Markus 4
4
Kanicau arǝ mǝɓeale
(Matiu 13:1-9; Luka 8:4-8)
1Yesu tita kanigir ɗǝm a kun nggeamur. Ɓwabunda rambǝa rǝì kǝrkǝr, gandǝa eauwe do a waru amur nggeamur, sǝ ɓwapǝndǝa cam a kunmur.#4:1 Ɓalli gbal aɓa: Luk 5:1-3. 2Kania wia agir pas nǝ kanicau. Aɓa kanigir male ka nea wia ama, 3“Wu kwaki kir wun! Mǝ'rya puro o aban ɓeale. 4Lang nda aban kok mǝsǝɓeale ka, aɓea sukkio amur njargula, amuna-nyal yiu à yì tarkia kat. 5Aɓea sukkio amur mǝsǝtali, aban mǝnana nzali pà kàm pepe raka. Banì sau ɗang, kara mǝssa puro, acemana nzali banì lim ɗang. 6Lang pwari ta bang-bang ngga, kara à wuli, à ime, acemǝnana nlerǝia bwal nzali pepe ɗang. 7Aman ngga à sukkio aɓa mǝsǝ zwe, azwe lo gulo, kara à sorǝki amuna mǝssa kat, ko a ɓǝl ɗang. 8Aɓea ka, à sukkio a nzǝm nzali mǝɓoarne. À gulo, à mǝn rǝia, à ɓǝl nggangsang, aman kusǝ lumi-tārú, sǝ aman lumi tongno-nong-mwashat, nggearǝ aman ngga lumi-lum mala gir mǝnana à ɓeal ka.” 9Pǝlǝa Yesu nea wia ama, “Ɓwa mǝnana ndanǝ akiru okban ngga, ɓǝ̀ o sǝ ɓǝ̀ kpaki wi.”
Yesu bǝl ɓa kanicau arǝ mǝɓeale
(Matiu 13:10-23; Luka 8:9-10,11-15)
10Lang Yesu na nǝmurǝì ka, aɓea ɓwana mǝnana à ok kanigir ka à yiu abani a tarǝia andǝ alaggana male sǝ à ɗi ɓǝ̀ bǝlia wia ɓalǝ akanicau nì. 11Nea wia ama:
Ma wun ngga girsǝmbǝrǝa aɓa domurǝm mala Ɓakuli ka à pana wuni ɓǝ̀ wu surǝì. Sǝa ma aɓwana mana à pa aɓalǝ wun raka, koya gir ka à nǝ̀ banggia wia nǝ kanicau. 12Acemǝnana,
“Ɓǝ̀ mala sǝnban nǝ
mǝsǝu na ka,
à nǝ̀ sǝna,
sǝ à pà nǝ̀ bwalte ɗang.
Ɓǝ̀ okban na nǝ kiru ka,
à nǝ̀ o,
sǝ à pà nǝ̀ surǝì ɗang.
Ɓǝ̀ ana raka à nǝ̀ nyare abanam
sǝ à nǝ̀ twalia wia banì!” # 4:12 Ɓalli gbal aɓa:
Isha 6:9,10.
13Pǝlǝa Yesu nea wia ama:
Ɓǝ̀ wu bwalta ɓa mǝnia yì kanicau raka, lang sǝ wu nǝ̀ bwalta ɓa ɓe kǝ kanicau? 14Mǝ'rya ka cau mala Ɓakuli na ɓeal ka. 15Aɓea aɓwana ka à nda kǝla mǝsǝɓeale mǝnana kpa amur njargula ka. Lang à ok cau ka, Shetan gya kaurǝa yi tarki cau mana à ɓeali a ɓabumia ka. 16Aɓea aɓwana ka à nda kǝla mǝsǝɓeale mǝnana à sukki amur mǝsǝtali ka. À ok cau mala Ɓakuli ka, a é àkǝ̀ dyadyan nǝ bumpwasǝa. 17Sǝ acemǝnana à pànǝ́ nlerǝia raka, bania sau ɗang. Ɓǝ̀ tanni ko mursana lo ata ce ka, àkǝ̀ dyadyan à nying buia.
18 Aɓea gbal ka à nda kǝla mǝsǝɓeale mǝnana sukkio aɓa mǝsǝ zwe ka. Yia ka à ok cau mala Ɓakuli, 19sǝa ma bumpina mala pǝrta gir ɓanza andǝ earce kume, andǝ suno ace acili agir ɗàngɗáng, à shak ce kat, ko kǝ kina pusǝ ɓǝle ɗang. 20Aɓea ka à nda kǝla mǝsǝɓeale mǝnana à ɓeali a nzali mǝɓoarne ka, à ok cau, à é, ɓǝla a ɓabumia; aman banì lumi-tārú, aman lumi-tongno-nong-mwashat, aman ngga lumi-lum mala gir mǝnana à ɓeal ka.
Tamsǝ pitǝla aban tamsǝe
(Luka 8:16-18)
21Yesu nea wia ama:
À nǝ̀ tsǝk bǝsa a pitǝla sǝ à nǝ̀ kumsǝi kǝrǝm amuri ko à nǝ̀ oasǝi aɓata gado le? Amur gir tamsǝe sǝ à nǝ̀ ci re? # 4:21 Ɓalli gbal aɓa:
Mat 5:15; Luk 11:33. 22Anggo gbal gir kat mala cau mala Ɓakuli, mǝnana sǝmbǝrǝa aɓwana bwalte raka, à nǝ̀ ngga pusǝì a banfana, ɓǝ̀ aɓwana surǝì.#4:22 Ɓalli gbal aɓa: Mat 10:26; Luk 12:2. 23Ɓǝ̀ ɓwa na nǝ kir okban ngga, ɓǝ̀ o.
24Nyare lidǝmbǝa nǝ cau ama:
Wu parkir wun arǝ gir mana wu kǝ ok ka. Sǝlǝe mǝnana Ɓakuli nǝ pa wun ngga nǝ̀ kārǝí arǝ kwakikiru ma'wun arǝ cau. Yale nǝ̀ pa wun sǝlǝe mǝnana kutibanì ka, ɓǝ̀ wu duk amǝ kwaki kiru pepe ka. # 4:24 Ɓalli gbal aɓa:
Mat 7:2; Luk 6:38. 25Aɓwana mǝnana à kǝ kwaki kiria arǝ kanigir mem ngga, Ɓakuli nǝ̀ tsǝkia wia ɓe sǝlǝe kam amur mǝnana à ndanǝi ka, sǝ aɓwana mǝnana à kǝ ginǝ kwaki kiria arǝ kanigir mem ngga, ko nggearǝ bǝti mǝnana à ndanǝi ka, à nǝ̀ é a rǝia.#4:25 Ɓalli gbal aɓa: Mat 13:12; 25:29; Luk 19:26.
Kanicau arǝ ɓeale mǝnana kǝ soa ka
26Yesu nyare nea wia ama:
Domurǝm mala Ɓakuli ka, nda kǝla ɓwa mana kok mǝsǝɓeale a nzǝm-nzali ka. 27Du andǝ pwari, ko nong ntulo ko lo, ɓeale man kǝ soa. Puro male andǝ gulo male ka, yì mǝ'rya nǝ ɓamuri ka bwalte ɗang. 28Nzali nǝ nggearǝì kǝ ɓǝl mǝssa, tite ka mǝsǝɓeale soa, yi gulo, pusǝ muri, anzǝm man ngga pusǝ ɓǝle. 29Lang ɓǝ̀ mǝssa ɓǝlna ka, mǝ'rya nǝ̀ tur amǝturo nǝ abyau ɓǝa cani, acemǝnana pwari cane karǝna.#4:29 Ɓalli gbal aɓa: Jol 3:13.
Kanicau arǝ mǝsǝ musta
(Matiu 13:30-32; Luka 13:18-19)
30Ɗǝm ngga Yesu bangŋa ama:
Domurǝm mala Ɓakuli ka sǝm nǝ̀ kànì arǝ mana? Ya ulang kanicau nani sǝm nǝ̀ kànì a rǝì? 31Nda kǝla mǝsǝ musta mǝnana nda kyauwe kuti acili amǝsǝɓeale kat, à twali à ɓeali a nzali ka. 32Sǝ ɓǝa ɓealni ka, kǝ gulo kuti acili agir ɓaban kat; kǝ mǝnggi abui kǝrkǝr mana anyal mǝnana a bum kuli ka, kǝ gandǝ bwal ndà amuri.
33Yesu yiu nǝ aɓea kanicau pas ulang amǝnia ka, aban kani aɓwana gir a njargula mǝnana à nǝ̀ bwalǝna ta kanigir male nǝi ka. 34Nea wia kǝ cau mana pa nǝ kanicau raka ɗang. Sǝa ma ɓǝa nda nǝmurǝia andǝ alaggana male ka, kǝ tarkya aɓa ko man ngga.
Yesu tamsǝ gung-mbulo
(Matiu 8:23-27; Luka 8:22-25)
35A kǝ pwari mǝno nǝ pwarikpǝra ka, Yesu ne alaggana male ama, “Wu fa sǝm nǝ̀ yale a ɓe nkaring garang.” 36Pǝlǝa à twal Yesu a muna waru nǝmurǝì, a ɗeki ɓwabunda a nzǝmia. Aɓea waru kpate. 37Kara nggea gung-mbulo mǝcande lo ɓua kǝrkǝr, kǝ wal mur kǝ ali aɓa waru, ue bǝti waru nǝ̀ ko. 38Yesu ka nda a ntulo a tǝta waru, amur gir-loasǝmuru. Alaggana loasǝi, à ne wi ama, “Malǝm, kǝgir oasǝo ɗang ɓǝ̀ sǝm limnggi ko?”
39Yesu par bui lo, pǝlǝa sà arǝ gung ɓwam, sǝ ne mur ama, “Ɓǝ̀ ban pwal ato!” Kara gung nyare kur kǝkǝs, ban pwal ɗǝong. 40Pǝlǝa ɗia ama, “Palang sǝ ɓangciu pakka wun? Wu nda piu aɓa ɗwanyi guliarǝu a rǝam le?” 41Ɓangciu bwalia kǝrkǝr, pǝlǝa à ɗi rǝarǝia ama, “Ya ulang ɓwa na mǝnia ka? Gung andǝ mur à kǝ oki wi!”
Currently Selected:
Markus 4: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
