Luka 21

Man-lú mana pa gir mana ndanǝi kat ka

(Markus 12:41-44)

1Lang Yesu loasǝ mǝsǝì ka, sǝn amǝ kume à nda rǝ turki aɓoro malea aɓa akwati boalo mǝnana aɓa Ndàmǝgule mala Ɓakuli ka. 2Ɗǝm ngga mǝsǝì kpa arǝ ɓe man-lú, mǝtǝr, aban tur amǝsǝ-boalo mǝkeke ɓari. 3Pǝlǝa Yesu na ama, “Mǝsǝcau, ǝn nggǝ bangga wun ama mǝnia yì man-lú mǝtapwasǝa ka, nda tur gir mǝnana kuti malea ka kat. 4Acemǝnana aɓwana mǝnia kat ka à tu aɓa kume malea mǝnana kpǝm ngga, sǝ yì ka, aɓa tǝ̀r male sǝ pa gir kat mǝnana ndanǝi ace do male ka.”

Agir-lǝmndǝa mala masǝlǝata ɓanza

(Matiu 24:1-2; Markus 13:1-2)

5Aɓea alaggana male na aban naki acau amur ɓoarjam mala Ndàmǝgule mala Ɓakuli mǝnana à gilǝki nǝ atali mǝɓoarkijami, andǝ aɓoro mǝnana à tàrria ace pe Ɓakuli ka. Pǝlǝa Yesu na ama, 6“Ɓǝ̀ mala agir mǝnana wu kǝ sǝnia à nda ka, ɓe pwari nǝ̀ yiu mǝnana kǝ ɓe tali pa kàm à nǝ̀ ɗeki aban came amur ɓe ka ɗang. Ko mǝyani ka à nǝ̀ rambǝi à nǝ̀ turi a nzali.”

Nunkiru amur atanni mana à kǝ yiu ka

(Matiu 24:3-14; Markus 13:3-13)

7Pǝlǝa à ɗi Yesu ama, “Malǝm, amǝnia yì agir ka a ya pwari sǝ à nǝ̀ kumban? Ɗǝm ngga mana gir nì nǝ̀ lǝmndǝ ama à mala à nǝ̀ kumban?”

8Sǝ Yesu pǝlǝia wia ama:

Wu parkir wun ɓǝa kǝa swarki wun ɗang. Acemǝnana aɓwana pas à nǝ̀ yiu aɓa lullǝam, à nǝ̀ nggǝ bangŋa ama, yia ka à nda ka Kǝrǝsti, ɗǝm ngga à nǝ̀ na ama, “Pwari gbashina!” Wu kǝa kpata cau malea ɗang. 9Ɓǝ̀ wu ok cau mala a'lwa andǝ amunǝo ka, cala ɓangciu pakka wun ɗang. Amǝnia yì agir ka dumǝna púp à nǝ̀ ak dǝmbǝa kumban, sǝ masǝlǝata ɓanza malaká yiu peatu ɗang.

10Pǝlǝa lidǝmbǝa aban nea wia ama:

Nzali nǝ̀ lo nǝ lwa arǝ ɓe nzali, sǝ domurǝm nǝ̀ lo arǝ ɓe domurǝm. 11Agǝggǝli mǝcande mala nzali nǝ̀ kumban, nzala nǝ̀ kpa, akwano ɓanza ɗàngɗáng nǝ̀ puro arǝ aban pas. Agir karmuru andǝ agir-lǝmndǝa mǝgulke à nǝ̀ pur nǝ kuli.

12 Sǝ kaniama amǝnia yì agir nǝ̀ kumban ngga, à nǝ̀ bwalki wun, à nǝ̀ pa wun tanni. À nǝ̀ ká nǝ wun a ɓashi arǝ andakpapi, à nǝ̀ kur wun arǝ andakurban, à nǝ̀ ká nǝ wun aban amurǝma andǝ anggwamna, acemǝnana wu nda ka amǝ kpatam ngga. 13Mǝnia ka nǝ̀ pa wun dǝmbǝu hamnǝ Cau Amsǝban mem.

14 # 21:14 Ɓalli gbal aɓa: Luk 12:11,12. Wu twali a ɓabum wun ama, pa wu nǝ̀ do nǝ ɓalǝ kasǝkya arǝ cau mǝnana wu nǝ̀ na aban ɓashi ka ɗang. 15Acemǝnana mǝ nǝ pa wun acau andǝ sǝlǝe mǝnana kǝɓwa pà kàm ata amǝɓinǝ múr wun mǝnana nǝ̀ gandǝ cam a kun wun, ko nǝ̀ makgir cau ma'wun ngga ɗang. 16Nggearǝ aɓwana mǝnana à ɓǝl wun, andǝ amǝ'eam wun, aɓǝla andǝ agyajam ma'wun, à nǝ̀ pa wun nzǝmia, à nǝ̀ wal-lú ka aɓea ɓwana aɓalǝ wun. 17Aɓwana kat nǝ̀ ɓinǝmǝsǝ wun acemǝnana wu ndaka amǝkpatam ngga. 18Sǝ ko nyang múr wun mwashat ka pà nǝ̀ kpa a nzali ɗang. 19Mǝsǝkang-kangŋa ma'wun na nǝ̀ amsǝ wun, nǝ̀ pa wun yilǝmu mǝnana málá male pà kàm raka.

Yesu bangcau ama à nǝ̀ kiɗikí Urǝshalima

(Matiu 24:15-28; Markus 13:14-23)

20 Ɓǝ̀ wu sǝnǝna asoje à yì karina Urǝshalima ka, wu sǝlǝ ama kpa male gbashina. 21Sǝ anggo ka aɓwana mǝnana a nzali Yahudi ka ɓǝa ɓangŋa ɓǝa eauwe amur ankono, aɓwana mǝnana aɓa là ka ɓǝa puro, sǝ aɓwana mǝnana a bondo ka ɓǝa kǝa kutio aɓa là ɗang. 22Acemǝnana mǝnia yì pwari ka mala mbweban nutanni na, ace lumsǝ agir mǝnana kat à gilǝì aɓa Malǝmce mala Ɓakuli ka.#21:22 Ɓalli gbal aɓa: Hos 9:7. 23Aɓalǝ apwari mǝno ka, gir mǝsǝswatǝr na nǝ amamǝna mǝnana nǝ amuna a bumia, andǝa mǝnana à kǝ pea muna kiura ka! Nggea tanni kǝrkǝr nǝ̀ yiu amur mǝnia yì nzali, sǝ bumlulla mala Ɓakuli nǝ̀ sulǝo amur amǝnia yì aɓwana ka. 24À nǝ̀ wal-lú aɓea ɓwana atea nǝ nggeabyau, sǝ aɓea ɓwana ka à nǝ̀ bwalia guro à nǝ̀ umnǝia arǝ anzali kat mala ɓanza. Aɓwana mana amǝ Isǝrayila na raka à nǝ̀ parki Urǝshalima aɓata rǝcandǝa malea, à nǝ̀ pak ce acau male ɓà, ba lumsǝo mala apwari mana Ɓakuli kasǝa acea, yia aɓwana mana amǝ Isǝrayila na raka.#21:24 lumsǝo mala pwari mana Ɓakuli kasǝa acea. Mǝnia ka nda lumsǝo mala apwari mana Ɓakuli tsǝa, mala yinǝ aɓwana mala acili anzali ɓanza aɓa kani male ka, anzǝm gine mana ginǝki amǝ Isǝrayila (ace mgbikiru malea), sǝ ado ka nǝ̀ nyesǝia ɗǝm ɓǝa pa a ɓaɓalǝu ace bwal anggur turo aɓa kani male. #21:24 Ɓalli gbal aɓa: Zak 12:3; Isha 63:18; Sǝn 11:2.

Ɓaria yiu mala Muna Mala Ɓwa

(Matiu 24:29-31; Markus 13:24-27)

25 Agir-lǝmndǝa nǝ̀ purkio aɓa pwari, andǝ zongŋo andǝ anlero. A ɓanza ka ɓwapǝndǝa kat nǝ̀ do nǝ ɓalǝkasǝkya andǝ gakia mala ɗenyicau, à nǝ̀ pǝlǝ nǝ ɓalǝia ɓà nǝ ɓangciu arǝ songnǝo mala nggeamur andǝ eaki-nkono male. # 21:25 Ɓalli gbal aɓa: Isha 13:10; Ezǝk 32:7; Jol 2:31; Sǝn 6:12,13. 26Ɓwapǝndǝa nǝ̀ wukiaban ace ɓangciu, ɓalǝia nǝ̀ kasǝkya arǝ gir mǝnana nǝ̀ sulǝo amur ɓanza ka, acemǝnana à nǝ̀ dǝurǝki anggea gir mǝgulke mǝnana a kuli ka. 27Anggo ka à nǝ̀ sǝn Muna Mala Ɓwa aban yiu aɓa pǝrɓang nǝ rǝcandǝa andǝ ɓoarɓwa mǝgule.#21:27 Ɓalli gbal aɓa: Dan 7:13; Sǝn 1:7. 28Ɓǝa mǝnia yì agir tinata kum ban ngga, wu lo, wu loasǝ mur wun a kuli, acemǝnana pwari akmúr wun gbashina.

Kanicau arǝ nggun vwari

(Matiu 24:32-35; Markus 13:28-31)

29Pǝlǝa Yesu nea wia mǝnia yì kanicau ka:

Wu sǝn nggun vwari andǝ acili anggun. 30Ɓǝa tinata to mbuia ka, wun nǝ ɓamur rǝ wun ngga wu nǝ̀ sǝni sǝ wu nǝ̀ sǝlǝ ama mbulo gbashina. 31Anggo gbal, ɓǝ̀ wu sǝnǝna amǝnia yì agir à ndaban pakki ka, wu sǝlǝ ama Domurǝm mala Ɓakuli ka gbashina.

32 Ən nggǝ na wun mǝsǝcau ama, tà mǝnia yì nza ka pà nǝ̀ mal ɗang she ɓǝ̀ amǝnia yì agir ka ɓǝa kumǝna ban ngga. 33Kuli andǝ nzali ka tea nǝ̀ mala, sǝ Cau mem ngga te pà nǝ̀ mal ɗang ko bǝti.

34 Wu parkir wun wu kǝa eare ɓǝ̀ ɗenyicau ma'wun lumsǝ nǝ likiagir, wal-wale andǝ pisǝ ɓalǝu arǝ alta agir ɓanza, gandǝa mǝno yì pwari ka nǝ̀ yia yasǝlǝ wun ngga ɗang. 35Kǝla gbǝli, nǝ̀ yiu amur aɓwana mǝnana a ɓanza kat ka. 36Wu dum nǝ mǝsǝ wun ko aya pwari, nǝ́ pak hiwi ace mǝnana ɓǝ̀ wu api amǝnia yì agir mana à mala à nǝ̀ kumban, sǝ ɗǝm ngga ɓǝ̀ wu kum kusǝu came a ɓadǝm Muna mala Ɓwa ka.

37Ko aya pwari ka Yesu na aban kanigir aɓa Ndàmǝgule mala Ɓakuli, sǝ nǝ pwarikpana ka nǝ̀ o a múr mǝ'nkono mǝnana à tunǝki ama Nkono Olif ka nǝ̀ ngga nong nggam.#21:37 Ɓalli gbal aɓa: Luk 19:47. 38Sǝ nǝ bu dǝmbari ka aɓwana kat kǝ yiu a ok kanigir male a Ndàmǝgule mala Ɓakuli.

Currently Selected:

Luka 21: mbu

Highlight

Copy