Matiu 20
20
Kanicau arǝ amǝturo ɓaban
1Yesu lidǝmbǝa nǝ kanigir male ama:
À nǝ̀ kànì Domurǝm mala kuli arǝ ɓe mǝtala ɓaban mǝnana pur nǝ dǝmbari ɗiɗyal ace alta amǝturo ɓǝa kya pakki wi turo a ɓaban male ka. 2Yì ka, eare nǝ̀ pea wia dinari mwashat ace turo pwari mwashat. Pǝlǝa tasǝia a ɓaban male.
3 A bu-pwari tongno-nong-ine nǝ dǝmbari ka, yi kum aɓea aɓwana aban came ɓa a kun limo. 4Pǝlǝa nea wia ama, “Wun gbal ka wu kya turo a ɓaban mem, mǝ nǝ mbwe wun gir mǝnana ɓoaro ɓǝa pa wun ngga.” 5Pǝlǝa à bwal njar à wario.
Nyare pur ɗǝm nǝ pwarizǝkia andǝ wulio mala pwari kya pwan aɓea amǝturo. 6A bu-pwari tongno mala pwarikpǝra ka, nyare puro kya kum aɓea aɓwana ɗǝm aban came à kǝ pak kǝgir ɗang. Sǝ ɗia ama, “Mana tsǝa sǝ pwari kpa wun kani aban came ɓa wu kǝ pak kǝgir ɗang?”
7 À eari wi ama, “Kǝ ɓwa pa sǝm turo mǝnana sǝm nǝ̀ pak ka ɗang.”
Pǝlǝa nea wia ama, “Wu kyan gbal a turo a ɓaban mem.”
8 Lang pwari kpana ka, mǝtala ɓaban ne ɓwa mǝnana tsǝi ɓǝ̀ kǝ sǝnbi wi ɓaban ngga ama, “Tunǝ amǝturo, mbwea tangnakusǝia. Tite amur amǝ'nzǝmo sǝ wu kya mur amǝdǝmbǝa.” # 20:8 Ɓalli gbal aɓa:
Pǝris 19:13; Nggur 24:15.
9 Aɓwana mana à twalia a bu-pwari tongno mala pwarikpǝra ka, ko yana ka à mbwe dinari mwashat. 10Amana à twalia nǝ dǝmbari ka à yiu nǝ tsǝkɓalǝu ama malea nǝ̀ kuti mala aɓwana mǝno ka. Sǝ kǝ boalo mǝ'mwashati na à pea wia ka. 11Lang à angŋǝna boalo ka, à tita nggwani arǝ mǝtala ɓaban. 12À bangŋa ama, “Aɓwana mǝnana à twalia turo nǝ nzǝmo ka, à pak turo bu-pwari mwashat, kǝ ndo ka, sǝ à mbwe sǝm, sǝm karǝ sǝnǝia, sǝm mǝnana pwari wal sǝm málá amur sǝm aban turo ka.”
13 Pǝlǝa eari ɓeɓwa mwashat atea ama, “Ɓiam, ǝn lio ɗang. A ear amur dinari mwashat re? 14Twal gir mǝnana à mbweo ka o. Nǝ eare mem sǝ ǝn mbweo kǝla mana ǝn mbwe ka amǝ'nzǝmo ka. 15Pa mǝ nǝ gandǝ pak gir mana ǝn earce ka nǝ boalo mem re? A kǝ pak mɓali ace ɓoaro mem le?”
16 Anggo sǝ amǝ'nzǝmo à nǝ̀ pǝlǝ amǝdǝmbǝa, sǝ amǝdǝmbǝa nǝ̀ pǝlǝ amǝ'nzǝmo. # 20:16 Ɓalli gbal aɓa:
Mat 19:30; Mar 10:31; Luk 13:30.
Yesu bang cau ɗǝm amur lú male
(Markus 10:32-34; Luka 18:31-34)
17Lang Yesu na ban o a Urǝshalima ka, tunǝ alaggana male lum-nong-ɓari a giriban, sǝ nea wia ama:
18 Sǝm ndo sǝm nggǝ eauwe aban ká a Urǝshalima ka, sǝ Muna mala Ɓwa ka à nǝ̀ ngga me aban agbani pǝris andǝ amǝkani Nggurcau. À nǝ̀ pakki wi ɓashi mǝnana nǝ̀ ká nǝi a lú ka. 19À nǝ̀ tasǝi a bu aɓwana mǝnana amǝ Yahudi na raka#20:19 aɓwana mǝnana amǝ Yahudi na raka: A mǝnia ka à ndaka amǝ Roma mana a baku mǝno ka amǝ Isǝrayila na aɓata nggwamnati malea ka. mǝnana à nǝ̀ ɓǝsǝki, à nǝ̀ kwe, sǝ à nǝ̀ gballì a nggun-gangndi ka. A tāruia nongŋo ka nǝ̀ lo nǝ yilǝmu!
Zǝmbǝa mala nggea ka Yohana andǝ Jemis
(Markus 10:35-45)
20Nggea ka muna mala Zabadi yiu aban Yesu nǝ amuni Yohana andǝ Jemis, sǝ yi kūndǝo a nzali sǝ zǝm ɓwamuru.
21Yesu ɗi ama, “Mana a earkiyice?”
Pǝlǝa na ama, “Mǝ nda aban zǝmbǝa ama alaggalem mǝnia ɓari ka, wu tsǝk mwashat ɓǝ̀ do a buo mǝli, sǝ ɓe mǝnia ka a buo mǝnggare a Domurǝm mo.”
22Yesu nyesǝia wia ama, “Wu surǝ gir mǝnana wu zǝmnggi ka ɗang. Wu nǝ̀ gandǝ nu tanni mǝnana ado mǝ nǝ nu ka le?”
À ear ama, “E, sǝm nǝ̀ gandǝi.”
23Yesu nea wia ama, “Ɓafo, wu nǝ̀ gandǝ nu tanni mǝnana mǝ nǝ nu ka, sǝa ma pa ban-do a buam-mǝlì ko mǝnggare ka pà aɓa rǝcandǝa mem ɗang. Amǝnia yì aban ngga nda ace aɓwana mǝnana Tárram gilǝkia wia ka.”
24Lang acili alaggana mala Yesu mǝnia lum ok ce ka, bumia lul arǝ amǝ'eambu mǝnia ɓari ka. 25Yesu pǝlǝa tunǝia abanarǝia sǝ na ama, “Wu sǝlǝa ama amurǝma mala mǝnia yì ɓanza ka à kǝ lǝmndǝ gulo amur aɓwana malea, sǝ aɓwana-mǝgule malea kǝ lǝmndǝia wia rǝcandǝa. 26Sǝ ma'wun ngga, anggo sǝ nǝ̀ pak ɗang. Ɓǝ̀ ya ɓwa na earce nǝ̀ duk ɓwamǝgule ata wun ngga, dumǝna púp nǝ̀ nyesǝ ɓamuri nda muna-ɓala aban wun.#20:26 Ɓalli gbal aɓa: Mat 23:11; Mar 9:35; Luk 22:26. 27Sǝ ɓwa mǝnana earce nǝ̀ duk murǝm ngga, dumǝna púp nǝ̀ duk guro ma'wun. 28Nda kǝla Muna mala Ɓwa, mǝnana yiu ace dumsǝ aɓwana aguro raka. Yiu ace duk guro sǝ nǝ̀ pa yilǝmi ace amsǝ#20:28 amsǝ: Ko “akmúr” aɓwana pas.”
Ante ɓari kum sǝnban
(Markus 10:46-52; Luka 18:35-43)
29Lang Yesu andǝ alaggana male à ndarǝ puri ɓa là Jeriko ka, aɓwana pas kana atea. 30Ante ɓari à nda ban do a girǝi njargula. Lang à ok ama Yesu na kǝ kuti ka, à loasǝ gia ama, “Mǝtalabangŋo, Muna mala Dauda#20:30 Muna mala Dauda: Ko “Mǝkà Dauda.”, sǝn mǝsǝswatǝr ma'sǝm!”
31Ɓwabunda sà a rǝia ama ɓǝa duk kunia piu. Sǝ à ɓine à loasǝ gia bang-bang ama, “Mǝtalabangŋo, Muna mala Dauda, sǝn mǝsǝswatǝr ma'sǝm!”
32Yesu pǝlǝa came sǝ ɗia ama, “Mana wu earkiyice ɓǝn pakka wun?”
33À banggi wi ama, “Ɓwamǝgule, sǝm nggǝ earce ɓǝ̀ mǝsǝ sǝm sǝnban.”
34Yesu sǝn mǝsǝswatǝr malea sǝ tsǝk bui a mǝsǝia. Kara mǝsǝia mǝnna àkǝ̀ banì, pǝlǝa a o ate.
Currently Selected:
Matiu 20: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
