Johan 12

Bethani vang-a Isu kho-a rimui tui kädi pa saite

Mat 26:6-13; Mar 14:3-9

1Cäqengja te Pawi tyng hethang käni tärutä ngai saite kätü-a, Isu lä Bethani vang-a tyng pa dy. Honi vang-a dü te üng Isu ma mäning haile tyng saite Lazarae lä awng by. 2Äni ce lä Isu tea kädüngbö mäcaw kha Matha ma bö ang aepaw pa dy. Isu hai bö ca te thung-a Lazarae la qa by. 3Tukha Maeri lä ävang ting phi saite rimui pilangtä süng kha ly pa. Honi rimui lä nadu näsaite üng sa te vi. Isu üng äkho-a honi rimui tui kälo kha äma üng äsang hai mai pa vi. Honi rimui tui üng ämui lä engthung khaw-a awng saite khimi angxynlyng na thai pa vi dy. 4Isu bung täre na kö-a a saite äkähui Judae Iskriota ma lä ngai pa y. 5Äni lä makäte phüng-a “Hini rimui lä phawisae cungvai thungtä-a, jaw kha dang saite phawisae lä mätang saite khimi na tähang py pa y te mei. Hini phawisae lä khimi lawngtä üng känitä sa kha dang saite ävang jetä vi” näkha näpa. 6Judae lä mätang saite khimi na tea bäheng kha thui te y. Äni lä theru te phüng-a, hini kätyng thui te kae. Äni lä tangkae cawngkö süng kha äma tähang kangru-a, mäsung te vi.

7Isu ma “Hini nawngmädi tea lä sakälö khü pa hang. Äni lä Kai bung aevui te kätü-a Kai tähang äni ma sa saite tea lä sädi dang ö sy. 8Mätang saite na lä nang ce hai mangtä awng jawjaw te kae. Kai lä nang ce hai mangtä awng jawjaw he y lyng” näpa.

Lazarae bung bädü hethang aeceng pa

9Bethani vang-a Isu tyng te thai kha Judae khimipui na lä, honi vang-a ly ö bawi dy. Äni ce lä Isu ma qaitä tea nung hethang ly ö te y. Isu ma mäning haile saite Lazarae bung la nung hethang ngai te phüng-a ly ö te kae vi. 10Tukätephüng-a mäthykung käleng na lä Lazarae bung la bädü hethang aeceng ö pa dy. 11Lazarae phüng-a Judae khimi kä-awng mang te na lä, mäthykung käleng bung khaisö kha Isu tea yng pa ö te phüng-a vi.

Isu Jerusalem märü-a kung pa

Mat 21:1-11; Mar 11:1-11; Luk 19:28-40

12Kädang pyng üng känitä-a lä, Cäqengja Pawi-a ly saite khimipui na lä Jerusalem märü-a Isu ly ai näte angthang thai ö vi dy. 13Äni ce lä cangrang cangpre na süng kha “Hosana näkha Säthaw tea bälaw ö si. Areng üng ämüng hai ly saite lawngtä tea Säthaw ma tähang kähawi py sy. Isrelae khimi na üng sanphrang lä tähang hawi te awng sy” näkha a ea Isu bung lady pa ö dy.

14Isu lä cäphö känawkhing käsa cäpi bung nung kha honi qawng-a aedang pa dy. Caekäcai ping thung-a hini kätyng tärü te awng vi.

15“Jerusalem märü üng khimi na ä#12:15 Zaion üng cänung ce ä, ri ö y ma.

Kheng kae-e, nang ce üng sanphrang lä

cäphö känawkhing käsa cäpi qawng-a aedang kha ly dy näkha awng.”

16Äkähui na lä honi kätü-a, hini phüng thaikaw ö pa y. Isu lä dü te üng aetha pyng-a phung-ang dang pyng ea lä, hini Caekäcai ping lä Isu phüng näte hai Isu tähang hini kätyng sa te mäny haile tyng ö dy.

17Tukha Isu ma Lazarae bung täprawng thung üng kähyng kha mätha haile tyng te kätü-a, awng saite khimipui na ma honi angthang lä aethang haidü vi dy. 18Honi cangxei saite kamarae sa te thai te phüng-a, khimipui na lä Isu tea lady hethang ly pa ö dy. 19Pharisai na ma “Kheng kae-e, mä-ai lä äte haetä la sakaw te y. Älawng üng khimi angxynlyng na lä äni leithung hui king ö vi dy” näkha äma ce tingtawi aethui ö dy.

Käri khimi ce ma Isu bung mäqang pa

20Jerusalem märü-a pawi sa te kätü-a, Säthaw tea cäphaw hethang Käri khimi phütä na ly by. 21Äni ce ma Kalile khö Besaida märü üng Philip tea ly ea “Särae ä, kai ce lä Isu bung nung hethang ngai” näkha näpa.

22Philip lä Andru tea ly kha hini phüng thui pa dy. Tupyng-a änini lä Isu tea ly hawi kha honi phüng na thui pa dy. 23Isu ma “Kai, Khimi üng Cäpaw, üng phung-ang aetüng hethang kätü lä tyng dy. 24Tängai ö. Caw mö lä älawng qawng-a aeqa ea aekaw y dylä mötä xyng awng he kae vi. Caw mö lä aekaw kha aepra dylä äthai awng mang-a aethai vi ai. 25Khimi lawngtä lä, äma üng hing saite tea bälung aevaw dylä äni lä pra vi ai. Hini älawng qawng-a, mä-ai ma üng hing te tea mäsai y saite na lä, dungtäsa hing saite dang ai. 26Kai üng mawsawng sa he ngai dylä kai leithung hui hethang kae. Kai awng te mityng-a lä kai üng mawsawng la awng by ai. Kai üng mawsawng na tea lä, Kai üng Pä-ai ma tämö mäsang vi ai.

Isu lä äma dü hethang phüng thui pa

27“Vaihi kai lä bälung mätangca te hai awng te vi. Kai lä ätemakä thui ai mei. ‘Ä-ai ä, Kai lä hini mätangca saite na kai tea tyng hai hang’ näkha thui ai mei. Kai lä hini mätangca saite na aeting hethang ly te kae. 28Pä-ai ä, nang üng ämüng lä phung-ang aetüng sy.”

Käni mang üng ätüng lä “Kai lä phung-ang aetüng te vi dy. Tupyng-a phung-ang lä aetüng be ai rawng” näkha thui pa.

29Honi mityng-a aedaw saite khimipui na lä ätüng thai kha phütä na ma lä “Khö bärü te tüng” näpa. Phütä na ma “Isu tea Säthaw üng angtawtha ma älo aepe te kae” näpa.

30Isu ma “Hini ätüng lä kai tähang y lyng. Nang ce tähang kae. 31Vaihi ma älawngpre üng khimi na tea tärae cei he kätü lä tyng te dy. Säthaw ma hini älawngpre tea pyng saite Setan angra bung lä mäthoja vi ai. 32Äni ce lä kai bung thinglang qawng-a bang ö vi ai. Tupyng-a khimi angxynlyng na bung kai ma tea ka vi ai” näpa. 33Hini kä thui te lä äma ätemakä dü ai mei näte phüng thui rüng pa te vi.

34Khimipui na ma “Mesia lä dungtäsa hing jaw ai näkha Ubädi lo thung-a awng. Tudylä Kai, Khimi üng Cäpaw, bung thinglang qawng-a täheng vi ai näkha nang lä makäte phüng-a thui haw te mei. Kai, Khimi üng Cäpaw, näte lä ämi mei” näkha düng pa.

35Isu ma “Äkaevang lä nang ce tea tänaetä awng ai. Nang ce tea käving ma bäja y hethang kaevang awng te thüng-a ly ö lawi. Käving-a ly saite nang lä nang ma mani mityng-a ly mei näte mäny y. 36Kaevang awng te thüng-a honi kaevang tea yng ö lawi. Tukä ea ni nang ce lä kaevang üng caw-a aelawng ö ai” näkha thui pa. Tupyng-a Isu lä tho kha khimi ce äma bung nung haw y saite mityng mang-a ly ja pa vi dy.

Khimi ce ma yng pa y

37Isu ma äni ce üng maw-a kamarae na awng mang-a sa pa vi dy. Tungaila äni ce lä Isu tea yng ö pa y vi rawng. 38Hini na lä buisaw Isaia thui te kätyng tyng khaw te dy. Äni ma

“Areng ä, kai ce üng thui saite angthang tea ämi ma yng mei.

Areng ma äni üng haidae ämi tea mätu mei” näkha nä vi.

39Khimi ce lä ätephüng-a yng haw y mei näte buisaw Isaia ma thui te vi.

40Äni lä “Säthaw ma äni ce üng ämi bäjö hai pa te vi.

Äni ce üng bälung la tangkö hai pa vi.

Tukätephüng-a äni ce üng ämi na la nung haw ö y.

Bälung hai la mäny haw y.

Äni ce üng naw saite na hawi hethang kai tea aekö haile tyng ö y” näpa.

41Isaia lä Isu üng phung-ang nung te phüng-a, äni phüng hini kätyng thui rüng pa te vi.

42Tungaila Judae mätawngky thung üng khimi awng mang saite na lä Isu tea yng ö dy. Äni ce lä Pharisai na ma, Judae na üng ingkäcai thung üng mätho ai näte ri te phüng-a, yng te phüng cüngpra-a thui ö vawng pa te y vi. 43Äni ce lä Säthaw ma bälaw te qawng-a, khimi ce üng bälaw saite tea ngaiky ö te phüng-a vi.

Isu ma khimipui na tea Kangkhüng üng thui te lo

44Tukha Isu ma “Kai tea yng te na lä kai ma qaitä tea yng te y. Kai bung mätaw saite Kung tea yng te by kae dy. 45Kai bung nung te na lä kai bung mätaw saite Kung tea nung te by kae dy. 46Kai tea yng saite angxynlyng na lä, käving thung-a awng y hethang kai lä kaevang-a aelawng kha älawng qawng-a cäqa te dy. 47Kai thui saite älo thai ea tängai y te khimi ce tea kai lä tärae cei he y. Älawngpre üng khimi na tea tärae cei hethang kai ly te y. Älawngpre üng khimi na bung aeqang hethang kai ly te kae.

48“Kai bung mäkung y kha älo tängai y saite khimi na tea tärae cei hethang lawngtä awng. Kai thui saite älo ma kangkhüng käni-a, äni tea tärae cei vi ai. 49Ätephüng-a mei nädylä kai lä kai ma üng aenae hai thui te y. Kai bung mätaw saite Pä-ai ma ätemakä angtu thui ai mei näte kai tea thui te vi. 50Pä-ai üng hini älosai phüng-a, khimi ce lä dungtäsa hing saite dang vi. Tukha kai thui saite lo lä, Pä-ai ma thui hai te vi” näkha ätüng käleng hai thui pa dy.

Currently Selected:

Johan 12: cekNT

Highlight

Copy