Johan 13
13
Isu ma äkähui na üng äkho mäse pa
1Cäqengja te pawi käni haetä tyng hethang kätü lä aenai dy. Isu lä älawngpre üng tho kha Pä-ai tea vawi haile hethang kätü tyng te mäny pa vi. Isu lä älawngpre-a awng saite äma üng äkähui na tea bälung aevaw jawjaw te vi. Äni ce tea käni kangteng khytä bälung aevaw jawjaw vi.
2Isu hai äkähui na lä kädüngbö mangtä ca kha awng ö dy. Setan angra lä Simon üng cäpaw Judae Iskriota tea Isu bung täre na üng kö thung-a, a hethang bärawi rüng pa vi dy. 3Pä-ai ma Isu tea äte angxynlyng na sa hethang aenae a pa dy. Isu lä hini na mäny king te vi. Äma lä Säthaw te mang üng ly te vi kha Säthaw tea vawi haile tyng ai näte mäny te vi. 4Tukha äni lä kädüngbö ca te loka üng aetha kha äma üng känih aeling pa dy. Sipry la ea angkeng-a aemäkhing dy. 5Tupyng-a kaephi käleng-a tui kädi ea äkähui na üng äkho mäse kha angkeng-a aemäkhing saite sipry hai mai pa dy.
6Simon Peterae tea tyng ea lä äni ma “Areng ä, kai üng äkho tea nang lä mäse by vi ai mei” näkha düng pa.
7Isu ma “Kai sa saite tea vaihi nang lä mäny y rawng. Khawngdüng-a nang lä mäny by ai mang” näkha näpa.
8Peterae ma “Areng ä, kai üng äkho tea manila mäse hang” näpa.
Isu ma “Nang üng äkho tea kai mäse y dylä, nang lä kai hai aesui te y dy” näkha näpa.
9Tukha Simon Peterae ma “Areng ä, kai üng äkho mäse te cang y äkö hai älö na la mäse king kae” näpa.
10Isu ma “Tui aehu pyng saite khimi üng ätabung lä caiping pyng te vi dy. Äkho ni mäse hethang ngai te kae. Nang ce angxynlyng caiping ö vi dy. Tungaila nang ce thung-a lawngtä lä caiping te y vi.” (11Isu lä äma bung ämi ma täre na kö thung-a, a ai mei näte äni lä mäny te vi. Tukätephüng-a “lawngtä lä caiping y” näkha thui te vi.)
12Isu lä äkähui na üng äkho mäse pyng ea känih aekhu haile tyng kha cäpawikhung-a aety pa be dy. Äni ma “Nang ce tea kai sa saite na mäny ö dy mei” näkha düng pa. 13Nang ce lä kai tea “Särae, Areng” näkha kähyng ö. Honi kätyng nang ce kähyng te lä tüngkhaw te vi. Kai lä honi dy. 14Kai lä nang ce üng Särae hai Areng la vi. Tukha nang ce üng äkho tea kai ma mäse te kätyng nang ma ce tingtawi la äkho aemäse hethang kae näpa. 15Nang ce tea kai sa te kätyng nang ma ce tingtawi sa hethang kae. Kai ma sa te kätyng nang ce kai üng könüng la ö.
16“Tängai ö, mawsawng lä äma üng areng qawng-a lengky te y. Angtawtha la mätaw saite ingkung qawng-a lengky te y lyng. 17Vaihi hini phüng nang ce mäny kha honi kätyng sa dylä Säthaw ma nang ce tea tähang kähawi py ai.
18“Nang ce angxynlyng phüng tea kai lä thui te y. Re pyng saite khimi na bung kai lä mäny vi. Tungaila Caekäcai thung-a awng te lä ‘Kai hai bö mangtä ca saite khimi lä kai tea äkho hai mäthui a’ näkha tärü saite kätyng tyng khaw vi ai” näpa. 19“Honi kätyng tyng te kätü-a Kai lä kai vi näte nang ce yng hethang tähang-a honi na tyng y te kälang-a, vaihi ma nang ce tea thui rüng te dy ba. 20Tängai ö. Kai ma mätaw saite bung mäkung saite khimi lä kai bung mäkung te by kae dy. Kai bung mäkung saite khimi na lä, kai bung mätaw saite Säthaw bung mäkung te by kae dy” näpa.
Isu bung a saite khimi
Mat 26:20-25; Mar 14:17-21; Luk 22:21-23
21Isu lä hini kätyng thui pyng ea bälung mätangca te tyng pa dy. Äni ma “Tängai ö. Nang ce thung üng lawngtä ma, kai bung täre na kö thung-a a vi ai” näkha cüngpra-a thui pa dy.
22Äkähui na lä äma ce tingtawi aekheng ö rü dy. Isu lä ämi phüng thui te mei näte äni ce lä mäny ö y. 23Isu ma bälung aevaw saite äkähui lawngtä lä äni üng äteng-a aety pa dy. 24Simon Peterae ma lä Isu ma bälung aevaw saite äkähui tea “Ämi phüng thui te mei” näte düng hethang sädi py pa.
25Tukha Honi äkähui lawngtä lä Isu tea aeneng kha “Areng ä, äni lä ämi mei” näkha düng pa.
26Isu lä “Täkaw kaehütä angfang thung-a sänung kha py saite lä äni dy” näkha näpa. Tupyng-a Isu lä Simon üng cäpaw Judae Iskriota tähang täkaw kaehütä ang thung-a sänung kha py pa dy. 27Honi täkaw tea Judae ma la pyng-a Setan angra lä äni tea kung praw pa vi dy. Isu ma “Judae ä, nang ma sa hethang ngai saite kärang-a sa lawi” näpa. 28Isu ma ätephüng-a Judae tea hini kätyng thui te mei näte bö aw saite äkähui na lä ämi lawngtä la mäny pa ö y. 29Judae Iskriota lä tangkae cawngkö süng saite khimi vi kha pawi tähang ngai saite na rang hethang, y dylä mätang saite khimi na tähang phawisae py hethang tähang-a, Isu ma älo py pa müng näkha äkähui na lä aedawng ö te vi.
30Tukha Judae Iskriota lä täkaw kaehütä la pyng-a, ärang-a tho praw pa vi dy. Honi kätü lä kärung thung-a vi.
Isu lä äma dü ai te phüng thui haile tyng pa
31Judae thoja pyng ea Isu ma “Vaihi ma Säthaw lä Kai, Khimi üng Cäpaw, lä phung-ang aetüng ai dy. Äni hai-a Säthaw üng phung-ang aetüng te dy. 32Säthaw lä Äcäpaw hai-a phung-ang aetüng te dylä, Säthaw ma khekhe Äcäpaw üng phung-ang kärang-a aetüng hai pa ai. 33Kai caw nade na ä, Kai lä nang ce hai tänaetä awng he kae dy. Nang ce lä Kai bung mäqang ö vi ai. ‘Kai ly saite mityng-a, nang ce lä ly haw y lyng’ näkha Judae mätawngky na tea thui te kätyng, vaihi nang ce tea la Kai ma thui te dy ba. 34Kai lä nang ce tea särilo kangthae py dy. Nang ma ce tingtawi bälung aevaw ö. Kai lä nang ce tea bälung aevaw te kätyng nang ma ce tingtawi lawng lawngtä tea bälung aevaw hethang kae. 35Nang ma ce tingtawi bälung aevaw dylä, khimi angxynlyng na ma nang ce lä Kai üng äkähui tätang na vi näte mäny ö ai mang” näpa.
Peterae lä aephae ai näte phüng thui rüng pa
Mat 26:31-35; Mar 14:17-31; Luk 22:31-34
36Simon Peterae ma “Areng ä, mani mityng-a ly ai mei” näkha düng pa.
Isu ma “Kai ly saite mityng-a nang lä vaihi hui haw y lyng. Khawngdüng-a lä, hui haw ai mang” näpa.
37Peterae ma “Areng ä, ätephüng-a vaihi kai lä hui haw y te vi mei. Areng nang tähang kai dü hethang awng rüng te dy” näkha näpa.
38Isu ma “Kai tähang nang lä dü hethang awng rüng dy mei. Tungaila aekhawng y te kälang-a, nang lä Kai bung qeng thungtä aephae vi ai” näkha näpa.
Currently Selected:
Johan 13: cekNT
Highlight
Share
Copy
Want to have your highlights saved across all your devices? Sign up or sign in
© 2017, Bible Society of Myanmar and Wycliffe Bible Translators, Inc
