Markus 2
2
Yesu twalban kwano rǝwuna
(Matiu 9:1-8; Luka 5:15-26)
1Anzǝm anongŋo bǝti ka, Yesu nyare a Kapanahum. Ceì akiban ama nyarǝna nda a ɓala. 2Zuku ka ɓwabunda yiu yi lumsǝna ban kàngkàng, yi pur a kun ɓala, ko kǝ ban oasǝ kusǝu pa kàm ɗang. Lang Yesu na aban hambia wia nǝ cau mala Ɓakuli ka, 3aɓea aɓwana, yia ine, à twal ɓe mǝrǝkwana mǝnana sú arǝ abui andǝ akusǝi ka, aɓa kala, à yiu nǝi aban Yesu. 4Sǝ acemǝnana ɓwapǝndǝa lakki kǝrkǝr, à kum njargula kuti nǝi a ɓadǝmbǝi raka, à pǝlǝa à eau nǝ mur kurǝm, à mǝn njar kam, sǝ à sulǝ mǝrǝkwana aɓa kala, nǝ anggur, a ɓadǝm Yesu. 5Lang Yesu sǝn guliarǝu malea a rǝì ka, pǝlǝa ne mǝrǝkwana ama, “Laggalem, à twalǝno ban acauɓikea mo.”
6Aɓea malǝm Nggurcau nakam aban do, à kǝ pakki aɗenyicau a rǝarǝia ama, 7“Palang sǝ mǝnia yì ɓwa ka bang ulang cau man? Nyesǝ ɓamuri kǝla nda Ɓakuli! Kǝ Ɓakuli raka, yana ɓwe nǝ̀ gandǝ twalban cauɓikea?”
8Anggo ka kara Yesu sǝlǝ ɗenyicau mǝnana a ɓabumia ka, sǝ ɗia ama, “Palang sǝ wu kǝ ndali amur mǝnia yì agir ka a ɓabum wun? 9Mǝye na kwano kutibanì, yi mǝnana ɓǝa ne mǝkwano ama, ‘À twalǝno ban acauɓikea mo’ ka le, ko ɓǝa na ama, ‘Lo, twal kala mo, sǝ wu ging’ ngga? 10Sǝ ace mǝnana ɓǝ̀ wu sǝlǝ ama Muna mala Ɓwa ka, ndanǝ rǝcandǝa akani a ɓanza, mala twalban cauɓikea ka, mǝ ndo mǝ nǝ lǝmndǝa wun ngga.” Pǝlǝa ne mǝkwano ama, 11“Mǝ́ nǝ̀ banggo, lo, twal kala mo, o a ɓala!”
12Pǝlǝa mǝkwano lo, twal kala male, àkǝ̀ ɓamǝsǝia kat, aban o. Koyan ngga gir nî pakki wi ndali, à gusǝlǝ Ɓakuli à kǝ bangŋa ama, “Sǝm malaká sǝn ulang mǝnia yì gir ka ɗang!”
Yesu tunǝ Lawi
(Matiu 9:9-13; Luka 5:27-32)
13Yesu nyare puro o a kun Nggeamur Galili. Ɓwabunda puro aban ká abani, pǝlǝa kania wia gir. 14Nda ban kutio ka, mǝsǝì kpa arǝ Lawi, muna mala Alfiyus, dumǝna aban ak boalo-cemi, aɓa mǝdanki cemi. Yesu ne wi ama, “Yiu atam.” Pǝlǝa Lawi lo o ate. 15Anzǝm mǝno ka Yesu do aban li girlina a ɓala mala Lawi. Amǝcemi pas andǝ amǝnana aɓwana twalia ama amǝ'cauɓikea na ka, à yì do à kǝ lili andǝ Yesu andǝ alaggana male. Aɓwana ulang amǝnia ka à ndakam pas mǝnana à kǝ gya ata Yesu ka. 16Lang amalǝm Nggurcau mala Musa mǝnana amǝ Farisi na, à sǝn Yesu aban lili andǝ amǝ'cauɓikea andǝ amǝcemi ka, à ɗi ka laggana male ama, “Palang sǝ kǝ lili andǝ amǝcemi andǝ amǝ'cauɓikea?” 17Yesu nǝ̀ oe ka, nea wia ama, “Aɓwana mǝnana rǝia bǎng ngga, à kǝ alta mǝsonzǝo ɗang, she amǝkwano. Ən yiu ace tunǝ aɓwana mǝnana à kǝ sǝni kǝla amǝ'cauɓoarna na ka ɗang, ǝn yiu ace tunǝ amǝ'cauɓikea.”
Ɗiban amur gilmur
(Matiu 9:14-17; Luka 5:33-39)
18Ɓe pwari nakam alaggana mala Yohana Mǝbatisǝma andǝ amǝ Farisi à nda ban gilmur. Aɓea ɓwana yiu aban Yesu à yì ɗi ama, “Palang sǝ alaggana mala Yohana andǝ mala amǝ Farisi ka, à kǝ gilmur, sǝ alaggana mo ka à kǝ gil ɗang?” 19Yesu nea wia ama, “Lang sǝ agyajam mala bura-manfela nǝ̀ gilmur yi mǝnana nda abania peatu ka? Ɓǝà nda a tarǝia andǝ bura-manfela ka, à pà nǝ̀ gilmur ɗang. 20Pwari mǝnana à twalǝna bura-manfela a rǝia ka, akàm sǝ yia ka à nǝ̀ gilmur.
21 “Kǝɓwa pà nǝ̀ twal nggurbyau mǝbǝshe sǝ nǝ̀ mbakina mǝ'e nǝi ka ɗang. Ɓǝ̀ pe anggo ka, nggurbyau mǝbǝshe nǝ̀ kpami, nǝ̀ san nggurbyau mǝ'e, nggea sana mǝgule. 22Sǝ kǝɓwa pà nǝ̀ solǝ mùr ɓǝlanggun anap mǝbǝshe aɓa eakǝna luru mala mùr ɓǝlanggun anap ɗang. Ɓǝ̀ pa anggo ka, mùr ɓǝlanggun anap nǝ̀ vwali nǝ̀ ar luru, sǝ mùr ɓǝlanggun anap andǝ luru kǝm ngga à nǝ̀ ueɓà. Mùr ɓǝlanggun anap mǝbǝshe ka a luru mǝbǝshe sǝ à nǝ̀ soe.”
Ɓwamǝgule amur Sabbat
(Matiu 12:1-8; Luka 6:1-5)
23A ɓe pwari Sabbat, pwari usǝlǝo mala amǝ Yahudi, Yesu andǝ alaggana male gya à kǝ kuti nǝban aɓea aɓaban mǝssa. À nǝ̀ nggǝ ká ka, alaggana male kutia harki kir mǝssa à kǝ she.#2:23 Ɓalli gbal aɓa: Nggur 23:25. 24Pǝlǝa amǝ Farisi ne wi ama, “Sǝni, palang sǝ alaggana mo kǝ yàl Nggurcau, à kǝ pak turo kasǝki mǝssa a pwari Sabbat?” 25Pǝlǝa Yesu nea wia ama, “Wu ɓal gir mǝnana Dauda pak ka re, yi mǝnana yì andǝ amǝte ka, nzala walia sǝ à kutia alta girlina ka? 26Yiu yi kutio aɓa Nda mala Ɓakuli (a baki mǝnana Abiyata nda pǝris mǝgule ka), yàl Nggurcau, shak bǝredi mǝnana à tarrì ace Ɓakuli, mǝnana apǝris na nǝmurǝia ɓoaro ɓǝa shak ka. Pǝlǝa pe aɓwana mǝnana ate ka gbal, à she.”#2:26 Ɓalli gbal aɓa: 1Sam 21:1-6; Pǝris 24:9. 27Pǝlǝa Yesu nea wia ama, “Sabbat, pwari usǝlǝo mala amǝ Yahudi ka, à pè ace ɓwapǝndǝa, à pak ɓwapǝndǝa ace Sabbat ɗang. 28Ace mani ka, mim Muna mala Ɓwa ka, mǝ nda Mǝtalabangŋo sǝ mǝ nda mǝtala Sabbat gbal.”
Currently Selected:
Markus 2: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
