Johan 7

Isu hai äkangby na

1Tupyng-a Isu lä Kalile khö-a khölawng tho dy. Judae mätawngky na lä äni bung bädü hethang aeceng ö pa te phüng-a Judae khö-a khölawng tho hethang ngai pa y. 2Tukha Judae na üng Taipung pawi lä aenai dy.#7:2 Taipung näte lä Säthaw ma khimi ce tea säningtä-a qengtä honi Taipung-a käni täjaetä awng hai vi. Honi Pawi lä Säthaw ma Ikuta pre üng Isrelae khimi na bung nähai kha daithung üng Taipung-a awng te sädi dang hethang pawi sa te vi. 3Äkangby na ma Isu tea “Nang sa saite kamarae äkähui na nung hethang hini mityng üng tho kha Judae khö-a ly lawi. 4Khimi lawngtä ämüng aethang he ngai dylä kangru-a sa y. Nang lä hini cangxei saite sa dylä nang üng phüng älawngpre bawi ma mäny rung khytä sa by ä” näpa. 5Äkangby na mäteng ma Isu tea yng pa ö y.

6Isu ma “Kai ly hethang aesyng te kätü tyng te y rawng. Nang ce lä mani kätü-a la ly hethang dang jawjaw. 7Älawngpre üng khimi na lä nang ce tea esäre haw y. Kai tea esäre ö te vi. Honi kätyng esäre te lä kai ma äni ce sa saite kähawi y na phüng thui pa te phüng-a vi. 8Hini pawi-a nang ce lä ly ö. Kai ly hethang aesyng te kätü lä tyng y te phüng-a ly y rawng lyng” näkha näpa. 9Tukä thui pyng ea Isu lä Kalile khö-a awng.

Taipung pawi-a Isu ly te

10Honi pawi-a äkangby na ly pyng ea Isu la kangru-a ly by dy. 11Judae mätawngky na lä honi pawi-a Isu bung mäqang kha “Äni lä ma-a awng mei” näkha düng pa ö dy.

12Khimipui na lä Isu phüng aemäcü ö dy. Khimi phütä na lä “Äni lä khimi kähawi kae” näkha näpa. Phütä na ma “Äni lä khimi ce bung lolang tämang hai te vi” näkha näpa. 13Tungaila Judae mätawngky na tea ri te phüng-a Isu üng phüng ämi la cüngpra-a thui pa ö vawng y.

14Pawi käni kaehütä tyng ea Isu lä Säthaw üng Ingkäcai-a ly kha älo angtu thui pa dy. 15Judae mätawngky na lä cangxei phi te hai “Hini khimi lä cae aetu vai y käla ma ätemakä sa kha hini kätyng kaw te mei” näkha thui pa ö dy.

16Isu ma “Kai üng mätu saite lä kai ma te üng y. Kai bung mätaw saite Säthaw te üng angtu lo kae. 17Khimi lawngtä ma Säthaw üng aely kängai sa he ngai dylä kai mätu te lä Säthaw te mang üng mei, kai ma üng mei näte äni mäny ai. 18Mä-ai ma üng aely kängai hai thui saite khimi lä mä-ai ma phung-ang dang he ngai te kae vi. Tungaila äma bung mätaw te Kung üng phung-ang tähang aethawsa saite khimi lä mitang khü vi. Äni lä älo kaeling thuikaw y lyng. 19Mosi ma nang ce tähang Ubädi py pyng te vi dy. Tungaila nang ce thung üng ämi lawngtä la honi Ubädi bäjui ö te y. Nang ce lä ätephüng-a kai bung bädü hethang aethawsa ö te vi mei” näkha näpa.

20Khimipui na ma “Nang la angra kung te vi. Nang bung bädü hethang aethawsa te lä ämi mei” näpa.

21Isu ma “Kai kamarae haetä sa tea nang angxynlyng lä cangxei ö bawi te vi. 22Mosi ma nang ce üng nawngmäcaw nade na bung lengkhüng täke hethang losai py. Tätang khü-a hini lengkhüng täke he reitae lä Mosi ma aetawng te y, nang ce üng kangsi na ma aetawng te kae vi. Nang ce la Aehae te Käni-a lengkhüng täke ö vi.#7:22 Judae na üng reitae kätyng nawngmäcaw aepeng pyng te käni täjae tyng ea honi käni lä aehae te käni hai aepy ngaila lengkhüng täke ö vi. 23Mosi üng Ubädi täphra y hethang tähang-a Aehae saite Käni-a lengkhüng täke vi dylä Kai ma khimi lawngtä bung Aehae te Käni-a känaw käsaw hawi sa pa te phüng-a, nang ce lä makä sa kha kädawtho ö te vi mei. 24Khimi üng mimai tea kheng kha tärae cei ö hang. Tätang khü-a tärae cei ö” näkha näpa.

Isu lä Mesia mei näkha aedüng ö

25Jerusalem märü üng khimi phütä na ma “Isu bung Judae mätawngky na ma bädü hethang aethawsa te y mei. 26Kheng e, äni lä khimipui tea älo angtu thui kha awng dy. Ämi lawngtä la äni tea mäkhang y vi mei. Äni lä Mesia vi näte mä-ai üng mätawngky na lä mäny ö by cämei. 27Tungaila Äni lä mamang üng ly mei näte mä-ai lä mäny te vi. Mesia ly saite kätü-a lä Äni üng awng saite mityng ämi la mäny y lyng” näpa.

28Isu lä Säthaw üng Ingkäcai-a älo angtu thui kha awng ea “Nang ce lä Kai bung mäny ö te vi. Kai mani mang üng ly te mei näte la nang ce mäny ö te vi. Tungaila Kai lä Kai ma üng aenae hai-a ly te y. Kai bung mätaw saite Kung lä mitang khü vi. Äni bung lä nang ce mäny ö y lyng. 29Kai lä Äni te üng ly kha Äni ma Kai bung mätaw te phüng-a Äni bung mäny te vi” näkha ätüng käleng hai thui pa dy.

30Honi kätü-a khimi ce lä Isu bung ne hethang aethawsa ngaila Äni bung ne hethang kätü lä tyng pa y te phüng-a, ämi ma la ne haw y. 31Tungaila khimipui na thung üng khimi kä-awng mang na lä Isu tea yng ö te vi. Äni ce ma “Mesia cäqa te kätü-a lä Isu ma sa saite kamarae qawng-a cang y sa ai mei” näkha näpa.

Isu bung ne hethang reisae na bung mätaw pa

32Tukha Isu phüng-a khimi ce lä aemäcü te Pharisai na lä thai ö dy. Tukätephüng-a mäthykung käleng na lä Isu bung ne hethang reisae na bung mätaw pa ö dy. 33Isu ma khimi ce tea “Kai lä nang ce hai tänaetä awng te kae. Tupyng-a kai ma bung mätaw saite Kung tea vawi haile vi ai. 34Nang ce lä Kai bung mäqang ngaila aeting haw y lyng. Kai ly saite mityng-a nang ce lä ly haw y lyng” näkha näpa.

35Judae mätawngky na ma “Mä-ai ce mäqang ea aeting y hethang mani mityng-a ämi la ly vi ai nang mei. Judae khimi na awng saite Käri märü-a ly kha äni ce tea älo angtu thui hethang vi nang mei. 36Äni ma ‘Nang ce lä Kai bung mäqang ngaila aeting y lyng. Kai ly saite mityng-a nang ce ly haw y lyng. Hini kä äni thui te la ätemakä näte vi nang mei’ näkha äma ce tingtawi aedüng aethui ö dy.”

Isu ma kähing py te vawcawng phüng thui pa

37Honi Pawi üng aely kälengky te kangkhüng üng käni-a Isu lä aedaw kha “Tui aehe saite khimi na lä Kai tea ly kha nei ö sy. 38Kai tea yng saite khimi lä Caekäcai thung-a tärü te kätyng lawng vi ai. ‘Äni üng bälung thung-a lä kähing py te vawcawng tui lawng te vi dy’” näkha ätüng käleng hai thui pa dy. 39Isu lä äma tea yng saite khimi na dang hethang Muilaw Käcai phüng thui pa dy. Honi kätü-a Säthaw lä Muilaw Käcai bung khimi ce tähang py pa te y vi rawng. Ätephüng-a mei nädylä Isu lä phung-ang dang te y vi rawng.

Khimi ce bälung aedü pa y

40Khimi phütä na lä Isu üng älo thai kha “Äni lä buisaw tätang vi” näpa.

41Phütä na ma “Äni lä Mesia vi” näkha thui pa.

Phütä na ma lä “Mesia lä Kalile khö üng khimi vi nang mei. 42Caekäcai thung-a lä Mesia lä Davidae ceng thung üng vi. Davidae awng saite Bethlehem märü-a aepeng ai näkha awng te vi” näpa 43Tukha Isu phüng-a khimi ce lä bälung aedü ö y pa vi dy. 44Khimi phütä na lä Isu bung ne hethang ngai ö dy. Tungaila ämi la ne vawng y vi.

Judae mätawngky na lä yng ö y

45Kangkhüng-a lä Säthaw üng Ingkäcai tea rui saite reisae na lä ly haile ö dy. Mäthykung käleng hai Pharisai na ma “Ätephüng-a äni bung nähai y te mei” näkha düng pa ö dy.

46Tukha reisae na ma “Hini Khimi thui te kätyng ämi la thui vai te y vi” näkha näpa.

47Pharisai na ma “Nang ce la Äni üng the te thung-a qa ö te vi dy mei. 48Mä-ai üng mätawngky hai Pharisai na thung-a ämi la Äni tea yng te awng y. 49Khimipui na lä Mosi te mang py saite Ubädi mäny ö te y vi. Äni ce lä Säthaw üng tähang käsi dang ö te dy” näkha näpa.

50Äni ce thung-a Nikodima lä qa te by vi. Äni lä jangni-a Isu tea ly vai te vi. 51Nikodima ma “Mä-ai lä äni äte sa tämang mei näte la düng vai te y. Äni tea älo düng te awng y käla ma dengpy te lä mä-ai üng Ubädi hai-a aebäla mang mei” näpa.

52Äni ce ma “Nang lä Kalile khimi by vi nang mei. Caekäcai thung-a kheng kae-e. Kalile khö üng buisaw lawngtä la tho y näte nang mäny vai mei” näpa. 53Tupyng-a khimi qütä lä äma ce ing-a vawi ö king dy.

Currently Selected:

Johan 7: cekNT

Highlight

Copy