Matiu 19
19
Kanigir amur gau doɓala
(Markus 10:1-12)
1Lang Yesu malǝna banggi acau mǝnia ka, nying bu-nzali Galili sǝ o a bui mala amǝ Yahudi a nkaring Nggeasala Jodan. 2Ɓwabunda pas o ate, sǝ amǝ rǝkwana mana aɓalǝia ka twalia wia ban akwano malea akano.
3Aɓea amǝ Farisi yiu aban Yesu, à yiua tambe. À yì ɗi ama, “Nggearǝì ka, Nggurcau eari ɓwa ɓǝ̀ pǝr mami ace ko man ngga le?”
4Sǝ pǝlǝia wia ama, “Wu ɓalli mbo aɓa Malǝmce ama, ‘A tite ka Mǝpusǝ-banza pak ɓwabura andǝ mɓwama,’#19:4 Ɓalli gbal aɓa: Tite 1:27; 5:1,2. 5sǝ bangŋa ama, ‘Ace mǝnia ka ɓwabura nǝ̀ nying tarrí andǝ ngge sǝ nǝ̀ lanzǝ arǝ mami. Yì andǝ mami ka à dumǝna ɓwa mwashat?’#19:5 Ɓalli gbal aɓa: Tite 2:24. 6Lǝmndǝ ama yia ka à pa ɓari ɗǝm ɗang, à nda mwashat. Ace mani ka aɓwana mana Ɓakuli kpapinia ka kǝɓwa ɓǝ̀ kǝa gauwia ɗang.”
7Pǝlǝa à ɗi ama, “Ɓǝ̀ nda anggo ka, mana tsǝa sǝ Musa bangŋa ama ɓwabura nǝ̀ gandǝ pe mami takada gau doɓala sǝ nǝ̀ pǝri ɓǝ̀ o?”#19:7 Ɓalli gbal aɓa: Nggur 24:1-4; Mat 5:31.
8Yesu pǝlǝia wia ama, “Musa eare ɓǝ̀ wu pǝr amālá wun ace ɓamurcandǝa ma'wun. Sǝ a share ɓanza ka, gir nî pa anggo ɗang. 9Sǝ ǝn nggǝ na wun ama, ko yana mǝnana pǝr mami sǝ pa ace nongnǝban a nza nǝ doɓala raka, sǝ kya al ɓe ɓwama ka, nda arǝ pak cauɓikea mala nongnǝban a nza nǝ doɓala#19:9 nongnǝban a nza nǝ doɓala: ko “ɗwanyi do nǝ mǝsǝcau arǝ doɓala.”.”#19:9 Ɓalli gbal aɓa: Mat 5:32; 1Kor 7:10,11.
10Alaggana male pǝlǝa à ne wi ama, “Ɓǝ̀ ce na anggo a nre ɓwabura andǝ mɓwama ka, kǝpǝna ɓǝ̀ ɓwa ɓǝ̀ kǝa al-nɓwama ɗang.”
11Pǝlǝa Yesu nyesǝia wia ama, “Koyan sǝ nǝ̀ ak mǝnia yì kanigir ka ɗang, she aɓwana mǝnana Ɓakuli pa ce nì acea ka. 12Aɓea ɓwana ka à pà nǝ̀ gandǝ al mɓwama ɗang acemǝnana à ɓǝlia ka abaran na; aɓea ka aɓwana nǝ̀ tsǝia sǝ à pǝlǝ abaran, sǝ aɓea ka à twalî ɓamuria à nǝ̀ do anggo ace pakkiagir mala Domurǝm mala Ɓakuli nǝmurǝì. Ɓwa mǝnana nǝ̀ gandǝ ak mǝnia yì kanigir ka ɓǝ̀ é.”
Yesu tsǝkbu amur amuna
(Markus 10:13-16; Luka 18:15-17)
13Aɓea ɓwana yiu nǝ amuna aban Yesu ace mǝnana ɓǝ̀ tsǝkbu amuria sǝ ɓǝ̀ pakkia wia hiwi ka. Pǝlǝa alaggana mala Yesu lo, à sà arǝ aɓwana mǝno à yiu nǝ amuna ka.
14Sǝ Yesu na ama, “Wu nying amuna amǝkeke ɓǝa yiu abanam, wu kǝa pǝrkia ɗang, acemǝnana Domurǝm mala kuli ka nda ace aɓwana kǝla amuna mǝnia ka.” 15Lang Yesu tsǝngŋǝna bu amur amuna ka, pǝlǝa upi banì.
Lagga mǝkume ɗi Yesu
(Markus 10:17-31; Luka 18:18-30)
16Ɓe ɓwa yiu aban Yesu sǝ ɗi ama, “Malǝm, ya gir mǝɓoarne na mǝ nǝ pa sǝ mǝ kum yilǝmu mǝnana málá male pà kàm raka?”
17Yesu nyesǝi wi ama, “Ace mana sǝ a kǝ ɗiem amur gir mǝnana mǝɓoarne na ka. Kǝ Ɓakuli nǝmurǝì nda mǝɓoarne. Sǝ ɓǝa earce a nǝ kum yilǝmu mǝnana málá male pà kàm raka, dumǝna púp a nǝ kpata anzongcau male.”
18Ɓwabure ɗi ama, “Amǝ ye na?”
Yesu eari wi ama, “Kǝa wal-lú ɗang, bwal rǝo arǝ amamǝna, kǝa iun'i ɗang, kǝa na nyir amur aɓwana ɗang,#19:18 Ɓalli gbal aɓa: Pur 20:13-16; Nggur 5:20. 19pe tárro andǝ nggo gulo, sǝ earce ɓio mǝkunɓala kǝla ɓamuro.”#19:19 Ɓalli gbal aɓa: Pur 20:12; Nggur 5:16; Pǝris 19:18.
20Lagga mǝno ne wi ama, “Ən kpana ta anzongcau mǝnia kat. Mana ueo ɗǝm?”
21Yesu nyesǝi wi ama, “Ɓǝ̀ a nǝ lumsǝ nǝ cauɓoarna ka, o kya makki agirkuma mo, boale ka pe amǝtǝr, a nǝ kum gǝna a kuli. Sǝ wu yiu wu yi kpatam.”
22Lang lagga ok cau mǝnia ka, nyare o nǝ bumkiɗikea, acemǝnana yì ka, mǝkume na kǝrkǝr.
23Pǝlǝa Yesu ne alaggana male ama, “Ən nggǝ na wun mǝsǝcau, ndanǝ kwano ɓǝ̀ mǝkume ɓǝ̀ pa ɓamuri ɓǝ̀ kutio a Domurǝm mala kuli. 24Ən nggǝ bangga wun ɗǝm, pa ɓamuru mala mǝkume aɓata yalmuru mala Ɓakuli ka, kwano kuti kutio mala kalakadambi a tūli nlerǝman.”
25Lang alaggana male ok mǝnia yì cau ka, à ndali kǝrkǝr sǝ à ɗi ama, “Ɓǝ̀ nda anggo ka, yana ɓwe na nǝ̀ auwa?”
26Yesu sǝnia kyap-kyap sǝ na ama, “Aban ɓwapǝndǝa ka mǝnia ka pà nǝ̀ pak ɗang, sǝ aban Ɓakuli ka ko ya gir ka nǝ̀ gandǝ pa.”
27Pǝlǝa Bitǝrus nyesǝi wi ama, “Sǝm nyingŋǝna agir kat sǝm nda ban kpato, mana ado sǝm nǝ̀ kumo?”
28Yesu nea wia ama:
Ən nggǝ na wun mǝsǝcau, a pwari mana bǝsa ɓanza nǝ̀ yiu ka, Muna mala Ɓwa nǝ̀ do a bunomurǝm mǝɓoarɓwe male. Sǝ wun mǝnana wu kǝ kpatam ngga, wu nǝ̀ do amur abuno-murǝm lum-nong-ɓari gbal. Wu nǝ̀ pakki atau mala amǝ Isǝrayila lum-nong-ɓari ɓashi. # 19:28 Ɓalli gbal aɓa:
Mat 25:31; Luk 22:30. 29Sǝ ɓwa mǝnana kat nying ɓala ko amǝ'eambǝu andǝ amǝnggaula, ko tarrû, ko nggeau, ko amuna, ko anzali, ace lullǝam ngga, nǝ̀ kumia kusǝ gbǝman. Sǝ nǝ̀ kum yilǝmu mǝnana málá male pà kàm raka. 30Sǝa ma aɓwana pas mana aɓwana kǝ twalia tyang-tyang ngga, à nǝ̀ ngga pǝlǝa amana à buricea ka, sǝ aɓwana pas mana à kǝ buricea ka à nǝ̀ ngga duk aɓwana mana à nǝ̀ twalia tyang-tyang ngga.#19:30 Ɓalli gbal aɓa: Mat 20:16; Luk 13:30.
Currently Selected:
Matiu 19: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
