abanì, sǝ Yesu kongŋǝna aɓalǝ aɓwana.

14Anzǝm mani ka Yesu kumi aɓa Ndàmǝgule mala Ɓakuli, sǝ ne wi ama, “Sǝni ado ka à twalǝno ban rǝkwana, nying pakki acauɓikea, ɓǝ̀ ana raka gir mǝɓane mǝnana kuti mǝno ka nǝ̀ kumo.” 15Pǝlǝa ɓwe o kya ne aɓwana-mǝgule mala amǝ Yahudi ama Yesu nǝ̀ twali wi ban rǝkwana male. 16Pǝlǝa yia amǝ Yahudi ka à tsǝk Yesu a dǝmbǝa, acemǝnana twalban rǝkwana a pwari Sabbat, pwari usǝlǝo. 17Yesu banggia wia ama, “Ko aya pwari ka Tárram na mur turo, ace mani ka dumǝna púp ama, mim gbal ka mǝ nǝ pak turo.”

18Ace mani ka, aɓwana-mǝgule mala amǝ Yahudi ɓariki kǝrkǝr ama à nǝ̀ wal-lú Yesu, acemǝnana yàl nzongcau mala Sabbat nǝmurǝì ɗang, tunǝ Ɓakuli ama Tarrí. Anggo ka ndaban karǝ ɓamuri arǝ Ɓakuli.

Rǝcandǝa mala Yesu Muna mala Ɓakuli

19Yesu earia wia ama:

Ən nggǝ na wun mǝsǝcau, pà mǝ nǝ pak kǝgir aɓa ɓamuram ɗang. Kǝ gir mǝnana ǝn sǝn Tárram Ɓakuli pak ka, nda ǝn pakkiyi ka. Gir mǝnana kat Tárram pak ka, nda mana ǝn pakkiyi ka. 20Ɓakuli Tarrû ka kǝ earcem mim Muni, sǝ kǝ lǝmndǝam agir mǝnana kat yì nǝ nggearǝì pakkiyi ka. Yale nǝ lǝmndǝam agir mǝgulke mǝnana à kuti man ngga, sǝ wun kat wu nǝ̀ nggǝ ndalǝki. 21Kǝla mǝnana Ɓakuli Tárram kǝ loasǝ alú sǝ kǝ pea wia yilǝmu ka, anggo sǝ mim Muni ka mǝ nǝ pea aɓwana mǝnana ǝn earce mǝ nǝ pea wia ka yilǝmu.

22Tárram nǝ ɓamuri ka kǝ ɓashi kǝɓwa ɗang, panam mim Muni rǝcandǝa mala ɓashi kat, 23ace mǝnana ɓǝ̀ aɓwana kat pam gulo kǝla mǝnana à pe Tárram Ɓakuli ka. Ɓwa mǝnana kat pam gulo raka, pà aban pê Tárram mǝnana tasǝam ngga gulo ɗang. 24Mǝ nda ban na wun mǝsǝcau, ɓwa mǝnana kat kǝ ok cau mem, sǝ kǝ pa ɓamuri aban Tárram mǝnana tasǝam ngga, ndanǝ yilǝmu mǝnana masǝlǝate pà kàm raka. Ɓashi pà nǝ̀ sulǝo amuri ɗang, yì ka, angŋǝna dǝmbǝa yàlǝ́nì lú, kutina a yilǝmu.

25Mǝ nda ban na wun mǝsǝcau, pwari na ban yiu, yale pwari nì pangŋǝna, mǝnana aɓwana mana alú na ka à nǝ̀ ok gi Muna mala Ɓakuli, sǝ aɓwana mǝnana à o ka, à nǝ̀ long nǝ yilǝmu. 26Kǝla mǝnana Tárram Ɓakuli nda tǝr yilǝmu ka, anggo gbal panam mim Muni ɓǝ̀ ǝn duk tǝr yilǝmu. 27Sǝ ɗǝm ngga panam rǝcandǝa mala ɓashi, acemǝnana mǝ nda Muna mala Ɓwa.

28Wu kǝa ndali arǝ man ɗang, pwari na kǝ yiu ka, mǝnana alú mana aɓalǝ aɓembe malea ka, à nǝ̀ ok gi Muna mala Ɓwa 29sǝ à nǝ̀ puri ɓalǝ aɓembe. Aɓwana mǝnana à pak mǝɓoarne ka, à nǝ̀ lo à nǝ̀ kutia yilǝmu, sǝ aɓwana mǝnana à pak mǝɓane ka, à nǝ̀ lo sǝ à nǝ̀ kum ɓashi.#5:29 Ɓalli gbal aɓa: Dan 12:2.

30Pa mǝ nǝ pak ɓe kǝgir aɓa rǝcandǝa mem ɗang. Ən nggǝ pak ɓashi mem à pě mǝnana Ɓakuli banggam ɓǝn nggǝ pe ka. Ace mani ka, ɓashi mem na amur njari, acemǝnana ǝn pa aban ɓariki mǝ nǝ pak gir mǝnana ǝn earkiyice ka ɗang. Kǝ nggearǝ mǝsǝrǝ gir mǝnana Tárram mana turam ngga earkiyi ce ka, nda ǝn nggǝ pe ka.

31Ɓǝ̀ ǝn na cau amur ɓamuram ngga, cau mem ka, à pà nǝ̀ é kǝla mǝsǝcau ɗang. 32Sǝa ma ɓeɓwa na kam mǝnana kǝ nakunam ngga, sǝ ǝn sǝlǝna ama acau mǝnana nea a muram ngga mǝsǝcau na.

33Yohana Mǝbatisǝma nda ɓwa mǝnana wu tasǝ amǝturonjar ma'wun abani, sǝ na wun mǝsǝcau a muram ngga.#5:33 Ɓalli gbal aɓa: Yoh 1:19-27; 3:27-30. 34Kat andǝ amani ka, ǝn pa aban came amur nakun mala ɓwamǝpǝnde ɗang; mǝ nda ban na anggo ace mǝnana wun ngga ɓǝ̀ wu kum auwa. 35Yohana ka nda kǝla pitǝla mana kǝ earke sǝ kǝ ta ka, sǝ wun ngga wu eare wu nǝ̀ pak banɓoarnado zuku arǝ tǎlaban male.

36Sǝ mǝ ndanǝ mem yi nakun a muram mǝnana kuti mana Yohana na a muram ngga. Agir mǝnana ǝn nggǝ pakkia ka, aturo mǝnana Tárram pam ama ɓǝn pakkia ka à nda. À kǝ̀ nakunam, sǝ à kǝ̀ lǝmndǝ ama Tárram nǝ turam.

37Sǝ Tárram mǝnana tasǝam ngga náná kunam. Wu malaká ok gi àkǝ̀ pwari ɗang, sǝ wu malaká sǝn ɓamǝsǝi gbal ɗang.#5:37 Ɓalli gbal aɓa: Mat 3:17; Mar 1:11; Luk 3:22. 38Sǝ wun ngga nggearǝ cau male pa a ɓabum wun ɗang, acemǝnana wu earnǝ mim mǝnana Ɓakuli tasǝi ka ɗang.

39Wu kǝ ɓalla andǝ mǝnggi ɓa Malǝmce, acemǝnana wu kǝ sǝni kǝla a ɓalǝi sǝ wu nǝ̀ kum yilǝmu mǝnana málá male pà kàm raka, sǝ aman yì acau wu ɓalkiyi ka, mǝ nda à nakiyi cau a muram ngga. 40Kat andǝ amani ka, wu ɓinǝ yiu a banam ace kum yilǝmu.

41Ɓwangsǝban mala ɓwapǝndǝa na ǝn alkite ka ɗang. 42Sǝ mim ngga ǝn surǝna rǝ wun, ɗǝm ngga ǝn sǝlǝna nǝma wu pànǝ earce Ɓakuli a ɓabum wun ɗang. 43Ən yiu aɓa lullǝ Tárram, sǝ wun ngga wu em ɗang, sǝ ɓǝ̀ ɓeɓwa yiu aɓa rǝcandǝa male ka wu nǝ̀ earnǝi, wu nǝ̀ é. 44Lang sǝ wun nǝ̀ earnǝ mim, yi mǝnana wu kǝ earce ak ɓwangsǝban arǝarǝ wun, sǝ wu kǝ ɓariki ama wu nǝ̀ kum ɓwangsǝban aban ɓwa mǝnana yì mwashat nda Ɓakuli ka ɗang?

45Wu kǝa sǝni kǝla mǝ nda ɓwa mǝnana nǝ̀ oasǝkimur wun aban Tárram ka ɗang. Musa mǝnana wu tsǝkɓalǝ wun a rǝì ka, nda kǝ ɓwa mǝnana nǝ̀ oasǝki mur wun ngga. 46Ɓǝ̀ kàngkàng wu earǝna nǝ Musa ka, ɓǝ́ wu earǝna nǝ mim, acemǝnana mǝ nda ɓwa mǝnana Musa gilǝ cau a muram ngga. 47Sǝ mǝnana wu ginǝ earnǝ gir mǝnana Musa gilǝ ka, lang sǝ wu nǝ̀ earnǝ gir mǝnana ǝn na ka?

Currently Selected:

Yohana 5: mbu

Highlight

Copy