Jɔɔnn 12
12
Mari nba din but tulaarii Yisa taa paak biaŋinba
(Matiu 26.6-13; Mak 14.3-9)
1Tɔn, daa ŋannloob daar din tan biar nan yukitgar tiaru jaamm-n di, ki Yisa nan u poorpoweiteeb saan Betani, doo nba ki Lasarus be na. Ŋɔɔe ki Yisa din fiinɔ kuun ni na. 2Leŋe ki bi din teen jeet, ki Maata jii ki baar nann ki tan turib; ki Lasarus din tee bi ni yenɔ nba din kar ki di namm. 3Ki Mari jii tulaarii saama, linba yaa daauk paar bonchiann. Bi din jii faat nba ki bi yir naade ki teen tulaarii maŋ; ki u jiir ki but Yisa taa paak, ŋaan soor u mɔŋ yut ki fiar fiar; ki ŋaak na ji nubir nan tulaarii na gbimm. 4Ki Yisa poorpoweitɔyenɔ, wunba ki bi yiu Judas Iskariot, (ŋɔɔe din tee wunba yaa wun tan nyi Yisa poor na,) ki u yet a 5“Bee teen ki bi bo ki kɔi tulaarii maŋ poŋ kobii ŋanntaa ki jii li likirii ki tur talasdammi?” 6Wa din yet nna maŋ, li din ki tee a u baka be talasdamm na ni kaa, ŋaan u din tee nanyukɔɔe. Ŋɔɔe din tee wunba dia likirii pakir ki tuu jaan. 7Ki Yisa yetɔ a “Ŋaantɔ! U teen nna ki li tee n kuun siir teenue. 8Talasdamme sii yɔɔ be nani yoo kura, ŋaan min ŋarin kii yɔɔ be nna kaa.”
Yennu jiantu yudamm nba lor lor a bin kpi Lasarus biaŋinba
9Ŋanne ki Juu teeb bonchiann gbat a Yisa be Betani, ki bi saan leŋ. Bi din ki saan Yisa paak kuukɔɔ kaa, ŋaan bi din loon ki bin saa la Lasaruse mun, wunba ki Yisa fiinɔ kuun ni na. 10Li paake teen ki Yennu jiantu yudamm din lorin lora a bin kpi Lasarus mun biak. 11Li din tee Lasarus kuun fiiru paake ki Juu teeb bonchiann din nyik Yennu jiantu yudamm maŋ, ŋaan teen Yisae yada ki waau.
Biaŋinba ki Jerusalem teeb dontir Yisa sann
(Matiu 21.1-11; Mak 11.1-11; Luk 19.28-40)
12Li yent sanyiɔko ki niburchiauŋ nba baar Jerusalem a bin di yukitgar tiaru jaamm na gbat a Yisa baat. 13Ki bi ji ŋat biabfaat ki chet a bin tookɔ, ki yikin wuyikinii sanpaapowa ki yaa a “Hosana, ti Yomdaanɔ, tintit mɔtana. Yennu mɔsonŋann-ii be daanɔ nba baat nan ti Yomdaanɔ Yennu sann ni. Yennu-n teen u mɔsonŋann timm Israel teeb kpanbar paak.” 14Ki Yisa din te ki bi poŋ lon boŋe ki u jak ki baat, kaman nan la sɔb Yennu gbouŋ ni biaŋinba na
15a “Sion doo teeb, i daa tiin jaŋmaanii.
Gotir, i kpanbar jak bonsar bik ki baat.”
16Ki u poorpoweiteeb din daa ki bann linba na paak li yoo maŋi. Ŋaan Yennu nba din tan donn Yisa sanpaapo na, ŋanne ki bi ji din tiar nan linba na sɔb Yennu gbouŋ ni ki jikit saa u po na, ki bia tiar nan niib na mun set din teenɔ nnae.
17Niburchiauŋ nba din be Yisa boor ni Betani yoo nba ki u yiin Lasarus a wun nyi kaauk ni ŋaan fiinɔ kuun ni na, ki bi din la ki mɔɔntir li barii. 18Li paake te ki niib bonchiann din chetɔ, kimaan ba gbat ki u tun toonjaann maŋ na paak. 19Ŋanne ki Farisiinba na yeen bi leeb a “Ti ji kan fit ki nyannɔ. Gotir, tingbouŋ na niib kura waaue.”
Biaŋinba ki Griik nisiab loon Yisa a bin lau
20Niib nba din saan Jerusalem a bin saa di yukitgar tiaru jaamm na, ki Griik siab din be bi ni; 21ki bi tan saan Filip peŋ, wunba nyii Betsaida nba be Galilee tiŋ ni na; ki bi yetɔ a “Chanbaa, ti loon ki ti la Yisa.” 22Ki Filip mun saan ki saa bet Andru, ki Andru nan Filip ji saan ki bet Yisa. 23Ki Yisa betib a “Yoo nba ki Yennu sa donn nisaarik Bik na sanpaapo na baar na. 24Barmɔniie ki n beeri na, li-i tee ki bi bur dibinn tiŋ ni, li tuu piae, ŋaan ki dibinn na-n kpo. Li poorpo dibinn na-n kpaat, ŋanne ji tuu te ki lin nan dii bonchiann. Ŋaan li-i tee ki bi ki bur dibinn maŋ, li kan kpo, ki bia kan nan; li sii tee dibinyenne. 25Tɔn, daanɔ nba loon u manfoor ki gar wa loon min Yisa biaŋinba, u sa kɔŋ u manfoore; ŋaan daanɔ nba loonin ki gar wa loon u manfoor biaŋinba tingbouŋ na ni na, ŋɔɔe kan boon u manfoori; li tan sii tee manfoor nba kaa gbennue. 26Daanɔ nba loon wuu tuun n toonn, see ki wuu waan, ki ma tan sii be siaminba, ki n toontunnɔ mun tan sii be leŋ. Ki bia jenna, daanɔ nba tuun n toonn, n Baa Yennu tan sa donnɔ.”
Yisa nba pak u kuun po biaŋinba
27Ŋanne ki Yisa yet a “N mɔk parbiir bonchiann, ki ki mi ma sa teen biaŋinba. N nɔk boi n Baa Yennu ki wun nyinnin fara nba baat n paak na nɔkaa?” ŋaan bia yaa a “Aaii, kimaan n baar tingbouŋ na ni ma n tan di fara maŋe,” 28ŋaan miar Yennu a “N Baa, ŋaant ki a sann-n la dontir.” Ŋanne ki kunkɔr pak sanpaapo a “N sann poŋ la dontira, ki bia sa ŋamm la dontir ki pukin.”
29Niib bonchiann nba din see leŋ na din gbat kunkɔr nba pak sanpaapo na, ki bi yaa a “Li tee satianiie,” ki siab yaa a “Malakae piak nanɔ.” 30Ŋaan ki Yisa betib a “Li ki tee n mɔŋ mɔŋ paak kaa ki kunkɔr maŋ pak na, ŋaan li tee i tiauŋ paake. 31Yoo nba ki Yennu yaa wun tan bu tingbouŋ na ŋaateeb buut na, li yoo baat; ki u bia sa biir tingbouŋ na yudaanɔ Sintaanii paŋ. 32Bi-i taŋŋi jii-n ki donnin tiŋ sanpaapo yoonba, n sa dak niib kur ki bin baar n peŋ.” 33U maan na din want wa tan sa kpo biaŋinbae. 34Ki nibur na yetɔ a “Ti sennu ni wantit a Yennu Niganntɔɔ Masia sii mɔk manfoor nba kaa gbennu. Nlee ki a sa yet a bi sa jii nisaarik Bik na ki donnɔ? Ŋmee tee nisaarik Bik maŋi?” 35Ki u jiin yetib a “Min nba tee yentu na sii be i boor waaminnee. Li paak, i somm man yentu maŋ ni, la daa be na, ki bunbɔnn kan fit lian baar i ni, kimaan wunba somm bunbɔnn ni, u ki mi wa saa siaminba po. 36Tɔn, min nba tee yentu na nba daa be na, teentin yada, ki i sii tee niib nba ki n yentu sii yentiri ni.”
Juu teeb nba yêt yada teenu biaŋinba
Yisa nba din yet nna maŋ poorpoe, ŋaan ki u nyii niib na ni, ki saan bɔr. 37U lek din tun toonjaana bonchiann bi numm ni, ŋaan bi din ki teenɔ yada. 38Ba din ki teenɔ yada na, ŋannii te ki Yennu sɔkinii maan na ji fit lian gbee, ki li yaa a
“Ti Yomdaanɔ, ŋmee gaar ti maami?
ŋmee ki Yennu jii u paŋ ki fiit wannɔ?”
39Binba din yêt a bi kan teenɔ yada na, li paak bi set ji kan teenɔ yada, kimaan Yennu sɔkinii Aisaya mun bia yet a
40“Min Yennue teemm jɔɔnii,
ki bia te ki bi gbar bannu,
ki bi nummpo daa yentiri,
ki bi bia daa bant li paaki,
ki li paak bi kan fit baar n boor ni,
ki n tan tinnibi.”
41Aisaya din yet nna, kimaan u din la u yentchiauŋ, ki din bunt buntir ki jikit saa u po.
42Tɔn, Juu teeb yudamm bonchiann gbaa din teen Yisa yada, ŋaan bi ki nyinn bi mɔŋ paanu ni a bi teenɔ yada, kimaan bi tiin jaŋmaanii a Farisiinba nee sa nyinnib bi Yenjiantu ni. 43Linba na wann nan Juu teeb yudamm maŋ din loon niib-n pakibe, ki gar Yennu-n pakib.
Biaŋinba ki Yisa maan sa bu niib buut
44Ŋanne ki Yisa tan pak sanpaapowa a “Daanɔ nba teenin yada, u ki teen min kuukɔɔ kaa yada, ŋaan u mun teen Yennu wunba tumin nee yada. 45Ki bia jenna, wunba laatin, u ki laat min kuukɔɔ kaa, ŋaan u laat Yennu wunba tumin nee mun. 46N baar tingbouŋ ni na ma mii tei yentir niibe, ki daanɔ nba teenin yada, u kan biar bunbɔnn ni. 47Ki bia jenna, wunba gbat n maan na, ŋaan ki saki, min kaa sa bu u buuti, kimaan n ki baar tingbouŋ na ni ma n tan bu niib buut kaa, ŋaan n baar ma n tinnibe. 48Ki wunba yêenin ki ki saak n maan na, bonte be ki sa bu u buut; maan nba ki n pak ki u ki sak nee tan sa bu nanɔ dunia gbennu daar. 49Ki bia jenna, maan nba ki n pak na, li ki tee n tiauŋ maan kaa, ŋaan ma pak linba maŋ, li tee n Baa Yennu wunba tumin nee betin a mii want. 50Ki u maan maŋ teen niib manfoor nba kaa gbennue. Ki ma pak linba na kura, ŋanne ki n Baa Yennu yaa a n pak.”
Currently Selected:
Jɔɔnn 12: BIM
Highlight
Share
Copy
Want to have your highlights saved across all your devices? Sign up or sign in
Jɔɔnn 12
12
Mari nba din but tulaarii Yisa taa paak biaŋinba
(Matiu 26.6-13; Mak 14.3-9)
1Tɔn, daa ŋannloob daar din tan biar nan yukitgar tiaru jaamm-n di, ki Yisa nan u poorpoweiteeb saan Betani, doo nba ki Lasarus be na. Ŋɔɔe ki Yisa din fiinɔ kuun ni na. 2Leŋe ki bi din teen jeet, ki Maata jii ki baar nann ki tan turib; ki Lasarus din tee bi ni yenɔ nba din kar ki di namm. 3Ki Mari jii tulaarii saama, linba yaa daauk paar bonchiann. Bi din jii faat nba ki bi yir naade ki teen tulaarii maŋ; ki u jiir ki but Yisa taa paak, ŋaan soor u mɔŋ yut ki fiar fiar; ki ŋaak na ji nubir nan tulaarii na gbimm. 4Ki Yisa poorpoweitɔyenɔ, wunba ki bi yiu Judas Iskariot, (ŋɔɔe din tee wunba yaa wun tan nyi Yisa poor na,) ki u yet a 5“Bee teen ki bi bo ki kɔi tulaarii maŋ poŋ kobii ŋanntaa ki jii li likirii ki tur talasdammi?” 6Wa din yet nna maŋ, li din ki tee a u baka be talasdamm na ni kaa, ŋaan u din tee nanyukɔɔe. Ŋɔɔe din tee wunba dia likirii pakir ki tuu jaan. 7Ki Yisa yetɔ a “Ŋaantɔ! U teen nna ki li tee n kuun siir teenue. 8Talasdamme sii yɔɔ be nani yoo kura, ŋaan min ŋarin kii yɔɔ be nna kaa.”
Yennu jiantu yudamm nba lor lor a bin kpi Lasarus biaŋinba
9Ŋanne ki Juu teeb bonchiann gbat a Yisa be Betani, ki bi saan leŋ. Bi din ki saan Yisa paak kuukɔɔ kaa, ŋaan bi din loon ki bin saa la Lasaruse mun, wunba ki Yisa fiinɔ kuun ni na. 10Li paake teen ki Yennu jiantu yudamm din lorin lora a bin kpi Lasarus mun biak. 11Li din tee Lasarus kuun fiiru paake ki Juu teeb bonchiann din nyik Yennu jiantu yudamm maŋ, ŋaan teen Yisae yada ki waau.
Biaŋinba ki Jerusalem teeb dontir Yisa sann
(Matiu 21.1-11; Mak 11.1-11; Luk 19.28-40)
12Li yent sanyiɔko ki niburchiauŋ nba baar Jerusalem a bin di yukitgar tiaru jaamm na gbat a Yisa baat. 13Ki bi ji ŋat biabfaat ki chet a bin tookɔ, ki yikin wuyikinii sanpaapowa ki yaa a “Hosana, ti Yomdaanɔ, tintit mɔtana. Yennu mɔsonŋann-ii be daanɔ nba baat nan ti Yomdaanɔ Yennu sann ni. Yennu-n teen u mɔsonŋann timm Israel teeb kpanbar paak.” 14Ki Yisa din te ki bi poŋ lon boŋe ki u jak ki baat, kaman nan la sɔb Yennu gbouŋ ni biaŋinba na
15a “Sion doo teeb, i daa tiin jaŋmaanii.
Gotir, i kpanbar jak bonsar bik ki baat.”
16Ki u poorpoweiteeb din daa ki bann linba na paak li yoo maŋi. Ŋaan Yennu nba din tan donn Yisa sanpaapo na, ŋanne ki bi ji din tiar nan linba na sɔb Yennu gbouŋ ni ki jikit saa u po na, ki bia tiar nan niib na mun set din teenɔ nnae.
17Niburchiauŋ nba din be Yisa boor ni Betani yoo nba ki u yiin Lasarus a wun nyi kaauk ni ŋaan fiinɔ kuun ni na, ki bi din la ki mɔɔntir li barii. 18Li paake te ki niib bonchiann din chetɔ, kimaan ba gbat ki u tun toonjaann maŋ na paak. 19Ŋanne ki Farisiinba na yeen bi leeb a “Ti ji kan fit ki nyannɔ. Gotir, tingbouŋ na niib kura waaue.”
Biaŋinba ki Griik nisiab loon Yisa a bin lau
20Niib nba din saan Jerusalem a bin saa di yukitgar tiaru jaamm na, ki Griik siab din be bi ni; 21ki bi tan saan Filip peŋ, wunba nyii Betsaida nba be Galilee tiŋ ni na; ki bi yetɔ a “Chanbaa, ti loon ki ti la Yisa.” 22Ki Filip mun saan ki saa bet Andru, ki Andru nan Filip ji saan ki bet Yisa. 23Ki Yisa betib a “Yoo nba ki Yennu sa donn nisaarik Bik na sanpaapo na baar na. 24Barmɔniie ki n beeri na, li-i tee ki bi bur dibinn tiŋ ni, li tuu piae, ŋaan ki dibinn na-n kpo. Li poorpo dibinn na-n kpaat, ŋanne ji tuu te ki lin nan dii bonchiann. Ŋaan li-i tee ki bi ki bur dibinn maŋ, li kan kpo, ki bia kan nan; li sii tee dibinyenne. 25Tɔn, daanɔ nba loon u manfoor ki gar wa loon min Yisa biaŋinba, u sa kɔŋ u manfoore; ŋaan daanɔ nba loonin ki gar wa loon u manfoor biaŋinba tingbouŋ na ni na, ŋɔɔe kan boon u manfoori; li tan sii tee manfoor nba kaa gbennue. 26Daanɔ nba loon wuu tuun n toonn, see ki wuu waan, ki ma tan sii be siaminba, ki n toontunnɔ mun tan sii be leŋ. Ki bia jenna, daanɔ nba tuun n toonn, n Baa Yennu tan sa donnɔ.”
Yisa nba pak u kuun po biaŋinba
27Ŋanne ki Yisa yet a “N mɔk parbiir bonchiann, ki ki mi ma sa teen biaŋinba. N nɔk boi n Baa Yennu ki wun nyinnin fara nba baat n paak na nɔkaa?” ŋaan bia yaa a “Aaii, kimaan n baar tingbouŋ na ni ma n tan di fara maŋe,” 28ŋaan miar Yennu a “N Baa, ŋaant ki a sann-n la dontir.” Ŋanne ki kunkɔr pak sanpaapo a “N sann poŋ la dontira, ki bia sa ŋamm la dontir ki pukin.”
29Niib bonchiann nba din see leŋ na din gbat kunkɔr nba pak sanpaapo na, ki bi yaa a “Li tee satianiie,” ki siab yaa a “Malakae piak nanɔ.” 30Ŋaan ki Yisa betib a “Li ki tee n mɔŋ mɔŋ paak kaa ki kunkɔr maŋ pak na, ŋaan li tee i tiauŋ paake. 31Yoo nba ki Yennu yaa wun tan bu tingbouŋ na ŋaateeb buut na, li yoo baat; ki u bia sa biir tingbouŋ na yudaanɔ Sintaanii paŋ. 32Bi-i taŋŋi jii-n ki donnin tiŋ sanpaapo yoonba, n sa dak niib kur ki bin baar n peŋ.” 33U maan na din want wa tan sa kpo biaŋinbae. 34Ki nibur na yetɔ a “Ti sennu ni wantit a Yennu Niganntɔɔ Masia sii mɔk manfoor nba kaa gbennu. Nlee ki a sa yet a bi sa jii nisaarik Bik na ki donnɔ? Ŋmee tee nisaarik Bik maŋi?” 35Ki u jiin yetib a “Min nba tee yentu na sii be i boor waaminnee. Li paak, i somm man yentu maŋ ni, la daa be na, ki bunbɔnn kan fit lian baar i ni, kimaan wunba somm bunbɔnn ni, u ki mi wa saa siaminba po. 36Tɔn, min nba tee yentu na nba daa be na, teentin yada, ki i sii tee niib nba ki n yentu sii yentiri ni.”
Juu teeb nba yêt yada teenu biaŋinba
Yisa nba din yet nna maŋ poorpoe, ŋaan ki u nyii niib na ni, ki saan bɔr. 37U lek din tun toonjaana bonchiann bi numm ni, ŋaan bi din ki teenɔ yada. 38Ba din ki teenɔ yada na, ŋannii te ki Yennu sɔkinii maan na ji fit lian gbee, ki li yaa a
“Ti Yomdaanɔ, ŋmee gaar ti maami?
ŋmee ki Yennu jii u paŋ ki fiit wannɔ?”
39Binba din yêt a bi kan teenɔ yada na, li paak bi set ji kan teenɔ yada, kimaan Yennu sɔkinii Aisaya mun bia yet a
40“Min Yennue teemm jɔɔnii,
ki bia te ki bi gbar bannu,
ki bi nummpo daa yentiri,
ki bi bia daa bant li paaki,
ki li paak bi kan fit baar n boor ni,
ki n tan tinnibi.”
41Aisaya din yet nna, kimaan u din la u yentchiauŋ, ki din bunt buntir ki jikit saa u po.
42Tɔn, Juu teeb yudamm bonchiann gbaa din teen Yisa yada, ŋaan bi ki nyinn bi mɔŋ paanu ni a bi teenɔ yada, kimaan bi tiin jaŋmaanii a Farisiinba nee sa nyinnib bi Yenjiantu ni. 43Linba na wann nan Juu teeb yudamm maŋ din loon niib-n pakibe, ki gar Yennu-n pakib.
Biaŋinba ki Yisa maan sa bu niib buut
44Ŋanne ki Yisa tan pak sanpaapowa a “Daanɔ nba teenin yada, u ki teen min kuukɔɔ kaa yada, ŋaan u mun teen Yennu wunba tumin nee yada. 45Ki bia jenna, wunba laatin, u ki laat min kuukɔɔ kaa, ŋaan u laat Yennu wunba tumin nee mun. 46N baar tingbouŋ ni na ma mii tei yentir niibe, ki daanɔ nba teenin yada, u kan biar bunbɔnn ni. 47Ki bia jenna, wunba gbat n maan na, ŋaan ki saki, min kaa sa bu u buuti, kimaan n ki baar tingbouŋ na ni ma n tan bu niib buut kaa, ŋaan n baar ma n tinnibe. 48Ki wunba yêenin ki ki saak n maan na, bonte be ki sa bu u buut; maan nba ki n pak ki u ki sak nee tan sa bu nanɔ dunia gbennu daar. 49Ki bia jenna, maan nba ki n pak na, li ki tee n tiauŋ maan kaa, ŋaan ma pak linba maŋ, li tee n Baa Yennu wunba tumin nee betin a mii want. 50Ki u maan maŋ teen niib manfoor nba kaa gbennue. Ki ma pak linba na kura, ŋanne ki n Baa Yennu yaa a n pak.”
Currently Selected:
:
Highlight
Share
Copy
Want to have your highlights saved across all your devices? Sign up or sign in