Johan 20

Isu lä aetha pa

Mat 28:1-8; Mar 16:1-8; Luk 24:1-12

1Käni säritä üng angcü üng käni kädang thawde khö aevang y te kätü-a, Makadala märü üng Maeri lä Isu üng täprawng täpu-a ly dy. Äni lä täprawng khaw üng kälung käleng aethuija te nung pa vi. 2Tukha Maeri lä Simon Peterae hai Isu ma bälung aevaw saite äkälang äkähui na tea aehui kha “Khimi ce ma Areng üng äro bung täprawng üng la ö ja vi dy. Äte ma mang-a khai mei näte mäny ö y” näkha näpa.

3Tukha Peterae lä äkälang äkähui hai täprawng täpu mang-a ly hawi dy. 4Änini lawng netä lä mangtä aehui hawi ngaila, äkälang äkähui lawngtä lä Peterae qawng-a täprawng-a tyng mang pa vi. 5Äni lä bü kha kheng ea lä, täprawng täpu thung-a, libyng käsa na awng sö te nung pa kae vi. Tungaila äni lä täprawng täpu thung-a kung pa y vi. 6Tupyng-a Simon Peterae lä äni üng leithung-a tyng ea täprawng täpu thung-a kung pa dy. Äni lä honi mityng-a, libyng na aetä-yng kha awng te nung pa kae vi dy. 7Isu üng älö-a bang saite sipry lä bälemy kha kälang-a khai ea libyng na lä kälang-a awng te nung pa vi. 8Tukha täprawng-a tyng mang saite äkälang äkähui la täprawng täpu thung-a kung dy. Nung kha yng pa by vi dy. 9Isu lä dü te üng aetha he kae näte Caekäcai-a tärü saite tea äni ce lä mäny ö y vi rawng. 10Tukha äkähui lawng netä ni lä ing-a vawi hawi kae dy.

Makadala märü üng Maeri tea Isu ma aetüng pa

Mat 28:9-10; Mar 9:11

11Maeri lä täprawng täpu ärang-a aedaw ea raw kha awng pa vi. Äni lä raw ea täprawng täpu thung-a kheng dy. 12Isu üng äro awng te mityng-a kanglung aekhu aena saite Säthaw üng angtawtha lawng netä bung nung pa vi. Lawngtä lä lötang-a aety kha äkälang lawngtä lä khotang mang-a aety kha awng. 13Känipre üng angtawtha lawng netä ma “Änang nawngmädi ä, ätephüng-a raw te vi mei” näkha düng pa hawi dy.

Tukha Maeri ma “Kai üng Areng äro bung lä khimi ce ma laja vi dy. Mani mityng-a khai ö mei näte kai lä mäny y vi” näpa.

14Hini kätyng thui pyng ea leithung-a aehawi ea lä Isu aedaw te tea Maeri lä nung ngaila, Isu bung mae pa y vi. 15Isu ma “Änang, nawngmädi ä, ätephüng-a raw te vi mei. Nang lä ämi bung mäqang te vi nang mei” näkha düng pa.

Tukha Maeri ma Isu tea angkhaw ty te kung käthi kha “Särae ä, Areng üng äro bung kälang mityng-a khai dylä, kai tea thui khü jo. Kai ma la ai mang” näpa.

16Isu lä “Maeri ä” näkha kähyng pa dy.

Tukha Maeri lä Isu te mang-a aehawi kha Hebärai lo hai “Raboni” näkha kähyng pa. (Raboni näte lä “Särae ä” näte by kae vi.)

17Isu ma “Kai tea aela hang. Kai lä Pä-ai tea tyng y te vi rawng. Kai üng äkähui na tea ly kha Kai üng ‘Pä-ai’ hai nang ce üng ‘Pä-ai’ kai üng ‘Säthaw’ hai nang ce üng ‘Säthaw’ tea kai lä ly ai näte phüng thui” näkha näpa dy.

18Makadala märü üng Maeri lä äkähui na tea ly kha äma Areng bung nung khe saite hai äni ma täru saite phüng na thui king pa vi dy.

Äkähui na tea Isu ma aetüng pa

Mat 28:16-20; Mar 16:14-18; Luk 24:36-49

19Äkähui na lä Judae mätawngky na tea ri te phüng-a Aehae te Käni kädang mang üng kädüng-a, engthung-a aekäcö kha kätho aekhaemy ea awng pa ö dy. Qengtäma Isu lä äni ce säla ung-a aedaw kha “Säthaw ma nang ce tea bälung awngneng saite py sy” näkha näpa. 20Hokä thui pyng ea äma üng äkö tämaw hai mäna tämaw na äkähui na tea mätü pa dy. Äkähui na lä Isu bung nung kha tengxyng y anghawtho ö pa vi dy. 21Tupyng-a Isu ma thui pa haile te lä “Nang ce tea awngneng te awng sy. Pä-ai ma kai bung mätaw te kätyng-a, nang ce bung la kai mätaw te vi dy” näkha näpa. 22Hokä thui pyng ea Isu lä äkähui na tea mö kha “Nang ce lä Muilaw Käcai bung bälung thung-a mäkung ö lawi. 23Nang ce ma khimi ce üng hunghö na bung bälawi dylä, Säthaw ma la äni ce üng hunghö bälawi vi ai. Nang ce lä khimi ce üng hunghö na bälawi y dylä, Säthaw ma äni ce üng hunghö bälawi y vi ai” näkha näpa.

Isu ni Thawmae

24Isu tyng te kätü-a, äkähui hawlai netä thung üng Didamu näsaite Thawmae lä äkähui na hai mangtä awng pa y vi. 25Isu üng äkälang äkähui na ma “Kai ce lä Areng bung nung vi dy” näkha Thawmae tea thui pa.

Thawmae ma “Isu üng äkö-a sengmu hai täheng te tämaw nung y, äni üng tämaw-a kai üng äköbäjung hai aela khe y, mäna üng tämaw-a äkö hai mäthang khe y dylä, kai lä yng haw y lyng” näpa.

26Tukha täbaitä qae ea äkähui na lä engthung-a aekäcö haile kha awng ö be dy. Honi kätü-a Thawmae la äni ce hai mangtä awng pa by dy. Kätho aekhaemy kha awng ö te vi. Tungaila Isu lä kung ea äni ce üng äsäla-a aedaw kha “Nang ce tea awngneng te tyng sy” näpa. 27Tupyng-a Thawmae tea “Nang üng köbäjung hai hini mityng-a mäthang e. Kai üng kö tea kheng e, nang üng kö hai kai üng mäna-a mäthang. Yng y käla awng hang lawi ba. Yng lawi” näkha näpa.

28Thawmae ma “Kai üng Areng, kai üng Säthaw” näkha näpa.

29Isu ma “Nang lä kai bung nung te phüng-a yng te kae vi. Kai bung nung y käla ma yng saite khimi na lä tähang hawi” näkha näpa.

Hini cae tärü te phüng

30Hini cae-u thung-a tärü y saite cangxei te kamarae äkälang na tea la, Isu lä äkähui na maw-a sa pa dy. 31Tungaila Isu ma Mesia lä Säthaw üng Cäpaw vi näte nang ce yng haw hethang hai hokä yng ea ni, Isu hai-a hing saite dang hethang tähang-a, hini na tea kai lä tärü te vi dy.

Currently Selected:

Johan 20: cekNT

Highlight

Copy