Markus 3
3
Yesu twalban rǝkwana a pwari Sabbat
(Matiu 12:9-14; Luka 6:6-11)
1A ɓekǝ pwari ka Yesu nyare kutio a ndakpapi. Ɓe ɓwa nakam bui wu. 2Amǝ Farisi, kúndǝo à nǝ̀ sǝni ko nǝ̀ twalban rǝkwana a pwari Sabbat, pwari usǝlǝo mala amǝ Yahudi. Ace mǝnana à nǝ̀ kum cau mǝnana, à nǝ̀ bwali nǝi ka.
3Yesu ne ɓwa mǝnana bui wu ka ama, “Lo, yiu yi cam kani a ɓadǝm aɓwana.” 4Yesu pǝlǝa ɗi aɓwana ama, “Mǝ ye na nggurcau eare ɓǝa pe a pwari Sabbat, ɓǝa pak mǝɓoarne le ko ɓǝa pak mǝɓane? Ɓǝa amsǝ yilǝmu le ko ɓǝa kiɗiki?” Kara à duk kunia piu.
5Pǝlǝ rǝì anggo sǝnia nǝ bumlulla, nǝ bumkiɗikea kǝrkǝr arǝ murcandǝa malea, pǝlǝa ne mǝkwano ama, “Sarǝ buo.” Lang mǝrǝkwana sarǝ bui ka, kara rǝì mala, bui nyarǝna pangŋǝna pepe! 6Kara amǝ Farisi puro a nza, à kya kum aɓwana mala Hirǝdus, à kurkun a rǝarǝia andǝia, amur wal-lú Yesu.
Ɓwabunda o ata Yesu
7Yesu lo andǝ alaggana male à nyare a kun nggeamur. Ɓwabunda pas puro o ate. À pur arǝ aban aɓa Galili, andǝ Yahudi, 8andǝ Urǝshalima, andǝ bu-nzali Idumiya, andǝ nkaring Nggeasala Jodan; sǝ aɓea ka à pur kuko nǝ abu-nzali mala amǝ Taya andǝ Sidon, à yiu ate. Cau mala agir-ndali mana kat kǝ pakki ka mǝsǝe akiban, nda ɓwabunda pas puro yiua sǝne ka. 9Ace ɓiki lakki mala ɓwapǝndǝa ka, pǝlǝa ne alaggana male ama ɓǝa alta muna-waru nǝ̀ eau kam, ɓǝ̀ ɓwapǝndǝa ɓǝ̀ kǝa nggiki ɗang. 10A mǝno yì pwari ka twalǝni aɓwana pas ban arǝkwana malea, nda aɓea amǝkwano ɗàngɗáng kǝ ramnggiban aban ká dǝmbǝa à nǝ̀ kumsǝ rǝì. 11Ɓǝ̀ aɓwana mǝnana nǝ akukwar aɓa nyamia sǝni nǝ sǝna ani ka, à yì sukki nǝ sukkio a ɓadǝmbǝi nǝ zwalo a kunia, à kǝ na ama, “A nda Muna mala Ɓakuli!” 12Sǝ yì ka, nunkir akukwar nì kǝrkǝr ama ɓǝa kǝa na yan nda yì ɗang.
Yesu tarki amǝ Mishan lum nong-ɓari
(Matiu 10:1-4; Luka 6:12-16)
13Yesu eauwe amur nkono, sǝ tunǝ aɓwana mǝnana earki cea ka, pǝlǝa à eauwe ate. 14Kya tarki aɓwana lum nong-ɓari sǝ pea wia lullǝu ama amǝ'mishan. Yia ka à nǝ̀ do ate, sǝ nǝ̀ nggǝ tasǝia ɓǝa kya hamnǝ Cau Amsǝban, 15sǝ pea wia rǝcandǝa mala pǝr akukwar ɓǝa purki rǝ aɓwana. 16Ata aɓwana lum nong-ɓari mǝnana tarkia ka
Shiman na kam (yi mǝnana tsǝki wi lullǝu ama Bitǝrus ka).
17Jemis muna mala Zabadi, andǝ mǝ'eambǝi Yohana (mana tsǝkia wia lullǝu ama Boanajis: ɓālǝi ama, Amuna mala Mgbarangce) ka, à ndakam atea.
18Andǝru,
andǝ Filip,
andǝ Batalomi,
andǝ Matiu,
andǝ Toma,
sǝ Jemis muna mala Alfiyus,
sǝ Tadawus ka, à ndakam gbal atea.
Acilia ka à nda ka Shiman yì ɓwa mana earkiyi ace la male raka,
19sǝ Yahuda Iskariyoti mǝnana me ka.
Yesu kuti murǝm mala akukwar
(Matiu 12:22-32; Luka 11:14-23)
20Yesu kutio aɓe ɓala. Ɓwabunda yiu yi ram ɗǝm, mǝnana tsǝa yì andǝ alaggana male à gandǝ li girlina raka. 21Lang amǝ ɓala male nǝ̀ ok ce ka, à puro à wario ama à nǝ̀ ngga bwali, à nǝ̀ um nǝi, acemǝnana a ne malea ka, “Muri pǝlǝna.” 22Sǝ amalǝm Nggurcau mala Musa mana à pur nǝ Urǝshalima ka, à kǝ na ama, “Baalzabul, murǝm mala akukwar kutio a rǝì. Nda gir mǝnana tsǝa sǝ ndanǝ rǝcandǝa mala pǝr akukwar ɓǝa pur ka.”#3:22 Ɓalli gbal aɓa: Mat 9:34; 10:25. 23Pǝlǝa Yesu tunǝia sǝ nea wia cau nǝ kanicau ama, “Palang sǝ Shetan nǝ̀ pǝr Shetan? 24Nzali murǝm mǝnana aɓwana male gakia à kǝ munǝo a rǝarǝia ka, pa nǝ̀ cam ɗang. 25Sǝ ɓǝ̀ ɓala sǝ gau rǝì aban munǝo a rǝarǝia ka, mǝno yì ɓalae gbal ka, pa nǝ̀ cam ɗang. 26Anggo gbal, ɓǝ̀ Shetan lo arǝ ɓamuri sǝ gau ka, pa nǝ̀ cam ɗang, male malǝna. 27Mǝsǝcau ka, ɓwa pa nǝ̀ gandǝ kutio a ɓala mala candǝna ɓwa nǝ̀ pwan girkuma male ɗang, she ɓǝ̀ angŋǝna dǝmbǝa tana abui andǝ akusǝi ka, sǝ nǝ̀ gandǝ pwan girɓala male.
28 “Ən nggǝ na wun mǝsǝcau, koya cauɓikea ka à nǝ̀ twali muna ɓwapǝndǝa banì andǝ koya cau kyauwikiban mǝnana pur a kunia ka. 29Sǝa ma cauɓikea nacau kyauwikiban arǝ Bangŋo Mǝfele ka, à pà nǝ̀ twalbani ɗang, cauɓikea na mǝnana nǝ̀ um nǝ ɓwa a lú mǝnana málá male pà kàm raka.”#3:29 Ɓalli gbal aɓa: Luk 12:10. 30Yesu nea wia mǝnia yì cau ka, acemǝnana à kǝ na ama, “Yì ka, ndanǝ kukwar ate.”
Nggea Yesu andǝ amǝ'eambǝi
(Matiu 13:1-9; Luka 8:4-8)
31Anggo ka nggea Yesu andǝ amǝ'eambǝi à yina à yì cam a nza, sǝ à turban ama ɓǝa tunǝi. 32Ɓwabunda nia rambǝa kàrǝì aɓalǝu ka, pǝlǝa ɓeɓwa ne wi ama, “Nggo andǝ amǝ'eambǝo à nda a nza à kǝ ɗiceo ka.”
33Yesu nǝ̀ ear ka nea wia ama, “Yana nda nggem sǝ ayana à ndaka amǝ'eambǝam?” 34Pǝlǝ mǝsǝì arǝ aɓwana mana à rambǝa à kàrǝì aɓalǝu ka, sǝ na ama, “Anggem andǝ amǝ'eambǝam nia ka! 35Ɓwa mǝnana kat kǝ pak kàne mala Ɓakuli ka, nda mǝ'eambǝam, sǝ nggem.”
Currently Selected:
Markus 3: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
