Mk 14

Babui mëfëg na bawoe Yesus

Mt 26,1-5; Lk 22,1-2; Yoh 11,45-53

1Hala Paska#14,1 Abog Paska angabë na Yuden badugan tsog mbol ya bëngabole a Egipten, Zamba awulugu ai bò. ai abog mbaṅëla të ai saṅ bitoa mëlu mëbè. Ndò bëfada bënen ai bësaṅa bëkalara bëngadzëṅ mbol bënë dzam bi Yesus a mëkëṅ, bëwoe nyè. 2Amu bëdzoo na: Së hm ki a abog ete mu, enyënyam eza bò a zaṅ bod.

Mininga awòbò Yesus mbòn a Betania

Mt 26,6-13; Yoh 12,1-8

3Ndò hm, atoa a Betania, a nda Simun man nzëzam, atoa na adi, ndò mininga ziṅan gasò, abëlë ndëg mbòn alabinda, otoa mfaṅ ai dia, ndò aboe e ndëg nyi, angasoe nyè wò a nlo. 4Bod bëziṅ bëngalaṅëdan a minnëm ha na: A dze hm fò abim endaman alabinda di? 5Amu bëhë bë dzam kuan ai mbòn hi alodo minsaṅ mi mòni mintèd milè, bëvëë mimbubua. Bëngasòg nyè. 6Ndò Yesus adzo na: Dzogan nyè. Dze miayi ai nyè abe? Abò ma mbëmbë esye. 7Amu mimbubua minë ai mina kòm esë, ndò minë bò dzam bò mbëṅ abog asë, mfa wama, masëki ai mina kòm esë. 8Abò abim ahë bëlë ngul. Atari ma waba mbòn a nyòl asu edzëb-mbim dzama. 9Makad mina bëbëla na, e hom osë bëngâbende mbëmbë foe a si esë, e dzam e mininga nyò abò layi lèèban, bëtsogo nyè.

Yudas ayëbë na akuan ai Yesus

Mt 26,14-16; Lk 22,3-6

10Ndò Yudas Iskariot, mbòg ya b'awom ai bëbè, angakë a bëfada bënen asu yë na akuan ai bò nyè. 11A bëngawog nala, bëngasan ai mintag, ndò bakag nyè na bayi nyè vë mòni.

Yesus adi Paska ai bëyègè boe

Mt 26,17-25; Lk 22,7-14.21-23; Yoh 13,21-30

12Ndò, amos osu ya abog mbaṅëla të ai saṅ, abog bakad tuni Paska, ndò bëyègè boe badzo ai nyè na: Wayi na bikë wa komëzan e hom wadi Paska ve? 13Ndò alom bëyègè boe bëbè, nyè ai bò na: Kaṅan a tisòn, miayi toban ai fam#14,13 Bininga mbò bëkarëga bëgë mëndim, asu te eyòṅ fam yabëgë mëndim, mod osë avol dò yen. ebëgë emvaṅ mëndim: Biegan nyè, 14e hom ayi nyian, mikad mod nda ya ete na: ṅyëgëlë asili na: Eyë etun-nda bëyëṅ#14,14 Mbol abui bod bëkarëga sòṅ a Yerusalem a abog Paska, bod bë dzal bëngakomëzan bitun bi nda asu yë na bëyëṅ bëdi Paska ete. dzama mayi di Paska ai bëyègè bama enë ve? 15Abog te ayi mina lëdë mod etun-nda a nda-yob atoa nkoman. Eyë komëzan bia abog ete. 16Ndò bëyègè bëngakë, bënyian a tisòn, bëkòbò anë angakad bò, bëkomëzan Paska. 17Eyòṅ ngoge engavin, ndò azu ai b'awom ai bëbè. 18Ndò bayëm bitoa, bëngadi, ndò Yesus adzo na: Makad mina bëbëla na mod mbòg ya abë mina ya adi ai ma, ayi kuan ai ma. 19Bëntoa mëlunga, bëngakë basilan bò bò ha na: Yë ma ana nga? 20Ndò akad bò na: Mbòg ya b'awom bëbè, a ayi du ai ma wò a esoa eyòṅ. 21Amu mòn mod akë fò anë bëngatil asu die, hë dzam da, amala ai e mod mòn mod akuan a mò moe! Lëntoa mbëṅ asu die ngë mod te abò të byali.

Yesus atye bidi bi ngoge (Mfufub Mès)

Mt 26,26-30; Lk 22,15-20; 1Kor 11,23-25

22A bëdzaa ha, ndò anòṅ mbaṅëla, avëë ngaṅ, abëgë, akalan bò, nyè na: Nòṅan, e dzi enë nyòl dzama. 23Ndò fë anòṅ kòb, avëë ngaṅ, akalan bò, ndò bësë bënganyu ete. 24Ndò adzo ai bò na: E dzi enë mëki mama ya mkpamaṅ elad, mayi soeban asu abui bod. 25Makad mina bëbëla na mayi ki bad nyu ebuma ya ndig wayn akëlë kui amos ya mayi nyu mkpamaṅ wayn a ayòṅ Zamba. 26Ndò bëngayia bia bi oyëṅ#14,26 Yënë afëb 82 (Mt 26,30), bëkui, bëkëlë a nkol bile bi mbòn.

Petrus ayi sie Yesus

Mt 26,31-35; Lk 22,31-34; Yoh 13,36-38

27Ndò Yesus adzo ai bò na: Bod bësë bayi ma wog osòn, amu anë ntilan na: Mayi bimi nnòni, mintomba misë mimana tsaman#14,27 Za 13,7. 28Dzam da, a mvus yë na mëkui ya sòṅ, mayi mina kë osu a Galilea. 29Ndò Petrus adzo ai nyè na: Tò fò bod bësë bëwog wa osòn, mfa wama, tègè ai nala. 30Ndò Yesus adzo ai nyè na: Makad wa bëbëla na, e wamen nyò, alu ben di, osusua yë na nnom kub alòṅ biyòṅ bibè, wayi ma sie biyòṅ bilè. 31Hë nyè afëdan dzo na: Tò mayean wu ai wa, mangasie ki wa. Bò bësë bëngakòbò hë dzam dëda.

Yesus akogëlan a Getsemani

Mt 26,36-46; Lk 22,39-46

32Ndò bakë a mod afub atoa dzoe na Getsemani, ndò adzo ai bëyègè boe na: Tòbëgan ha, ntye makë kogëlan. 33Ndò anòṅ Petrus ai Yakob ai Yohannes, akèè na asaṅan eyëgan, ai mëlunga abui, 34ndò adzo ai bò na: Nnëm wama onë a mëlunga akui a awu. Tòbëgan ha, bibò evie. 35Ndò akë osu man ntye, akuu a si, angakogëlan na, ngë anë ebugbu awola te asaala nyè, 36angadzo na: Abba, a Tara, onë bò mesë. Vaagi ma e kòb nyi, dzam da sëki anë mbol mayi, abòò anë mbol wayi. 37Ndò azu bò koe bëkëlë oyò, nyè ai Petrus na: A Simun, dze yë wakë oyò? Wandzëki bi ngul ya atòbò evie tò hë awola da nga? 38Tòbëgan evie, mikogëlan, asu yë na të miaku a mëbobëla; amu nsisim onë ngul, nyòl etoa ntëgan. 39Ndò adugan kë, angakogëlan hë dzam dëda. 40Ndò adugan bò sòṅ koe bëkëlë oyò, amu mis mëngabë bò adid, bò ha të yëm e dzam bakad nyè. 41Ndò akë eyòṅ lala, nyè ai bò na: Kaṅan oyò eyòṅ dzili, miwaè: Nala wayean. Awola asò ya, yënan sik, mòn mod azu kuan a mò bësëm. 42Tëbëgan, nkaṅan. E mod akuan ai ma nyòlò azu.

Bazu bi Yesus

Mt 26,47-56; Lk 22,47-53; Yoh 18,3-12

43Angënë akòbògò nala, ndò Yudas (mbòg ya b'awom ai bëbè) asò, anë ha ai nkunda bod ya bëfada bënen ai bësaṅa bëkalara ai bënyia-bod-mvia bëngalom, bëbëlë bënyamëla, ai këg. 44E mod akuan ai nyè angakui ai bò kiṅ na: E mod mayi wuban ai nyè, ṅnyè nyòlò, bian nyè, mitoan kë ai nyè. 45Ndò asubu nyè babi, nyè ai nyè na: Rabbi, awuban ai nyè. 46Ndò e bod ba bafudi nyè mò a nyòl, bëbii nyè. 47Mod mbòg ya e ba bëngabë bëtëlë hala atye fò nyamëla, abaa man olò fada nen, atsigi nyè alò. 48Ndò Yesus adzo ai bò na: Dze yë misò ma bi anë ezilgan, ai akëṅ, ai këg nga? 49Mëngabë ai mina amos osë a tempel, mëyëgëlë, mina tègè ma bi. Abòban nala, asu yë na ntilan odzalëban. 50Ndò bëngalig nyè, bò bësë bëmana tub. 51Man ndoman ziṅ#14,51 Abui bod badzo na e ndoman mod nyi enë e Markus angatil Mbëmbë Foe nyò. azaa atoṅ nyè hala, abëgë sanda a angëdëg, ndò babi nyè. 52Ndò angalig sanda atubu nsò.

Bakë ai Yesus a ekoan nnam

Mt 26,57-68; Lk 22,54-55.63-71; Yoh 18,13-14.19-24

53Ndò bakë ai Yesus abë fada nen, ndò bëfada bënen bësë ai bënyia-bod-mvia ai bësaṅa bëkalara bakoan. 54Petrus azu abye nyè ha man ntye, akui a nsëṅ abaa fada nen, ndò atòbò a si ha ai bod bisye, angawòbò ndoan. 55Bëfada bënen ai ekoan nnam bëngadzëṅ akalëga abë Yesus asu yë na bëwoe nyè, hë da, të yen. 56Amu abui bëzaa nyè tsig mbë mvaa, dzam da mbòlan waban të toban kiṅ. 57Ndò bod bëziṅ bëngatëbë hala, bëngatsig nyè mbë mvaa, bò na: 58Bingawog e mod nyò adzo na: Mënë dzam bug e tempel anë nloṅan ai mò më bod nyò, mëdugan loṅ mfë, së a ki ai mò më bod, a mvus mëlu mëlè, 59dzam da tò mbòòlan waban te të toban. 60Ndò fada nen angatëbë a ezezaṅ, ndò asili Yesus na: Wafèd ki e mësòman ma nga? 61Nyè hë evol, të yalan tò dzom. Ndò fada nen adugan nyè sili na: Yë wa onë Kristus, mòn e nyò anë ai olugu#14,61 E nyò anë ai olugu: Dzoe Zamba. 62Yesus nyè na: Owe, ndò fë miayi yen mòn mod atoa a mbo-nnomo ngul, azaa fë a minkut a yob#14,62 Bs 110,1. Da 7,13. 63Ndò fada nen angatonde biwòman bie nyè na: Dze fë bingëne yaṅan ai bësòman? 64Miwog ebyandi! Miayen dò ya? Bò bësë bëngatsig na ayean ai awu. 65Ndò bëvòg bëziṅ batari na batui nyè mëtè bëbudigi nyè asu, bëbimiṅi nyè, bò na: Bò mvigi; Tò bod bisye bëbimiṅi nyè a mëmaṅ.

Petrus asie na ayëm ki Yesus

Mt 26,69-75; Lk 22,56-62; Yoh 18,15-18.25-27

66Petrus atoa osinkiè abaa ha, ndò man mininga ziṅ, mbò bisye fada nen asò 67ndò ayen Petrus awòbògò ndoan, ndò atoan nyè bëbë, nyè na: Wa wazu ya fë watòbò ai Yesus man Nazaret. 68Ndò asie na: Mayëm ki, ndò fë mawog wog ki e dzam wadzo. Ndò akë osu efas ya nsëṅ, ndò nnom kub alòṅ. 69Ndò man mininga ayen nyè, adugan kèè na akad e bod bëmbë tëlë hala na: E mod nyò anë mbòg ya abë bò. 70Hë nyè asiege. Eban të kog, ndò e bod bëmbë tëlë hala badzo ai Petrus na: Onë fò mbòg ya abë bò totoe, amu onë man Galilea. 71Ndò akèè na akag, akanëṅi sòṅ nyè na: Mayëm ki e mod miadzo nyòlò. 72Etye etye te, ndò nnom kub alòṅ eyòṅ bèè. Petrus adugan tsog ebug ya Yesus angadzo ai nyè na: Osusua yë na nnom kub alòṅ biyòṅ bibè, wayi ma sie biyòṅ bilè. Atsogo angatsog dò, aboe yon.

Currently Selected:

Mk 14: NTE12

Highlight

Copy