Markus 1

Hama mala Yohana Mǝbatisǝma

(Matiu 3:1-12; Luka 3:1-18; Yohana 1:19-28)

1Ani sǝ Cau Amsǝban mala Yesu Kǝrǝsti, Muna mala Ɓakuli tite.

2Kǝla mana à gilǝì aɓa malǝmce mala Ishaya, mǝɓangna mala Ɓakuli ka, Ɓakuli bangŋa ama:

“Mǝ ndya ǝn nggǝ tur

mǝturonjar mem

ɓǝ̀ ako dǝmbǝa,

ɓǝ̀ yi gilǝkio tanjargula.”#1:2 Ɓalli gbal aɓa: Pur 23:20; Mal 3:1.

3“Giu mala ɓǝɓwa

kǝ tunǝban a ɓabondo ama,

‘Wu gilǝki tanjar

ace Mǝtalabangŋo!

Wu tamsǝi wi atanjar pǝrapǝra

ɓǝ̀ ging nggam!’ ”#1:3 Ɓalli gbal aɓa: Isha 40:3.

4Mǝnia yì mǝturonjar ka nda Yohana Mǝbatisǝma. Puro yiu kǝ hamnǝ Cau Amsǝban aban aɓwana a ɓabondo ama, “Wu pwanzali wu ɗeki bu wun arǝ acauɓikea ma'wun, Ɓakuli nǝ̀ twala wun bania, sǝ dumǝna púp ɓǝa pakka wun batisǝma.” 5Ɓwabunda pur arǝ acilia ala aɓa nzali Yahudi, andǝ ɓa Urǝshalima aban yiu a sǝne sǝ à nǝ̀ ok hama male. À kǝ bang acauɓikea malea, sǝ Yohana kǝ pakkia wia batisǝma a kun Nggeasala Jodan. 6Agir-nggurǝu male yì Yohana ka, à pea nǝ nggu kalakadambi, sǝ nggur-ɓunu male ka nggu-bangŋa na. Girlina male ka doshi na andǝ mur'nyi mǝnana kumo ɓun kano a ɓabondo ka.#1:6 Ɓalli gbal aɓa: 2Amur 1:8. 7Kǝ hama, kǝ bangŋa ama, “Ɓe ɓwa nà kǝ yiu a nzǝmam ngga. Gulo kutiam kǝrkǝr, ko anggur nkura kusǝì ka ǝn kārǝa mǝ nǝ kūndǝo mǝ nǝ panzǝia ɗang. 8Nǝ mur sǝ ǝn nggǝ pakka wun batisǝma, sǝ yì ka, nǝ̀ pakka wun batisǝma nǝ Bangŋo Mǝfele!”

Batisǝma andǝ karǝkiban mala Yesu

(Matiu 3:13-17; Luka 3:21-22)

9Aɓalǝ amǝno yì anonggeo ka, Yesu pur a Nazarat, a bu-nzali Galili. Yohana yi pakki wi batisǝma a Nggeasala Jodan. 10Yesu na aban eapi mur ani ka, kara sǝn kuli mǝna. Bangŋo Mǝfele sulǝo aban yiu amuri kǝla kutu. 11Gi Ɓakuli pur nǝ kuli na ama, “A nda Munem mǝnana ǝn earkiyi ace raka, mǝnana ban kǝ ɓoaram a rǝì ka.”#1:11 Ɓalli gbal aɓa: Tite 22:2; Ang 2:7; Isha 42:1; Mat 3:17; Mar 9:7; Luk 3:22. 12Zuku ka, Bangŋo loasǝ Yesu aban ká a ɓabondo. 13Nda kano a ɓabondo, nongŋo lumi-ine, Shetan na aban karǝke. Yesu ka nda nǝmurǝì andǝ anyam ɓabondo mana abanì ka. Amǝturonjar mala Ɓakuli yiu à yì bwali wi kam.

Yesu tita tunǝ amǝ kpate

(Matiu 4:12-22; Luka 4:14; 5:1-11)

14Anzǝm mana à bwalǝna Yohana à oasǝni a ndàkurban ngga, Yesu o a nzali Galili, kǝ hamnǝ Cau Amsǝban mala Ɓakuli. 15Kǝ bangŋa ama, “Pwari karǝna! Domurǝm mala Ɓakuli gbashina tu! Wu pwanzali wu ɗeki bu wun arǝ acauɓikea ma'wun, wu earnǝ Cau Amsǝban wu é!”#1:15 Ɓalli gbal aɓa: Mat 3:2.

16Lang Yesu na ban gya a kun Nggeamur Galili ka, mǝsǝì kpa arǝ Shiman andǝ mǝ'eambǝi Andǝru, aban taula nǝ andámbú, acemǝnana yia ka amǝbwalki anji na. 17Yesu nea wia ama, “Wu yiu atam, mǝ nǝ tsǝk wun wu nǝ̀ duk amǝbwalki aɓwana.” 18Àkǝ̀ banì kara à ɗeki andámbú malea, à kpate.

19Nǝ̀ tur a dǝmbǝa bǝti anggo ka, nyare sǝn Jemis, muna mala Zabadi a tarǝia andǝ mǝ'eambǝi Yohana. Yia ka à nda aɓa waru aban gilǝki andámbú malea. 20Yesu tunǝia. Pǝlǝa à ɗeki tárria yì Zabadi aɓa waru andǝ aɓwana mǝnana à twalia ace nun ndāmbú ka, à o ate.

Yesu pusǝ kukwar arǝ ɓwa

(Luka 4:31-37)

21Yesu andǝ alaggana male wario a Kapanahum. Pwari Sabbat karǝna ka Yesu kutio a ndakpapi, tita kanigir kam. 22Kanigir male pakkia wia ndali, acemǝnana kǝ kania wia gir nǝ sǝlǝe andǝ rǝcandǝa, pa kǝla mala amalǝm Nggurcau ɗang.#1:22 Ɓalli gbal aɓa: Mat 7:28,29.

23Àkǝ̀ banì mǝno ka, ɓeɓwa nakam nǝ bangŋo mǝɓane a rǝì aɓa ndakpapi, lo mak'zwalo, kǝ na ama, 24“We Yesu ɓwa Nazarat, mana a earkiyice arǝ sǝm? A yiua kiɗiki sǝm, a nǝ mal sǝm le? Ən surǝo, a nda Ɓwa Mǝfele mala Ɓakuli!”

25Yesu sà arǝ kukwar, ne wi ama, “Duk kuno piu, puri rǝ ɓwa man!”

26Bangŋo mǝɓane dǝkǝrǝki nǝ rǝcandǝa, mak'zwalo, pǝlǝa puri rǝi. 27Ɓwapǝndǝa ndali kǝrkǝr gandǝa à kǝ ɗiki rǝarǝia ama, “Mana aman? Ɓe kǝ bǝsa kanigir na nǝ rǝcandǝa! Nggearǝ abangŋo mǝɓane ka, kǝ sàrǝia sǝ à kǝ oki wi.”

28Àkǝ̀ dyadyan cau male akiban a bu-nzali Galili kat.

Yesu twali aɓwana pas ban rǝkwana

(Matiu 8:14-25; Luka 4:38-41)

29Yesu nǝ̀ puri ndakpapi ani ka, yì, andǝ Jemis andǝ Yohana, à kutio a ɓala mala Shiman andǝ Andǝru. 30Nkil Shiman mǝɓwame ka nda aban nongŋo, ɓauwa eari wi ɗang, pǝlǝa à banggi Yesu cau mala rǝkwana male. 31Yesu kuti abani kya bwali a garabui loasǝi. Ɓauwa puri rǝì, pǝlǝa lo pea wia girlina.

32Nǝ mǝno yì pwari kpana ka, amǝ le yiu nǝ amǝkwano, andǝ aɓwana mǝnana nǝ akukwar aɓa nyamia ka, abani. 33Ɓwapǝndǝa mana a la kat ka à dapi a kunɓala. 34Yesu twalban arǝkwana ɗàngɗáng arǝ aɓwana. Sǝ pusǝ akukwar pas, sǝ ko earia wia ɓǝa na cau ɗang, acemǝnana à sǝlǝna ama yì ka, Muna mala Ɓakuli na.

Yesu o a pak hiwi nǝmurǝì

(Luka 4:42-44)

35Nǝ dǝmbari ɗiɗyal, ban malaká fa pepe ɗang, Yesu puri ɓa la o aban mǝnana kǝɓwa pà kàm raka, kya pak hiwi. 36Shiman andǝ aɓi à puro aban alte. 37Lang à kya kumǝni ka, à ne wi ama, “Koyana le ka nda ban alto!”

38Yesu earia wia ama, “Wu fa sǝm nǝ̀ kánì arǝ acili amuna-là mana akani tu ka. Mǝ nǝ ngga hamnǝ Cau Amsǝban kam gbal, acemǝnana nda kǝgir mǝnana yinǝ mim ngga.”

39Pǝlǝa gya aɓa nzali Galili kat, kutio arǝ andakpapi malea aban hamnǝ Cau Amsǝban, sǝ kǝ pusǝ akukwar arǝ aɓwana.#1:39 Ɓalli gbal aɓa: Mat 4:23; 9:35.

Yesu twali mǝdakali ban rǝkwana

(Matiu 8:1-4; Luka 5:12-16)

40Ɓe ɓwa mǝdakali yiu yi kūndǝo a ɓadǝm Yesu, zǝmbǝi wi ama, “Ɓǝ̀ a nǝ ear ka, a nǝ gandǝ twalam ban mǝnia yì kwano ka ɓǝ̀ rǝam ɓoarnsari.”

41Mǝsǝswatǝr bwal Yesu kǝrkǝr, pǝlǝa lǝmndǝ bui jena rǝì nǝi, ne wi ama, “Ən earǝna, ɓǝ̀ rǝo mala!” 42Àkǝ̀ banì kara dakali malǝna, rǝì ɓoarnansari. 43Yesu ne wi cau nunkiri, pǝlǝa tasǝi ɓǝ̀ o. 44Ne wi ama, “Kǝa ne kǝɓwa ce ɗang. A kun mani ka, kutio kya lǝmndǝ ɓamuro aban pǝris ɓǝ̀ pelǝkio. Sǝ ace mǝnana ɓǝ̀ ko yan ngga ɓǝ̀ sǝlǝ ama rǝo malǝna ka, kyane kya pa ɓoro-bu a Ndàmǝgule kǝla mǝnana Musa kasǝa ace sonzǝo mala rǝo ka.”#1:44 Ɓalli gbal aɓa: Pǝris 14:1-32.

45Sǝa ma lang purna ka, kara tita mesǝ ce a koya ban ngga. Gir nî tsǝa Yesu gandǝ kutio a ɓe kǝ la a ɓamǝsǝ aɓwana ɗang, ak rǝì arǝ aban mǝnana kǝɓwa pà kàm raka. Kat andǝ amani ka, ɓwapǝndǝa pur a koya ban ngga aban yiu abani.

Currently Selected:

Markus 1: mbu

Highlight

Copy