Markus 7
7
Kanigir amur kpata akuncau mala akáu
(Matiu 15:1-9)
1A ɓe pwari ka aɓea amǝ Farisi andǝ aɓea malǝm Nggurcau mala Musa mǝnana à pur nǝ Urǝshalima ka, à yì ram rǝia aban Yesu. 2À sǝn aɓea alaggana mala Yesu ka, à kǝ lili nǝ abu mǝ pǝndǝke. Lǝmndǝ ama à lak abuia ɗang. 3(Amǝ Farisi andǝ acili amǝ Yahudi kat ɓǝa nǝ̀ lili ka, she à nǝ̀ lakki abuia kǝla mǝnana kuncau kànì ka, à bwal kuncau mana à kumo a bu akea ka. 4Ɓǝa nyari limo ka, à pà nǝ̀ li kǝgir ɗang, she ɓǝa lakina a rǝia nǝ mur ka. À kǝ kpata aɓea akuncau kam pas, kǝla pakkiagir mala laki akwar, andǝ ankwaring, andǝ ankenye bolo, andǝ abuno-banli.)
5Nda amǝ Farisi andǝ amalǝm Nggurcau mala Musa ɗi Yesu ama, “Palang sǝ alaggana mo ka à kǝ kpata kuncau mana aká sǝm nyingga sǝm ngga ɗang? A kǝ lili nǝ abu mǝpǝndǝke.”
6Pǝlǝa Yesu earia wia ama:
Wun amǝ'kunɓarina, ɓangna mala Ishaya amur wun ngga, mǝsǝcau na yi mǝnana gilǝa ama:
“Amǝnia yì aɓwana ka
à kǝ pam gulo
nǝ mburkunia,
sǝ ɓabumia ka,
nda kuko nǝ mim.
7 À kǝ peri abanam aɓa nyir,
akanigir malea ka,
anggurcau mala
ɓwapǝndǝa na!” # 7:7 Ɓalli gbal aɓa:
Isha 29:13
.
8 Wu fa ka anzongcau mala Ɓakuli wu sukkia, sǝ wu karǝ akuncau mala ɓwapǝndǝa wu bwalia kàngkàng.
9Nyare nea wia ama:
Wu twali ama wu ndanǝ kutan mǝnana wu ginǝki anzongcau mala Ɓakuli, ace mǝnana wu nǝ̀ bwal a ma'wun akuncau ka! 10Musa ka bangga wun mbo ama, “Pe tarró andǝ nggo gulo,” sǝ ɗǝm ngga bangŋa ama, “Ɓǝ̀ ɓwa sanggi tarrí ko sanggi ngge ka, ɓǝa wal-lui” re?#7:10 Ɓalli gbal aɓa: Pur 20:12; 21:17; Nggur 5:16; Pǝris 20:9. 11Sǝ wun ngga, wu na ama ɓǝ̀ ɓwa na nǝ ɓe kǝgir mǝnana nǝ̀ pe tarrí ko ngge ace bwalia wia kam, sǝ ginǝ pea wia, na ama, “Mǝnia ka ǝn pani Ɓakuli” ka, ɓiki ɗang. 12Mǝno ka wu ndarǝ ne ɓwe ɓǝ̀ kǝa ɗenyi nǝ tarrí ko ngge nǝ gir mǝnana à ɗwanyi ka ɗang. 13Anggo sǝ kanigir mǝnana wu ak a bu aká wun sǝ wu kǝ pea aɓwana ka, kǝ twal bancame mala cau mala Ɓakuli, kǝ nyesǝi ɓa. Aɓea gir na kam pas kǝla amǝno mǝnana wu kǝ pea ka.
Gir mǝnana kǝ pǝndǝki ɓwa aban Ɓakuli ka
(Matiu 15:10-20)
14Yesu nyare tunǝ ɓwabunda abani tu ɓǝa okcau. Nea wia ama, “Wu kwaki kir wun kat wu o, sǝ wu ɓariki wu bwalta tǝr mǝnia yì cau ka. 15Gir mǝnana nǝ nza sǝ kǝ kutio a bum ɓwa ka, nda mǝnana kǝ pǝndǝki ɓwe a ɓadǝm Ɓakuli ka ɗang; gir mǝnana kǝ puro a ɓabum ɓwa ka, nda mǝnana nǝ̀ pǝndǝki ɓwa ka. 16(Ɓwa mǝnana ndanǝ kiru okban ngga, ɓǝ̀ o.”)
17Anzǝm mana Yesu nyingŋǝna ɓwapǝndǝa sǝ kutina a ɓala ka, alaggana male yiu abani à yì ɗi ɓa mǝnia yì kanicau ka. 18Pǝlǝa Yesu ɗia ama, “Wun gbal ka ɓamur wun dǝmbǝri le? Wu sǝlǝ mbo ama girlina mǝnana nǝ nza sǝ ɓwa li sǝ kutio a rǝì ka, pà nǝ̀ gandǝ tsǝi nǝ̀ pǝndǝki ɗang? 19Girlina ka kǝ kutio a ɓabum ɓwa ɗang; aɓa munalungye a bumi sǝ kǝ kutio sǝ nǝ̀ ngga pur a nza.” (Mǝnia yì cau Yesu ne ka, lǝmndǝ ama koya girlina ka mǝɓoarnsari na aban Ɓakuli.)
20Lidǝmbǝa na ama:
Gir mǝnana kǝ pur nǝ ɓabum ɓwa ka, nda gir mǝnana pǝndǝkiyi ɓwa ka. 21Acemǝnana nda nǝ ɓalǝu, a ɓabum ɓwa, sǝ aɗenyicau mǝɓane kǝ puro, kìɗìkì mala nongginǝban, ǝn'i, walki alú, panzǝzana, 22nzumon, bwal ɓwa a bum, swarkiban, shamgir mala ɓwa, twal lullǝu, gusǝlǝ-muru andǝ ɓwaɓana. 23Amǝnia yì agir mǝɓane kat ka, à kǝ pur aɓa ɗenyicau mala ɓwa ka; à ndaka gir mǝnana à kǝ pǝndǝki ɓwa ka.
Guliarǝu mala ɓe mɓwama
(Matiu 15:21-28)
24Yesu nying bu-nzali Galili, o a bu-nzali Taya andǝ Sidon. Kutio a ɓe ɓala, sǝ eare ama ɓǝ̀ kǝɓwa ɓǝ̀ sǝlǝ ce ɗang; kat andǝ amani ka, aɓwana sǝlǝa. 25Sau ɗang, ɓe mɓwama na kam mǝnana muni muna-ɓwama ka ndanǝ kukwar mǝɓike a ɓa'nyami ka, ok ce Yesu, kara yiu yi kpa a ɓadǝmbǝi. 26Mɓwame ka ɓwa Yahudi na ɗang, ɓwa Gǝrik na, à ɓǝli a bareban Fonishiya aɓa bu-nzali Suriya. Yi zǝmbǝi Yesu ɓǝ̀ pusǝ kukwar mǝnana arǝ muni ka. 27Yesu ne wi ama, “Ɓǝa amuna, amǝɓala mem, amǝ Yahudi, ɓǝa li ɓǝa ɗǝmbǝo peatu. Acemǝnana ɓoaro ɓǝa twal girlina mala amuna ɓǝa turia anvwa, aɓwana mǝnana amǝ Yahudi na raka ɗang.”
28Pǝlǝa mɓwame ne Yesu ama, “Mǝna ka mǝsǝcau na, Ɓwamǝgule, sǝa ma ko aban li ka anvwa kǝ kumo à kǝ li ɓwanggine mala girlina mala amuna mǝnana kǝ sukkio a nzali ka.”
29Yesu ne wi ama, “Ace cau mo mǝno a bangŋi ka, kyane, kukwar purni rǝ munio!”
30Pǝlǝa mɓwame nyare a ɓala kya kum muni aban nongŋo ɗǝong aɓa kala, kukwar purni ɓa'nyami.
Yesu twali mǝ talasǝɓunna rǝkwana male
31Yesu pǝlǝa nying bu-nzali Taya, ara a Sidon, kya pur a kun nggeamur Galili, aɓa bu-nzali Dekapolis. 32Aɓea aɓwana yinǝi wi nǝ ɓeɓwa mǝnana mǝkir'ara na sǝ mǝtalasǝ-ɓunna na. À zǝmbǝi wi ɓǝ̀ tsǝk bu amur ɓwe ɓǝ̀ sonzǝi.
33Yesu pusǝ ɓwe zak à puri ɓalǝ aɓwabunda, sǝ oasǝ amunabui aɓa kir ɓwabure, pǝlǝa tau ntara arǝ amunabui sǝ tsǝki ɓwe a lasǝi. 34Yesu pǝlǝa loasǝ mǝsǝì a kuli, tusǝ ɓālǝi nǝ mǝsǝswatǝr, sǝ na ama, “Efata!” Tǝri ama, “Mǝna!”
35Kara akir ɓwabure mǝna, sǝ tita okban. Talasǝi panzǝa, kǝ na cau pepe. 36Yesu pǝlǝa ne ɓwabunda ama ɓǝa kǝa ne kǝɓwa ce ɗang. Kǝla à tsǝkta aɓwana nǝ tsǝa, ama ɓǝa ar ce, à kutio aban bang ce. 37Gir nî pea wia ndali kǝrkǝr, à camarǝ ɓǝsǝlǝki ce ama, “Koya gir mana kǝ pe ka mǝɓoarne na!” À nyare à na ama, “Nggearǝ amǝ kir'ara ka kǝ tsǝia à kǝ okban, sǝ amǝ talasǝɓunna ka, pea wia nacau!”
Currently Selected:
Markus 7: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
