Yona 1
1
Yona Nei̱ru̱ka Kuruga Hali Mukama
1Kiro ki̱mwei̱, Mukama yaaweereeri̱ Yona mu̱tabani̱ wʼAmitaayi naakoba yati, 2“Byokya, ogyende mu lu̱lwo rub̯uga lukooto lwetwa Ni̱neeva, orangiire bantu baamwona nti ncwi̱ri̱mwo ku̱bahwerekereerya, kubba nyeetegeri̱i̱ze nka kubali na bibiibi binene.”
3Bei̱tu̱ yo Yona, yaabyokeerye yaakwata muhanda gundi gwa kwi̱ru̱ki̱ra Tarasi̱i̱si̱, aleke aruge hali Mukama. Yaasi̱ri̱mu̱ka Yopa, hayaagi̱i̱rye b̯wati̱ b̯ukooto b̯ukugyenda Tarasi̱i̱si̱. Yaasasula sente za b̯wati̱ kumutwala, yaab̯utemba, agyende hamwei̱ na bo Tarasi̱i̱si̱, aruge hali Mukama. 4Bei̱tu̱ b̯ubaali nibakugyenda, Mukama yaaleeti̱ri̱ bbuukuulu munene hoi̱ mwitaka, haabbamwo bijanga byakalasanu̱ b̯ukooto, binyakubba heehi̱ kwata b̯wati̱. 5Ki̱kyo, kyati̱i̱ni̱si̱i̱rye hoi̱ bakori̱ ba mu b̯wati̱. B̯uli omwei̱ yaaluka naakutagira kihala kya kwamwab̯u kibajune kizib̯u kibaalingimwo. Baaguma migugu minyakubba mu b̯wati̱ mwitaka, aleke b̯wati̱ b̯uhuhe.
Bei̱tu̱ yo Yona, yaali amaari̱ ku̱si̱ri̱mu̱ka kwansi mu b̯wati̱, aleeri̱ kandi yeebbaki̱i̱ri̱ ki̱mwei̱.
6Mwomwo mu̱handu̱ wa b̯wati̱ yaamugyendera yaamu̱b̯u̱u̱lya naakoba yati, “We, osobora teetei̱ kwebbaka? Byoka olaame hali kihala kya kwamwenyu̱, kisobora ku̱twetegeerya, aleke tutahwerekeera.”
7Kasi bakori̱ baaweerangana nibakoba yati, “Tu̱cu̱u̱hye, aleke twege mu twe muntu atu̱gu̱mi̱ri̱ mu kizib̯u kiki.” Baacu̱u̱hya, baagya nali Yona. 8Mwomwo baamu̱b̯u̱u̱lya nibakoba yati, “Tu̱weere, naani aleteereerye kiki kizib̯u? Okora mulimo ki? Oruga hai? Oruga mwihanga ki? Oli muki?”
9Yona yaabei̱ramwo naakoba yati, “Ndi Muhebburaniya, ndamya Mukama Ruhanga wa mwiguru, munyakuhanga nsi neitaka.” 10Yona yaagyendi̱ri̱ mu mei̱so naakubaweera naakoba yati, “Nkwi̱ru̱ka kuruga hali Mukama.”
Nahab̯waki̱kyo, badulu baati̱i̱ni̱ri̱ hoi̱ kandi baamu̱b̯u̱u̱lya, “Kiki kyani kyokoori̱?”
11B̯u̱b̯wo nu, bbuukuulu na bijanga, byeteeryengi̱ b̯weteerya. Nahab̯waki̱kyo, bakori̱ baab̯u̱u̱lya Yona nibakoba yati, “Kyani twe, kitwakukola, kyaleetera itaka kuteeka?”
12Yona yaabei̱ramwo naakoba yati, “Mu̱nsenge mungume mwitaka, li̱kwi̱za kuteeka. Kubba nyeegi̱ri̱ yogo bbuukuulu hamwenya na bijanga, bi̱i̱zi̱ri̱ hab̯wa nsobi̱ gyange.”
13Bei̱tu̱ bo, baalwani̱si̱i̱rye kugoza magyenda ku mutanda. Kyonkei batakasobore kujaama, hab̯wakubba bbuukuulu na bijanga byetereerye byakalasani̱a. 14Nahab̯waki̱kyo, bakori̱ baasabi̱ri̱ Mukama nibakoba yati, “Beiraba Mukama, otatwi̱ta hab̯wa yogo mudulu, kandi otatujunaana hab̯wa ku̱mwi̱ti̱ra b̯usa, hab̯wakubba we Mukama weewe oki̱koori̱ nka ku̱wendeerye.” 15Mwomwo baasenga Yona, baamuguma mwitaka, itaka lyateeka. 16Kiki kyabaleeteeri̱ ku̱ti̱i̱na hoi̱ Mukama, naakumuhongera kyonzira, kandi baarahira kumukooranga.
17B̯u̱baagu̱mi̱ri̱ Yona mwitaka, Mukama yaaragira nsu̱ gikooto gyamumera. Yona yaamaari̱ mu nda gya nsu̱ minsi misatu na majolo gasatu.
Currently Selected:
Yona 1: LUGUNGU
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.