Luk 18

Pakɔɔk nan barbuurɔ po

1Li yoo na ki Yisa yimm barjouk a wun wannib nan li ŋan ki bii mei Yennu yoo kura, ŋaan daa mɔk kpinkpangbatuku, ki betib a 2“Barbuurɔ din be dosau ki din tuu ki tiin Yennu ki tan boi a u baakit nirɔ gbaa. 3Pakɔɔk mun bia din be doo maŋ ni ki din tuu yɔɔ baat u boor yoo kur ki yeenɔ a ‘Bumin n maan na ki turin nan nirɔ nba mukisirin na.’ 4Ŋaan ki u tuu yêt. Li poorpo ki u tan dukin dudukit a ‘N poŋ taan ki tiin Yennu, ki bia ki baakit nirɔ gbaa, 5ŋaan pakɔɔk na daamii paak, n sa tat ki bu u maan maŋ ki turɔ, ŋaan wu biakii baatie ŋann u ji yaa wun kpime na.’ ”

6Ki ti Yomdaanɔ Yisa ŋamm yetib a “Gbiintir barbutouŋ daanɔ nba dukin biaŋinba. 7Wa yaa a u sa turɔ mɔnii na, ki Yennu nigannteeb nba meiɔ yennu nan nyiɔk na, ŋɔɔ Yennu kan bu ki turibii? U sa yukiraa? 8N beerie, u sa bu bi paak yian yian. Tɔn, min nisaarik Bik-i baar yoonba, n sa la niib nba teenin yadawa-aa?”

Farisii nirɔ nan lampogaartɔɔ po

9Ŋanne ki Yisa yin barjouk ki tur binba dukii bonŋann bi mɔŋ paak, ŋaan sian bi leeb na: a 10“Jab bannlee din saan saa kɔɔ Yennu jiantu ŋasaakak ni a bin miar Yennu, ki yenɔ din tee Farisii nirɔ, ki lɔɔ mun din tee lampogaartɔɔ. 11Ki Farisii nirɔ na set ŋaan miar u mɔŋ dudukit ni ki yet a nna, ‘Yennu, n teena niipoouk, kimaan n ki tee biitdaanɔ kaman nan nileeb na. N ki tee ninfɔkdaanɔ, ki bia ki di fobiti, ki mun bia ki tuun bonchonchonsimi. Niipoouk nan ma ki tee kaman nan lampogaartɔɔ na na. 12N lorin n mɔb taar munnlee daa ŋannlore nɔɔk ni; ma tuu la linba, n bia teena yennkɔɔ piik nɔɔk ni.’ 13Ki lampogaartɔɔ na ŋanin din set dannuwa, ki din ki loon wun yaat got sanpaapo, ŋaan pak yur ki yet a ‘Yennu, tinimin ninbaauk, kimaan n tee biitdaanɔe.’ ” 14Ki Yisa ŋamm yetib a “N beerie, jɔɔ na, li ki tee lɔɔ, wa din tan kun, Yennu poŋ din gaar u miaru ki turɔ mɔnii; kimaan wunba kur dont u mɔŋ, Yennu tan sa sikinɔ; ŋaan wunba mun sikint u mɔŋ, Yennu tan sa donnɔ.”

Yisa nba gaar waas paak biaŋinba

(Matiu 19.13-15; Mak 10.13-16)

15Tɔn, ki nisiab din baat nan bi sanpaantii Yisa boor ni, a wun tan yii u nii bi paak, ŋaan ki u poorpoweiteeb nba la ki bi baat nan waas maŋ na, ki bi tian bi paak. 16Ŋaan ki Yisa yiin waas maŋ a bii baat u boor na, ŋaan yet u poorpoweiteeb na a “Ŋaant man ki waas maŋ-ii baat n boor na man, ki daa tiammi, kimaan bi boorue yen Yennu naan. 17Barmɔniie ki n beeri na, wunba ki gaar Yennu naan kaman nan bik na, u kan mi kɔɔ li ni fabaa.”

Mɔkitsɔɔ labaar

(Matiu 19.16-30; Mak 10.17-31)

18Li yoo na ki yudaansɔɔ din baar Yisa boor ni ki tan boiɔ, “Wanntɔŋanɔ, n sa teen nlee ki tan la manfoor nba kaa gbennu?”

19Ki Yisa ŋmat boiɔ a “Bee ki a yin niŋanɔ? Niŋansɔɔ kaa see Yennu kuukɔɔ. 20A poŋ mi Yennu sennu: Daa tuun bonchonchonn toona, daa kpi nirɔ, daa jaami, daa tee faak siara, baakit a baa nan a naa.” 21Ki jɔɔ maŋ jiin ki yetɔ a “N poŋ sak linba na kur n bisin niewa.”

22Yisa nba gbat u jiinu na ki u betɔ a “Bonyennkɔɔe pɔta; kɔin linba kur ki a mɔk ki jii li likirii ki tur talasdamm, ki a tan sa la mɔkint Yendɔuŋ ni. Li poorpo ki a jenna kii waan.” 23Wa gbat linba na ki u par ji biir, kimaan u din mɔk mɔkint bonchiann.

24Yisa nba bann nan u mɔk parbiir na, ki u yet a “Li paar nan mɔkita-n kɔɔ Yennu naan ni. 25Li bia paar nan mɔkitɔɔ-n kɔɔ Yennu naan ni kaman nan lagumii nba kan fit kɔɔ kparpeenu miar ni nae.”

26Niib nba gbat wa piak biaŋinba na ki bi boiɔ a “Li-i tee nneeie, ŋmee ji sa fit ki la tinnu?”

27Ki u betib a “Linba ki nirɔ kan fit tumi ŋaan Yennu sa fit tumira.”

28Ki Piita yetɔ a “Nnara, ti din nyik linba ki ti din mɔk na ŋaan waa-a.”

29Ki Yisa betib a “Barmɔniie ki n beeri, wunba kur nyik u ŋaak amii u baa amii u naa amii u poo amii u waas amii u yɔɔrib amii u waarii Yennu naan paaki, 30u sa bia la bona bonchiann tingbouŋ na ni, ki lin gar wa nyik linba na; ki yoo nba baat na, u tan sa la manfoor nba kaa gbennu.”

Yisa nba ŋamm pak u kuun po taar munntaa biaŋinba

(Matiu 20.17-19; Mak 10.32-34)

31Li yoo na ki Yisa yiin u poorpoweiteeb ki nyii namm kpiŋ ki sa betib a “Nnara, ti saa Jerusaleme, ki leŋe ki bi sa teen min nisaarik Bik linba kur ki Yennu sɔkiniinba din sɔb n po biaŋinba na, 32kimaan bi tan sa soorin ki teenin binba ki tee Juu teeb nuu ni, ki bi tan sa daanin nyatuk ki sukiin ki siin mɔsant n paak, 33ki bia boon kpaasir, ki bia tan kpin; ŋaan daa ŋanntaa daar ki n tan sa fiir kuun ni.”

34Ŋaan u poorpoweiteeb na din ki bann barii na paaki, kimaan Yennu dɔkin bi yama. Ŋanne din te ki bi ki bann linba ki u piak na paaki.

Yisa nba nyɔɔnt jɔɔŋ biaŋinba

(Matiu 20.29-34; Mak 10.46-52)

35Ki Yisa nba din tan per Jeriko na, ki jɔɔnsɔɔ din be ki kar sanjokpiŋ ki din tuu mei, 36ki tan gbat ki niburchiauŋ gaar, ki u boi a “Bee tee?”

37Ki bi betɔ a “Yisa nba tee Nasaret nirɔ nee gaar.”

38Ki u yikin sanpaapowa a “Yisa, David yaaboonn, tinimin ninbaauk.” 39Ki sɔnliita na din tian u paak a wun ŋmin; ŋaan ki u bia ŋamm yikin sanpaapowa a “David yaaboonn, tinimin ninbaauk.”

40Ki Yisa set, ŋaan betib a bin dat jɔɔŋ maŋ ki baar nanɔ u boor. Wa din baar kpian Yisa yoonba ki Yisa boiɔ a 41“A loon ki n tun bee ki turani?”

Ki u jiin yetɔ a “N Yomdaanɔ, n loon ki a nyɔɔnt n ninbinae turin.”

42Ki Yisa betɔ a “Nyɔɔntir! Fa teenin yada nee te ki a ninbina na la paaku.”

43Li taakpaak ni ki u ninbina nyɔɔnt ki u ji laat, ki waa Yisa ki saa ki dont Yennu sann. Yoo nba ki niib na la nna maŋ, ki bi kura ji piak Yennu.

Currently Selected:

Luk 18: BIM

Highlight

Copy