Markus 9
9
1Yesu lidǝmbǝa ne na cau ama:
Ɓafo, ǝn nggǝ bangga wun, aɓalǝ wun mǝnia wu cam ngga, aɓea aɓwana nakam mǝnana à pà nǝ̀ wu raka, she ɓǝa sǝna Domurǝm mala Ɓakuli yina nǝ rǝcandǝa ka.
Nggurǝ Yesu nggaɗi
(Matiu 17:1-13; Luka 9:28-36)
2Anzǝm nongŋo tongno-nong-mwashat ka, Yesu tunǝ Bitǝrus, sǝ Jemis, sǝ Yohana. Pǝlǝa um nǝia amur nkono mǝdāre, nǝmurǝia. Akano ka rǝ Yesu twalo nggaɗi àkǝ̀ ɓamǝsǝia.#9:2 Ɓalli gbal aɓa: 2Bit 1:17,18. 3Anggurbyau rǝì pwasǝ tyal-tyal mǝnana kǝɓwa pà kàm a ɓanza mǝnia ka nǝ̀ gandǝ lak gir nǝ̀ fa anggo raka. 4Kara Iliya, andǝ Musa, à pusǝrǝia à kǝ na cau nǝ Yesu.
5Bitǝrus ne Yesu ama, “Malǝm, yàwá, mǝnana ado sǝm ndakani ka. Sǝm nǝ̀ kar gumli tārú, mwashat ka nda aceo, mwashat ka nda ace Musa, sǝ man mwashat ka nda ace Iliya.” 6Yì andǝ aɓi ka ɓangciu bwalia kǝrkǝr, yale surǝ gir mǝnana nakiyi cau amuri ka ɗang.
7Pǝlǝa pǝrɓang puro yi gir muria. Gi Ɓakuli pur nǝ ɓa pǝrɓang ama, “Mǝnia ka nda Munem mǝnana ǝn earkiyi ace raka. Wu oki wi.”#9:7 Ɓalli gbal aɓa: Mat 3:17; Mar 1:11; Luk 3:22. 8À nǝ̀ loasǝ mǝsǝia ka, ko à sǝn kǝɓwa ɗang, kǝ Yesu na nǝmurǝì.
9À nda aban sulǝi mur nkono ka, Yesu nunkiria nea wia ama, “Wu kǝa ne kǝɓwa ce gir mǝnana wu sǝn ngga ɗang, she ɓǝ̀ Muna mala Ɓwa longŋǝni ɓembe ka.” 10Pǝlǝa à bwal ce gbal àkǝ̀ rǝarǝia, à kutio amur naki acau amur, “Loapi ɓembe ka ɓālǝi nda mana?”
11Pǝlǝa à ɗi Yesu ama, “Palang sǝ amalǝm Nggurcau mala Musa bangŋa ama, Iliya nǝ̀ aki Kǝrǝsti dǝmbǝa yiu?”#9:11 Ɓalli gbal aɓa: Mal 4:5; Mat 11:14.
12Yesu earia wia ama, “E, Iliya nǝ̀ yiu a dǝmbǝa, nǝ̀ yia gilǝki agir kat ɓǝa duk pepe. Sǝ Malǝmce ka, na gbal mbo ama, Muna mala Ɓwa ka nǝ̀ tanni kǝrkǝr sǝ à nǝ̀ ginǝi? 13Sǝa ma ǝn nggǝ bangga wun, Iliya angŋǝna dǝmbǝa yina, sǝ à pangŋǝni koya gir mǝnana yia ka à earce ka, kǝla mǝnana à gilǝì amuri ka.”
Yesu pusǝ kukwar arǝ muna
(Matiu 17:14-21; Luka 9:37-49)
14Lang à nyarǝna aban acili alaggana ka, à sǝn ɓwapǝndǝa kǝrkǝr rambǝa a rǝia, sǝ aɓea amalǝm Nggurcau mala Musa na aban makgir andǝia. 15Lang ɓwabunda nǝ̀ sǝn Yesu ka, à ndali kǝrkǝr, sǝ à swar a mire à yì makki wi kun. 16Yesu ɗi ka laggana male ama, “Mana gir ni wu makkiyigir wunǝia amuri?”
17Ɓe ɓwa aɓa ɓwabunda kasǝa ama, “Malǝm, ǝn yiu nǝ munem abano ace mǝnana wu twali ban rǝkwana ka. Ndanǝ kukwar a rǝì, mǝnana kǝ eari wi nacau raka. 18Ɓǝ̀ loarǝi ka, nǝ̀ me a nzali, ntara nǝ̀ gupi a kuni, nǝ̀ nggǝ go minǝì, sǝ nǝ̀ shiuri kwanggong. Nda ǝn ne alaggana mo nǝma ɓǝa pusǝì sǝ à gandǝi ɗang.”
19Yesu nea wia ama, “Wun amǝ ɗwanyi earnǝ Ɓakuli! Banem nǝ̀ sau lang ata wun sǝ wu nǝ̀ kani earnǝ cau? Banem nǝ̀ sau lang aban twal gandǝa nǝ wun? Wu yinǝam nǝ mune!”
20À pǝlǝa à yiu nǝ muna. Lang kukwar nǝ̀ sǝn Yesu ka, kara kàr muna dǝkǝrǝki kǝ̀rkǝ́r, turi a nzali. Muna camarǝ ɗǝnggǝliki, ntara kǝ gupi a kuni.
21Yesu ɗi tar muna ama, “Aya pwari sǝ mǝnia yì gir ka tiki te?”
Pǝlǝa eare ama, “Tiki te a muntulo. 22A ɓe pwari ka kǝ me a bǝsa ko a mùr, ama nǝ̀ wal-lui. Sǝa ma ɓǝ̀ a nǝ gandǝi ka, sǝn mǝsǝswatǝr ma'sǝm, bwala sǝm nggam!”
23Yesu ɗi ama, “Ace mana sǝ a na ama, ‘ɓǝ̀ a nǝ gandǝi ka?’ Ko man ngga nǝ̀ gandǝ pa aban ɓwa mǝnana earnǝ cau mala Ɓakuli nǝ ɓabumi kat ka.”
24Tar muna ear nǝ rǝɓǝla ama, “Ən earǝna ǝn pana ɓamuram, bwalam nggam ɓǝ̀ ǝn limurǝm amur ɗwanyi paɓamuru mem!”
25Lang Yesu sǝn ɓwapǝndǝa nǝ̀ nggǝ kana aban yiu ka, kara sà arǝ kukwar ama, “We kukwar mala kir ara andǝ mala talasǝɓunna, ǝn nggǝ banggo nǝma, wu puri rǝi, cea nyare a kuti kam ɗǝm ɗang!”
26Kukwar mak'zwalo, pūrǝki muna wak, sǝ puri nyami. Muna nong kpoklyak, kǝla wu nǝ wú, gandǝa aɓea aɓwana bangŋa ama, “Wuna!” 27Yesu bwali a garabui, loasǝi amur akusǝi, pǝlǝa lo came.
28Anzǝm mana Yesu nyarǝna a ɓala ka, alaggana male ɗi a sǝmbǝrǝa, ama, “Palang sǝ sǝm gandǝ pusǝ mǝno yì kukwar ka ɗang?”
29Yesu nea wia ama, “Ulang mǝnia yì kukwar ka, kǝ hiwi andǝ gilmur na nǝ̀ pusǝì ka.”
Yesu bangce lú male
(Matiu 17:22-23; Luka 9:43-45)
30À ɗeki ban mǝno à ara aɓa bu-nzali Galili. Yesu ear ama ɓǝ̀ kǝɓwa surǝ ban mǝnana à ndakam ngga ɗang, 31acemǝnana nda aban kani alaggana male gir. Nea wia ama, “Muna mala Ɓwa ka, à nǝ̀ kurakuro nǝi aban aɓwana. À nǝ̀ wal-lui, sǝ a tāruia nongŋo ka nǝ̀ lo nǝ yilǝmu.” 32Sǝ ko à bwalta gir mǝnana banggiyi ka ɗang, sǝ ɓangciu pakkia wia ɓǝa ɗi amuri.
Yana gulo kutiban kat?
(Matiu 18:1-5; Luka 9:40-48)
33Pǝlǝa à yiu a Kapanahum. Yi dumǝna a ɓala ka, Yesu ɗi ka laggana male ama, “Mana wu makkiyigir amuri a tanjar aban yiu?” 34Pǝlǝa à do kunia ɗǝong, acemǝnana a njargula ka, à makgir amur ko yana aɓalǝia nda ɓwamǝgule kat.#9:34 Ɓalli gbal aɓa: Luk 22:24. 35Lang Yesu dumǝna nǝ do ka, pǝlǝa tunǝ alaggana male lum nong-ɓari nea wia ama, “Ɓǝ̀ ɓwa earce duk mǝdǝmbǝa ka, dumǝna púp ɓwe nǝ̀ duk mǝ'nzǝmo, sǝ nǝ̀ duk guro mala aɓi kat.”#9:35 Ɓalli gbal aɓa: Mat 20:26,27; 23:11; Mar 10:43,44; Luk 22:26. 36Pǝlǝa loasǝ muna mǝkyauwe tamsǝi a ɓadǝmbǝia. Núnní a nkanggari rǝi, sǝ nea wia ama, 37“Ɓwa mǝnana ak muna kǝla mǝnia aɓa lullǝam ngga, Mǝ nda akiyiam ngga. Sǝ ɓwa mǝnana em ngga, Mǝ nda akiyiam nǝmurǝam ngga ɗang, nda ban ak Tárram mǝnana tasǝam ngga.”
Ɓwa mǝnana ɓinǝ sǝm raka nda ata sǝm
(Luka 9:49-50)
38Yohana ne wi ama, “Malǝm, sǝm sǝn ɓe ɓwabura aban pusǝki akukwar aɓa lullǝo, sǝ sǝm pǝrki, acemǝnana yì ka, pa aɓalǝ sǝm ɗang.”
39Yesu ne wi ama:
Ce wu pǝrki ɗang. Kǝɓwa pà kàm nǝ̀ pak gir'ndali aɓa lullǝam, sǝ nyar tu nǝ̀ bang mǝɓane a muram ɗang. 40Ɓwa mǝnana kat ɓinǝ ce sǝm raka, nda ata sǝm.#9:40 Ɓalli gbal aɓa: Mat 12:30; Luk 11:23. 41Ɓafo ǝn nggǝ bangga wun, ɓǝ̀ koyana sǝ pà wun murnuna aɓa lullǝam, acemǝnana wu ndaka mala Kǝrǝsti ka, pà nǝ̀ ɗwanyi tangnakusǝi ɗang.#9:41 Ɓalli gbal aɓa: Mat 10:42.
Tsǝk ɓwa ɓǝ̀ pak cauɓikea
(Matiu 18:9-10; Luka 19:1-2)
42 Ɓǝ̀ koyana sǝ tsǝk mwashat aɓalǝ amuna mǝnana à earnǝ mim, sǝ pak cauɓikea ka, nǝ̀ ɓoari ɓǝa ɗurri wi nggea taligo a meali, sǝ ɓǝa turi aɓa nggeamur. 43-44#9:43-44 Ɓalli gbal aɓa: Mat 5:30.Ace mani ka, ɓǝ̀ buo kǝ cio a kǝ pak cauɓikea ka, kasǝi kpat. Nǝ̀ ɓoaribani wu kutio a yilǝmu mana málá male pà kàm raka nǝ bu mwashat, amur mana a nǝ dum nǝ abuo ɓari sǝ à nǝ̀ turo aɓa lu-bǝsa, aban mǝnana bǝsa male kǝ linggi raka.#9:43-44 aban mǝnana bǝsa male kǝ linggi raka: Aɓea malǝmce mǝnana à gilǝì nǝ bu ka à tsǝa amuri ama, “Aban mǝnana anggwaso male kǝ wu ɗang, sǝ bǝsa male kǝ linggi gbal raka.” 45-46Ɓǝ̀ kusǝo na kǝ cio a kǝ pak cauɓikea ka, kasǝi kpat. Nǝ̀ ɓoaribani wu kutio a yilǝmu mana málá male pà kàm raka nǝ kusǝu-kasǝa, amur mana a nǝ dum nǝ akusǝu ɓari sǝ à nǝ̀ turo aɓa lu-bǝsa ka.#9:45-46 kutio a lu-bǝsa nǝ akusǝu ɓari: Aɓea malǝmce mǝnana à gilǝia nǝ bu ka à tsǝa amuri ama, “Aban mǝnana nggwaso male pà nǝ̀ wu ɗang, sǝ bǝsa male pà nǝ̀ linggi gbal raka.”
47 Sǝ ɓǝ̀ mǝsǝo na kǝ cio a kǝ pak cauɓikea, pusǝì turi! Nǝ̀ ɓoaribani wu kutio a domurǝm mala Ɓakuli nǝ mǝsǝu mwashat, amur mana a nǝ dum nǝ amǝsǝu ɓari sǝ à nǝ̀ turo aɓa lú-bǝsa ka. # 9:47 Ɓalli gbal aɓa:
Mat 5:29
. 48Akano ka “nggwaso mana nǝ̀ nggǝ lia ka, pà nǝ̀ wu ɗang, sǝ bǝsa mana nǝ̀ nggǝ pisǝkia ka, pà nǝ̀ linggi ɗang.”#9:48 Ɓalli gbal aɓa: Isha 66:24.
49 Koyan ngga nǝ bǝsa sǝ à nǝ̀ ci nǝ̀ ɓoarnsari.
50 Tuɓamur ka ɓoaro, sǝ ɓǝ̀ cyauwe male purini wi ka, nǝ mana sǝ à nǝ̀ ci nǝ̀ cyau ɗǝm? Wu dum nǝ ɓealǝu kǝla tuɓamur arǝarǝ wun, wu dum nǝ dorǝpwala arǝarǝ wun. # 9:50 Ɓalli gbal aɓa:
Mat 5:13; Luk 14:34,35.
Currently Selected:
Markus 9: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
