Mk 11

Yesus anyian a Yerusalem ai duma

Mt 21,1-11; Lk 19,28-40; Yoh 12,12-19

1Eyòṅ bëngakui babi ai Yerusalem, a Betfage ai Betania, a nkol bile bi mbòn, ndò alom bëyègè boe bëbè, 2nyè ai bò na: Kaṅan e dzal anë mina osu dili; eyòṅ miayi kui ete, miayi yen ozele atii, mod ziṅ abë ya ki nyè bed a yob. Tian nyè, mizu ai nyè. 3Ngë bësili mina na: Dze miabò dzili? Yalan na: Nti woe ayaṅan ai nyè, ndò fë ayi nyè dugan lom mu. 4Ndò bëngakë, bëkòbò ozele atii babi ai mbè a nsëṅ, a mgbag ndzòṅ, ndò batii nyè. 5Ndò bod bëziṅ bëmbë tëlë hala badzo ai bò na: A ya miatii ozele? 6Ndò bayalan bò anë Yesus angadzo, bëdzoge bò. 7Ndò bakë ai ozele abë Yesus, bëmana nyè bede biwòman biaban a nyòl, Yesus atòbò nyè a yob. 8Abui bod bëngatè biwòman biaban a ndzòṅ, bëvòg bëbugu mëbui bile ya mëfub. 9E bod bëkëlë nyè osu ai e ba bëzaa nyè a mvus bëngabede kiṅ na: Osanna. Maa ai e nyò azu a dzoe Nti #11,9Bs 118,25-26. 10Olugu ai edzoe tara waan David yazu bia a zen. Osanna a yob ete. 11Ndò anyian a Yerusalem, anyian a tempel, angakë a fëb dzom esë; ngoge engayi vin, ndò akë a Betania, ai b'awom ai bëbè.

Yesus ayòg ele bibuma

Mt 21,18-19

12E kidi lende ya hala, bëkodogo a Betania, ndò zie yakòn nyè. 13Ndò ayen ele bibuma ebëlë abui kye etëlë man ntye, angakë, adzo na ayi të kòb ebuma ete. Ndò akë, tègè kòb tò dzom, hë kye. Abog te dò lëngabë ki abog bibuma. 14Ndò adzo ai ele na: Mod angâbad ki di ebuma dzoe tò eyòṅ. Bëyègè boe bëwogo.

Yesus atsidan bëkuan biyëm a tempel

Mt 21,12-17; Lk 19,45-48; Yoh 2,13-22

15Ndò bazu a Yerusalem. Ndò anyian a tempel, akèè na atsam e bod bëkuan ai e ba bëkusu byem a tempel, akubu bëtëbëlë b'e bod bëtsendëge mòni ai e ba b'e bod bëkuan ai abëṅ asi, 16të dzoge na tò mod abëgë dzom a mò a tempel. 17Angayëgëlë bò, nyè na: Asë ntilan na: Bayi loe nda dzama na nda ngogëlan asu mëyòṅ mësë#11,17Is 56,7 a? Mina mibò ya dzò etòbògò bizilngan! 18Ndò bëfada bënen ai bësaṅa bëkalara bëngawog, bëngadzëṅ mbol bënë nyè dzam dzèè. Amu bëmbarëga nyè, asu bod bësë bëkama ayëgëlë die. 19Abog ngoge engavin, ndò bëngakodo a tisòn.

Ele bibuma emana ya kot

Mt 21,20-22

20A bëkëlë bawulu ai ndib kidi, bëntala ele bibuma emana ya kod, akègè a minkaṅ. 21Ndò Petrus adugan tsog, nyè ai nyè na: Rabbi, yënë, ele ya wayòg emana ya kod. 22Yesus nyè ai bò na: Bëlëgan ṅyëbë abë Zamba#11,22Yesus ayëgëlë na Zamba awog ngogëlan kòm esë, dzam da mod ayean bi ṅyëbë, abëlë ediṅ, adzu babënyaṅ.. 23Makad mina bëbëla na, e mod andzo ai nkol vi na: Famëṅi, okë diban a maṅ, tègè soan a nnëm woe, hë ayëbëgë na e dzam akòbò layi bòban, nala wayi yenan ai nyè. 24Asu te makad mina na: E dzi esë miayi dzaè a ngogëlan, yëbëgan na mibi ya dzò; miayi dzò bëlë. 25Eyòṅ miakogëlan, dzuan e mod mibëlë ai nyè olun, asu yë na esya waan ya yob adzu mina minsëm mian.#11,2526 Ngë mindzëki dzu, esya waan ya yob ayi ki mina dzu bivus bian.

E ngul nyi yasò Yesus ve?

Mt 21,23-27; Lk 20,1-8

27Ndò badugan zu a Yerusalem. Akëlë awulu a tempel ha, ndò bëfada bënen ai bësaṅa bëkalara ai mvindi bod ya nnam bazu toban ai nyè, 28bò ai nyè na: e ngul wabò e mam ma yasò wa ve? Za ki angavë wa e ngul nyi na obò e mvòṅ mam nyi? 29Yesus nyè ai bò na: Mayi mina sili ebug dzia; ngë miyalan ma, ma mëkada mina e ngul mabò e mam ma ai dzò. 30Ṅduan Yohannes ongabë osò ve, yë a yob, yë a bod? Yalan ma! 31Bëngalaṅëdan bò bò, bò na, ngë biadzo na: Ombë sòṅ a yob, ayi bia sili na: Asu dze miandzëki nyè yëbë? 32Yë bikë a hm ki dzo na ombë sòṅ a bod? Bëngambara nkunda bod, amu abui bëngabë bëdzoo na Yohannes anë mfaṅ profet. 33Ndò bayalan Yesus na: Biayëm ki. Ndò hm Yesus nyè adzo ai bò na: Ma makad hm ki mina e ngul mabò e mam ma ete!

Currently Selected:

Mk 11: NTE12

Highlight

Copy