Johan 9
9
Mikangjö üng ämi aevang hai pa
1Isu lä aeke kha awng tea aepeng te üng hai ma ämi bäjö saite khimi lawngtä bung nung pa vi. 2Äkähui na ma “Särae ä, hini khimi üng ämi bäjö te lä äma üng hunghö phüng-a mei. Änä-awi ni äpä-ai üng hunghö phüng-a mei” näkha düng pa.
3Isu ma “Äma üng hunghö phüng-a y. Änä-awi ni äpä-ai üng hunghö phüng-a la y lyng. Äni üng ämi bäjö te lä Säthaw üng phung-ang äni hai-a aetüng hai te kae ecy. 4Käni aevang saite kätü-a kai bung mätaw saite Säthaw üng kälu mä-ai ce lä sa hethang kae te vi. Ämi lawngtä lä kälu sa he dang y te käving lä tyng vi ai. 5Kai lä älawng qawng-a awng te thüng-a älawngpre khimi ce üng kaevang vi” näkha näpa.
6Älo thui pyng-a Isu lä älawng-a mäce mäthui kha älawng ngang hai angqo sa pa vi. Tukha mikangjö khimi üng ämi-a angqo hai kälo pa dy. 7Tukha Isu ma “Ly kha Silawm tuikang-a ämi aelae jaw cü” näpa. (Silawm näte lä mätaw te näte vi.) Tupyng-a honi khimi lä ly kha ämi aelae pang ea lä ämi lä aevang pa vi dy. Tukha äni lä ämi aevang kha ing-a tyng pa dy.
8Äni lä jangni-a phawisae mäkai kha ca nei saite khimi näte ingdawngpa na hai äni bung nung vai saite na lä mäny ö te phüng-a äni ce ma “Äni lä aety kha phawisae mäkai saite khimi y mei” näkha näpa.
9Khimi phütä na ma “Äni khaw be ä.” Phütä na ma lä “äni hai aetawng saite khimi kae müng” näpa.
Tukha äni ma “Kai lä nang ce thui saite khimi dy” näpa.
10Khimi ce ma “Nang lä makä sa kha ämi aevang te mei” näkha düng pa.
11Äni ma “‘Isu’ näsaite khimi ma angqo sa kha kai üng ämi-a kälo te vi. Äni ma kai bung Silawm tuikang-a ämi aelae hai vi. Tukha kai ly kha ämi aelae pyng ea lä ämi aevang vi dy” näkha thui pa dy.
12Khimi ce ma “Honi khimi lä ma-a awng mei” näkha düng pa.
Tukha mikangjö vai saite ma “Kai lä mäny y” näkha näpa.
Pharisai na ma ämi aevang saite khimi tea düng pa
13Khimi ce lä ämi bäjö vai saite khimi bung Pharisai na tea nähai pa ö dy. 14Isu ma äni üng ämi-a angqo sa kha kälo ea ämi aevang te käni lä Aehae te Käni vi. 15Pharisai na lä äni tea makä sa kha ämi aevang te mei näte phüng düng pa dy. Tukha äni ma “Kai üng ämi-a angqo sa kha kälo pyng-a kai lä tui hai ämi aelae pyng-a ämi lä aevang dy” näpa.
16Pharisai phütä na ma “Hini kä sa te lä Aehae te Käni üng Ubädi tea bäjui te y. Tukätephüng-a äni la Säthaw te mang üng mätaw saite Khimi y” näpa.
Phütä na ma “Hunghö awng te khimi lä ätemakä hini cangxei te na sa haw ai mei” näkha näpa. Tukha äni ce lä lawngtä hai lawngtä bälung aedü ö pa y vi dy.
17Pharisai na lä ämi bäjö vai saite khimi tea “Nang tea ämi aevang hai saite khimi phüng makä aedawng mei” näkha düng haile pa.
Äni ma “Buisaw vi” näkha näpa dy.
18Judae mätawngky na lä hini khimi jangni-a ämi bäjö kha vaihi ämi aevang saite tea yng y te hai ma änä-awi ni äpä-ai tea kähyng pa dy. 19Äni ce ma “Hini lä nang ni üng cäpaw mei. Nang ce thui te kätyng äni lä aepeng te üng hai ma ämi bäjö te vi mei. Tudylä ätemakä sa kha vaihi äni ämi aevang te vi mei” näkha düng pa.
20Änä-awi ni äpä-ai ma “Äni lä kai ni üng cäpaw tätang cäkae. Aepeng te hai ma äni lä ämi bäjö tätang te vi. 21Tungaila ätemakä sa kha vaihi ämi aevang te mei näte kai ni la mäny hawi y. Äni tea ämi ma ämi aevang hai mei näte la kai ni lä mäny y. Äni tea phai düng ö. Äni lä särai dy. Äni üng phüng lä äma ma thui ai mang” näkha näpa. 22Hini kätyng-a änä-awi ni äpä-ai thui te lä Judae mätawngky na tea ri te phüng-a vi. Khimi lawngtä ma Isu lä Mesia vi näkha älo aepho vi dylä äni bung Judae na üng ingkäcai üng mätho hethang Judae mätawngky na lä aedüng ö pyng te vi dy. 23Tukätephüng-a änä-awi ni äpä-ai ma “Äni lä särai dy. Äma tea düng ö ba” näkha näpa hawi te vi.
24Judae mätawngky na la ämi bäjö vai saite khimi bung äbaeni kähyng ea “Säthaw maw-a mitang khü-a thui lawi. Nang mi aevang hai saite khimi lä hunghö sa vi näte kai ce lä mäny dy” näpa.
25Äni ma “Kai lä äni hunghö sa mei näte mäny y. Tungaila kai haetä mäny te awng. Kai lä jangni-a ämi bäjö kha vaihi aevang te mäny kae” näpa.
26Tukha äni ce ma “Äni lä nang tea ätemakä sa mei. Ätemakä sa kha ämi aevang hai te mei” näkha düng pa ö dy.
27Äni ma “Kai ma nang ce tea thui pyng te vi dy. Nang ce lä tängai ö y. Ätephüng-a thai haile hethang ngai te vi mei. Nang ce la äni üng leithung hui hethang ngai ö te by mei” näkha düng pa.
28Äni ce ma äni tea jaw kha “Nang lä äni leithung hui saite vi. Kai ce lä Mosi leithung hui saite na kae. 29Kai ce lä Säthaw ma Mosi tea älo aepe te mäny vi. Tungaila hini khimi lä mani mityng üng ly te mei näte mäteng ma kai ce mäny y” näpa.
30Ämi kangjö vai te khimi ma “Äni lä kai üng ämi aevang hai te vi. Tungaila nang ce lä äni mani mang üng ly mei näte mäny y. Hini lä cangxei hethang hawi bärai na ly. 31Säthaw lä hunghö khimi ce üng aetang te tängai y. Säthaw üng aely kängai sa saite khimi kähawi na üng aetang te ni tängai te kae. 32Aepeng te üng hai ämi kangjö bung ämi aevang hai te lä jangni-a la thai vai y. 33Äni lä Säthaw te mang üng ly te y dylä, äte haetä la sa haw y lyng” näkha näpa.
34Äni ce ma “Nang lä aepeng te üng hai hunghö awng saite khimi kae. Kai ce tea ätemakä angtu thui vawng mei” näkha ämi bäjö vai saite bung lä Judae na üng ingkäcai thung üng mäthoja pa dy.
Muilaw mikangjö
35Isu lä ämi bäjö vai saite bung mätho te angthang thai kha äni hai aeting ea “Nang lä Khimi üng Cäpaw tea yng mei” näkha düng pa.
36Äni ma “Särae ä, Khimi üng Cäpaw, lä Ämi mei. Kai lä Äni tea yng hethang kai tea thui jo” näkha näpa.
37Isu ma “Nang lä Äni bung nung dy. Äni lä vaihi nang hai älo aepe sälö kha awng dy” näkha näpa.
38Ämi kangjö vai ma “Areng ä, kai yng dy cäkae” näkha cäphaw ea thui pa dy.
39Tukha Isu ma “Kai lä älawng tea tärae cei hethang ly te dy. Ämi aevang saite na lä ämi bäjö kha ämi bäjö saite na lä ämi aevang vi ai” näkha näpa.
40Pharisai phütä na ma äni lo thai ea “Kai ce tea lä ämi kangjö näkha thui he ngai te mei” näkha düng pa.
41Isu ma “Nang ce ämi bäjö dylä, hunghö awng y lyng. Vaihi nang ce lä ämi aevang näkha thui te phüng-a, nang ce lä hunghö awng ö te dy” näkha näpa.
Currently Selected:
Johan 9: cekNT
Highlight
Share
Copy
Want to have your highlights saved across all your devices? Sign up or sign in
© 2017, Bible Society of Myanmar and Wycliffe Bible Translators, Inc
