Markus 6
6
À ginǝ Yesu a Nazarat
(Matiu 13:53-58; Luka 4:26-30)
1Yesu pǝlǝa nying mǝno yì bu-nzali ka, nyare andǝ alaggana male a Nazarat, la male. 2A pwari Sabbat mǝnana kar ka, yì pwari usǝlǝo mala amǝ Yahudi, Yesu tita kanigir aɓa ndakpapi. Aɓwana mǝnana kat à oe ka, à ndali kǝrkǝr, pǝlǝa à ɗiban ama, “Ake sǝ mǝnia yì ɓwa ka kum mǝnia yì sǝlǝe andǝ rǝcandǝa mala pakkia ulang amǝnia yì agir-ndali ka? 3Kafinta man na mbak? Yì nda muna mala Maryamu mbo, sǝ amǝ'eambǝi Jemis, Yisǝfu, Yahuda andǝ Shiman, andǝ amǝ'eambǝi amuna mamǝna pa kani aban sǝm re?” Kara bumia kiɗiki a rǝì, à ginǝ earnǝi.
4Yesu pǝlǝa nea wia ama, “Mǝɓangna mala Ɓakuli ka, à kǝ pe wi gulo a koya ban ngga, she àkǝ̀ la male, aɓalǝ aɓwana male, a nggearǝ kǝ amǝ ɓala male.”#6:4 Ɓalli gbal aɓa: Yoh 4:43,44. 5Ace ɗwanyi earnǝban malea a rǝì ka gandǝ pakkia kǝ turo mǝgulke ɗang, kǝ amǝkwano shen à ndaka mǝnana tsǝkbu amuria sǝ twalia wia ban rǝkwana ka. 6Ndali kǝrkǝr nǝ ɗwanyi pa ɓamuru malea abani. Pǝlǝa kutio arǝ amuna-là kǝ kanigir kam.
Yesu tasǝ alaggana mana lum-nong-ɓari ka
(Matiu 10:5-15; Luka 9:1-6)
7Yesu tunǝ alaggana male mana lum-nong-ɓari ka, tasǝia ɓari-ɓari, pea wia rǝcandǝa amur akukwar. 8Kwarkiria ani: “Wu kǝa twal kǝgir ace gya ɗang, ko girlina, ko luru, ko boalo a lǝpan. Kǝ gara gya nda wu nǝ̀ twal ka.#6:8 Ɓalli gbal aɓa: Luk 10:4-11. 9Wu oasǝ ankura, wu kǝa twal daura ɓari ɗang.” 10Nyare banggia wia ama, “Ɓǝ̀ ya ɓala na wu kuti kam sǝ à ak wun ngga, wu do a ɓalae she pwari mǝnana wu nǝ̀ nying le ka. 11Sǝ ɓǝ̀ wu wario àkǝ̀ ban sǝ à ɓinǝ ak wun ko à ginǝ cau ma'wun ngga, wu kǝtǝrǝki tu mǝnana a kusǝ wun ngga, ɓǝ̀ wu nǝ̀ nying banì ka. Ɓǝ̀ dupia wia gir'lǝmndǝa ama, bu wun pa aɓa ɓashi mǝnana nǝ̀ yiu amuria ka ɗang!”#6:11 Ɓalli gbal aɓa: Aturo 13:51.
12Pǝlǝa alaggane puro, à kǝ hambi aɓwana ama ɓǝa pwanzali ɓǝa ɗeki buia arǝ acauɓikea malea. 13À pusǝki akukwar arǝ aɓwana pas, à hasǝ muru amur amǝ rǝkwana pas, sǝ à twalia wia aban rǝkwana.#6:13 Ɓalli gbal aɓa: Jem 5:14.
Lú mala Yohana Mǝbatisǝma
(Matiu 14:1-12; Luka 9:7-9)
14 # 6:14 Ɓalli gbal aɓa:
Mat 16:14; Mar 8:28; Luk 9:19.Murǝm Hirǝdus Antipas ok ce amǝnia yì agir ka, acemǝnana lullǝ Yesu akiban. Aɓea aɓwana kǝ na ama, “Yohana Mǝbatisǝma na loapi ɓembe ka! Nda gir nî sǝ kum mǝnia yì rǝcandǝa pakki agir-ndali ka.” 15Aɓea aɓwana ama, “Iliya na.” Sǝ aɓea aɓwana ka à bangŋa ama, “Ɓe kǝ mǝɓangna mala Ɓakuli ulang amǝnana a pwaryan ngga nda.” 16Lang Hirǝdus ok ce ka, na ama, “Yohana Mǝbatisǝma mǝnana ǝn kasǝ meali ka, nda loapi ɓembe ka!”
17 # 6:17 Ɓalli gbal aɓa:
Luk 3:19,20.Hirǝdus nǝ nggearǝì ka tasǝna aɓwana à kya bwalǝna Yohana, à oasǝni a ndàkurban. Pak mǝnia ka ace Hirǝdiya, mala mǝ'eambǝi Filip, mǝnana yì, yì Hirǝdus ali ate ka. 18Nda acemǝnana Yohana Mǝbatisǝma ka, camarǝ ne Hirǝdus ama, “Nggurcau ear ama wu dum nǝ mala mǝ'eambǝo ɗang!”
19Nda gir nî sǝ Hirǝdiya bwal Yohana a bumi, kǝ earce wal-lui ka, sǝ ɓǝ̀ pà nǝ́ eare mala Hirǝdus raka, pà nǝ̀ gandǝ pakki wi kǝgir ɗang. 20Hirǝdus ka, kǝ ɓanggi Yohana; sǝ acemǝnana sǝlǝna ama Yohana ka ɓwa mǝɓoarne na, ɗǝm ngga ɓwa mala Ɓakuli na ka, kǝ yállí, eare ama kǝgir je ɗang. A koya pwari sǝ ɓǝ̀ Yohana bangcau andǝ Hirǝdus ka, ban kǝ ɓiki Hirǝdus kǝrkǝr. Sǝ kat andǝ amani ka, kǝ earce kwaki kiri arǝ Yohana.
21A masǝlǝate ka Hirǝdiya kum dǝmbǝu, a pwari pakiɗire ɓǝlban mala Hirǝdus. À lamnggi agirlina, à turkiban arǝ amǝte, andǝ akasǝla, andǝ aɓwana-mǝgule mǝnana a bu-nzali Galili ka. 22Muna-ɓwama mala Hirǝdiya puro aɓa tūli sǝ tanggwam nǝ ta ana, ban ɓoari Hirǝdus andǝ abǝri mǝnana tunǝia li ka. Gandǝa Murǝm banggi muna-ɓwama ama, “Zǝm ko mana gir nî kat a earki ce ka, mǝ nǝ po wi.” 23Murǝm kpapì kánmbi wi gir ama, “Gir mǝnana kat a zǝmbǝam ngga, ko ɓǝ̀ mǝ nǝ gau nzali domurǝm mem a ɓalǝu ka, mǝ nǝ po wi.”
24Kara muna-ɓwama man nyare aban ngge, ɗi ama, “Mana ado mǝ nǝ zǝm le?” Ngge ne wi ama, “Ne wi ama ɓǝa po ɓamur Yohana Mǝbatisǝma.” 25Kara nyare a kaurǝa aban murǝm sǝ ne wi ama, “Ən nggǝ earce nǝma wu pam ɓamur Yohana Mǝbatisǝma aɓa tasau àkǝ̀ dyadyan!”
26Ɓabum murǝm kiɗiki kǝrkǝr, sǝ ace kana mǝnana kana a ɓamǝsǝ abǝri male ka, gandǝ ginǝi wi ɗang. 27Àkǝ̀ banì sǝ murǝm tasǝ mǝwalki alú, ne wi ama ɓǝ̀ kya ndàkurban ɓǝ̀ kasǝ ɓamur Yohana sǝ ɓǝ̀ yinǝi. Ɓwabure pǝlǝa wario kya kasǝ ɓamur Yohana a ndàkurban 28sǝ yinǝi aɓa tasau yi pe muna-ɓwame. Yì gbal ka kutio kya pe ngge. 29Lang alaggana mala Yohana ok ce ka, à wario à kya twal lui à yì ci a ɓembe.
Yesu linǝ́ aɓwana á-tongno
(Matiu 14:13-21; Luka 9:10-17; Yohana 6:1-14)
30Amǝ'mishan mala Yesu nyari turo hama sǝ à yiu abani, à naki wi ce agir mǝnana kat à pakki ka andǝ agir mǝnana à kànì ka. 31Yesu pǝlǝa na ama, “Wu fani sǝm nǝ̀ sunyi aban mǝnana kǝɓwa pà kàm raka, wu kya usǝlǝo.” Bangŋa anggo acemǝnana ɓwapǝndǝa pas camarǝ yiu sǝ à kǝ o, ko à kum njar à lili ɗang.
32Nda à eauwe a waru aban ká aban mǝnana kǝɓwa pà kàm raka, yia na nǝmurǝia. 33Ɓwapǝndǝa pas mǝnana à sǝnia aban o ka, à surǝia, pǝlǝa à ɓangŋa a kun nggeamur aban ká. Ɓwapǝndǝa puro à koya la ka nǝ kusǝia, à kya kasǝ muria. 34Lang Yesu nǝ̀ eapi waru ka, sǝn lakki mala ɓwapǝndǝa, mǝsǝswatǝr malea bwali kǝrkǝr, acemǝnana à nda kǝla anzur mǝnana yalgir pa atea raka. Pǝlǝa tita kania wia agir pas.#6:34Ɓalli gbal aɓa: Ɓal 27:17; 1Amur 22:17; 2Kpa 18:16; Ezǝk 34:5; Mat 9:36.
35Anggo ka pwari na arǝ ká kpa, alaggana male yiu abani à yì ne wi ama, “Ban mǝnia ka kǝɓwa pà kàm ɗang, ɗǝm ngga pwari kpana. 36Ɓoaro male ka, ɗeki aɓwana ɓǝa o arǝ amuna-là aban mǝnana à nǝ̀ kum girlina kam ngga.”
37Sǝ Yesu nea wia ama, “Wu pea wia ɓe kǝgir ɓǝa li.” À ɗi ama, “Sǝm nǝ̀ kum ake? Sǝm nǝ̀ ngga pak turo boalo mala zongŋo tongno-nong-tārú sǝ sǝm nǝ̀ kur girlina mǝnana nǝ̀ karǝ amǝnia yia aɓwana ka le?” 38Pǝlǝa Yesu ɗia ama, “Bǝredi na shen a bu wun? Wu kyane wu sǝnban.” À kya sǝnban sǝ à yì ne wi ama, “Sǝm ndanǝ bǝredi tongno nǝ nji ɓari.”
39Yesu pǝlǝa nea wia ama ɓǝa tsǝk aɓwana kat ɓǝa do mbop-mbop amur bondo mǝpwale. 40Pǝlǝa à do mbop-mbop. Aɓea aɓwana ka à do gbǝman-gbǝman, sǝ aɓea ka, à do lumi tongno-tongno.
41Pǝlǝa Yesu twal agbatali bǝredi mǝnia tongno andǝ anji ɓari ka a bui. Loasǝ mǝsǝì a kuli, pak hiwi amuria. Pǝlǝa ɓwanggi agbatali bǝredi, pe alaggana male ɓǝa gakia aɓwana. Ɗǝm ngga ɓwanggi anji mǝnia ɓari ka pea wia, ace mǝnana koyan ngga ɓǝ̀ kumo. 42Ɓwapǝndǝa man kat ka à lili à ɗǝmbǝo. 43Alaggana ram cili ɓwanggine bǝredi andǝ nji mǝnana ue ka, à lumsǝ ago lum nong-ɓari. 44Aburana nǝmurǝia mǝnana à lili ka, ɓwa á-tongno na.
Yesu gya amur mùr
(Matiu 19:22-27; Yohana 6:16-21)
45Tu anzǝm mǝno ka, Yesu tsǝk alaggana male ama ɓǝa eauwe a waru, ɓǝa aki dǝmbǝa ɓǝa o a Beseda, sǝ yì ka, kúndǝo nǝ̀ ne aɓwabunda ɓǝa o a la. 46Anzǝm mǝnana tsǝngŋǝna aɓwana a ndà ka, pǝlǝa eauwe o a pak hiwi amur nkono.
47Lang ban bwalǝna ka, alaggana male ka à nda aɓa waru aɓa gauwa mala nggeamur, sǝ Yesu ka nda nǝmurǝì a nza. 48Sǝn alaggana male ka à nǝ̀ nggǝ tanniki nǝ samsǝa kǝrkǝr arǝ gung andǝ eaki-nkono mala mùr, acemǝnana gung soea. Nǝ du anzǝm ɓaria ɓua mala nggu ka, Yesu yi gbashi bania, kǝ gya amur mùr. Yi pa kǝla nǝ̀ kutia. 49À nǝ̀ sǝni aban gya amur nggeamur ka, à twali ama kukwar na. À mak'zwalo bang-bang, 50acemǝnana yia kat ka à sǝni, sǝ ǝn'o pakkia wia kǝrkǝr. Anggo ka, Yesu sa a rǝia ama, “Wu candǝ mǝsǝ wun! Mǝ nda. Ɓangciu ɓǝ̀ kǝa pakka wun ɗang!” 51Pǝlǝa yiu eauwe atea a waru, gung nyare kur kǝs-kǝs. Yia ka à ndali kǝrkǝr, nǝ gya male amur mùr, 52sǝ ɗǝm ngga, acemǝnana yia ka à bwalta ɓa gir'ndali mala linǝ́ aɓwana á-tongno nǝ bǝredi ka ɗang, ɗenyicau malea shilina, à gandǝ é ɗang.
Yesu sonzǝ amǝkwano a Jenasaret
(Matiu 14:34-36)
53Lang à eauna ka, à kya kpashi nǝ bu-nzali Jenasaret, à kùr waru akano a kunto. 54Lang à nǝ̀ eapi waru ani ka, ɓwapǝndǝa kara sǝlǝ ama Yesu na. 55Pǝlǝa à purkio nǝ mire, à pwan amǝkwano amur aleso, à warinia aban mǝnana à ok gǝshì kam ngga. 56Koya ban Yesu kar kam ngga: aɓalǝ amuna-là, andǝ alamǝgule, andǝ anzǝm ala ka, à nongsǝ amǝ rǝkwana a kun alimo. À zǝmbǝi wi ama ko ɓǝ̀ kun daura male na ka, à nǝ̀ je; sǝ aɓwana mǝnana kat à je ka, à kum sonzǝban.
Currently Selected:
Markus 6: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
