Jɔɔnn 3

Jɔɔ nba ki u sann din yi Nikodemus na po

1Jasɔɔ nna din be ki u sann yi Nikodemus. U din tee Juu teeb yudaanɔe, ki bia din tee Farisii nirɔe; 2ki nyiɔsiɔk ki u tan baar Yisa boor ni, ki yetɔ a “Chanbaa, ti mi nan a tee wanntɔɔ nba nyii Yennu boor, kimaan sɔɔ kan fit tun toonjaana nba ki a tuun na booru, ki li ki tee ki Yennu be nanɔ kaa.”

3Ki Yisa betɔ a “Barmɔniie ki n beera na, sɔɔ kan fit ki kɔɔ Yennu naan ni, ki li ki tee ki bi ŋamm marɔ kaa.” 4Ki Nikodemus boiɔ “Nlee ki bi sa ŋamm ki mar nirɔ nba ki tee bik biaki? kimaan u ji kan fit ki ŋmat kɔɔ u naa poor ni, ki wun ŋamm marɔ.” 5Ki Yisa yetɔ a “Barmɔniie ki n beera, nirɔ maaru, li kan fit jaŋ nan wun baar Yennu naan ni, ŋaan see ki u la maaru munnlee, ki li tee Yennu Seyeeŋ yar. Nnee-i kaa, u kan fit ki baar Yennu naami. 6Nisaarik ŋarin maar nisaarik, ŋaan Seyeeŋ na ŋarin maar Seyeeŋ yɔɔe. 7Li paak, a daa te ki li teea bakitnauŋ nan ma yaa a ‘See ki bi ŋamm mari na.’ 8Wouŋ na tuu da la loon siaminba na, ki a ki mi wa nyi sian ki da. A bia ki mi wa saa siami, ŋaan a gbia ki u dae. Li mun bia tee nnee ki tur sɔɔ kur nba ki Yennu Seyeeŋ marɔ na.”

9Ki Nikodemus boiɔ a “Nlee ki li sa teen nna?” 10Ki Yisa jiinɔ a “A tee daanɔ nba want Israel teeb Yennu maan, ŋaan tan ki mi linba na paakii? 11Barmɔniie ki n yaa n beta, ti beeri linba ki ti mi, nan ta bia la linbae, ŋaan ki i ki gaan ti maami. 12Li-i tee ki i ki teenin yada, nan ma beeri tingbouŋ na bona po na, li-i tee ki n beti Yendɔuŋ ni bona po, nlee ki i ji sa teenin yada? 13Sɔɔ kaa ki doo Yendɔuŋ ni see min nisaarik Bik nba nyii Yendɔuŋ ni na.”

14Moses nba din jii kut waauk ki finnɔ daauk paak ki donnɔ muuk ni, li mun bia tee nnee ki bi tan sa jii nisaarik Bik na, ki donnɔ sanpaapo, 15ki wunba teenɔ yada, u sa la manfoor nba kaa gbennu. 16Kimaan Yennu mantik din loon timm tingbouŋ na niib bonchiann; li paak, ki u turit u Bijayemmir, ki wunba teen u Bija maŋ yada u tan kan kɔɔ muu ni, ŋaan u sii mɔk manfoor nba kaa gbennu, 17kimaan Yennu nba din tun u Bija tingbouŋ na ni, u din ki tumɔ a wun tan bu tingbouŋ na niib buut ki biirib kaa, ŋaan u din yaa wun tinnibe. 18Ki daanɔ nba teen Yennu Bija maŋ yada, Yennu kan bu u buut ki biirɔ, ŋaan wunba ki teeu yada, Yennu poŋ bu u yaa buut ki biirɔwa, kimaan u ki teen ŋɔɔ Yennu Bijayemmir maŋ yada.

19Linba paak te ki Yennu bu bi buut ki biirib maŋ tee nnee: Yennu Bija din baar tingbouŋ na ni a wun yent tingbouŋ na niib nummpo, ŋaan ki nifosaarik loon bunbɔnn ki gar yentu maŋ, kimaan bi toona nba bi biaŋinba na paak, 20kimaan daanɔ nba kur tuun toonbiit, u nân yentu maŋe, ki ki loon wuu nakiiɔ, kimaan u ki loon nan u toonbiit na-n tan nyi paanu. 21Ŋaan wunba waa Yennu barmɔnii wannu ki bia tuun li biaŋ, ŋɔɔe baat yentu maŋ boor, a sɔɔ kur-n bann nan u toona kur, Yennu be li ni.

Jɔɔnn nba want Yisa po biaŋinba

22Li poorpoe ki Yisa nan u poorpoweiteeb din nyii leŋ ki saan Judea siar po, ki saa be leŋ kaman nan daa ŋaŋŋa nna; ki bi din wuur niib Yennu nyunwuru.

23-24Li yoo na ki sɔɔ ki Jɔɔnn wunba wuur niib Yennu nyunwuru na daa ki kɔɔ dansariki, ki be Enon, siaminba ki nyun din yab na, ki niib din tuu baat u boor, ki u wuurib nyun. Enon din ki fɔk nan Salimi.

25Ŋanne ki mɔniɔk tan fiir Jɔɔnn maŋ poorpoweiteeb nan Juu nirɔ nna sinsuuk ni ki jikit saa Yennu nyunwuru po. 26Ki Jɔɔnn poorpoweiteeb na saan u boor, ki saa betɔ “Chanbaa, nirɔ nba ki a daan be nanɔ na Jɔɔdann mɔk-pootir, ki yaa a u tee Yennu Niganntɔɔ na, ti gbat ki u wuur niib Yennu nyunwuru, ki sɔɔ kur saa u boor ki u wuurib.” 27Ki Jɔɔnn maŋ betib a “Yennu nyint sɔɔ kur nan u toona. Nirɔ kan fit tun siar ki li ki tee Yennu nyinnɔ. 28I mɔŋ poŋ mi gbat ki n yet ma min kaa tee Yennu Niganntɔɔ Masia, ŋaan min ŋarin, Yennu dɔŋ tun mine, a n tan teen u baaru siir. 29Poosɔrɔe tee wunba yen pooyookir na. Wunba tee poosɔrɔ na yɔɔk ki be u boor ki gbiintirɔ, ŋɔɔe mɔk parpeenn poosɔrɔ na kunkɔr paak. Nnee ki n mun set mɔk parpeenn bonchiann Masia na paak.

30“Li kpaa talas nan ŋɔɔ Masia-ii yabitir, ŋaan ki min-ii waabit.”

Wunba nyii Yendɔuŋ ni labaar

31Wunba nyii sanpaapo, ŋɔɔe chee sɔɔ kura; ŋaan binba nyii tingbouŋ na ni, ŋamm tee tingbouŋ na teebe, ki bia piak nisaarii maan. Wunba nyii Yendɔuŋ ni, ŋɔɔe chee sɔɔ kur, 32ki bia jenna ki beer niib linba ki u la ki bia gbat, ŋaan sɔɔ kur kaa gaar u maami. 33Ki bia jenna, ki wunba gaar u maan maŋ, li want nan ŋɔɔe saak nan Yennu maan maŋ tee barmɔnii. 34Yennu Bija nba ki u tumɔ na, wa piak maan nba na, li tee Yennu maame, kimaan Yennu tur u Bija maŋ Seyeeŋ nba yab ki kaa bikinu. 35Yennu loon u Bija, ki kubinɔ bona kur u nuu ni.

36Daanɔ nba tee Yennu Bija yada, u sii mɔk manfoor nba kaa gbennu, ki daanɔ nba mun ki saak Yennu Bija na mɔb kan la manfoor maŋi, ŋaan Yennu wutoor sa do u paak ki kan gbenni.

Currently Selected:

Jɔɔnn 3: BIM

Highlight

Copy