Luka 1
1
Tita cau
1Aɓwana pas twalî ɓamuria à nǝ̀ gilǝ cau amur agir mǝnana Ɓakuli pea aɓalǝ sǝm ngga. 2Cau mǝnana à gilǝ ka nda kǝ̀ mǝnana à oe a kun aɓwana mǝnana à sǝn agir nì nǝ mǝsǝia a nggea dǝmbe, sǝ à hamnǝ ce ka. 3Ace mani ka, we Ɓwamǝgule Tiyofulus, ǝn bǝl atǝ́r ace pepe, sǝ ǝn sǝni ka ɓoaro ɓǝ̀ ǝn gilǝo wia kǝla mǝnana à kwaɗi rǝia ka. 4Ən pak mǝnia ka ace mǝnana wu surǝ mǝsǝcau mala agir mǝnana à kanio ka.
Mǝturonjar bangcau amur ɓǝl Yohana Mǝbatisǝma
5A do'nza mala Hirǝdus, murǝm mala nzali Yahudi ka, ɓe pǝris nakam lullǝi ama Zakariya a bui mala Abija. Mami ka lullǝi ama Alisabatu; yì gbal ka nda a tau mala Haruna. 6Yia kǝm ngga amǝ'ɓealɓoarna na a ɓadǝm Ɓakuli. À kǝ kpata anzongcau andǝ angguracau mala Mǝtalabangŋo, à eare ama à nǝ̀ ɓwarkio àkǝ̀ ɓè ɗang. 7Sǝ yia ka ko à pànǝ muna ɗang, acemǝnana Alisabatu ka nkombi na, sǝ yia kǝm ngga à ena.
8A ɓè pwari mwashat Zakariya na ban pak turo male mala Pǝris a ɓadǝm Ɓakuli, aɓalǝ anonggeo mǝnana tau malea na nǝ turo ka. 9A kane mala kuncau mala turo pǝris ka, Zakariya na twalban kpa amuri nǝ̀ kutio aɓa Ndàmǝgule mala Ɓakuli nǝ̀ loasǝ yele-mǝ'rǝm-ɓoarne, ace pa ɓoro aban Ɓakuli ka. 10Lang pwari loasǝ yele ace pa ɓoro aban Ɓakuli karǝna ka, ɓwapǝndǝa rambǝa a nza aban pak hiwi.
11Mǝturonjar mala Ɓakuli yi pusǝrǝi abani, cam nǝ bu-mǝli mala gyangŋan mala loasǝ yele-mǝ'rǝm-ɓoarne. 12Lang Zakariya loasǝ mǝsǝì sǝni ka, ɓangciu pakki wi, yàl hǝrkit. 13Pǝlǝa mǝturonjar ne wi ama:
Zakariya, ce a ɓang ɗang! Ahiwi mo ka Ɓakuli ongŋǝnia, mamo Alisabatu nǝ̀ ɓǝlô muna sǝ a wu nǝ pe wi lullǝu ama Yohana. 14Bumo nǝ̀ pwasǝo, a nǝ dum nǝ banɓoarnado, sǝ aɓwana pas ka bumia nǝ̀ pakiɗire ace ɓǝle. 15Mǝnia yì muna ka, nǝ̀ duk ɓwamǝgule a ɓadǝm Mǝtalabangŋo. Ɓǝ̀ kǝa nu mba ko ɓe kǝgir mǝnana nǝ̀ walban ngga ɗang. Yì ka, nǝ̀ lumsǝ nǝ Bangŋo mala Ɓakuli, a bum ngge.#1:15 Ɓalli gbal aɓa: Ɓal 6:3. 16Nǝ̀ tsǝk amǝ Isǝrayila pas à nǝ̀ nyare aban Mǝtalabangŋo Ɓakuli malea. 17Nǝ̀ aki Mǝtalabangŋo dǝmbǝa, nǝ̀ pak turo aɓa bangŋo andǝ rǝcandǝa, ulang mala Iliya mǝɓangna mala Ɓakuli. Nǝ̀ yinǝ dotarǝu mala atárru andǝ amunia. Nǝ̀ nyesǝ amǝ'mgbikiru ɓǝa kum sǝlǝe mala amǝ ɓealɓoarna, ace tsǝk aɓwana ɓǝa gilǝki rǝia ace yiu mala Mǝtalabangŋo.
18Pǝlǝa Zakariya ɗi mǝturonjar ama, “Lang sǝ mǝ nǝ sǝlǝ ama gir mǝnana a bang ngga anggo sǝ nǝ̀ pa? Acemǝnana mim ngga ǝn ena, sǝ mamam gbal ka ena.”
19Mǝturonjar eari wi ama, “Mǝ nda Jibǝrayilu mǝnana camnggiyi a ɓadǝm Ɓakuli ka. Ɓakuli tasǝam ɓǝ̀ ǝn yi banggo mǝnia yì cau mǝɓoarne ka.#1:19 Ɓalli gbal aɓa: Dan 8:16; 9:21. 20Sǝ ado ka, acemǝnana a earnǝ cau mem raka, mǝnana nǝ̀ yia duk mǝsǝcau a pwari male ka, kuno girna; a pa wu nǝ na cau ɗang, she pwari mǝnana amǝnia yì agir dumǝna mǝsǝia ka.”
21Anggo ka, ɓwapǝndǝa na arǝ kundǝ Zakariya, à kǝ ndali, lang sǝ banì sauwa anggo kǝrkǝr aɓa Ndàmǝgule mala Ɓakuli. 22Lang purna ka, gandǝ nea wia cau ɗang. Kara à sǝlǝ ama sǝnǝna gir aɓa bangŋo, aɓa Ndàmǝgule mala Ɓakuli. Acemǝnana camarǝ lǝmndǝkia wia cau nǝ bui, sǝ ko gandǝ mǝn kuni na kǝ cau ɗang.
23Lang anonggeo mala turo mala Zakariya malǝna ka, pǝlǝa nyare a ɓala. 24Anzǝm man ngga mami Alisabatu kum muna a bumi. Zongŋo tongno ko sǝn nza ɗang, kǝ na ama, 25“Mǝtalabangŋo nǝ̀ pakkam mǝnia ka. Aɓalǝ anonggeo man ngga lǝmndǝnam ɓwamuru male, sǝ twalnam ban kǝsǝkya aɓalǝ aɓwana.”
Mǝturonjar bang cau mala ɓǝl Yesu
26Aɓa tongno-nong-mwashatia zongŋo mala kum muna-bum mala Alisabatu ka, Ɓakuli tur mǝturonjar Jibǝrayilu a ɓè la aɓa nzali Galili mǝnana à tunǝki ama, Nazarat ka. 27Turi nǝ cau aban ɓe nsari lullǝi ama Maryamu, mǝnana ɓeɓwa lullǝi ama Yisǝfu, Mǝkà Dauda pur amuri nǝ̀ ali ka.#1:27 Ɓalli gbal aɓa: Mat 1:18. 28Mǝturonjar kutia bani ne wi ama, “Ɓǝ̀ rǝo pwalo! We mǝnana a ndanǝ ɓwamuru mala Ɓakuli ka, Mǝtalabangŋo na to.”
29Mǝnia yì cau mǝturonjar ne ka, pe Maryamu ɗenyicau kǝrkǝr, kara kutia ndali ama, ya ulang makkun na man. 30Pǝlǝa mǝturonjar ne wi ama, “Maryamu, ɓangciu ɓǝ̀ kǝa pakko ɗang, a kumǝna ɓwamuru aban Ɓakuli. 31A wu nǝ kum muna a bumo, a nǝ ɓǝl muna ɓwabura, sǝ a nǝ tsǝki wi lullǝu ama Yesu. 32Nǝ̀ duk ɓwamǝgule, sǝ à nǝ̀ tunǝi ama Muna mala Ɓakuli mana Karban nǝ Gulo kat ka. Mǝtalabangŋo Ɓakuli nǝ̀ pe wi bunomurǝm mala kè Dauda.#1:32 Ɓalli gbal aɓa: 2Sam 7:12,13,16; Isha 9:7. 33Nǝ̀ duk gbani amur amǝ Isǝrayila tatǝk, sǝ domurǝm male ka masǝlǝate pà kàm ɗang.”
34Pǝlǝa Maryamu ne mǝturonjar ama, “Lang sǝ mǝnia ka nǝ̀ pǎ, yi mǝnana mǝ nda nsari, ǝn surǝ ɓwabura raka?”
35Mǝturonjar eari wi ama, “Bangŋo mala Ɓakuli nǝ̀ sulǝ a muro. Rǝcandǝa mala Ɓakuli mana Karban nǝ Gulo kat ka, nǝ̀ yia zuppi a muro, sǝ Muna Mǝfele mǝnana a nǝ ɓǝli ka, à nǝ̀ tunǝi ama, Muna mala Ɓakuli. 36Nggearǝ ɓǝla mo Alisabatu ka, ndanǝ muna a bumi aɓa ě male. Yì mǝnana nkombi na ka, gongŋǝna nǝ azongŋo tongno-nong-mwashat. 37Kǝgir pà kàm mǝnana Ɓakuli pa nǝ̀ pè raka.”#1:37 Ɓalli gbal aɓa: Tite 18:14.
38Maryamu eari wi ama, “Mǝ nda guro mala Mǝtalabangŋo. Ɓǝ̀ ce ɓǝ̀ do kǝla mǝnana a na ka.” Mǝturonjar pǝlǝa o ɗeki.
Maryamu waria sǝn Alisabatu
39Anzǝm anonggeo bǝti ka Maryamu lo tsuk-tsuk aban o a ɓè la aɓalǝ ankono mala nzali Yahudi. 40Kya kutio a ɓala mala Zakariya, pǝlǝa makki Alisabatu kun. 41Lang Alisabatu ok makkun mala Maryamu ka, muna mǝnana a bumi ka yàl hǝrkit, sǝ Alisabatu lumsǝ nǝ Bangŋo Mǝfele. 42Sǝ loasǝ gi kǝrkǝr, banɓoarnado ci na ama:
A ndanǝ tsǝkbu mala Ɓakuli aɓalǝ amamǝna, sǝ muna mǝnana a nǝ ɓǝl ka, ndanǝ tsǝkbu mala Ɓakuli gbal! 43Lang sǝ múrɓoarna mem yipam anggo, yi mǝnana nggeau mala Mǝtalem yiu a banam ngga. 44Lang ǝn ok makkun mo ka, muna mǝnana a bumam ngga yàl nǝ banɓoarnado. 45A ndanǝ tsǝkbu mala Ɓakuli, ace eare mǝnana a ear ama, cau mala Mǝtalabangŋo abano ka, nǝ̀ yia lumsǝo.
Nggyal mala Maryamu mala ɓwangsǝki Ɓakuli
46Maryamu na ama:
“#1:46-55 Ɓalli gbal aɓa: 1Sam 2:1-10.Yilǝmem ngga kǝ ɓwangsǝki
Mǝtalabangŋo;
47sǝ ɓabumam kǝ pak
banɓoarnado ata cau
mala Ɓakuli Mǝ'amsǝam,
48acemǝnana yì ka,
ɗenyina nǝ mim,
guro male
kat andǝ amani ama
ǝn pa a kun kǝgir raka!
Twal ado aban o a dǝmbǝa ka,
aɓwana arǝ anza kat
à nǝ̀ tunǝam ama mǝ'kúm
tsǝkbu mala Ɓakuli.
49Acemǝnana Ɓakuli mana
Karban kat ka,
pangŋǝnam agir mǝgulke.
Lullǝi ka nda Ɓwa Mǝfele.
50Kǝ lǝmndǝ mǝsǝswatǝr
male aban aɓwana mǝnana
à kǝ ɓanggi wi ka,
twal a do'nza aban ká ɓe.
51Pangŋǝna aturo mǝgulke nǝ murbui,
sǝ mesǝkina amǝ'gusǝlǝ muru
andǝ aɗenyicau malea kat.
52Yi sulǝna amurǝma amur
abuno-murǝm malea,
sǝ loasǝna amǝ nyesǝmuru.#1:52 Ɓalli gbal aɓa: Ayu 5:11; 12:19.
53Amǝ'nzala ka ɗǝmsǝnia
nǝ agir mǝɓoarne,
sǝ amǝkume ka tasǝna
takwaria ɓǝa o nǝ ɓabuia.
54Bwalǝni guro male Isǝrayila kam,
aɓa ɗenyi nǝ mǝsǝswatǝr male,
55kǝla mǝnana pàcau aban aká sǝm,
à Ibǝrayim andǝ amǝkè,
málá male pà kàm ɗang!”#1:55 Ɓalli gbal aɓa: Tite 17:7; Mik 7:20.
56Maryamu do ata Alisabatu zongŋo tārú, nda sǝ nyarǝna umna a la ka.
À ɓǝl Yohana mǝ Batisǝma
57Lang pwari gbashi mala Alisabatu karǝna ka, yi gbashi muna ɓwabura. 58Aɓi amǝkunɓala, andǝ aɓǝla ok ama, Mǝtalabangŋo lǝmndǝni Alisabatu ɓwamuru mǝgule, gbashina muna ka, à yì bwali wi pak banɓoarnado.
59A tongno-nong-tāruia nongŋo ka, à yiu ace kasǝî muna ɓate#1:59 Kasǝî muna ɓate: Mǝnia ka nda lǝmndǝ ama muna ka dumǝna mala Ɓakuli.. À earce ama à nǝ̀ tsǝki wi lullǝ tarrí Zakariya.#1:59 Ɓalli gbal aɓa: Pǝris 12:3. 60Sǝ nggè kasǝa ama, “Awo, ɓǝa tunǝi ama, Yohana.”
61Sǝ à ne wi ama, “Kǝɓwa pà kàm aɓalǝ aɓǝla ma'wun nǝ mǝna yì lullǝu ka ɗang.”
62Pǝlǝa à ne tar muna cau nǝ bu, ɓǝ̀ na ko ya lullǝu na nǝ̀ tunǝna muna nǝi. 63Sǝ zǝmbǝa ama, ɓǝa yinǝi wi nǝ kpamgbang gilǝgir. Koyan ngga ndali, mǝnana gilǝ ama “Lullǝi nda Yohana” ka. 64Anggo ka, kara kun Zakariya mǝnna, lasǝi panzǝa, pǝlǝa tita na cau, kǝ ɓwangsǝki Ɓakuli. 65Amǝkunɓala kat ka muria kàrria. Sǝ aɓwana mǝnana arǝ ala mǝnana amur ankono mala nzali Yahudi ka, à camarǝ naki ce amǝnia yì agir ka. 66Ɓwa mǝnana kat ok ce ka, ndali sǝ ɗiban a ɗenyicau male ama, “Mǝnia yì muna ka, nǝ̀ yia duk ya ulangyi nani? Acemǝnana bu Ɓakuli na muri.”
Zakariya ɓwangsǝki Ɓakuli
67Zakariya, tar Yohana ka lumsǝ nǝ Bangŋo Mǝfele. Pǝlǝa ɓangnǝ ɓangna, bangcau mala Ɓakuli, ama:
68Nokiban ngga dumǝna
mala Mǝtalabangŋo Ɓakuli
mala amǝ Isǝrayila.
Acemǝnana yina ace bwali
aɓwana male kam,
sǝ angŋǝna muria,
pusǝnia a gung.
69Yi pa sǝm Mǝ'amsǝban
mǝnana ndanǝ rǝcandǝa ka,
a tau-murǝm mala
guro male Dauda.
70Pe kǝla mǝnana bangŋa
a kun amǝ'ɓangna male
mǝfele ɓara-ɓara ka.
71Pe anggo ace mǝnana
ɓǝ̀ amsǝ sǝm
a bu aɓi sǝm amǝbura,
andǝ aɓwana mǝnana kat
à ɓinǝ mǝsǝ sǝm ngga.
72Pak mǝnia ka ace lǝmndǝì
atár sǝm mǝsǝswatǝr,
sǝ ɓǝ̀ ɗenyi nǝ
kurcau male mǝfele.
73-74Nǝ mǝnia yì kurcau ka
kánmbi tár sǝm Ibǝrayim
ama nǝ̀ amsǝ sǝm a bu
aɓi sǝm amǝbura,
ace mǝnana ɓǝ̀ sǝm pak turo
male nǝ mǝsǝkang-kangŋa,
75aɓa do mǝfele
andǝ ɓealɓoarna
a ɓadǝmbǝi a do yilǝmu
ma'sǝm kat.
76Sǝ we munem ngga,
à nǝ̀ tunǝo ama
mǝɓangna mala Ɓakuli
mana Karban nǝ Gulo kat ka.
A nǝ aki Mǝtalabangŋo dǝmbǝa,
ace gilǝki wi atanjar male,#1:76 Ɓalli gbal aɓa: Mal 3:1.
77ace pe aɓwana male
surǝ amsǝban
nǝ njar mala kum twalbani
mala acauɓikea malea.
78Ace mǝsǝswatǝr andǝ
ɓuɓɓuka mala Ɓakuli
ma'sǝm ngga,
nǝ̀ tsǝk kwaro mala ban
ɓǝ̀ mǝnna amur sǝm nǝ kuli,
79ace pà tǎlaban aban
aɓwana mǝnana à do
aɓa pǝndǝa andǝ
yinggǝli lú ka,
ace yal kusǝ sǝm
aɓa ká tanjar mala
dorǝpwala.#1:79 Ɓalli gbal aɓa: Isha 9:2.
80Muna, yì Yohana ka, camarǝ gulo sǝ dumnǝ rǝcandǝa aɓa bangŋo. Do male ka nda a ɓabondo kya bwal a pwari pusǝrǝi aban amǝ Isǝrayila.
Currently Selected:
Luka 1: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
