Johan 8

Änawngpaw y saite nawngmäcaw hai i te nawngmädi

1Isu lä Olive kung na awng saite me anghung-a ly dy. 2Kädang thawde-a Säthaw üng Ingkäcai-a ly ea khimipui na lä äni tea aekäcö pa ö vi. Isu lä aety kha äni ce tea älo mätu pa vi. 3Ubädi särae hai Pharisai na lä nawngmädi lawngtä bung äni tea nähai pa ö vi. Khimi ce ma äni lä änawngpaw y saite nawngmäcaw hai täkübäjang sa saite nung ea ne kha khimi ce maw-a aedaw hai pa dy. 4Äni ce ma “Särae ä, hini nawngmädi lä änawngpaw y saite nawngmäcaw hai täkübäjang sa te kai ce nung kha ne te vi. 5Mosi üng Ubädi thung-a hini nawngmädi bung lä kälung hai käde kha bädü he kae näkha awng. Vaihi nang lä ätemakä thui ai mei” näkha düng pa. 6Äni ce lä Isu tea käsi nung hethang ngai te phüng-a hini kätyng düng pa lükae te vi. Tukha Isu lä bü ea älawng qawng-a äköbäjung hai cae tärü kha awng pa dy.

7Äni ce lä Isu tea älo düng haile ö pa be dy. Tukha Isu lä thyngdyng ea kheng kha “Nang ce thung-a hunghö awng y saite khimi lä angcü-a ma äni tea kälung hai käde mang” näpa. 8Tupyng-a äni lä bü kha älawng qawng-a äköbäjung hai cae tärü haile kha awng pa tyng be dy. 9Äni ce lä Isu üng älo thui te thai ea khösäning kälengky üng hai aetawng kha cäpiky sengtä lawngtä pyng-a lawngtä tho ö king pa vi dy. Tukha Isu lä äma qaitä awng kha nawngmädi la äni üng maw-a aedaw kha awng. 10Isu lä thyngdyng kha kheng ea “Nawngmädi ä, äni ce lä ma-a dy mei. Nang tea dengpy hethang ämi la awng y vi dy mei” näkha düng pa.

11Nawngmädi ma “Areng ä, ämi lawngtä la awng y vi dy” näkha näpa.

Isu ma “Kai la nang üng hunghö phüng-a dengpy y lyng. Ly lawi mai cü. Hunghö sa vi hang lawi ba” näkha näpa.

Isu lä älawng khimi ce tähang kaevang

12Tukha Isu ma khimipui na tea “Kai lä älawngpre khimi ce üng kaevang vi. Kai leithung hui saite na lä manila käving thung-a ly y dy lyng. Äni ce lä kähing py saite kaevang dang ö vi ai” näkha näpa.

13Pharisai na ma “Nang lä Nang ma üng phüng thui te vi. Tukha Nang üng thui saite lä ämi la yng he ngai y” näpa.

14Isu ma “Kai lä Kai ma üng phüng thui te vi. Tungaila Kai üng thui te lo yng hethang kae. Ätephüng-a mei nädylä Kai lä mani mityng üng ly te mei, mani mityng-a vawi ai mei näte mäny te vi. Tungaila nang ce lä Kai mani mityng üng ly te mei, mani mityng-a vawi ai mei näte mäny ö te y. 15Nang ce lä khimi ce üng kaedawng hai-a tärae cei ö te kae vi. Kai lä ämi tea la tärae cei vai te y. 16Tungaila Kai tärae cei si nädylä Kai üng sa te lä tüng khaw vi. Ätephüng-a mei nädylä kai lä kai ma qaitä y. Kai bung mätaw saite Pä-ai hai mangtä awng te phüng-a vi. 17Nang üng Ubädi thung-a tärü te lä ‘Ätete lo tho saite khimi lawng netä bälung aedü dylä äni lo lä tüng khaw vi’ näkha awng vi. 18Kai lä Kai ma üng phüng thui te lawngtä kha Kai bung mätaw saite Pä-ai lä Kai phüng thui saite äkälang lawngtä vi” näkha näpa.

19Äni ce ma “Nang üng Pä-ai lä ma-a awng te vi nang mei” näkha düng pa.

Isu ma lä “Kai hai Kai üng Pä-ai bung nang ce lä mäny ö te y. Nang ce lä Kai bung mäny dylä Pä-ai bung la mäny ö vi ai” näpa.

20Isu lä Säthaw üng Ingkäcai thung-a thawlawng bung awng saite teng-a mätu ea hini lo thui te vi. Tungaila äni bung ne hethang kätü tyng y rawng te phüng-a, ämi la Isu bung ne pa y rawng.

Kai ly saite mityng-a nang ce lä hui haw y lyng

21Tupyng-a Isu ma “Kai lä ly ja hethang kae te vi. Nang ce lä kai bung mäqang ö vi ai. Tungaila nang ce lä nang ma ce üng hunghö hai-a dü ö vi ai. Kai ly saite mityng-a nang ce lä ly haw ö y lyng” näkha thui pa haile vi.

22Judae mätawngky na ma “‘Kai ly saite mityng-a nang ce lä ly haw y lyng’ nä vi to. Äni lä äma tea äma ma aebädü hethang thui te vi nang mei” näkha düng ö dy.

23Isu ma “Nang ce lä hini älawngpre hai aesui saite khimi na vi. Kai lä äqawng mang üng ly te vi. Nang ce lä hini älawngpre üng khimi na vi. Kai lä hini älawngpre üng y vi. 24Tukha nang ce lä nang ma ce üng hunghö hai-a dü ö vi ai näte Kai ma nang ce tea thui vai te vi dy. Kai lä Kai ma thui mäcai saite Kung lawngtä khekhe näte nang ce yng y dylä nang ma ce üng hunghö hai-a nang ce lä dü ö tätang vi ai” näpa.

25Äni ce ma “Nang lä ämi vi nang mei” näkha düng pa.

Isu ma äni ce tea “Kai lä ämi mei näte angcü-a ma kai thui pyng te vi dy be. 26Nang ce üng phüng kai lä thui hethang hai nang ce tea tärae cei hethang awng mang te vi. Kai bung mätaw saite Kung lä mitang khü vi. Äni te üng thai saite älo ni Kai lä älawng khimi ce tea thui te kae vi” näkha näpa.

27Isu ma Pä-ai üng phüng thui te tea äni ce lä thaikaw pa ö te y vi. 28Tukha Isu ma “Nang ce lä Kai, Khimi üng Cäpaw, bung thinglang qawng-a bang saite kätü-a, Kai lä ämi mei näte nang ce mäny ö ai. Kai ma üng aely ngai te kätyng äte haetä la sa te y kha Pä-ai ma mätu te kätyng älo thui te kae vi näte nang ce lä mäny ö ai mang. 29Kai bung mätaw saite Kung lä Kai hai mangtä awng te vi. Äni üng aely kängai-a Kai lä sa jawjaw pa te phüng-a Äni lä Kai bung khaisö te y vi” näkha näpa.

30Isu ma hini älo na thui te thai saite khimi kä-awng mang na lä Isu tea yng ö dy.

Abraham üng caw na

31Isu lä äma tea yng saite Judae khimi na tea “Nang ce lä kai thui te kätyng sa ö dylä kai üng äkähui tätang na vi dy. 32Säthaw üng phüng tätang nang ce mäny ö te phüng-a honi ma nang ce bung aelawi hai pa vi ai mang” näkha näpa.

33Äni ce ma “Kai ce lä Abraham üng kaesui na vi. Manila ämi üng mawsawng tangnae sa kha awng vai ö te y. Nang lä ätephüng-a ‘Kai ce tea aelawi ö vi ai mang’ näte vi mei” näkha düng pa ö dy.

34Isu ma “Tängai ö, hunghö sa saite na lä hunghö üng mawsawng tangnae na vi dy. 35Mawsawng lä engthung haetä-a awng jaw te y vi. Äcäpaw ni ingthung haetä-a awng jawjaw te kae vi. 36Kai, Äcäpaw, ma nang ce bung bälawi dylä tätang khaw-a nang ce aelawi ö vi ai. 37Nang ce lä Abraham üng kaesui na näte kai lä mäny. Tungaila nang ce lä Kai üng älo thui saite tea tängai y te phüng-a, Kai bung bädü he ngai ö te vi. 38Kai lä Pä-ai te mang üng nung saite na phüng nang ce tea thui te kae. Nang ce lä nang ma ce üng pä-ai ma thui te kätyng sa ö te vi” näpa.

39Äni ce ma “Kai ce üng pä-ai lä Abraham vi” näkha näpa.

Isu ma “Nang ce lä Abraham üng caw na tätang nädylä Abraham kätyng-a sa hethang kae” näpa. 40“Säthaw te mang üng älo mitang kai lä nang ce tea thui dy. Tungaila kai bung bädü hethang nang ce lä aethawsa ö te vi. Abraham lä hini kätyng sa te y lyng. 41Nang ce lä nang ma ce üng pä-ai sa te kätyng-a sa ö te vi” näpa.

Äni ce ma “Kai ce lä täkü bäjang caw y. Kai ce üng Pä-ai lä Säthaw lawngtä ni awng te kae be” näpa.

42Isu ma “Säthaw lä nang ce üng Pä-ai vi dylä nang ce lä Kai tea bälung aevaw ö vi ai. Kai lä Säthaw te mang üng ly kha vaihi hi-a awng te kae be. Kai ma üng aely ngai te kätyng-a ly te y lyng. Säthaw ma Kai bung mätaw te kae vi. 43Ätephüng-a Kai thui saite lo nang ce lä thaikaw ö y te vi mei. Kai thui saite älo nang ce lä thai he ngai y te phüng-a vi. 44Nang ce üng pä-ai lä Setan angra kae vi. Tukha nang ce pä-ai üng aely kängai kätyng nang ce lä sa hethang aethawsa ö te vi. Setan angra lä angcü üng hai ma khimi bädü te kae vi. Äni tea älo mitang lä awng te y vi kha älo kaeling thui te lä äma üng rawraw kae vi. Äni lä khimi älo kaeling na üng pä-ai kae vi. 45Kai lä älo mitang khü thui te phüng-a, nang ce lä Kai tea yng ö y. 46Kai lä hunghö sa te vi näte nang ce thung üng khimi lawngtä ma mätü haw ai mei. Kai älo mitang thui te dylä, nang ce lä ätephüng-a yng ö y te vi mei. 47Säthaw te mang üng ly saite Kung lä Äni üng älo tea tängai te vi. Tungaila nang ce lä Säthaw te mang üng ly y te phüng-a, älo aetängai ö y te vi” näkha näpa.

Isu ni Abraham

48Judae khimi na ma “Nang lä Samari khimi hai angra kung saite khimi vi näkha kai ce ma thui te lä tüngkhaw vi” näpa.

49Isu ma “Kai lä angra kung saite khimi y lyng. Kai lä Pä-ai tea tämö khai saite Kung kae. Tungaila nang ce lä Kai tea tämö khai y saite khimi na kae vi. 50Kai la Kai ma üng phung-ang leng hethang aethawsa te y. Kai üng phung-ang tähang sa saite Kung lawngtä awng vi. Äni lä tärae cei te Kung vi. 51Tängai ö, Kai üng lo tängai saite na lä manila dü y ai dy” näkha näpa.

52Judae khimi na ma “Nang tea angra kung vi näte kai ce lä vaihi mäny khe dy. Abraham hai buisaw na lä dü king te vi dy be. Nang lä ‘Kai üng lo tängai saite na la manila dü be y ai dy’ näkha näte vi mei. 53Nang lä kai ce üng kangsi Abraham qawng-a haidae lengky hethang aepö mei. Abraham hai buisaw na la dü king te vi dy. Nang lä nang ma tea makäti khimi käthi te vi mei” näkha düng pa.

54Isu ma “Kai lä Kai ma tea tämö khai te kae dylä, Kai üng tämö khai saite lä aetütü kae dy. Kai üng Pä-ai lä Kai tea tämö khai te vi. Äni tea nang ce üng Säthaw näkha nä ö te vi. 55Nang ce lä äni tea mäny ö y ngaila Kai lä mäny vi. Kai lä äni tea mäny y näkha thui dylä Kai lä nang ce kätyng kaeling lo thui saite by kae dy. Kai la Pä-ai bung mäny kha äni üng lo tängai saite kung vi. 56Nang ce üng pä-ai Abraham lä Kai tyng te käni nung ai näte phüng aedawng kha kawngphi te vi. Kai tyng saite käni tea äni lä nung khe kha kawngphi te vi” näkha näpa.

57Judae na ma “Nang lä säning rui bangtä la awng te y rawng be. Ätemakä sa kha Abraham bung nung te vi mei” näkha düng pa.

58Isu ma “Tängai ö, Abraham aepeng y te kälang-a ma, Kai lä awng pyng te vi dy” näkha näpa.

59Honi kätü-a äni ce lä Isu tea käthu hethang kälung na aekhü ö pa vi dy. Tungaila Isu lä kangru-a aeho kha Säthaw üng Ingkäcai thung üng thoja pa vi dy.

Currently Selected:

Johan 8: cekNT

Highlight

Copy