Johan 21

Isu lä äkähui lawng säritä tea aetüng pa

1Tupyng-a Isu lä Tiberi tuilipui teng-a äkähui na tea aetüng pa be dy. Aetüng te lä hini kätyng vi. 2Simon Peterae Didamu näsaite Thawmae, Kalile khö Kana märü üng Nathanela, Zebede üng cäpaw lawng netä hai äkälang äkähui lawng netä lä mangtä awng. 3Simon Peterae ma äni ce tea “Kai lä mawi ne ai” näkha näpa.

Äni ce ma “Kai ce la hui by ai” näpa. Tukha äni ce lä bälawng hai mawi la te ly ö dy. Tungaila kärung rungtaw mawi ne te lä dang pa ö y vi. 4Kädang thawde-a Isu lä mepui-a aedaw kha awng pa. Tungaila äkähui na lä Isu näte mae pa ö y.

5Isu ma “Rawijae na ä, mawi dang ö mei” näkha düng pa.

Äni ce ma “Dang y vi” näpa.

6Isu ma “Nang ce lä bälawng üng bangtang mang-a bälo hai heng ö by ä, mawi dang ai mang” näpa. Thui te kätyng-a äni ce ma bälo heng ea lä, mawi awng mang pa te phüng-a bälo bung re haw ö pa y vi dy.

7Tukha Isu ma bälung aevaw saite äkähui lä “Mä-ai üng Areng vi” näkha Simon Peterae tea thui pa. Hini lo thai ea Peterae lä nitha aetäkei kha tuilipui thung-a säly jaw pa dy. 8Äkälang äkähui na lä mawi awng mang saite bälo bung re kha bälawng hai hui pa ö dy. Äni ce lä mepui hai hanglaw bärai y, lang rui bangawtä tingtang awng. 9Äni ce lä mepui-a tyng ea mai ae-e-a bädang saite mawi hai täkaw bung nung ö vi. 10Isu ma “Nang ce üng vaihi dang saite mawi phütä nähai ö e” näpa.

11Simon Peterae lä bälawng qawng-a paw ea mawi käleng na kawipy saite bälo bung mepui qawng-a re pa dy. Mawi me cungvaitä hai rui bangaw thungtä aemang ngaila, bälo lä aesä-ei pa y vi rawng. 12Isu ma “Ly kha kädang bö ca ö lawi” näkha äni ce tea thui pa. Äkähui na lä ämi lawngtä la “Nang lä ämi mei” näkha düng vawng ö pa y. Äma ce lä Areng näte mäny ö vi. 13Isu lä ly kha täkaw hai mawi la ea äni ce tea py pa.

14Isu lä dü te üng aetha pyng ea, äkähui na tea aetüng pa te lä qeng ämäthung dy.

Isu ni Peterae

15Äkähui na ca pyng ea Isu ma “Johan üng cäpaw Simon ä, äni ce ma kai tea bälung aevaw te qawng-a nang lä bälung aevawky cäkae mei” näkha Simon Peterae tea düng pa.

Simon ma “Tüng cäkae Areng ä, nang tea kai bälung aevaw näte nang lä mäny dy” näpa.

Tupyng-a Isu ma Peterae tea “Kai üng beram caw na tea mäcaw ba” näkha näpa.

16Tupyng-a Isu ma “Johan üng cäpaw Simon ä, nang lä kai tea bälung aevaw cäkae mei” näkha düng haile pa dy.

Peterae ma “Tüng cäkae. Areng ä, nang tea bälung aevaw näte nang lä mäny dy be” näpa.

Tukha Isu ma “Kai üng beram na tea rui pa ba” näkha näpa. 17Isu lä “Johan üng cäpaw Simon ä, nang lä kai tea bälung aevaw mei” näkha ämäthung düng pa be dy.

Tukä qengthungtä düng pyng-a Peterae lä bälung naw kha “Areng ä, Nang lä äte cawngkhang na mäny bawi te kae be. Nang tea bälung aevaw näte nang ma mäny dy be” näpa.

Isu ma “Kai üng beram na bung mäcaw ba.

18“Tängai ba. Nang lä nade thüng-a khabai angkeng-a aemäkhing kha ngai saite mityng-a ly dy. Mätawng ea lä nang üng äkö pang netä bäjae kha khimi kälang na ma nang bung mäkhing pyng-a, nang ly hethang ngai y saite mityng-a nähai vi ai” näpa. 19(Isu ma hini kätyng thui pa te lä, Peterae lä Säthaw üng phung-ang aetüng hai hethang ätemakä sa kha dü ai mei näte phüng thui rüng pa te vi.) Tupyng-a Isu ma Peterae tea “Kai leithung hui lawi” näkha näpa.

Isu hai äkälang äkähui na

20Peterae lä leithung mang-a aehawi te kätü-a, äni üng leithung-a Isu ma bälung aevaw saite äkähui bung nung dy. Äni lä kädüngbö ca ea Isu üng äteng-a aety saite äkähui lawngtä ma “Areng ä, nang bung ämi ma täre na kö thung-a, a hethang mei” näkha düng pa. 21Peterae lä honi äkähui na bung nung kha “Areng ä, hini lä makä awng ai mei” näkha düng pa.

22Isu ma “Kai cäqa haile tyng te khytä, äni tea hing hethang kai ngai hai dylä, nang üng aely y lyng. Nang lä kai leithung-a hui lawi” näkha näpa.

23Honi älo phüng-a, “Honi äkähui dü hethang y dy” näkha thui rungrang saite angthang lä äkähui na säla-a aethangdü pa vi dy. Tungaila Isu lä “Hini äkähui lä dü y dy” näkha thui te y “Kai cäqa haile te kätü khytä, äni tea hing hai hethang kai ngai dylä nang üng aely y lyng” näkha thui te kae.

24Hini phüng na thui saite hai tärü saite kung lä hini äkähui vi. Äni üng thui saite hini lo lä tüngkhaw te kai ce lä mäny ö te vi.

Kangkhüng üng älo

25Isu ma sa saite phüng äkälang na la awng mang te vi rawng. Honi angxynlyng na tärü king dylä, cae-u na khai hethang hini älawngpre-a mityng awng he y lyng näte kai lä aepö vi.

Currently Selected:

Johan 21: cekNT

Highlight

Copy