Markus 5

Yesu pusǝ kukwar arǝ ɓwa a Garasa

(Matiu 8:28-34; Luka 8:26-39)

1Yesu andǝ alaggana male yi eauwe a nkaring nggeamur, a bu-nzali mala amǝ Gerasin. 2Yesu nǝ̀ eapi waru ani ka, ɓeɓwa nǝ kukwar aɓa nyami pur nǝ ɓalǝ aɓembe, yi kasǝa kuni. 3Mǝnia yì ɓwa ka, aki rǝì a nreka aɓembe. Kǝ ɓwa gandǝ bwale kùrrì dumsǝi aban mǝ'mwashati ɗang, ko ɓǝ̀ a nsolo sǝ à oasǝi ka. 4Kusǝ pas pak ka à nǝ̀ taka abui andǝ akusǝi nǝ nsolo andǝ anko, sǝa ma nǝ̀ ɓunggia gucik-gucik. Kǝ ɓwa pà kàm nǝ rǝcandǝa bwale ɗang. 5Du andǝ pwari ndaban gali a nreka aɓembe andǝ mur ankono, kǝ makki'zwalo, sǝ kǝ canggi rǝì nǝ atali.

6Lang mǝsǝì nǝ̀ kpa arǝ Yesu kuko ka, kara sarǝa a mire, kya kūndǝo amur ankuni a ɓadǝmbǝi. 7Mak'zwalo bang-bang na ama, “Yesu, Muna mala Ɓakuli mana Karban Kat ka! Mana a kǝ earce pak nǝ mim? Ən zǝmbǝo nǝ lullǝ Ɓakuli ama kǝa pam tanni ɗang!”#5:7 Ɓalli gbal aɓa: Aturo 16:17; Ib 7:1; Mar 1:24. 8Bangŋa anggo acemǝnana Yesu angŋa dǝmbǝa nani wi ama, “We bangŋo mǝɓane, puri ɓa rǝ ɓwa mǝnia ka.”

9Pǝlǝa Yesu ɗi bangŋo ama, “Lullǝo a mana?” Eare ama, “Lullǝam nda pas, acemǝnana sǝm nda pas aɓa rǝ ɓwa mǝnia ka!” 10Pǝlǝa abangŋo mǝɓane mǝnana a rǝ ɓwabure ka à camarǝ ɓuaki arǝ Yesu ama ɓǝ̀ kǝa pǝria ɓǝa ɗeki mǝno yì bu-nzali ka ɗang.

11Àkǝ̀ bania tu a pal nkono ka, atǝmbǝrǝm-ɓala na kam pas aban likiali. 12Abangŋo mǝɓane zǝmbǝi Yesu ama, “Eara sǝm ɓǝ̀ sǝm kutio arǝ atǝmbǝrǝm-ɓala.” 13Yesu eari wia ɓǝa kyane. Pǝlǝa abangŋo mǝɓane man puri rǝ ɓwabure, à kya kutio aɓa nyam atǝmbǝrǝm-ɓala. Sǝ kara atǝmbǝrǝm-ɓala yia kat, mǝnana lakki malea na á-ɓari ka, à giɓi nǝ mire a pal nkono à kya ɓunno a kun gwanyi mǝdāre, à sukkio aɓa nggeamur, à ko kat abanì.

14Amǝyal atǝmbǝrǝm-ɓala ɓangŋa à kya na ce a la andǝ amuna-là aɓa bu-nzali banì. Ɓwabunda puro yiu a sǝn gir mǝnana kumban ngga. 15Lang à yina aban Yesu ka, à yì kum ɓwa mǝnana nǝ akukwar a ɓa'nyami ɗiɗyal ka dumǝna nǝ agir-nggurǝu a rǝì, nyarǝna aɓa ɗenyicau male pepe. Gir nî pea wia ɓangciu kat. 16Aɓwana mǝnana à sǝn gir nî mana kumban ngga, à kani aɓwana ce puro mala akukwar andǝ gir mana kum atǝmbǝrǝm-ɓala ka. 17Pǝlǝa aɓwana tita ɓuaki arǝ Yesu ɓǝ̀ puri bu-nzali malea.

18Lang Yesu na aban eauwe a waru ka, ɓwa mǝnana a pusǝî wi akukwar a rǝì ka yiu yi zǝmbǝi wi ama nǝ̀ o ate. 19Yesu eari wi ɗang, ne wi ama, “O a ɓala, aban aɓwana mo, kya banggia wia ce turo mǝgule mǝnana Mǝtalabangŋo pakko, andǝ ɓwamuru mǝnana lǝmndǝo ka.” 20Pǝlǝa ɓwabure kutio o, kǝ hamnǝ ce nggea turo mǝgule mǝnana Yesu pakki wi ka, arǝ ala lum mǝnana à tunǝkia ama Dekapolis ka. Ɓwapǝndǝa mǝnana ok mǝnia yì cau ka, a ndali.

Muna-ɓwama mala Jarus andǝ mɓwama mǝrǝkwana

(Matiu 9:18-26; Luka 8:40-56)

21Yesu andǝ alaggana male eauwe a waru a nyare a ɓe nkaring nggeamur. Lang à yì kpashi ka, ɓwabunda yi rambǝa à kàrǝì, a kun nggeamur. 22Ɓe ɓwamǝgule mala ndakpapi, lullǝi ama Jarus, yiu abani. Nǝ̀ yia sǝn Yesu ka, pǝlǝa kpa a ɓadǝmbǝi,#5:22 Ɓalli gbal aɓa: Luk 13:14; Aturo 13:15; 18:8,17 23ɓuakia rǝì kǝrkǝr ama, “Muna-ɓwama mem ngga rǝì eari wi ɗang, mala nǝ̀ wu. Ən nggǝ zǝmbǝo, yiu yi tsǝk buo a rǝì; twali wi ban rǝkwana male, ɓǝ̀ auwa!”#5:23 Ɓalli gbal aɓa: Mar 6:7; 7:32; 8:23; Aturo 9:17; 28:8.

24Yesu pǝlǝa wario ate. Ɓwapǝndǝa pas kana aban ká ata Yesu, gandǝa à kǝ nggiki. 25Ɓe mɓwama na kam aɓalǝ aɓwana, mǝnana apǝlǝkia lum-nong-ɓari nkila na aban sukkio a rǝì. 26Kat andǝ amani ama amǝ sonzǝo pas pe wi ɓuri, mal gǝna male kat ata ɓuri ka, ko rǝì mal ɗang; kara rǝpangŋa male kǝ kánǝká a dǝmbǝa nǝ ɓike. 27Lang ongŋǝna ce Yesu ka, pǝlǝa yiu yi kar nǝ nzǝmi aɓalǝ aɓwana sǝ je daura male, 28nǝ ɗenyicau a ɓabumi ama, “Ko ɓǝ̀ daura male na ǝn je ka, rǝam nǝ̀ mala.”

29Àkǝ̀ banì kara sukkio mala nkila male kasǝa. Sǝ oè gbal a rǝì ama rǝì malǝna, à panzǝni aɓa tanni.

30Anggo ka kara Yesu sǝlǝ ama rǝcandǝa purna a rǝì. Pǝlǝ rǝì aban ɓwabunda, sǝ ɗiban ama, “Yana je daura mem?”

31Alaggana male eari wi ama, “A kǝ sǝn ɓwapǝndǝa mana kǝ nggikio ka, a nyare a ɗiban ama, ‘Yana jem le?’ ”

32Yesu lidǝmbǝa nǝ sǝnban ɓwa mǝnana pak mǝnia yì gir ka. 33Mɓwama man sǝlǝna rǝ gir mǝnana kumi ka, puro yiu nǝ ɓangciu yi kpa a ɓadǝmbǝi, nǝ rǝɓǝla, bǝli wi mǝsǝcau kat. 34Yesu ne wi ama, “Munem, guliarǝu mo a rǝam twalǝno ban rǝkwana. O aɓa rǝpwala. Tanni mo malǝna.”#5:34 Ɓalli gbal aɓa: Luk 7:50; Mar 10:52.

35Kun Yesu malaká pwal ɗang, aɓea ɓwana mǝnana à pur nǝ ɓala mala Jarus, ɓwamǝgule mala ndakpapi ka, à nǝ̀ yia tusǝo. À yì ne wi ama, “Munio pangŋǝna lú, kǝa pe Malǝm tanni ɓa ɗang.”

36Yesu tsǝkia wia kir ce ɗang, pǝlǝa ne ɓwamǝgule ndakpapi ama, “Cala ɓangciu pakko ɗang. Makɓalǝo a rǝam.” 37Pǝlǝa Yesu tamsǝ ɓwabunda. Eari kǝɓwa ɓǝ̀ kya ate ɗang, she Bitǝrus, andǝ Jemis sǝ Yohana, mǝ'eam Jemis. 38Lang à bingŋǝna ɓala mala Jarus, yì ɓwamǝgule ndakpapi ka, Yesu kya kum ban ngga zurina kǝrkǝr nǝ loasǝban mala ɓwapǝndǝa aban ɓua andǝ makki'zwalo. 39Yi kutio a ɓala, pǝlǝa ɗia ama, “Mana pur arǝ wun sǝ wu kǝ ɓua, wu mesǝke ani watsak? Muna ka wu ɗang, nda a ntulo!” 40Kara à oali nǝ oalo. Yesu pǝlǝa pǝria pusǝia a nza kat, sǝ tunǝ tar muna andǝ ngge, andǝ alaggana male mǝnana ate ka, à kutio aɓa ndà aban mǝnana muna nong nggam ngga. 41Kya bwali a garabui sǝ ne wi ama, “Talita kum!” Ɓālǝi ama, “Muna-ɓwama, lo!”#5:41 Ɓalli gbal aɓa: Luk 7:14; Aturo 9:40.

42Kara mǝnia yì muna-ɓwama, mǝnana apǝlǝa male na lum-nong-ɓari ka, lo sǝ tita gya! Ko yan ngga ndali kǝrkǝr. 43Yesu tsǝkia wia nzongcau mǝcande ama ɓǝa kǝa ne kǝɓwa ce ɗang. Pǝlǝa banggia wia ɓǝa pe muna-ɓwame girlina ɓǝ̀ li.#5:43 Ɓalli gbal aɓa: Mar 1:43-44; 7:36.

Currently Selected:

Markus 5: mbu

Highlight

Copy