Markus 8
8
Yesu linǝ́ aɓwana á-ine
(Matiu 15:32-39)
1Aɓalǝ amǝno yia apwari ka, ɓwabunda yi ram kǝrkǝr. Girlina pa kàm à nǝ̀ li ɗang. Yesu pǝlǝa tunǝ alaggana male sǝ nea wia ama, 2“Mǝsǝswatǝr mala ɓwapǝndǝa man bwalam kǝrkǝr. À ndakani atam nongŋo tārú yalung, sǝ ko kǝgir pà kàm à nǝ̀ li ɗang. 3Ɓǝ̀ ǝn tasǝtea ama ɓǝa o nǝ nzala ka, mǝsǝpǝndǝa nǝ̀ mea a njargula, acemǝnana aɓea aɓwana atea ka a puro aban sauwa.”
4Alaggana male pǝlǝi wi ama, “A ya ban a ɓabondo man sǝ sǝm nǝ̀ kum girlina mana nǝ̀ linǝ́ ɓwapǝndǝa man ngga?”
5Yesu ɗia ama, “Agbatali bǝredi shen a bu wun ɗe?”
À eare ama, “Tongno-nong-ɓari.”
6Nda Yesu ne ɓwabunda ama ɓǝa dum nǝ do a nzali. Sǝ twal agbatali bǝredi mana tongno-nong-ɓari ka, oaso pakki Ɓakuli yàwá, sǝ ɓwanggia. Pea alaggana male ɓǝa gaki aɓwabunda, sǝ à gaki gbal. 7À ndanǝ amǝ nji a buia bǝti. Yesu pǝlǝa pak yàwá amuria gbal, sǝ banggia wia ama ɓǝa gaki aɓwana.
8Ɓwapǝndǝa lili, à ɗǝmbǝo. Anzǝm man ngga, alaggana male tarki cili aɓwanggina girlina mǝnana à ueo ka, à lumsǝ ago mǝgulke tongno-nong-ɓari. 9Aburana kǝla á-ine à nda aɓalǝ aɓwabunda abanì. Pǝlǝa Yesu ne ɓwabunda ama ɓǝa mǝsǝe, ɓǝa o a la. 10Lang tsǝngŋǝna aɓwana a ndà ka, yi eauwe a waru andǝ alaggana male, pǝlǝa à nyare a bu-nzali mala ban mǝnana à tunǝki ama Dalmanuta ka.
Amǝ Farisi earce sǝn gir'lǝmndǝa
11Lang amǝ Farisi ongŋǝna ama Yesu yina ka, à yiu à yì tita makgir andǝi. À nǝ̀ karǝki ka, à ɗi ama ɓǝ̀ lǝmndǝia wia gir'lǝmndǝa nǝ ban Ɓakuli, mǝnana nǝ̀ lǝmndǝ rǝcandǝa male ka.#8:11 Ɓalli gbal aɓa: Mat 12:38; Luk 11:16. 12Pǝlǝa Yesu tusǝ ɓālǝi kpǝm aɓa bangŋo male, sǝ na ama, “Palang sǝ aɓwana mǝnana a nza man kǝ earce sǝn gir'lǝmndǝa mǝ'pa ndali? Ən nggǝ na wun mǝsǝcau, pa mǝ nǝ pe aɓwana mǝnana a nza man kǝ gir'lǝmndǝa ɗang.”#8:12 Ɓalli gbal aɓa: Mat 12:39; Luk 11:29. 13Pǝlǝa ɗekia, eauwe a waru, nyare a kusǝì o a ɓe nkaring nggeamur.
Yis mala amǝ Farisi andǝ mala Hirǝdus
(Matiu 16:5-12)
14Alaggana ka ɓalǝia lorǝo à yiu nǝ girlina abuia ɗang, kǝ gbatali bǝredi mwashat na à ndanǝi aɓa waru ka. 15Lang à ndarǝ o aɓa waru ka, Yesu nun kiria ama, “Wu par kir wun arǝ yis mala amǝ Farisi andǝ mala Hirǝdus.”#8:15 Ɓalli gbal aɓa: Luk 12:1.
16À tita naki ce a rǝarǝia ama bangŋa anggo acemǝnana à yiu nǝ bǝredi a buia raka.
17Yesu sǝlǝna rǝ cau mǝnana à nakiyi ka, pǝlǝa ɗia ama, “Palang sǝ wu kǝ naki acau arǝarǝ wun ama wu twal bǝredi a bu wun ɗang? Nggearǝ wun ngga, wu kǝ gandǝ surǝ gir ko wu bwalta gir mbo? Ɓabum wun na piu aɓa cande, kǝ gandǝ twal cau ɗang? 18Amǝsǝ wun andǝ akir wun girki le? Ɓalǝ wun kasǝ arǝ kǝ cau re?#8:18 Ɓalli gbal aɓa: Ir 5:21; Ezǝk 12:2; Mar 4:12. 19Mǝnana ǝn linǝ́ aɓwana á-tongno nǝ agbatali bǝredi tongno ka, cili mǝnana ueo, wu tarki ka, wu pwano arǝ ago shen ɗe?”
À ear ama, “Lum nong-ɓari.”
20Yesu nyare ɗia ama, “Sǝ mǝnana ɗǝm ǝn linǝ́ aɓwana á-ine nǝ agbatali bǝredi tongno-nong-ɓari ka, cili mǝnana ueo, wu tarki ka, wu pwan arǝ ago shen?” À eare ama, “Tongno-nong-ɓari.”
21Pǝlǝa ɗia ama, “Ado ka wu surǝ gir mǝnana ǝn banggi cau amuri ka re?”
Yesu mǝnmbi nte mǝsǝì a Beseda
22À yì bik Beseda. Aɓea aɓwana yiu nǝ ɓe nte. À yì zǝmbǝi Yesu ama ɓǝ̀ tsǝk bui a rǝì, ɓǝ̀ mǝnmbi wi mǝsǝì. 23Yesu bwal nte a garabui pusǝì anzǝm la. Pǝlǝa tapi ntara a mǝsǝì sǝ tsǝk bui a muri, sǝ ɗi ama, “A kǝ sǝn kǝgir ado le?”
24Pǝlǝa nte man loasǝ muri a kuli, na ama, “E, ǝn nggǝ sǝn aɓwana, sǝ ǝn nggǝ sǝnia pepe ɗang. À nda kǝla anggun mǝnana à kǝ ging ngga.”
25Yesu nyare tsǝk abui a mǝsǝ nte mǝno ɗǝm, kara amǝsǝì mǝn gamama, kǝ sǝnban gǝraɗau. 26Yesu tasǝ te ama ɓǝ̀ o a la, ne wi ama, “Ce a kar nǝ ɓa mǝnia yì muna-la ka ɗang, ɓǝ̀ a nǝ o ka.”
Cau mana pur a kun Bitǝrus amur Yesu ka
(Matiu 16:18-20; Luka 9:18-21)
27Yesu lo andǝ alaggana male à nying bu-nzali Galili, à o arǝ amuna-là tu nǝ ban la Kaisariya Filipi. Amur njar ka, Yesu ɗia ama “Aɓwana kǝ bangŋa ama mǝ nda yana?”
28À eari wi ama, “Aɓea ɓwana kǝ na ama, a nda Yohana Mǝbatisǝma, aɓea ɓwana ka ama, a nda Iliya, sǝ aɓea ɓwana ka ama a nda ɓe kǝ mǝɓangna mala Ɓakuli.”#8:28 Ɓalli gbal aɓa: Mar 6:14,15; Luk 9:7,8.
29Pǝlǝa ɗia ama, “Sǝ wun ngga, wu na ama mǝ nda yana?”
Bitǝrus eare ama, “A nda Kǝrǝsti, Mǝ'amsǝban.”#8:29 Ɓalli gbal aɓa: Yoh 6:68,69. 30Yesu nunkiria ama ɓǝa kǝa ne kǝɓwa cau amuri ɗang.
Yesu na cau amur lú male
(Matiu 16:21-28; Luka 9:2-27)
31Pǝlǝa tita banggia wia gir mǝnana nǝ̀ kumi ka. Na ama, “Muna mala Ɓwa ka nǝ̀ nu tanni ɗàngɗáng. Aɓwana-mǝgule andǝ agbani pǝris, andǝ amalǝm Nggurcau mala Musa nǝ̀ ɓinǝ mǝsǝì, à nǝ̀ wal-lui. Sǝ a tāruia nongŋo ka, nǝ̀ lo nǝ yilǝmu.” 32Banggia wia mǝnia yì cau ka bwāng. Pǝlǝa Bitǝrus tunǝi a nkanggariban, gimbi arǝ cau mǝnana ne ka.
33Yesu pǝlǝ rǝi sǝn alaggana male, pǝlǝa sà arǝ Bitǝrus ama, “Gǝshi banam, we Shetan! Ɗenyicau mo ka mala Ɓakuli na ɗang, mala ɓwapǝndǝa na!”
34Pǝlǝa tunǝ ɓwabunda, andǝ alaggana male, nea wia ama:
Ɓǝ̀ ɓwa twal ama nǝ̀ duk mǝkpatam ngga, dumǝna púp ɓwe nǝ̀ nying kpata agir mala ɓamuri. Ɓwe nǝ̀ twal takusǝam aɓa gandǝrǝu mala nutanni andǝ lú ulang mem amur nggun-gangndi, sǝ nǝ̀ yiu atam arǝ aban kat mǝnana mǝ nǝ ká akàm ngga. # 8:34 Ɓalli gbal aɓa:
Mat 10:38; Luk 14:27. 35Acemǝnana ɓwa mana kǝ earce amsǝ yilǝmi ka, nǝ̀ ɗwanyi banì, sǝ ɓwa mǝnana turta yilǝmi acem andǝ ce Cau Amsǝban ngga, nǝ̀ kumi.#8:35 Ɓalli gbal aɓa: Mat 10:39; Luk 17:33; Yoh 12:25. 36Mana nǝ̀ puri ɓwa yì mǝnana ɓǝ̀ kum girbunda mala ɓanza kat, sǝ turta yilǝmi ka? 37Mana gir nì na ɓwa na nǝi nǝ̀ pe Ɓakuli ace mǝnana ɓǝ̀ kum yilǝmu mǝnana málá male pà kàm raka?
38 Wu kǝa pak kǝsǝkyem andǝ cau mem aɓa mǝnia yì ɓanza mǝ ɗwanyi do nǝ mǝsǝcau aban Ɓakuli, andǝ mǝnana lumsǝ nǝ cauɓikea ka ɗang. Ɓǝ̀ kǝɓwa pak kǝsǝkyem ngga, mim Muna mala Ɓwa ka, mǝ nǝ pak kǝsǝkye gbal a pwari mǝnana mǝ nǝ nyar nǝi aɓa ɓoarɓwa mala Tárram, andǝ amǝturonjar mǝfele male ka.
Currently Selected:
Markus 8: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
