Matiu 18
18
Yana nda ɓwamǝgule kat?
(Markus 9:33-37; Luka 9:46-48)
1A nzǝm mǝno bǝti ka alaggana mala Yesu yiu abani sǝ à ɗi ama, “Yana gulo kuti ban kat a Domurǝm mala kuli?”#18:1 Ɓalli gbal aɓa: Luk 22:24.
2Yesu pǝlǝa tunǝ ɓe muna mǝkyauwe sǝ tamsǝi aɓalǝia. 3Sǝ na ama:
Mǝsǝcau, ǝn nggǝ bangga wun, ɓǝ̀ wu nggaɗya wu do kǝla amuna mǝkeke raka, pa wu nǝ̀ kuti a Domurǝm mala kuli ɗang. # 18:3 Ɓalli gbal aɓa:
Mar 10:15; Luk 18:17. 4Sǝ ɓwa mǝnana kat nwangsǝ ɓamuri kǝla muna mǝkyauwe man ngga nda ɓwamǝgule kat a Domurǝm mala kuli.
5 Koya ɓwa sǝ ak muna mǝkyauwe kǝla mǝnia acem ngga, Mǝ nda akiyiam ngga.
Tamban arǝ cauɓikea
(Markus 9:42-48; Luka 7:1-2)
6 Ɓǝ̀ kǝɓwa tsǝk mwashat ata amuna mǝkeke mǝnia mǝnana à earnǝ mim sǝ pak cauɓikea ka, kǝpǝna ɓǝa ɗurri ɓwe taligo a meali sǝ ɓǝa turi aɓa nggeamur mǝlime.
7 Caukwanban na nǝ ɓanza ace agir mǝnana à kǝ tsǝk aɓwana ɓǝa pak cauɓikea ka! Agir tamban ngga à nǝ̀ yiu púp. Sǝa ma caukwanban na nǝ ɓwa mǝnana à kǝ pur nǝbani ka!
8 Ɓǝ̀ buo ko kusǝo kǝ tsǝo a kǝ pak cauɓikea ka, kasǝi turi. Kǝpǝna wu kuti a yilǝmu nǝ bu-kasǝa ko kusǝu-kasǝa amur mǝnana wu dum nǝ abuo ɓari ko akusǝo ɓari sǝ ɓǝa turo aɓa bǝsa mǝnana pà nǝ̀ linggi raka. 9Ɓǝ̀ mǝsǝo kǝ tsǝo a kǝ pak cauɓikea ka, ui turi. Kǝpǝna wu kuti a yilǝmu nǝ mǝsǝu mwashat amur mǝnana wu dum nǝ amǝsǝo ɓari sǝ ɓǝa turo a lu-bǝsa ka.#18:9 Ɓalli gbal aɓa: Mat 5:29,30.
Kanicau arǝ nzur mǝnana ɓwàr ka
(Luka 15:3-7)
10 Wu tsǝk kir wun, wu kǝa burice mwashat ata amuna mǝkeke mǝnia ka ɗang. Ən nggǝ na wun mǝsǝcau amǝturonjar malea a koya pwari ka à nda a ɓadǝm Tárram mǝnana a kuli ka. 11[Muna mala Ɓwa yiu ace amsǝ aɓwana mǝnana à ɓwarki tanjar ka.]#18:11 Ɓalli gbal aɓa: Luk 19:10.
12 Lang sǝ wu sǝni, ɓǝ̀ ɓwa nanǝ anzur gbǝman sǝ mwashat ɓwarki ta ɓi ka, pà nǝ̀ nying amǝnia lumi-tongno-nong-ine bwamdǝ tongno-nong-ine ka amur nkono sǝ nǝ̀ oa alta mǝnana ɓwàr ka re? 13Sǝ ɓǝ̀ yi kumǝni ka, ǝn nggǝ na wun mǝsǝcau ban nǝ ɓoari wi ace nzur mǝnia mwashat ka nǝ̀ kuti mǝnana ndanǝi ace acili amǝno à ɓwarki raka. 14Anggo gbal sǝ Tar wun mǝnana a kuli ka eare ama ɓǝ̀ mwashat ata amǝkeke mǝnia ka ɓǝ̀ ɓwàr raka.
Mǝ'eambǝu mǝnana pakko cauɓikea
(Luka 17:3)
15 Ɓǝ̀ mǝ'eambǝo pakko cauɓikea ka, kya bani nǝmurǝo lǝmndǝì wi cauɓikea male, a nre wun ɓari. Ɓǝ̀ oako ka, a nyesǝna mǝ'eambǝo a tanjar. # 18:15 Ɓalli gbal aɓa:
Luk 17:3
. 16Sǝ ɓǝ̀ pà nǝ̀ oako raka, tunǝ ato ɓwa mwashat ko ɓari abani. Acemǝnana mǝsǝcau ka à kǝ oe a kun aɓwana ɓari ko tārú. 17Ɓǝ̀ ginǝ ok ka, kyan nǝi aban Ikǝlisiya. Sǝ ɓǝ̀ ginǝ oaki Ikǝlisiya ka, nyesǝi kǝla mǝ ɗwanyi surǝ Ɓakuli ko mǝ'cauɓikea.
18 Ən nggǝ na wun mǝsǝcau gir mǝnana kat wu kùrrì a ɓanza ka à nǝ̀ kùrrì a kuli, sǝ gir mǝnana kat wu panzǝi a ɓanza ka à nǝ̀ panzǝi a kuli. # 18:18 Ɓalli gbal aɓa:
Mat 16:19; Yoh 20:23.
19 Sǝ ǝn nggǝ na wun mǝsǝcau ama, ɓǝ̀ aɓwana ɓari ata wun akani a ɓanza à nǝ̀ eare amur koya gir mǝnana wu nǝ̀ zǝm ngga, Tárram mǝnana a kuli ka nǝ̀ pakka wuni. 20Ɓǝ̀ aya ban sǝ aɓwana ɓari ko tārú kpapi aɓa lullǝam ngga, Mǝ nda aɓalǝia.
Kanigir arǝ guro mǝginǝ twalbani
21Pǝlǝa Bitǝrus yiu aban Yesu sǝ ɗi ama, “Mǝtalabangŋo, kusǝ shen sǝ ɓǝ̀ mǝ'eambǝam camarǝ pakkam cauɓikea ka ɓǝ̀ ǝn twali wi banì? Kusǝ tongno-nong-ɓari na le?”
22Yesu eari wi ama:
Awo, kusǝ tongno-nong-ɓari na ɗang, lumi tongno-nong-ɓari kusǝ tongno-nong-ɓari na! # 18:22 Ɓalli gbal aɓa:
Luk 17:3,4; Tite 4:24.
23 Ace cau mǝnia ka à nǝ̀ kànì Domurǝm mala kuli arǝ ɓe murǝm mǝnana earce nǝ̀ bǝlki kusǝ agǝna male mǝnana a bu amǝ'turo-ɓala male ka. 24Lang tinata bǝlki kusǝ agǝne ka à kya yinǝ ɓe ɓwabura a ɓadǝmbǝi, mǝnana li tangna boalo kǝrkǝr. 25Sǝ ace mǝnana ɓwabure gandǝ mbwe raka, ɓwamǝgule male tsǝa ɓǝa me, yì andǝ mami andǝ amuni andǝ agirkuma male kat, ɓǝa mbwena tangne nǝi.
26 Mǝturo-ɓala man pǝlǝa ɓun amur ankuni a ɓadǝmbǝi sǝ zǝmbǝa ama, “Ɓwamǝgule, pakkam munyi, mǝ nǝ mbweko boalo mo kat.” 27Murǝm yi sǝn mǝsǝswatǝr mala mǝturo-ɓala man nda sǝ twaliban tangne sǝ nyi ɓǝ̀ o.
28 Lang mǝturo-ɓala man purna a nza ka, yi kum ɓi mǝturo-ɓala mǝnana kǝ kpate tangna boalo bǝti ka. Pǝlǝa kpe a mǝsǝ'meali kàngkàng ne wi ama, “Mbwem gir mǝnana ǝn nggǝ kpato ka.”
29 Ɓi mǝturo-ɓala ɓun amur ankuni sǝ zǝmbǝi wi ama, “Pakkam munyi, mǝ nǝ mbweo.”
30 Ɓwabure ɓine. O kya tsǝa a oasǝ ɓi a ndàkurban ama she ɓǝ̀ mbwena tangna mǝnana kǝ kpate ka. 31Aɓi amǝturo sǝn gir man ngga bumia kìɗìkì, pǝlǝa à kya banggi ɓwamǝgule malea ce kat.
32 Ɓwamǝgule tunǝi ne wi ama, “We mǝɓealɓikea, ǝn twalo ban tangna mo acemǝnana a zǝmbǝam ngga. 33Ɓoaro wu sǝn mǝsǝswatǝr mala ɓio mǝturo kǝla mǝnana ǝn sǝn mo ka re?” 34Bum ɓwamǝgule lul kǝrkǝr, pǝlǝa tasǝ te a ndàkurban ɓǝa pe tanni, she ɓǝ̀ mbwena tangna mǝnana amuri kat ka.
35 Anggo gbal sǝ Tárram mǝnana a kuli ka nǝ̀ pang nǝ ko yana ka aɓalǝ wun, yi mǝnana ɓǝ̀ wu twali amǝ'eam wun ban acauɓikea malea nǝ ɓabum wun mwashat raka.
Currently Selected:
Matiu 18: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
