Luk 6

Foon daar po

(Matiu 12.1-8; Mak 2.23-28)

1Tɔn, foon dasiar ki Yisa nan u poorpoweiteeb din gaar dii kpaab ni, ki u poorpoweiteeb na din somm kɔnii dikara ki pinii ki ŋman. 2Ki Farisiinba siab din boib a “Bee ki i tuun linba ki ti sennu want nan ti daa tuun foon daari?”

3Ki Yisa jiin ki boib a “I ki mi karin Yennu gbouŋ ni David nba din tun biaŋinba na-aa? Ki kon nba din mɔk ŋɔɔ nan u jɔɔmu na, 4ki u din kɔɔ Yennu ŋaak ni ki saa jii Yennu boroboro ki ŋman, ki bia tur u jɔɔmu na. Ki sennu na din ki chab nan sɔɔ-n di boroboro maŋ see manteeb kuukɔɔe.”

5Ki Yisa bia betib a “Min nisaarik Bike yen foon daar.”

Nuukpeenn daanɔ paaku labaar

(Matiu 12.9-14; Mak 3.1-6)

6Foon daleer ki Yisa din kɔɔ Yenjiantu diiuk ni ki wann niib Yennu maan, ki jasɔɔ din be leŋ ki u nuudiitu kpo ki goon. 7Ki sennu wannteeb nan Farisiinba siab mun din be leŋ, ki gorii Yisa a bin laan u sa te ki wun paak foon daarii, kimaan bi din loon bin la linba ki bi sa biirɔ li po. 8Ŋaan Yisa din mi bi dudukit ni, ki bet jɔɔ nba ki u nuu kpo na a “Fiit ki set tɔɔnn po.” Ki jɔɔ maŋ fiir ki set. 9Ki Yisa yetib a “N yaa n boi-ie ki laan ti sennu sak a ti somm niib foon daar amii ti biiribi? Ti fat niib lu amii ti kpibi?” 10Ŋanne ki u got lint niib maŋ kura ŋaan bet nuukpeenn daanɔ maŋ, “Tantir a nuu maŋ.” Ki u tant, ki u nuu maŋ naat.

11Ki sennu wannteeb nan Farisiinba na ji din yaa bin put nan wutoa, ki bi ji piin ki piak beer leeb ba sa teen Yisa biaŋinba.

Yisa nba din gann u toomiinba piik nan bannlee biaŋinba

(Matiu 10.1-4; Mak 3.13-19)

12Li daa tan gar ki Yisa doo kunkonn paak a wun saa miar Yennu, ki din saa mei Yennu nyiɔk nan la tan yent. 13Ki sanyiɔk ni ki u din yiin u poorpoweiteeb ki tan gann piik nan bannlee ki yib toomiinba. 14U din gann Simon (wunba ki u din purɔ Piita na) nan Simon waarɔ Andru, nan Jems nan Jɔɔnn, nan Filip nan Batolomiu, 15nan Matiu nan Tomas, nan Jems nba din tee Alfeus bik na, nan Simon (wunba ki bi din yiu Nikakitik na), 16nan Judas nba din tee Jems bik, nan Judas Iskariot (wunba din tan nyii Yisa poor na).

Yisa nba din want niib ki bia te ki bi paak biaŋinba

(Matiu 4.23-25)

17Yisa nba din nyii kunkonn na paak ki sik namm yoonba, ki u din saan set paanu ni; ki u poorpojɔɔmu lakin bonchiann; ki niib bonchiann mun dɔŋ nyii Judea po nan Jerusalem nan Taya nan Saidon kur doi nba kpia mɔkgbeŋŋir kpianu na, 18ki din baar a bin tan gbiint u maan, ki bia loon wun te ki bin paak. Binba ki narinbiit daamiib mun din baar ki u te ki bi paak. 19Ki sɔɔ kur nba yiar loon bin siiu, kimaan paŋ din nyi u ni ki te ki bi kur paak.

Parpeenn nan parbiir labaar

(Matiu 5.1-12)

20Li yoo na ki Yisa got u poorpoweiteeb ŋaan yet a

“Yimm tatimm, parpeenn tee i yare,

kimaan Yennu naan tee i yare.

21Yimm nba ki kon mɔki mɔtana, parpeenn tee i yare,

kimaan i tan sa gboo.

Yimm nba mɔ mɔtana, parpeenn tee i yare,

kimaan i tan sii laa.

22“Niib-i nami ki bɔkitiri ki sukii-i ki biir i sana, kimaan ya waa min nisaarik Bik na paak, parpeenn tee i yare. 23Yii mɔk parpeenn jik kii kpamm, kimaan i nyɔɔt tan sii yab Yendɔuŋ ni; bi yejamm mun din tee Yennu sɔkiniinba nnee.

24“Yimm mɔkita, li sii bi i paak,

kimaan i dɔŋ la i yanbɔɔta.

25“Yimm nba gboo mɔtana, li sii bi i paak,

kimaan kon tan sa gbati.

“Yimm nba laa mɔtana, li sii bi i paak,

kimaan i tan sii fabin ki mɔ.

26“Yimm nba ki niib kur piaki, li sii bi i paak; bi yejamm mun din piak faak sɔkiniinba nnee.”

Yii mɔk loomm man nan i datai

(Matiu 5.38-48; 7.12a)

27“Yimm nba gbiintir n maan na, n beerie, yii mɔk loomm nan i datai, kii tuun linba ŋan kii teen binba nami. 28Binba porintirii mɔpora i paak, yin jiimm a ‘Yennu mɔsonŋann-ii be i paak.’ Binba sarikiti, yii mei Yennu kii teemm. 29Wunba peb a tanpak, fan ŋmant leer po mun ki wun peb. Wunba jii a chinchenn, fan sak ki wun gaar a soot mun. 30Wunba kur miara siar, fan turɔ. Wunba fat a bona, a ji daa waa gaani. 31Biaŋinba ki i loon niib-ii tuun kii teeni na, i mun-ii tuun nna kii teen i leeb.

32“Li-i tee ki i loon binba looni na kuukɔɔe, nlee ki Yennu sa pukiniini? Biitdamm mun loon binba loomm na gbaa. 33Li-i tee ki i tuun linba ŋan ki teen binba tuun linba ŋan ki teeni na, nlee ki Yennu sa pukiniini? Biitdamm mun tuun linba na gbaa. 34Li-i tee ki i kpentir ki teen binba ki i daan nan i bia tan sa gaar jiŋ, nlee ki Yennu sa pukiniini? Biitdamm mun kpentir nna gbaa, ki teen bi leeb ki bia tuu tan gaar bi bont biaŋ jiŋ.

35“Li paak, yii mɔk loomm nan i datai man, kii tuun linba ŋan kii teemm. Li-i tee ki i kpent nirɔ ki li yukir, ya daa biir i para li paaki, kimaan i nyɔɔt tan sii yab, ki i bia tan sii tee Yabint Yennu waas, kimaan ŋɔɔe tuun linba ŋan ki teen binba ki teenɔ niipoouk, nan biitdamm. 36Yii mɔk ninbatinu man kaman nan i Baa Yennu nba mɔk ninbatinu biaŋinba na.

Leeb buut bunu labaar

(Matiu 7.1-5)

37“Daa bu nirɔ buuti ki Yennu kan bu a buuti. Daa piak nirɔ biir ki gbentɔ, ki Yennu kan biir ki gbennani. Nyikin chab niib ki Yennu sa nyik chaba mun. 38Yii teen niib, ki Yennu mun sii teena. Li sii tee kaman nan Yennu nba sa jii u daŋmanbaŋ ki chaat dii, ki lin tan gbee nan mɔgbana ki wun ji dinn ki ŋak ki lin ji tan gbee ki saa mɔ ki jii ki tura biaŋinba ki a sa fit dia nee. Fa jikit a daŋmanbaŋ ki chaatir bont biaŋinba ki teen niib na, Yennu mun sa chaat nnee ki tura.”

39Li poorpo ki Yisa din yimm barjouk a “Jɔɔŋ sa fit daar u lɔɔ-ɔɔ? bi kur kan baa bootuk ni-ii? 40A ki tumiitɔɔ ki gar u wanntɔɔ; ki tumiitɔɔ mun-i bann gbenn, ŋaan ŋɔɔ nan u wanntɔɔ sii jame.

41“Bee ki a gorii laat mɔɔnu nba be a lɔɔ ninbinn ni, ŋaan ki ki la jaantarik nba be a mɔŋ mɔŋ ninbinn ni? 42Nlee ki a sa bet a lɔɔ a ‘N yɔɔk, ŋaant ki n nyinn mɔɔnu nba be a ninbinn ni,’ ŋaan ki ki laat jaantarik nba be a mɔŋ ninbinn ni? Fin, kpinkpannii daanɔ na, nyint jaantarik nba be a ninbinn ni na sinsinn, ki ji fit la fanu ki nyinn mɔɔnu nba be a lɔɔ ninbinn ni na.

Tiik nan u lɔɔna barjouk

(Matiu 7.16-20; 12.33-35)

43“Tiŋaŋ kan lon lɔɔnbiiti, ki tibiiuk mun kan lon lɔɔnŋana. 44Tiik lɔɔna nie ki bi bantɔ. Bi ki laat kinkana kunkoŋ paak ki pɔɔ, ki bia ki laat gaa jagootuk paak ki pɔɔ. 45Niŋanɔe tuun toonŋana, kimaan u par ni ŋan; ki nibiiuk mun tuun toonbiit, kimaan u par ni bi. Linba be nirɔ par ni, ŋanne ki u piak.

Tanmaara bannlee labaar

(Matiu 7.24-27)

46“Bee ki i yin i Yomdaanɔ ŋaan ki tuun ma loon biaŋinba? 47Wunba kur baat n boor ki gbiintir n maan ki saak ki tuun li biaŋ, n sa wanni wa naan wunba; 48u naan nan jɔɔ nba din maa u ŋaak nee. Sinsinn u din gbiir fiakir ki li suŋ, ki saa tuu tanpiiuk, ki ji fɔkin fiakir maŋ li paak. Li poorpo ki saak tan baa bonchiann, ki kpenu gbee nan nyunmɔnn ki saa doo ki yir ŋaak maŋ, ŋaan ki li ki baa, kimaan u din maar bonŋanne. 49Ŋaan wunba gbiintir n maan ŋaan yêt li weiu, u naan nan jɔɔ nba mun din maa u ŋaak tanbiinii ni, ŋaan ki gbiir fiakir nee, ki nyunmɔnn din tan gbee ki saa doo ki yir ŋaak maŋ, ki li baa yiama. Bee ninbɔŋe na jiaki!”

Currently Selected:

Luk 6: BIM

Highlight

Copy