Yoh 10
10
Nkana nkunda mintomba
1Amen, amen, madzo ai mina na: E mod osë anyian ki a mbè efòg mintomba, dzam da, akë bed zen fë, e nyòlò te anë ṅwuwub ai ezilgan. 2E nyò ki anyian a mbè, anë ṅnòni mintomba. 3Mbaala mbè ayaè nyè, mintomba miawog kiṅ dzie, ndò aloe mintomba mie a dzoe, angalëdë miè zen a nsëṅ. 4Eyòṅ amana ya kuli mintomba mie misë a nsëṅ, angawulu miè a osu, mintomba mingabie nyè, amu miayëm kiṅ dzie. 5Miasëki dzam bie ndzin, miatubtub nyè amu miayëm ki kiṅ bëdzin. 6Yesus angavë bò e mvulna nyi, bò të yëm e mam angabë akada bò.
Ma, mënë mbëmbë nnòni
7Yesus angadugan bò kad na: Amen, amen, madzo ai mina na: Ma, mënë mbè mintomba. 8E ba bësë bëngasò ma osu, bënë miṅwuwub ai bizilngan, dzam da, mintomba miandzëki bò wog. 9Ma, mënë mbè. Ngë mod anyian abë ma, ayi kodëban, ndò fë ayi nyii, akuig, ayënë fë mëdiiga. 10Ṅwuwub wazu hë asu yë na wadzib, owoe, ondaman fë. Ma mëngasò asu yë na bëbi enyiṅ, bëbi dzò ntud ntud. 11Ma mënë mbëmbë nnòni. Mbëmbë ṅnòni akab enyiṅ dzie asu mintomba. 12E mod asye hë asu maan, a asëki ṅnòni#10,12-13Yesus anë mbëmbë nnòni. E bod bëvòg babò hë esye mòni., a mintomba miawoge ki ai nyè, ayenë fë mvu afan ezaag, adzoge fò mintomba, atubu, mvu afan ebii miè, emana tsam, 13mbol asye hë mòni, ndò abisi ki e di layenan ai mintomba. 14Ma mënë mbëmbë ṅnòni, ndò mayëm emiama, miè miyëmë fë ma, 15anë tara ayëm ma, ma mëyëmë fë Tara, ndò makab enyiṅ dzama asu mintomba. 16Ndò fë mëbëlë mintomba mifë ya miasëki a efòg dzi. Mayean wulu ai e mili mite, miayi wog kiṅ dzama, ndò miayi bò esamba dzia, ṅnòni mbòg. 17Asu te Tara adiṅ ma, mbol makab enyiṅ dzama, asu yë na mëdugan dzò nòṅ. 18Mod afadi ki ma dzò, dzam da, mamen makab dzò, mëbëlë fë ngul ya adugan dzò nòṅ. Mënganòṅ e mvende nyili abë Tara. 19Yuden bëdugan kaban ngam ngam etòm e bibug bi. 20Abui ya ete bëdzoo na: Anë ai mbë nsisim, ndò fë asòg. Dze miavogolo nyè? 21Bëfë bò na: e bibug bi biasëki ebi bi e mod abële mbë nsisim. Yë mbë nsisim onë dzam yaè ndindim mis?
Yuden batimi Yesus
22Ndò abog afubu-lë-tempel#10,22A mbu 164 osusua abyali Yesus, ndò Yudas Makkabeus angafubu tempel, a mvus yë na nkukuma haiden Antiokus Epifanes angazu ai nyè eboe a nyòl, mbol angatele evëgëlë zamba bëhaiden etere. Atarigi mbu te, Yuden bëngadzëme abog afubu-lë tempel. angabò a Yerusalem, a abog oyon, 23Yesus angakë awulu a tempel, mfag ya minkum mi Salomon#10,23Minkum mi Salomon mingabë minkum ya nsëṅ tempel. (Yënë afëb ). 24Yuden bëloṅo nyè edinga a nyòl, bò ai nyè na: Wayi bia këlë minnëm a yob akëlë kui ve? Ngë wa onë Kristus, kada bia a kpaam. 25Yesus nyè ai bò na: Mëkad ya mina, mina të yëbë. E mimboan mabò a dzoe Tara mmiè miabòòlò ma. 26Ndò mina miayëbë ki, amu miasëki a ekòg mintomba miama. 27Mintomba miama miawog kiṅ dzama; mayëm miè, ndò fë miabie ma, 28ndò fë mavë miè enyiṅ kòm; miayi ki dzaṅ a ekòg tò eyòṅ, ndò fë mod ziṅan gâfadi ki ma miè a mò. 29E Tara angavë ma, alod bësë, ndò mod ziṅ asëki dzam fadi a mò më Tara. 30Bia Tara binë dzom dzia. 31Ndò Yuden badugan nòṅ ngòg na balum nyè. 32Yesus nyè ai bò na: Maalëdë mina abui mimbëmbë mimboan ya abë Tara. Mialum ma ngòg asu mboan mbe ya ete? 33Yuden bò ai nyè na: Së ki asu mbëmbë mboan ngò bialum wa ngòg, dzam da, asu ebyandi, mbol ya na, wa ha, otoa të mod, ongadzo na onë Zamba. 34Yesus nyè ai bò na: Asë ntilan a mvende dzaan na: Mëngadzo na: Minë bëzamba a? 35Ngë Zamba adzo ai e bod angakad ebug dzie na bënë bëzamba -Mfufub Ntilan wa wasole hm ki- 36e nyò ya Tara angafubu, alomo a si, mina miadzo na: «Onë ebyandi», mbol mëdzo na: «Mënë mòn Zamba» nga? 37Ngë mabò ki mimboan mi Tara, mibë ma yëbë. 38Ngë mabò hm miè, tò mibò ma të yëbë, yëbëgan mimboan, asu yë na miyen, miyëm fë na Tara anë abë ma, ma fë abë Tara. 39Bëngadugan dzëṅ na babi nyè, ndò angasòdan bò a mò. 40Ndò adugan kui a Yordan ayat, e hom Yohannes angabë aduu bod osusua, atòbò hala. 41Abui bod asòò abë nyè, bò na: Yohannes andzëki bò tò ndëm dzia, dzam da e mam mësë Yohannes angadzo mëtyan ai nyè mënë ete. 42Ndò abui bod bëngayëbë nyè ete.
Currently Selected:
Yoh 10: NTE12
Highlight
Share
Copy
Want to have your highlights saved across all your devices? Sign up or sign in
MKPAMAṄ AMVOE Nouveau Testament en langue Ewondo © Bible Society of Cameroon, 2012.
