Luka 2

Ɓǝlban mala Yesu

1Aɓalǝ amǝno yì anonggeo ka, Kaisar#2:1 Kaisar: ka nda lullǝ murǝm mǝgule mala amǝ Roma. Agusta pa nzongcau ama, ɓǝa ɓal aɓwana mǝnana aɓa nzali Roma ka kat ɓǝa gilǝ lullǝia. 2Mǝnia ka nda tita ɓalban arǝ abaku mǝnana Karniyus nda nggwamna mala bu-nzali Suriya ka. 3Sǝ koyan ngga o a la male, ace mǝnana ɓǝa kya gilǝ lullǝi ka.

4Yisǝfu ka, lo a Nazarat ɓe la a bu-nzali Galili, aban ká a bu-nzali Yahudi, a la mala Dauda mana à tunǝki ama Betalami ka, acemǝnana yì Yisǝfu ka muna lá na, a tau mala Dauda. 5O kano andǝ Maryamu mansari male mǝnana gongŋǝna ka, ace mǝnana ɓǝa kya gilǝ lullǝia. 6À nda kano piu a Betalami ka, pwari gbashi male yi kārǝa. 7Pǝlǝa gbashi muna dǝmbǝa male, muna-ɓwabura. Mbúɓɓǝkì aɓa nggurbyau sǝ nongsǝi aɓa kpamgbang-girlina mala agirkusǝu, acemǝnana à pànǝ ban nongŋo aɓa nda a ban-sulǝo ɗang.

Ayalgir andǝ mǝturonjar

8Tu nǝ bania aɓa mǝnia yì bu-nzali ka, aɓea yalgir do a takuri aban ɗenyi nǝ agirkusǝu malea nǝ du. 9Pǝlǝa ɓe mǝturonjar mala Mǝtalabangŋo pusǝrǝi abania, ɓoarɓwa mala Mǝtalabangŋo ta gumbǝlia. Ɓangciu bwalia kǝrkǝr. 10Mǝturonjar banggia wia ama, “Ɓangciu ɓǝ̀ kǝa pakka wun ɗang. Wu sǝni, ǝn ndya yina wun nǝ bǝsa Cau Mǝɓoarne mǝ'pwasǝ ɓabumì kǝrkǝr mǝnana nda ace ɓwapǝndǝa kat ka. 11Yalung aɓa nggeala mala Dauda ka, à ɓǝlǝ́na wun Mǝ'amsǝban; yì nda Kǝrǝsti#2:11 Kǝrǝsti: Ko Mezaya: Ko “Kǝrǝsti” nǝ kun mala amǝ Gǝrik andǝ “Mezaya” nǝ kun mala amǝ Ibǝru ka ɓālǝi nda “Ɓwa mǝnana à ɗarǝi wi muru olif amuri mana lǝmndǝ ama Ɓakuli tarni ace turo male” ka; anggo gbal a mǝsǝì 26. Mǝtalabangŋo. 12Gir mǝnana nǝ̀ lǝmndǝ ama mǝnia yì cau ka mǝsǝcau na ka ndya ka. Wu nǝ̀ ngga kum bangna-muna à mbuɓɓǝ́kini aɓa nggurbyau sǝ à nongsǝi aɓa kpamgbang-girlina mala agirkusǝu.”#2:12 Ɓalli gbal aɓa: Isha 7:14.

13Anggo ka kara aɓea amǝturonjar pas sulǝ nǝ kuli aban mǝturonjar mana yiu a dǝmbe ka. À kǝ ɓwangsǝ Ɓakuli à kǝ na ama:

14“Nokiban aban Ɓakuli

akano a kuli,

sǝ a ɓanza ka dorǝpwala

aban aɓwana mǝnana

à kǝ pwasǝ ɓabumi ka!”

15Lang amǝturonjar nyingŋǝnia à nyarǝna à umna kuli ka, ayalgir mǝno nea rǝia ama, “Wu fani sǝm nǝ̀ ká a Betalami, sǝm nǝ̀ ngga sǝn mǝnia yì gir mana kumban, mǝnana Mǝtalabangŋo na sǝm ce ka.”

16Pǝlǝa à lo a kaurǝa à kya kum Maryamu andǝ Yisǝfu sǝ bangna-muna aban nongŋo aɓa kpamgbang-girlina mala agirkusǝu. 17Lang à sǝnǝni ka, pǝlǝa à mesǝ cau mǝnana mǝturonjar banggia wia amur mǝnia yì muna ka. 18Aɓwana kat mǝnana à ok ka à ndali nǝ cau mǝnana ayalgir banggia wia ka. 19Sǝ Maryamu ka bwal amǝnia yì acau, kǝ ɗenyi amuria nǝ ɓabumi. 20Ayalgir nyare à kǝ gusǝlǝ Ɓakuli, à kǝ ɓwangsǝki ace agir mǝnana kat à o sǝ à sǝni, kǝla mǝnana à banggia wia ka.

À tsǝki Yesu lullǝu sǝ à wari nǝi a Ndàmǝgule mala Ɓakuli

21A tongno-nong-tāruia nongŋo, pwari mǝnana à nǝ̀ kasǝi wi ɓate ka, à tsǝki wi lullǝu ama Yesu, lullǝu mǝnana mǝturonjar pe wi sǝ yi kpa a bum ngge ka.#2:21 Ɓalli gbal aɓa: Pǝris 12:3; Luk 1:31.

22Lang apwari mala lak rǝia aɓa ɓoarnsari a ɓadǝm Ɓakuli yi lumsǝna, kǝla mǝnana Nggurcau mala Musa na ka, Yisǝfu andǝ Maryamu twal Yesu à um nǝi a Urǝshalima ace mǝnana ɓǝa kyan nǝi a ɓadǝm Mǝtalabangŋo ka. 23Nggurcau mala Mǝtalabangŋo na ama, “Koya muna-dǝmbǝa mǝnana muna-ɓwabura na ka, à nǝ̀ ká nǝi ɓǝ̀ duk mala Mǝtalabangŋo.”#2:23 Ɓalli gbal aɓa: Pur 13:2,12. 24À wari gbal ace pàɓoro nǝ gir'nkila kǝla mǝnana Nggurcau mala Mǝtalabangŋo bangŋa ama ɓǝa pà ka: “akutu ɓari, ko amuna-kutumurǝm ɓari.#2:24 Ɓalli gbal aɓa: Pǝris 12:8.”

25A baku mǝno ka ɓeɓwa nakam nǝ do a Urǝshalima lullǝi ama Shimiyan. Yì ka, mǝ ɓealɓoarna, mǝ ɓanggi Ɓakuli na. Nda ban kundǝ amsǝban mala amǝ Isǝrayila, sǝ Bangŋo Mǝfele na amuri 26Bangŋo Mǝfele lǝmndǝni wi ama pà nǝ̀ wu ɗang, she ɓǝ̀ sǝnǝna Kǝrǝsti Mǝ'amsǝban mǝnana Mǝtalabangŋo turi ka. 27Bangŋo mala Ɓakuli loasǝi wari nǝi a Ndàmǝgule mala Ɓakuli. Maryamu andǝ Yisǝfu yiu nǝ Yesu a Ndàmǝgule mala Ɓakuli, ace mǝnana ɓǝa pakki wi gir mǝnana Nggurcau mala Musa kani ka. 28Shimiyan yi ak muna a bui sǝ ɓwangsǝ Ɓakuli na ama:

29“A dyan ngga we

Mǝtalabangŋo

mǝnana a Karban kat ka,

nying guro mo ɓǝ̀ o

aɓa rǝpwala,

kǝla mana a bang ngga.

30Acemǝnana amǝsǝam

sǝnǝna amsǝban mo,

31mana a gilǝkice

a ɓamǝsǝ aɓwana

mala anzali kat ka.

32 # 2:32 Ɓalli gbal aɓa: Isha 42:6; 49:6; 52:10.Tǎlaban na ace

mǝn mǝsǝ aɓwana

mala acili anzali,

sǝ aban aɓwana mo

amǝ Isǝrayila ka

gulo na.”

33Tár muna andǝ ngge ka à ndali nǝ cau mǝnana à bangŋa amuri ka. 34Pǝlǝa Shimiyan tsǝkia wia bu sǝ ne ngge Maryamu ama, “Kwaki kiro pepe: Mǝnia yì Muna ka Ɓakuli tsǝngŋǝni ama nǝ̀ duk tǝr kpa andǝ lo mala ɓwapǝndǝa pas a Isǝrayila. Yì ka, nǝ̀ duk gir'lǝmndǝa mǝnana pur nǝ ban Ɓakuli, mǝnana aɓwana pas nǝ̀ na mǝɓane amuri ka. 35Nǝ̀ pusǝta ɗenyicau ɓabum mala aɓwana pas. Sǝ we ka, kpakpak mǝkwanbanì mǝnana aɓwana nǝ̀ pakki wi ka nǝ̀ soa ɓabumo kǝla soaban mala nggeabyau.”

Anna bangcau amur muna

36Ɓe ɓwagula mǝɓangna mala Ɓakuli nakam gbal lullǝi ama, Anna, muna mala Fanuwel, a tau mala Asha. Anzǝm isǝban ngga, à do andǝ burri pǝlǝa tongno-nong-ɓari sǝ burri wu. 37Anggo sǝ do man-lú apǝlǝa lumi-tongno-nong-tārú nǝ mǝsǝì ine. Gapiyi tarǝia andǝ Ndàmǝgule mala Ɓakuli ɗang, du andǝ pwari nda aban peri aban Ɓakuli nǝ gilmur andǝ hiwi. 38Yiu yi karǝ nǝ mǝnia yì gir ka, pǝlǝa kutia pakki Ɓakuli yàwá andǝ bangcau amur muna aban aɓwana mǝnana à kǝ kundǝ akmúrú mala Urǝshalima ka.

Yisǝfu andǝ Maryamu nyare a la malea a Nazarat

39Lang Yisǝfu andǝ Maryamu malǝna gir mǝnana kat Nggurcau mala Mǝtalabangŋo kani ka, à nyare a nzali Galili, a la malea a Nazarat.#2:39 Ɓalli gbal aɓa: Mat 2:23. 40Muna gulo, kum rǝcandǝa, lumsǝ nǝ sǝlǝe, ɗǝm ngga ɓwamuru mala Ɓakuli na amuri.

Yesu, a muntulo aɓa Ndàmǝgule mala Ɓakuli

41 # 2:41 Ɓalli gbal aɓa: Pur 12:1-27; Nggur 16:1-8.Koya pǝlǝa nani ka tar Yesu andǝ ngge kǝ̀ o a Urǝshalima ace Lamsan Yalimuru#2:41 Lamsan Yalimuru: Mǝnia ka nda pakiɗire ace ɗenyi nǝ baku mǝnana Ɓakuli pusǝ amǝ Isǝrayila aɓa nzali Masar ka.. 42Lang Yesu lumsǝna apǝlǝa lum-nong-ɓari ka à wario a Lamsan Yalimuru, kǝla mǝnana à pakkiyi ka. 43Lang Lamsan Yalimuru malǝna sǝ tarrí andǝ ngge na aban nyare à nǝ̀ o a la ka, Muna yì Yesu ka akrǝi a Urǝshalima, sǝ yia ka à sǝlǝ ɗang. 44À twali ama nda aɓalǝ acilia aɓwana mǝnana à twal gya andǝia ka, nda à gya aban o ba pwari kpana. Nǝ nzǝmo ka à tita alte aban aɓǝla malea andǝ agyajam. 45Lang à sǝni raka, à nyare a kusǝia aban ká Urǝshalima à nǝ̀ ngga sǝnbani. 46Anzǝm nongŋo tārú ka à kya kumi a Ndàmǝgule mala Ɓakuli aban do ata amǝkanigir, nda rǝ kwaki kiri aban oea, sǝ kǝ ɗikia acau. 47Ɓwa man kat oe ka, ndali kǝrkǝr nǝ sǝlǝgir male andǝ acau mǝnana kǝ nyesǝia wia aɓa pa eare ka. 48Lang a tarrí andǝ ngge sǝni ka, à ndali. Sǝ ngge ɗi ama, “Munem, palang sǝ a pakka sǝm ani? Mim sǝnǝ tarró sǝm came arǝ alto nǝ rǝɓǝla.”

49Yesu ɗia ama, “Ace mana sǝ wu altam? Wu sǝlǝ mbak ama dumǝnam púp mǝ pa a ɓala mala Tárram a kun turo male?” 50Sǝ yia ka à bwalta mǝnia yì cau nea wia ka ɗang.

51Pǝlǝa lo atea à nyare aban o a Nazarat. Kǝ okia wia. Sǝ ngge ka bwal amǝnia yì acau ka a ɓabumi. 52Yesu gulo aɓa sǝlǝe andǝ nggunrǝu, nǝ earmuru aban Ɓakuli, andǝ aɓwana.#2:52 Ɓalli gbal aɓa: 1Sam 2:26; Pas 3:4.

Currently Selected:

Luka 2: mbu

Highlight

Copy