Mt 16

Bod basili ndëm

Mk 8,11-13

1Ndò bëfarisea ai bësadukea bëngazu na bazu nyè bobolo, bò na alëdë bò ndëm esòò a yob. 2Ndò angayalan bò na: A abog ngoge evin ya, miakad dzo na, yob anë angumaa, amos waanyëb. 3Kikidigi, mina na mvëṅ yayi nòṅ mbol yob lavin. Ndò hm, miayëm fòmbò yob, tègè yëm fòmbò ndëm zuli mëtiṅ. 4E mvòṅ bod ebamba ai mvol nyi yasili ndëm! Ndëm fë dzò yangâvëban ki mina së na e nyi Yonas. Ndò angalig bò, akodo hala.

Ozëzaṅ mbaṅëla bëfarisea ai bësadukea

Mk 8,14-21

5Ndò bëyègè bëngasò a kindig, bëvoan nòṅ bëmbaṅëla. 6Yesus nyè ai bò na: Boan okala, misaala ozëzaṅ mbaṅëla bëfarisea ai bësadukea. 7Bëngakë balaṅëdan bò bò ha, bò na: Biandzëki nòṅ bëmbaṅëla. 8Yesus ayëmë të nala, nyè na: Dze mialaṅëdan a minnëm mian, a e bod minë tègè ai abui ṅyëbë ba, na miandzëki nòṅ bëmbaṅëla? 9Miabë ki wog, ndò fë miatsog ki e bëmbaṅëla bëtan asu bod bakuda bëtan! Minganòṅ minkun miam? 10Ngë ki bëmbaṅëla zamgbal asu bakuda bëtan, taṅ minkun fe minganòṅ? 11Asu dze miawog ki na mëhë kad ki mina adzo bëmbaṅëla? Misaala ozëzaṅ mbaṅëla bëfarisea ai bësadukea. 12Ndò hm bazu wog na angabë ki adzoo na bësaala ozëza mbaṅëla, dzam da, na bësaala ayëgëlë bëfarisea ai bësadukea.

Petrus amëm na Yesus anë Kristus, mòn Zamba

Lk 9,18-21

13Ndò Yesus angasò a nkòd nnam Sezarea ya Filipi, ndò asili bëyègè boe na: Bod badzo na Mòn Mod anë za? 14Bò na: Bëvòg badzo na Yohannes Ndu-Bodo, bëvòg bò na Elias, bëfë ki bò na Yeremias ngë ki na profet#16,14E Messias ya Yuden bëyanga angabë yean bò esye profèt. mbòg ziṅ. 15Nyè ai bò na: Mina bëben ki miadzo na mënë za? 16Ndò Simun Petrus angayalan nyè na: Onë Kristus, mòn e Zamba avëë. 17Yesus nyè ai nyè na: Onë mvòm, a Simun, man Yonas, amu së ki minson ai mëki mbiè bikulan wa adzo te, hë e Tara y'anë a yob. 18Ndò makad wa na: Onë Petrus#16,18Ebug Petra a nkòbò Grek yatyan na «Akoa»., ndò mayi loṅ nda dzama a akòg te a yob. Ngul mimbè ya tolendoṅ yangâtègè ki dzò. 19Mayi wa vë bidibiga y'ayòṅ ya yob, ndò e dzi esë ongâtindi a si engâtindëban a yob, e dzi ki ongâtii a si, engâtiiban a yob. 20Ndò fë azu bende bëyègè boe na të bakad tò mod ziṅ na ṅnyè anë Kristus.

Yesus akad na bayi nyè woe, akui fë a sòṅ

Mk 8,31-33; Lk 9,22

21Akaègi abog te, ndò Yesus angakèè na alëdë bëyègè boe mbol ayean kë a Yerusalem, abëlë abui mintye a mò bënyia-bod-mvia bë nnam, ai bëfada bënen, ai bësaṅa bëkalara, bëwoe nyè, abog te ayi kui a sòṅ a amos lala. 22Ndò Petrus angakë ai nyè a fëfël, angakòṅan ai nyè, nyè na: Sòṅ, a Nti! Akyaè dzam te të toban ai wa! 23Ndò angavëṅan, nyè ai Petrus na: Kodogo ma a zen, a Satan#16,23Satan: Ebug te yatyan na, e mod ya anë ma a ngam ya ayat, nziziṅ wama. Ndò hm Satan angavëṅan e mod adaṅ aluman ai Zamba., wayè ma zen. Amu wawog ki mam më Zamba, e ma më bod mmò wawog. 24Eyòṅ te Yesus azu dzo ai bëyègè boe na: Ngë mod ayi na azu abie ma, asiege nyè emen, anòṅ klos dzie, azu abie ma. 25E mod ayi na akaman ai enyiṅ dzie, ayi dzò dzèè. E nyò ki adzèè enyiṅ dzie asu dama, ayi dzò bi. 26Anë ai mfi dze na mod ahaman si esë, ngë adzèè enyiṅ dzie? Eban efe ki mod anë dzam vë asu enyiṅ dzie? 27Mòn Mod ayi sò a duma esya ai bënglès boe, abog te ayi yaan ai mod osë anë mbol mod angasye. 28Makad mina bëbëla na bod bëziṅ bëtëtëlan va, a bëngâyen ki awu, së na bëyen anë Mòn Mod azu a edzoe dzie.

Currently Selected:

Mt 16: NTE12

Highlight

Copy