Luk 23

Tiŋ yudaanɔ Pailat nba bu Yisa buut biaŋinba

(Matiu 27.1-2, 11-14; Mak 15.1-5; Jɔɔnn 18.28-38)

1Ŋanne ki niib na kura din fiir ki jii Yisa ki saan nanɔ Pailat boor. 2Leŋe ki bi ji din piin ki want u biit ki yeen a “Ti la nirɔ na ki u biir ti niib ki yaa a bi daa pa lampo kii teen Kpanbar Siisa, ki bia yeen a ŋɔɔe tee Yennu Niganntɔɔ Masia, ki bia tee kpanbar.”

3Ki Pailat boiɔ a “Fii tee Juu teeb kpanbar na-aa?”

Ki u jiin ki yet a “Nan fa kpan yaa na.”

4Ki Pailat yet Yennu jiantu yudamm nan nibur na, “N ki la jɔɔ na biiti.”

5Ki niib na bia din yakii nan Pailat ki yeen a “U want niib wannu, li paak te ki bi fiir jirjir. U din piin ki want Galilee niib ki tan saan Judea doi ni kura nan wa tan baar nna na.”

Bat Herod nba bu Yisa buut biaŋinba

6Pailat nba gbat nna na ki u boib a “Jɔɔ na tee Galilee nirɔee?” 7Wa bann nan Yisa nyii Galilee tiŋ nba ki Bat Herod yen na, ki u ŋaan ki bi saan nanɔ Herod boor, kimaan ŋɔɔ Herod mun din be Jerusalem li yoo. 8Ki Herod poŋ din tuu gbia Yisa po, ki loon wun lau ki li yukir. Wa din tan la Yisa yoonba ki u ji mɔk parpeenn bonchiann, ki loon Yisa-n tun bakitnauŋ toonn ki wun la. 9Li paak, ki u boi Yisa buboit bonchiann; ŋaan ki u ki jiinɔ siari. 10Ki Yennu jiantu yudamm nan sennu wannteeb mun din see leŋ ki piak nan paŋ ki want Yisa biit. 11Ki Herod nan u lanjimanba ji sian Yisa ki daanɔ nyatuk, ki gbabinɔ chinchenŋann ki jiinɔ Pailat boor. 12Li daar maŋ ki Pailat nan Herod soor leeb naasinyɔɔsir, kimaan bi din tuu tee dataie sinsinn tuuk.

Pailat nba chab a bin kpi Yisa biaŋinba

(Matiu 27.15-26; Mak 15.6-15; Jɔɔnn 18.39–19.16)

13Ki Pailat din yiin Yennu jiantu yudamm nan Juu teeb yudamm nan nileeb 14ki tan yetib a “I baar nan nirɔ na ki yaa a u kpann niibe. Gotir, n bu u buut i numm nna, ki ki la u biit nba tee linba ki i yaa a u tun maŋi. 15Herod mun bia ki la u biiti. Li paak te ki u jiintɔ ki teent na. I lawa-aa? Jɔɔ na ki tun bisiat nba ki li jaŋ nan kuumi. 16Ŋannimi n sa boou kpaasir, ŋaan ŋaau ki wun saan.” 17Ki binn kur yukitgar tiaru jaamm yoo na, Pailat din tuu fabir ki nyinn dansarkɔyenɔe ki ŋaan ki wun saan yann.

18Ki nibur na din tian sanpaapo ki yeen a “Kpin jɔɔ na. Nyint Barabas yann ki turit.” 19(Ba din kɔɔn Barabas dansarik na kimaan u bigbabisin nba ki u din tee doo na ni na, nan u nikpinu na paak.)

20Ŋanne ki Pailat bia lek din loon wun nyinn Yisa ki ŋaau yann, li paak ki u bia ŋamm piak nan nibur na; 21ki niib na mun bia tian sanpaapo ki jiint Pailat a “Kpaamɔ dapunpunn paak! Kpaamɔ dapunpunn paak!”

22Ki Pailat boib taar munntaa ni, “Bee paake? U biit mantik tee lannpoe? N ki la linba ki u tumi ki li jaŋ nan kuunkpinu. Ŋannimi n sa boou kpaasire, ŋaan ŋaau ki wun saan.”

23Ŋaan ki niib na bia lek tian tintianii a wun kpaa Yisa ki tabinɔ dapunpunn paak; ki bi tintianii maŋ tan nyann Pailat yar. 24Ki Pailat ji chabib ba loon biaŋinba a lin teen nna, 25ki nyinn jɔɔ nba ki bi loon wun nyinnɔ na, wunba ki bi din kɔɔnɔ dansarik kimaan u bigbabisin nan u nikpinu na paak, ki u chabib Yisa nan ba loon biaŋinba lin teen maŋ.

Ba kpaa Yisa ki tabinɔ dapunpunn paak biaŋinba

(Matiu 27.32-44; Mak 15.21-32; Jɔɔnn 19.17-27)

26Li yoo na ki lanjimanba jii Yisa ki saan nanɔ, ki saa took jasɔɔ ki u sann yi Simon, wunba din tee Sairene jɔɔ, ki u nyii digbankpiŋ nna ni ki baat Jerusalem; ki bi din tan soorɔ ki jii Yisa dapunpunn na ki bukinɔ ki u waa Yisa poor.

27Ki niburchiauŋ din waa Yisa ki bi tɔk saa. Bi ni maŋ poosiab din waa ki bui ki fabin u paak. 28Ki Yisa din tan jiant bi paak ki yetib a “Jerusalem poob, i daa bui n paaki, ŋaan kii bui man i mɔŋ paak nan i waas paak. 29Gotir, yoo tan sii baat ki niib tan sii yeen a ‘Pookanmata damm binba ki mar waas ki mɔɔmm biiri, ŋamme mɔk parpeenn.’ 30Li yoo maŋe ki niib tan sii yeen jɔɔt nan kunkona a ‘Baan ti paak ki piint!’ 31A muu-i di tana, ki dagbira jikii?”

32Ŋanne ki bi ji din jii doyeerteeb bannlee ki pukin Yisa paak a bin kpib. 33Ba din baar siaminba ki bi yir Yukpabuk na, leŋe ki bi din kpaa Yisa ki tabinɔ dapunpunn paak, ki bia din kpaa doyeerteeb bannlee na dapunpuna paak, ki yenɔ din be Yisa niidiitu po, ki lɔɔ na mun din be u niigaŋ po. 34Ki Yisa yet ki yaa a “N Baa Yennu, nyikin chab niib na, kimaan bi ki bann ba tuun linba na paaki.”

Ki bi din chent u liata ki dia ŋaan tɔ tiatia a bin la wunba sa di ki yent u liata maŋ. 35Ki niib na see ki gorii; ŋaan ki Juu teeb yudamm na din daanɔ nyatuk ki yeen a “U tuu tint nileeb; li-i tee ki u set tee Yennu Niganntɔɔ Masia na, wun tinn u mɔŋ.”

36Ki lanjimanba bia din daanɔ nyatuk, ki tan baar nan damiituk ki teenɔ, 37ŋaan yaa a “Li-i tee ki a set tee Juu teeb kpanbarie, fan tinn a mɔŋ.”

38Bi bia sɔb sɔbu ki tabin dapunpunn na u yur paak, ki li yet a “Juu teeb kpanbarii na.”

39Li yoo na ki doyeerteeb nba taab na yenɔ din sukii Yisa ki yaa a “A ki tee Masia kaa-aa? Tint a mɔŋ ŋaan mun tinnit.”

40Ki lɔɔ na din tiau ki yet a “A ki tiin Yennu-uu? kimaan fin nan ŋɔɔ be tubdatyennkɔɔ nie na. 41Timm ŋanin ŋan nan li tubdatu, kimaan bi jiintit pankpera nba ki ti tuu tuun na paake;” 42ŋaan bet Yisa a “Yisa, yoo nba ki a dii a naan, a tan tiar n po.”

43Ki Yisa betɔ a “Barmɔniie ki n beeri, dinna min nan fin sii be Paradais ni.” ((Bi bia yi Yendɔuŋ Paradais, ki li paak tee siaminba ki parpeenn bonchiann be.))

Yisa kuun labaar

(Matiu 27.45-56; Mak 15.33-41; Jɔɔnn 19.28-30)

44Li yoo din tee kaman nan yensuuk nie, ki yennu ji din lib, ki tingbouŋ na kur ji din bɔnn mɔkmɔk nan yenlekir, kut munntaa yoo. 45Ki chinchenn din tuu jɔɔn ki puun Yennu jiantu diiuk sinsuuk ni, ki li ji din tan soor bɔkit taar munnlee. 46Ki Yisa tan yikin sanpaapo ki yet a “N Baa Yennu, n jikit n seek ki tee a nuu ni.” Wa yet nna maŋ ŋaan ji kpo.

47Ki lanjimanba yudaanɔ nba la linba teen na, ki u pak Yennu ki yet a “Barmɔniie, jɔɔ na set tee popeendaanɔe.”

48Ki niburchiauŋ nba lakin leŋ a bin la linba tee, ba din la linba teen na, ki bi ji ŋmat kun nan parbiir ŋaan pakin yura. 49Ki u yɔɔsinba kur nan poob nba nyii Galilee nanɔ din be leŋ ki see banfɔkira ŋaan gorii linba tee.

Yisa gbanant piinu labaar

(Matiu 27.57-61; Mak 15.42-47; Jɔɔnn 19.38-42)

50-51Ki jasɔɔ din be ki u sann yi Josef ki din nyii Juu teeb doo nba ki bi yir Arimatea, ki din tee niŋanɔ nba tee burchimɔ, ki din guu Yennu naan baaru na. U din tee Juu teeb yudaanyenɔe, ŋaan u din ki sak nan Juu teeb yudaanleeb nba din lorin lor, nan bi toona nba ki bi tuun tee Yisa maŋi. 52Ki jɔɔ maŋ saan Pailat boor ki saa miarɔ a wun turɔ Yisa gbanant; ki u chabɔ. 53Ŋanne ki u saan kpaat gbanant na dapunpunn na paak, ki jiiu ki pɔbinɔ katiŋ ni, ki piiu kapaauŋ ni, linba ki bi poŋ din jiar tanpiiuk lokir ni na, ki bi din daa ki pii sɔɔ kaauk maŋ ni. 54Li din tee daar nba ki bi tee siir foon daar paake, ki foon daar na din tan piint.

55Ki poob nba din nyii Galilee ki din waa Yisa na wei Josef, ki bi saa la Yisa kaauk boor nan ba piiu biaŋinba. 56Ŋanne ki bi ji din ŋmat kun ŋaak ni, ki saa teen siir ki ŋamm kpanunubit nan tulaarii.

Ki foon daar ki bi din foi kaman nan Yennu sennu nba want biaŋinba na.

Currently Selected:

Luk 23: BIM

Highlight

Copy